PSI ನೇಮಕಾತಿ ಪರೀಕ್ಷೆ ಅಕ್ರಮ; ಕುಡಚಿ ಶಾಸಕ ಪಿ.ರಾಜೀವ್​​ ಆಪ್ತ ಸಹಾಯಕನ ಆಡಿಯೋ ವೈರಲ್

ಬೆಂಗಳೂರು: ಪಿಎಸ್‌ಐ ಪರೀಕ್ಷೆಯಲ್ಲಿ ಕೋಟಿ ಕೋಟಿ ಬಾಚಲು ಕಿಂಗ್​ಪಿನ್​ಗಳು ಮಾಡಿದ್ದ ಖತರ್ನಾಕ್ ಪ್ಲಾನ್​​ಗಳು ಜಗಜ್ಜಾಹೀರಾಗಿದ್ದು, ಅಕ್ರಮ ಸಂಪತ್ತಿನ ಕೋಟೆ ಕಟ್ಟಿದ್ದ ಆರೋಪಿಗಳು ತನಿಖಾ ತಂಡದ ತೆಕ್ಕೆಗೆ ಬೀಳ್ತಿದ್ದಾರೆ. ಈ ನಡುವೆ ಸರ್ಕಾರ 2021ರಲ್ಲಿ ನಡೆದಿದ್ದ ಪರೀಕ್ಷೆಯನ್ನ ರದ್ದುಗೊಳಿಸಿ ಮರು ಪರೀಕ್ಷೆ ನಡೆಸಲು ಸಜ್ಜಾಗಿದೆ. ಈ ನಡುವೆ ಸರ್ಕಾರವನ್ನ ಒತ್ತಡಕ್ಕೆ ಸಿಲುಕಿಸುವ ಕಾರ್ಯ ನಡೆಸಲಾಗುತ್ತಿದೆ, ಪಿಎಸ್‌ಐ ಪರೀಕ್ಷೆ ಅಕ್ರಮದ ಸಂಪೂರ್ಣ ತನಿಖೆ ಮುಗಿಯುವ ಮುನ್ನವೇ ಒತ್ತಡ ಶಾಸಕರು ಗೃಹ ಸಚಿವರಿಗೆ ಪತ್ರ ಬರೆದಿದ್ದಾರೆ ಎನ್ನಲಾಗಿತ್ತು. ಇದರಲ್ಲಿ ಕುಡಚಿ ಶಾಸಕ ಪಿ.ರಾಜೀವ್​ ಅವರ ಹೆಸರು ಕೇಳಿ ಬಂದಿತ್ತು.

ಸದ್ಯ ಈ ಬೆಳವಣಿಗೆಗೆ ಬಿಗ್​ ಟ್ವಿಸ್ಟ್ ಸಿಕ್ಕಿದ್ದು, ಎಲ್ಲಾ 9 ಶಾಸಕರೂ ಸಹ ಸ್ವಯಂಪ್ರೇರಿತವಾಗಿ ಪತ್ರ ಬರೆದಿಲ್ಲ. ಯಾರೋ ಬರೆದು ತಂದ ಪತ್ರಕ್ಕೆ ನೋಡದೇ ಶಾಸಕರು ಸಹಿ ಹಾಕಿದ್ದಾರಾ ಎಂದ ಪ್ರಶ್ನೆ ಉದ್ಭವಿಸಿದೆ. ಹೌದು, ನ್ಯೂಸ್ ಫಸ್ಟ್​ಗೆ ಶಾಸಕ ಪಿ.ರಾಜೀವ್ ಅವರ ಆಪ್ತ ಸಹಾಯಕ ಮಾತನಾಡಿರುವ ಲಭ್ಯವಾಗಿದ್ದು, ಯಾರೋ ಬರೆದು ತಂದ ಪತ್ರಕ್ಕೆ ನೋಡದೇ ಶಾಸಕರು ಸಹಿ ಹಾಕಿದ್ದಾರಾ ಎಂಬ ಅನುಮಾನ ಸಾಧ್ಯ ಎದುರಾಗಿದೆ. ಏಕೆಂದರೆ ಎಲ್ಲಾ 9 ಶಾಸಕರ ಪತ್ರ ಒಂದೇ ಫಾರ್ಮೆಟ್​ನಲ್ಲಿದ್ದು, ಒಂದೇ ಒಂದು ಅಕ್ಷರ ಅಥವಾ ಪ್ಯಾರಾ ಸಹ ಬದಲಾವಣೆ ಆಗಿಲ್ಲ. ಅಲ್ಲದೇ ಪಿ.ರಾಜೀವ್​ ಅವರ ಪಿಎ ಮಾತನಾಡಿದ್ದಾರೆ ಎನ್ನಲಾದ ಆಡಿಯೋದಲ್ಲಿ ಪ್ರಸ್ತಾಪ ಮಾಡಲಾಗಿದೆ. ಪ್ರಕರಣವನ್ನು ಬೆಳಕಿಗೆ ತಂದ ರವಿಶಂಕರ್ ಎಂಬವರು ಶಾಸಕರ ಆಪ್ತ ಸಹಾಯಕರೊಂದಿಗೆ ಮಾತನಾಡಿದ ಆಡಿಯೋ ಎನ್ನಲಾಗಿದೆ.

