ಬೆಂಗಳೂರಲ್ಲಿ ತೀವ್ರಗೊಂಡ ಕೋವಿಡ್​​: ಲಸಿಕೆ ಪಡೆದ 7 ಮಂದಿ ಬಲಿ.. ಯಾಕೆ?

ರಾಜಧಾನಿಯಲ್ಲಿ ದಿನೆ ದಿನೇ ಕೊರೊನಾ ಪ್ರಕರಣಗಳ ಸಂಖ್ಯೆ ಹೆಚ್ಚಾಗ್ತಿದೆ. ಈಗ ಕೊರೊನಾ ಪ್ರಕರಣ ಮಾತ್ರವಲ್ಲದೇ ಸಾವಿನ ಸಂಖ್ಯೆಯೂ ಅಧಿಕವಾಗ್ತಿದ್ದು ಕೊಂಚ ಭೀತಿ ಮೂಡಿಸಿದೆ. ಕೆಲವು ವಾರ್ಡ್​ಗಳಲ್ಲೇ ಈ ಸಂಖ್ಯೆ ಸಾವಿರದ ಗಡಿ ಸಮೀಪಿಸಿದೆ.

Download the Newsfirstlive app

ಸಿಲಿಕಾನ್​ ಸಿಟಿಯಲ್ಲಿ ದಿನೆ ದಿನೇ ಕೊರೊನಾ ಕೇಸ್​ಗಳು ಆಕಾಶಕ್ಕೆ ಏಣಿ ಹಾಕ್ತಿವೆ. ಮೂರನೇ ಅಲೆ ಆರಂಭವಾಗಿದ್ದು ಕೋವಿಡ್​ ಸೋಂಕಿತರ ಸಂಖ್ಯೆ 20 ಸಾವಿರದಿಂದ 30 ಸಾವಿರಕ್ಕೆ ಜಿಗಿದಿದೆ. ಮಾತ್ರವಲ್ಲದೇ ದಿನಕ್ಕೆ 5 ರಿಂದ 10 ಜನರು ಕೊರೊನಾ ಮಾರಿಗೆ ಕೊನೆಯುಸಿರೆಳೆಯುತ್ತಿದ್ದಾರೆ. 7 ದಿನಗಳಲ್ಲಿ 33 ಜನ ಕೊರೊನಾ ಬಲಿಯಾಗಿದ್ದು ಮೃತಪಟ್ಟವರಿಗೆ ಕೋರ್ಮಾರ್ಬಿಡಿಟಿ ಇತ್ತಾ? ಅಂತ ಆರೋಗ್ಯ ಇಲಾಖೆ ತನಿಖೆ ನಡೆಸುತ್ತಿದೆ.

ಸಾವಿನ ಅಂಕಿ-ಅಂಶ

7 ದಿನಗಳಲ್ಲಿ ಸಾವನ್ನಪ್ಪಿದ 33 ಜನರಲ್ಲಿ 11 ಜನರು ಕೊರೊನಾಗೆ ಬಲಿಯಾಗಿದ್ರೆ 22 ಮಂದಿ ಬೇರೆ ಬೇರೆ ರೋಗಗಳಿಂದ ಬಳಲುತ್ತಿದ್ದರು. ಇದರಲ್ಲಿ 21 ರಿಂದ 40 ವರ್ಷದ 5 ಮಂದಿ, 41 ರಿಂದ 60 ವಯಸ್ಸಿನ 9 ಜನರು ಹಾಗೂ 60 ವರ್ಷಕ್ಕಿಂತ ಮೇಲ್ಪಟ್ಟ 19 ಜನರು ಸಾವನ್ನಪ್ಪಿದ್ದಾರೆ. ಬ್ರೈನ್ ಟ್ಯೂಮರ್ ನಿಂದ ಬಳಲುತ್ತಿದ್ದ 12 ವರ್ಷದ ಮಗು ಸಾವನ್ನಪ್ಪಿದೆ.

