ಬಗೆದಷ್ಟು ಹೊರಗೆ ಬರ್ತಿದೆ PSI ಪರೀಕ್ಷೆ ಅಕ್ರಮ-ಆರೋಪಿಗಳ ಬೇಟೆ ಮುಂದುವರಿಸಿದ CID

ಬೆಂಗಳೂರು: ಪಿಎಸ್​ಐ ಪರೀಕ್ಷೆ ಅಕ್ರಮ ಬಗೆದಷ್ಟು ಆಳವಾಗ್ತಿದೆ. ತನಿಖೆಗೆ ವೇಗ ನೀಡಿರೋ ಸಿಐಡಿ ಆರೋಪಿಗಳ ಬೇಟೆ ಮುಂದುವರೆಸಿದೆ. ಈ ಬೆನ್ನಲ್ಲೇ, ಪಿಎಸ್​ಐ ಅಭ್ಯರ್ಥಿಗಳ ವಿಚಾರಣೆ ಮುಂದುವರೆದಿದ್ದು, ಕೋಳ ತೊಡಿಸೋಕೆ ರೆಡಿಯಾಗ್ತಿದ್ದವರ ಕೈಗೇ ಇವತ್ತು ಸಿಐಡಿ ಅಧಿಕಾರಿಗಳು ಕೋಳ ತೊಡಿಸಿಬಿಟ್ಟಿದ್ದಾರೆ.

400 ಅಭ್ಯರ್ಥಿಗಳ ವಿಚಾರಣೆ ನಡೆಸಿದ ಸಿಐಡಿ
100ಕ್ಕೂ ಹೆಚ್ಚು ಅಭ್ಯರ್ಥಿಗಳು ವಿಚಾರಣೆಗೆ ಗೈರು

Download the Newsfirstlive app

ಪಿಎಸ್​ಐ ಹಗರಣದ ಬೆನ್ನತ್ತಿರೋ ಪೊಲೀಸರು 545 ಅಭ್ಯರ್ಥಿಗಳಿಗೂ ವಿಚಾರಣೆಗೆ ನೋಟಿಸ್​ ನೀಡಿದ್ರು. ಈವರೆಗೂ 400 ಅಭ್ಯರ್ಥಿಗಳು ವಿಚಾರಣೆಗೆ ಹಾಜರಾಗಿದ್ದು, 100ಕ್ಕೂ ಹೆಚ್ಚು ಜನ ಗೈರಾಗಿದ್ದಾರೆ. ಕಾರ್ಬನ್ ಶೀಟ್​ ಮಿಸ್ಸಾಗಿದೆ, ಆರೋಗ್ಯ ಸರಿಯಿಲ್ಲ ಅನ್ನೋ ನಾನಾ ಕಾರಣ ನೀಡಿ ವಿಚಾರಣೆಗೆ ಹಾಜರಾಗಿಲ್ಲ.

27 ಅಭ್ಯರ್ಥಿಗಳ ಕಾರ್ಬನ್​ ಶೀಟ್​ನಲ್ಲಿ ವ್ಯತ್ಯಾಸ
ಬೆಂಗಳೂರಿನ 12 ಮಂದಿ ಅಭ್ಯರ್ಥಿಗಳು ಅರೆಸ್ಟ್​

ವಿಚಾರಣೆಗೊಳಪಟ್ಟಿರೋ 400 ಅಭ್ಯರ್ಥಿಗಳ ಪೈಕಿ 27 ಜನರ ಕಾರ್ಬನ್​ ಶೀಟ್​ನಲ್ಲಿ ವ್ಯತಾಸ್ಯ ಕಂಡು ಬಂದಿದ್ದು, ಸಿಐಡಿ 27 ಜನರ ಲಿಸ್ಟ್​ ರೆಡಿ ಮಾಡಿದೆ. ಸದ್ಯ ಬೆಂಗಳೂರಿನ 12 ಮಂದಿಯನ್ನ ಅರೆಸ್ಟ್​ ಮಾಡಲಾಗಿದ್ದು, 10 ದಿನಗಳ ಕಾಲ ಪೊಲೀಸರ ಕಸ್ಟಡಿಗೆ ನೀಡಲಾಗಿದೆ.

