ಸ್ವದೇಶಿ ಕಂಪನಿ ಮೇಲೆಯೇ ಸೇನೆ ನಂಬಿಕೆ; ₹130 ಕೋಟಿ ವೆಚ್ಚದಲ್ಲಿ ಬೆಂಗಳೂರು ಸಂಸ್ಥೆಯಿಂದ ಡ್ರೋಣ್ ಖರೀದಿ

ನವದೆಹಲಿ: ಭಾರತೀಯ ಸೇನೆ ಈವರೆಗೆ ಶಸ್ತ್ರಾಸ್ತ್ರಗಳಿಗಾಗಿ ವಿದೇಶಿ ಕಂಪನಿಗಳನ್ನ ಅವಲಂಬಿಸುತ್ತಿತ್ತು.. ಇದೀಗ ಸ್ವದೇಶಿ ಕಂಪನಿಗಳಿಗೆ ಬೃಹತ್ ಮೊತ್ತದ ಆರ್ಡರ್​ ಒಂದನ್ನ ಕೊಡುವ ಮೂಲಕ ಭಾರತೀಯ ಸೇನೆ ಆತ್ಮನಿರ್ಭರ ಭಾರತದತ್ತ ಮತ್ತೊಂದು ಹೆಜ್ಜೆ ಇಟ್ಟಿದೆ.

ideaForge ಹೆಸರಿನ ಕಂಪನಿಯೊಂದಿಗೆ ಭಾರತೀಯ ಸೇನೆ SWITCH ಡ್ರೋನ್​ಗಳಿಗಾಗಿ 20 ಮಿಲಿಯನ್ ಡಾಲರ್​ನ ಅಂದ್ರೆ ಸುಮಾರು 130 ಕೋಟಿ ರೂಗಳ ಒಪ್ಪಂದವೊಂದನ್ನ ಮಾಡಿಕೊಂಡಿದೆ. ಎಷ್ಟು ಡ್ರೋಣ್​​ಗಳ ತಯಾರಿಕೆಗೆ ಈ ಒಪ್ಪಂದ ಮಾಡಿಕೊಳ್ಳಲಾಗಿದೆ ಎಂಬುದನ್ನ ಬಹಿರಂಗಪಡಿಸಿಲ್ಲ.

Download the Newsfirstlive app

ಭಾರತೀಯ ಸೇನೆ ನೂರಾರು SWITCH ಡ್ರೋಣ್​​​ಗಳಿಗಾಗಿ ಈ ಒಪ್ಪಂದ ಮಾಡಿಕೊಂಡಿದೆ ಎಂದು ಅಂದಾಜಿಸಲಾಗಿದೆ. ಈ ಡ್ರೋನ್​ಗಳು 6.5 ಕೆಜಿ ತೂಕ ಹೊಂದಿದ್ದು ವರ್ಟಿಕಲ್ ಟೇಕ್​ಆಫ್, ಕನ್ವೆನ್ಷನಲ್ ಫ್ಲೈಟ್, 2 ಗಂಟೆ ಸುದೀರ್ಘ ಹಾರಾಟ, 4,000 ಮೀಟರ್ ಎತ್ತರದಲ್ಲಿ 15 ಕಿಮೀ ಸುತ್ತಳತೆಯನ್ನ ಸುತ್ತುವ ಸಾಮರ್ಥ್ಯ ಹೊಂದಿರಲಿವೆ.

ಹಲವಾರು ಸುತ್ತಿನ ಪ್ರಯೋಗಗಳಲ್ಲಿ ಈ ಡ್ರೋನ್​ಗಳ ಸಾಮರ್ಥ್ಯ ಈಗಾಗಲೇ ಸಾಬೀತಾಗಿದೆ. ಬೆಂಗಳೂರಿನಲ್ಲಿ ನಿರ್ಮಾಣಗೊಳ್ಳಲಿರುವ ಈ ಭಾರತೀಯ ಸ್ವಿಚ್ ಡ್ರೋನ್‌ಗಳನ್ನು ಫಾಸ್ಟ್ ಟ್ರ್ಯಾಕ್ ಪ್ರೋಟೋಕಾಲ್‌ಗಳ ಅಡಿಯಲ್ಲಿ ಸೈನ್ಯಕ್ಕೆ ಶೀಘ್ರವಾಗಿ ತಲುಪಿಸಲಾಗುವುದು ಎನ್ನಲಾಗಿದೆ.

ಈ ಡ್ರೋನ್​ಗಳನ್ನು ಭಾರತೀಯ ಸೇನಾ ಪಡೆಗಳಿಗೆ ಮತ್ತು ಪೂರ್ವ ಲಡಾಖ್‌ನ ಘರ್ಷಣೆ ಸ್ಥಳಗಳಲ್ಲಿ ನಿಯೋಜಿಸಲಾದ ವಿಶೇಷ ಪಡೆಗಳ ಘಟಕಗಳಿಗೆ ಆದ್ಯತೆಯ ಮೇರೆಗೆ ನಿಯೋಜಿಸಲಾಗುತ್ತದೆ ಎನ್ನುವ ಮಾಹಿತಿ ಇದೆ. ಈ ಹಿಂದೆಯೂ ಭಾರತೀಯ ಸೇನಾಪಡೆಗಳು ಡ್ರೋನ್​ಗಳಿಗಾಗಿ ಐಡಿಯಾಫೋರ್ಜ್ ಜೊತೆಗೆ ಒಪ್ಪಂದ ಮಾಡಿಕೊಂಡಿತ್ತಾದರೂ ಈ ಬಾರಿಯ ಒಪ್ಪಂದ ದೊಡ್ಡ ಮೊತ್ತದ ಒಪ್ಪಂದ ಎನ್ನಲಾಗಿದೆ.