ಇದನ್ನೂ ಓದಿ: PSI ನೇಮಕಾತಿ ಪರೀಕ್ಷೆ ಅಕ್ರಮ; ಗೃಹ ಸಚಿವರಿಗೆ ಪತ್ರ ಬರೆದ ಮೂರು ಪಕ್ಷದ 9 ಶಾಸಕರು

 ಶಾಸಕರ ಪಿಎ- ರವಿಶಂಕರ್ ಆಡಿಯೋ ಸಂಭಾಷಣೆಯಲ್ಲಿ ಏನಿದೆ..?

ಶಾಸಕ ಪಿ.ರಾಜೀವ್ ಪಿಎ: ತಗೊಳ್ಳಪ್ಪ ಅಂತ ಲೆಟರ್ ಕೊಟ್ರು..ಸಾಹೇಬ್ರು ಲೆಟರ್ ಡ್ರಾಫ್ಟ್ ಮಾಡಿಸಿದ್ದಲ್ಲ.. ಅವರಿಗೆ ಏನು ಬೇಕೋ ಮನಸಿಗೆ ಬಂದಂಗೆ ಬರೆಸಿಕೊಂಡ್ರು. ಸೈನ್ ಮಾಡಿಸಿಕೊಂಡು ಹೋದ್ರು ಅಷ್ಟೆ.

ರವಿಶಂಕರ್: ಅಂದ್ರೆ ನಮ್ಮ ರಾಜೀವ್ ಸಾಹೇಬ್ರು ಏನು.. ಬರೆದಿಲ್ಲ ಅಲ್ಲ ಸಾರ್ ಅದು

ಶಾಸಕ ಪಿ.ರಾಜೀವ್ ಪಿಎ: ಸಾಹೇಬ್ರು ಮ್ಯಾಟರ್ ಬರೆದಿದ್ದಲ್ಲ ಇದು..ಒಂದ್ 60 ಜನ ಬಂದಿದ್ರು..ಅವರು ತಗೊಂಡ್ ಹೋದ್ರು ಅಷ್ಟೆ.

ರವಿಶಂಕರ್: ಹುಂ ಸಾರ್….

ಶಾಸಕ ಪಿ.ರಾಜೀವ್ ಪಿಎ: ಸರ್.. ಹಿಂಗೆ ಲೆಟರ್​ ಕೊಡಿ ಹಂಗೆ ಇಂಗೆ ಅಂದ್ರು.. ಆಯ್ತು ಅಂತ ತಗೊಂಡ್ ಹೋಗಪ್ಪ.. ಏನಾದ್ರು ಮಾಡಪ್ಪ ಅಂತ ಸುಮ್ಮನಾಗಿಬಿಟ್ರು ಸಾಹೇಬ್ರು.

ರವಿಶಂಕರ್: ಸಾಹೇಬ್ರು ಅವರಿಗೆ ಏನ್ ಹೇಳಿಲ್ಲವೇನ್ರಿ..

ಶಾಸಕ ಪಿ.ರಾಜೀವ್ ಪಿಎ: ಏನೂ ಹೇಳಿಲ್ಲ..

ರವಿಶಂಕರ್: ಅಂದ್ರೆ ಅಳಕ್ಕತ್ತುಬಿಟ್ಟಿದ್ರಾ ಅವರು

ಶಾಸಕ ಪಿ.ರಾಜೀವ್ ಪಿಎ: ಹಾಂ.. ಬಹಳ ಜನ ಬಂದಿದ್ರು..ಕಷ್ಟಪಟ್ಟು ಎಕ್ಸಾಂ ಬರೆದಿದ್ದೀವಿ ಸಾರ್.. ನಾವು ಹೆಂಗೆ? ನಮ್ದಿಲ್ಲ ನಮಗೆ ಏಜ್ ಬಾರ್ ಆಗ್ಬಿಡ್ತಿದೆ.. ಅಟ್​ಲಿಸ್ಟ್​ ಹಿಂಗಾದ್ರೂ ಲೆಟರ್​ ಕೊಟ್ರೆ ಏನಾದ್ರೂ ಮಾಡಿಸಿಕೊಂಡ್ ಫಾಲೋ ಮಾಡ್ಕೊತಿವಿ ಸರ್ ಅಂದಿದ್ರು.

