9ನೇ ತರಗತಿ ಟೆಕ್ಸ್ಟ್​ ಬಕ್​ನಲ್ಲಿ ಏರ್​ಸ್ಟ್ರೈಕ್​ ಹಾಗೂ ಅಭಿನಂದನ್​ ಸಾಹಸದ ಪಾಠ

ಜೈಪುರ: ಬಾಲಾಕೋಟ್​ನಲ್ಲಿ ಏರ್​ಸ್ಟ್ರೈಕ್​ ನಡೆಸಿ ಉಗ್ರರ ಸಂಹಾರ ಮಾಡಿದ ವಾಯುಸೇನೆಯ ಸಾಧನೆಯನ್ನು ರಾಜಸ್ಥಾನ ಸರ್ಕಾರ 9ನೇ ತರಗತಿಯ ಪಠ್ಯಪುಸ್ತಕದಲ್ಲಿ ಪಾಠವಾಗಿಸಿದೆ. ಜೊತೆಗೆ ಪಾಕಿಸ್ತಾನದ ಎಫ್​-16 ಹೊಡೆದುರುಳಿಸಿ, ಪಾಕ್​ ನೆಲದಲ್ಲೇ ವೀರತ್ವ ಪ್ರದರ್ಶಿಸಿದ್ದ ವಿಂಗ್ ಕಮಾಂಡರ್​ ಅಭಿನಂದನ್​ ಸಾಧನೆಯನ್ನೂ ಸಮಾಜ ಪುಸ್ತಕದಲ್ಲಿ ಉಲ್ಲೇಖಿಸಲಾಗಿದೆ. ಪಾಕ್​ ಪುಂಡಾಟಕ್ಕೆ ಪ್ರತಿಕ್ರಿಯಿಸಲು ವಾಯುಸೇನೆ ತನ್ನ ‘ಬ್ರೇವ್​ ಹಾರ್ಟ್’ ಅಭಿನಂದನ್​ಗೆ ಸೂಚಿಸಿತ್ತು. ತಾನಿದ್ದ ವಿಮಾನಕ್ಕಿಂತ ಬಲಶಾಲಿಯಾಗಿದ್ದ ವಿಮಾನವನ್ನು ಹೊಡೆದುರುಳಿಸಿದ ಅಭಿನಂದನ್​ ಶ್ರೇಷ್ಠತೆ ಪ್ರದರ್ಶಿಸಿದರು ಅಂತಾ ಪುಸ್ತಕದಲ್ಲಿ ಉಲ್ಲೇಖವಾಗಿದೆ.

Download the Newsfirstlive app

ಏರ್​ಸ್ಟ್ರೈಕ್​ ಹಾಗೂ ಅಭಿನಂದನ್​ ಬಗ್ಗೆ ಬರೆಯಲಾಗಿರುವ ಗದ್ಯಕ್ಕೆ ಯಾವುದೇ ಹೆಡ್​ಲೈನ್​ ನೀಡಲಾಗಿಲ್ಲ. ಬದಲಿಗೆ ‘ರಾಷ್ಟ್ರೀಯ ಭದ್ರತೆ ಮತ್ತು ಶೌರ್ಯ ಸಂಪ್ರದಾಯ’ ಎಂಬ ಗದ್ಯಪಾಠದಲ್ಲಿ ಈ ಸಾಧನೆಗಳ ಬಗ್ಗೆ ಉಲ್ಲೇಖಿಸಲಾಗಿದೆ. ಏರ್​ಸ್ಟ್ರೈಕ್​ನಲ್ಲಿ ಎಷ್ಟು ಉಗ್ರರು ಸತ್ತರು ಎಂಬ ಬಗ್ಗೆ ಪುಸ್ತಕದಲ್ಲಿ ದಾಖಲಿಸಿಲ್ಲ.
ಇನ್ನೊಂದು ವಿಚಾರವೇನೆಂದ್ರೆ, ಆರಂಭದಲ್ಲಿ ಏರ್​ಸ್ಟ್ರೈಕ್ ಬಗ್ಗೆ ಕಾಂಗ್ರೆಸ್​ನ ಕೆಲ ನಾಯಕರು ಅನುಮಾನ ವ್ಯಕ್ತಪಡಿಸಿ ಪ್ರಶ್ನೆಗಳನ್ನು ಕೇಳಿದ್ದರು. ಈಗ ರಾಜಸ್ಥಾನ ಪಠ್ಯಪುಸ್ತಕದಲ್ಲಿ ಏರ್​ಸ್ಟ್ರೈಕ್​ ಬಗ್ಗೆ ದಾಖಲಾಗಿದೆ. ರಾಜಸ್ಥಾನದಲ್ಲಿರೋದು ಕಾಂಗ್ರೆಸ್ ಸರ್ಕಾರ ಎನ್ನುವುದೇ ವಿಶೇಷ.

