ಬೆಳಕಾಗೋ ಹೊತ್ತಲ್ಲೇ ಆವರಿಸಿತು ಅಪಘಾತ ಕತ್ತಲು..!

ಸಿಮೆಂಟ್​ ಬಲ್ಕರ್​ಗೆ ಟಾಟಾ ಸುಮೋ ಡಿಕ್ಕಿ; 13 ಜನ ಸಾವು!

ಮೃತರ ಕುಟುಂಬಕ್ಕೆ ತಲಾ 2 ಲಕ್ಷ ಪರಿಹಾರ ಘೋಷಣೆ

ಚಿಕ್ಕಬಳ್ಳಾಪುರ: ಇವತ್ತು ಬೆಳ್ಳಂಬೆಳಗ್ಗೆ ನಡೆದ ಭೀಕರ ಅಪಘಾತವೊಂದು ಚಿಕ್ಕಬಳ್ಳಾಪುರದ ಜನರನ್ನ ಬೆಚ್ಚಿ ಬೀಳಿಸಿಬಿಟ್ಟಿದೆ. ಸದಾ ವಾಹನಗಳು ಓಡಾಡ್ತಿದ್ದ ರಸ್ತೆಯಲ್ಲಿ ಶವಗಳ ಸಾಲು.. ರಕ್ತದೋಕುಳಿ.. ಮುಂಜಾನೆ ಮಂಜಲ್ಲಿ ತಮ್​ ತಮ್ಮ ಕೆಲಸಕ್ಕೆ ಹೊರಟಿದ್ದವರು ಸೇರಿದ್ದು.. ಮಸಣದ ಮನೆಯನ್ನ.

ಇನ್ನು, ಚಿಕ್ಕಬಳ್ಳಾಪುರ ನಗರ ಹೊರವಲಯದ ಚಿತ್ರಾವತಿ ಬಳಿಯ ರಾಷ್ಟ್ರೀಯ ಹೆದ್ದಾರಿ 44 ರಲ್ಲಿ ಟಾಟಾ ಸುಮೋ ವಾಹನ ನಿಂತಿದ್ದ ಸಿಮೆಂಟ್ ಬಲ್ಕರ್​ಗೆ ಡಿಕ್ಕಿ ಹೊಡೆದಿದೆ. ಪರಿಣಾಮ ಟಾಟಾ ಸುಮೋದಲ್ಲಿದ್ದ 13 ಮಂದಿ ಸಾಲು ಸಾಲಾಗಿ ಸಾವಿನ ಮನೆ ಸೇರಿದ್ದಾರೆ.

ಬೆಳ್ಳಗ್ಗೆ 7 ಗಂಟೆ ಸುಮಾರಿಗೆ ಹೈವೇ ಮೂಲಕ ಸುಮೋ ಬರ್ತಿತ್ತು. ಈ ವೇಳೆ ದಟ್ಟ ಮಂಜು ಆವರಿಸಿದ್ದರಿಂದ ಚಾಲಕನಿಗೆ ದಾರಿ ಕಾಣಿಸದೇ ಸೈಡಲ್ಲಿ ನಿಂತಿದ್ದ ಸಿಮೆಂಟ್​ ಬಲ್ಕರ್​ಗೆ ಸುಮೋ ಡಿಕ್ಕಿ ಹೊಡೆದಿದೆ. ಅಪಘಾತದ ತೀವ್ರತೆ ಹೇಗಿತ್ತು ಅಂದ್ರೆ ಸುಮೋದ ಮುಂಭಾಗ ಸಂಪೂರ್ಣ ನಜ್ಜುಗುಜ್ಜಾಗಿದೆ.

ಘಟನೆ ಚಿಕ್ಕಬಳ್ಳಾಪುರ ಗ್ರಾಮಾಂತರ ಸಂಚಾರಿ ಪೊಲೀಸ್​​ ಠಾಣೆಯ ಕೂಗಳತೆಯಲ್ಲೇ ನಡೆದಿದ್ದು, ಪೊಲೀಸರು ಸ್ಥಳಕ್ಕೆ ಬಂದು ಮೃತದೇಹಗಳನ್ನ ಸ್ಥಳೀಯ ಆಸ್ಪತ್ರೆಗೆ ಶಿಫ್ಟ್​ ಮಾಡಿದ್ರು. ಆಸ್ಪತ್ರೆಗೆ ಎಸ್​ಪಿ ಹಾಗೂ ಚಿಕ್ಕಬಳ್ಳಾಪುರ ಶಾಸಕ ಪ್ರದೀಪ್​ ಈಶ್ವರ್​ ಭೇಟಿ ಕೊಟ್ಟು ಕುಟುಂಬಸ್ಥರಿಗೆ ಸಾಂತ್ವನ ಹೇಳಿದ್ರು.

ತಲಾ 2 ಲಕ್ಷ ಪರಿಹಾರ ಘೋಷಣೆ

ಮೃತರ ಕುಟುಂಬಕ್ಕೆ ಸರ್ಕಾರದಿಂದ ತಲಾ 2 ಲಕ್ಷ ಪರಿಹಾರವನ್ನೂ ಘೋಷಿಸಲಾಗಿದೆ. ಆಂಧ್ರ ಪ್ರದೇಶದಿಂದ ಬಾಡಿಗೆ ಮೂಲಕ ಜನರನ್ನ ಬೆಂಗಳೂರಿಗೆ ಕರೆ ತರ್ತಿದ್ದ ಟಾಟಾಸುಮೋ ಚಾಲಕ ನಿನ್ನೆ ರಾತ್ರಿಯೇ ಒಂದು ಟ್ರಿಪ್ ಜನರನ್ನ ಬಿಟ್ಟು ಮತ್ತೊಂದು ಟ್ರಿಪ್ ಮೂಲಕ ಜನರನ್ನ ಕರೆತರುತ್ತಿದ್ದ ಎನ್ನಲಾಗ್ತಿದೆ. ಬೆಳಗ್ಗೆ 5 ಗಂಟೆಗೆ ಹೊರಟಿದ್ದ ಸುಮೋ 7 ಗಂಟೆ ಸುಮಾರಿಗೆ ಅಪಘಾತಕ್ಕೀಡಾಗಿದೆ. ಇನ್ನೂ ಈ ಅಪಘಾತಕ್ಕೆ ಡ್ರೈವರ್​ನ ಅತಿ ವೇಗದ ಜೊತೆಗೆ ಮಂಜು ಕವಿದಿದ್ದೇ ಕಾರಣ ಎನ್ನಲಾಗ್ತಿದೆ. ಜೊತೆಗೆ ಬಸ್​​ಗಳ ಸರಿಯಾದ ವ್ಯವಸ್ಥೆ ಇಲ್ಲದೇ ಇರೋದು ಒಂದು ಕಾರಣ ಅಂತ ಕುಟುಂಬಸ್ಥರು ಹೇಳ್ತಿದ್ದಾರೆ. ಅದೇನೇ ಇರ್ಲಿ ತಮ್​ ತಮ್ಮ ಕೆಲಸಕ್ಕೆ ಹೋಗೋಣ ಅಂತ ಹೊರಟಿದ್ದ ಈ 13 ಜನರು ಬಾರದ ಲೋಕಕ್ಕೆ ಪಯಣ ಬೆಳಸಿದ್ದು ನಿಜಕ್ಕೂ ದುರಂತ.

ವಿಶೇಷ ಸೂಚನೆ: ಎಲ್ಲಾ DTH & Cableನಲ್ಲಿ ನ್ಯೂಸ್​ಫಸ್ಟ್​ ಚಾನೆಲ್​​​ ಲಭ್ಯ