ಸಾವನ್ನಪ್ಪಿದವರಲ್ಲಿ 21-40 ವಯಸ್ಸಿನ ಐವರ ಪೈಕಿ 4 ಜನ ಸಿಂಗಲ್​ ಡೋಸ್ ವ್ಯಾಕ್ಸಿನ್ ಕೂಡ ಪಡೆದಿರಲಿಲ್ಲ. ಆದ್ರೆ ಯಾವುದೇ ಖಾಯಿಲೆ ಇಲ್ಲದ, ಡಬಲ್​ ಡೋಸ್​ ಪಡೆದಿದ್ದ 7 ಮಂದಿ ಕೊರೊನಾಗೆ ಬಲಿಯಾಗಿದ್ದು ಇವರ ಸಾವಿನ ಕಾರಣ ಪತ್ತೆ ಹಚ್ಚಲು ತನಿಖೆ ನಡೆಸಲಾಗ್ತಿದೆ. ಎರಡು ಡೋಸ್​ ಲಸಿಕೆ ಪಡೆದಿದ್ರೂ ಅಂಗಾಂಗ ವೈಫಲ್ಯ, ಬಿಪಿ, ಶುಗರ್, ಲಿವರ್ ಫೇಲ್ಯೂರ್​​ನಿಂದ ಬಳಲುತ್ತಿದ್ದ 22 ಮಂದಿ ಕಳೆದ 7 ದಿನದಲ್ಲಿ ಸಾವನ್ನಪ್ಪಿದ್ದಾರೆ.

ಇನ್ನು ಬೆಂಗಳೂರಲ್ಲಿ ದಿನದಿಂದ ದಿನಕ್ಕೆ ಕೋವಿಡ್ ಕೇಸ್ ಏರಿಕೆಯಾಗ್ತಿದ್ದು ನಗರದ ಗಲ್ಲಿ ಗಲ್ಲಿಗಳಲ್ಲೂ ಸೋಂಕಿತರು ಪತ್ತೆಯಾಗ್ತಿದ್ದಾರೆ. 198 ವಾರ್ಡ್​ಗಳ ಪೈಕಿ 101 ವಾರ್ಡ್​ ಡೇಂಜರ್ ಝೋನ್ ಆಗಿದ್ರೆ 33 ವಾರ್ಡ್​ಗಳಲ್ಲಿ ಸೋಂಕಿತರ ಸಂಖ್ಯೆ ಸಾವಿರ ದಾಟಿದೆ.
ವಾರ್ಡ್​ವಾರು ಸೋಂಕಿತರು

ವಾರ್ಡ್​ವಾರು ಸೋಂಕಿತರು

33 ವಾರ್ಡ್​ಗಳಲ್ಲಿ ಸೋಂಕಿತರ ಸಂಖ್ಯೆ ಸಾವಿರದ ಗಡಿ ದಾಟಿದೆ. 68 ವಾರ್ಡ್​ಗಳಲ್ಲಿ 500 ರಿಂದ 1000 ಕೇಸ್ ದಾಖಲಾಗ್ತಿವೆ. 64 ವಾರ್ಡ್​ಗಳಲ್ಲಿ 250 ರಿಂದ 500 ಮಂದಿಗೆ ಪಾಸಿಟಿವ್ ಬಂದಿದ್ರೆ 26 ವಾರ್ಡ್​ಗಳಲ್ಲಿ 100 ರಿಂದ‌ 250 ಮಂದಿಗೆ ಸೋಂಕು ದೃಡಪಟ್ಟಿದೆ. 7 ವಾರ್ಡ್​ಗಳಲ್ಲಿ 1 ರಿಂದ 100 ಕೇಸ್​ಗಳಷ್ಟೇ ದಾಖಲಾಗಿವೆ.

ಒಟ್ಟಿನಲ್ಲಿ ಸಿಲಿಕಾನ್​ ಸಿಟಿಯಲ್ಲಿ ದಿನೇ ದಿನೇ ಕೊರೊನಾ ಸಂಖ್ಯೆ ಹೆಚ್ಚಾಗೋದ್ರ ಜೊತೆಗೆ ಸಾವಿನ ಸಂಖ್ಯೆಯೂ ಅಧಿಕವಾಗ್ತಿದೆ. ಜನ ಆದಷ್ಟು ಕೊರೊನಾ ನಿಯಮ ಪಾಲಿಸುವ ಮೂಲಕ ಕೊರೊನಾ ಚೈನ್​ಗೆ ಬ್ರೇಕ್​ ಹಾಕಬೇಕಿದೆ.