ಫೆ.14ರಂದು ಉಗ್ರರು ಪುಲ್ವಾಮಾದಲ್ಲಿ ದಾಳಿ ನಡೆಸಿ 40ಕ್ಕೂ ಹೆಚ್ಚು ಯೋಧರ ಬಲಿದಾನಕ್ಕೆ ಕಾರಣವಾಗಿದ್ದರು. ಇದಕ್ಕೆ ಪ್ರತೀಕಾರವಾಗಿ ಭಾರತೀಯ ವಾಯುಸೇನೆ ಫೆಬ್ರವರಿ 26ರಂದು 12 ಮಿರಾಜ್​-2000 ಯುದ್ಧವಿಮಾನಗಳ ಮೂಲಕ ಗಡಿ ನಿಯಂತ್ರಣಾ ರೇಖೆ ದಾಟಿ. ಉಗ್ರರ ನೆಲೆಗಳ ಮೇಲೆ ದಾಳಿ ನಡೆಸಿ ಅಪಾರ ಸಂಖ್ಯೆಯಲ್ಲಿ ಭಯೋತ್ಪಾದಕರನ್ನು ಸಂಹರಿಸಿತ್ತು. ತದನಂತರ ಇದಕ್ಕೆ ಪ್ರತಿಕಾರವೆಂಬಂತೆ ಭಾರತದ ಗಡಿದಾಟಿ ಬಂದ ಪಾಕಿಸ್ತಾನದ ಎಫ್​-16 ವಿಮಾನವನ್ನು, ಮಿಗ್​​-21 ವಿಮಾನ ಬಳಸಿ ಬೆನ್ನಟ್ಟಿದ್ದ ವಿಂಗ್ ಕಮಾಂಡರ್​ ಅಭಿನಂದನ್​ ಎಫ್​16 ಹೊಡೆದುರುಳಿಸಿದ್ದರು. ಬಳಿಕ ತಾನಿದ್ದ ಮಿಗ್​​-21 ಪತನಗೊಂಡ ಕಾರಣ ಜೀವ ಉಳಿಸಿಕೊಳ್ಳಲು ಪ್ಯಾರಾಚೂಟ್​ ಸಹಾಯದಿಂದ ಕೆಳಕ್ಕೆ ಹಾರಿ ಪಾಕ್​ ಸೈನಿಕರ ವಶಕ್ಕೆ ಸಿಕ್ಕಿದ್ದರು. ಪಾಕಿಸ್ತಾನದ ನೆಲದಲ್ಲೂ ಕೆಚ್ಚೆದೆ ತೋರಿದ ಅಭಿನಂದನ್​, ಸೇನೆಗೆ ಸಂಬಂಧಿಸಿದ ಯಾವ ಗುಟ್ಟನ್ನೂ ರಟ್ಟು ಮಾಡಿರಲಿಲ್ಲ. ಭಾರತ ಸರ್ಕಾರ ಕೂಡ ಪಾಕಿಸ್ತಾನದ ನಡೆ ವಿರುದ್ಧ ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಒತ್ತಡ ಹೇರಿತ್ತು. ಅಭಿನಂದನ್​ಗೆ ಏನಾದ್ರೂ ಆದ್ರೆ ತಕ್ಕ ಪಾಠ ಕಲಿಸುತ್ತೇವೆ ಅಂತಾ ಪಾಕಿಸ್ತಾನಕ್ಕೆ ಎಚ್ಚರಿಕೆ ನೀಡಿತ್ತು. ಕೊನೆಗೆ ಎರಡು ದಿನಗಳ ಬಳಿಕ ವಾಘಾ ಗಡಿಯ ಮೂಲಕ ಅಭಿನಂದನ್​ ಸುರಕ್ಷಿತವಾಗಿ ಭಾರತಕ್ಕೆ ವಾಪಸ್​ ಕಳುಹಿಸಿಕೊಡಲಾಗಿತ್ತು.