ಪಿಎಸ್​ಐ ಅಭ್ಯರ್ಥಿಗಳಿಗೆ ಕೋಳ

400 ಅಭ್ಯರ್ಥಿಗಳ ವಿಚಾರಣೆ ವೇಳೆ 27 ಅಭ್ಯರ್ಥಿಗಳ OMR ಪ್ರತಿಗೂ ಮತ್ತು ಕಾರ್ಬನ್​ ಶೀಟ್​ಗೂ ವ್ಯತ್ಯಾಸ ಕಂಡು ಬಂದಿದೆ. ವ್ಯತ್ಯಾಸ ಕಂಡು ಬಂದಿರೋ OMR ಶೀಟ್, ಕಾರ್ಬನ್ ಶೀಟ್​ಗಳನ್ನ ಎಫ್​ಎಸ್​ಎಲ್​ಗೆ ರವಾನೆ ಮಾಡಲಾಗಿದೆ. ಬೆಂಗಳೂರಿನ FSL ಕೇಂದ್ರಕ್ಕೆ ಸಂಶಯಾಸ್ಪದ ಪ್ರತಿಗಳನ್ನ ರವಾನಿಸಲಾಗಿದೆ. 27 ಅಭ್ಯರ್ಥಿಗಳ ಪೈಕಿ 22 ಮಂದಿ ಬೆಂಗಳೂರಿನವರು 5 ಮಂದಿ ಕಲಬುರ್ಗಿಯವರು. 22 ಅಭ್ಯರ್ಥಿಗಳು ಬೆಂಗಳೂರಿನ 7 ಕೇಂದ್ರಗಳಲ್ಲಿ ಪರೀಕ್ಷೆ ಬರೆದಿದ್ರೆ, ಕಲಬುರ್ಗಿಯ ಒಂದೇ ಕೇಂದ್ರದಲ್ಲಿ 5 ಅಭ್ಯರ್ಥಿಗಳು ಪರೀಕ್ಷೆ ಬರೆದಿದ್ರು. ಇನ್ನೂ 27 ಅಭ್ಯರ್ಥಿಗಳ ಪೈಕಿ ಬೆಂಗಳೂರಿನ 12 ಅಭ್ಯರ್ಥಿಗಳನ್ನ ಅರೆಸ್ಟ್ ಮಾಡಲಾಗಿದೆ. ಹೈಗ್ರೌಂಡ್ಸ್ ಪೊಲೀಸರು 12 ಪಿಎಸ್​ಐ ಅಭ್ಯರ್ಥಿಗಳನ್ನ ಬಂಧಿಸಿದ್ದಾರೆ. ಮೊದಲ ಹಂತದಲ್ಲಿ ಸಿಐಡಿ ಅಧಿಕಾರಿಗಳು 27 ಅಭ್ಯರ್ಥಿಗಳಿಗೆ ಬಲೆ ಬೀಸಿದ್ದಾರೆ.

ಪಿಎಸ್​ಐ ಆಗಲು ಕಳ್ಳಾಟವಾಡಿದವರು ಸಿಐಡಿ ಬೀಸಿರೋ ಬಲೆಯಲ್ಲಿ ಬಂಧಿಯಾಗ್ತಿದ್ದಾರೆ. ಸದ್ಯ 12 ಮಂದಿಯನ್ನ ಅರೆಸ್ಟ್​ ಮಾಡಲಾಗಿದ್ದು, ಮುಂದೆ ಮತ್ತಷ್ಟು ಜನರ ಬಂಧನವಾಗೋ ಸಾಧ್ಯತೆ ಇದೆ. ಇದರ ಮಧ್ಯೆ ಪರೀಕ್ಷೆ ರದ್ದು ಮಾಡಿದ್ದಕ್ಕೆ ಆಯ್ಕೆಯಾಗಿರೋ ಉಳಿದ ಅಭ್ಯರ್ಥಿಗಳು ಬೇಸರ ವ್ಯಕ್ತಪಡಿಸ್ತಿದ್ದಾರೆ. ಒಟ್ನಲ್ಲಿ ಯಾರೋ ಮಾಡಿದ ತಪ್ಪಿಗೆ ಇನ್ಯಾರಿಗೋ ಶಿಕ್ಷೆ ಎಂಬಂತಾಗಿದೆ.