ರವಿಶಂಕರ್: ಹುಂ ಹುಂ..

ಶಾಸಕ ಪಿ.ರಾಜೀವ್ ಪಿಎ: ಅದಕ್ಕೆ ಇನ್ನೇನ್ ಮಾಡೋದು ಅಂತ, ಆಯ್ತು ತಗೊಳ್ಳಪ್ಪ.. ನೀವೇ ಏನಾದ್ರೂ ಮಾಡ್ಕೊಳಿ ಅಂತ ಸುಮ್ಮನಾಗಿಬಿಟ್ರು ಸಾಹೇಬ್ರು

ರವಿಶಂಕರ್: ಹೌದೇನ್ ಸರ್..

ಶಾಸಕ ಪಿ.ರಾಜೀವ್ ಪಿಎ: ಸಪರೇಟ್ ಮಾತಾಡ್​​ಬಿಟ್ಟು, ಇವ್ರೇ ತಗೊಂಡ್ ಹೋಗಿ ಅಂದಿದ್ರೆ ತಪ್ಪಾಗೋದು..

ರವಿಶಂಕರ್: ಹೌದೌದು ಕರೆಕ್ಟ್

ಶಾಸಕ ಪಿ.ರಾಜೀವ್ ಪಿಎ: ಸಾಹೇಬ್ರು.. ಲೆಟರ್ ಕೊಟ್ರು. ನೀವೇನಾದ್ರೂ ಮಾಡ್ಕೊಳ್ಳಿಯಪ್ಪ.. ನನ್ ಹತ್ರ ಬರಬೇಡಿ ಅಂತ ಹೇಳಿದ್ದಾರೆ.

ರವಿಶಂಕರ್: ಓಕೆ.. ಓಕೆ..

ಶಾಸಕ ಪಿ.ರಾಜೀವ್ ಪಿಎ: ಸಾಹೇಬ್ರು ಇದು ಮಾಡಿದ್ದನ್ನ ಯಾವತ್ತೂ ಹೇಳೋಕ್ಕೊಗಲ್ಲ, ಯಾರ್ ಹತ್ರನೂ ಹೇಳೋಕೆ ಹೋಗಲ್ಲ.. ಅಷ್ಟ್ ಮಾತ್ರ ಹೇಳಿದ್ರೂನು ನಾವೇ ಹೇಳೋಕೆ ಹೋಗ್ಬೇಡಿ ಅಂತ ತಡೀತಿವಿ ನಾವೇ ಸಾಹೇಬ್ರನ್ನ.

ರವಿಶಂಕರ್: ಹುಂ ಸರ್.. ಹುಂ ಸರ್..

ಶಾಸಕ ಪಿ.ರಾಜೀವ್ ಪಿಎ: ತಪ್ಪಾಗುತ್ತೆ ಅದು.. ಈಗ ನಾವೇ ಬಯಲಿಗೆಳೆದು ಬಿಟ್ಟು.. ಎಲ್ಲರಿಗೂ ಹೊರಗೆ ಹಾಕ್ಬಿಟ್ಟು.. ಎಕ್ಸಾಂ ಕ್ಯಾನ್ಸಲ್ ಮಾಡಿ, ರೀಎಕ್ಸಾಂ ಬರೆಸಿ ಅಂತ ನಾವೇ ಹೇಳ್ಬಿಟ್ಟು ನಮ್ಮೋರಿಗೆ ನಾವೇ ಹಿಂಗೆ ಕೊಡಿ ಸರ್ ಅಂದ್ರೆ ತಪ್ಪಾಗುತ್ತೆ

ರವಿಶಂಕರ್; ಇನ್ನೊಂದೇನ್ ಅಂದ್ರೆ ಸರ್, ಅಕ್ರಮ ತೆಗೆದಿದ್ದು ನಾನೇ ಸರ್..ದಾಖಲೆಗಳನ್ನ ತಗೊಂಡ್ ಹೋಮ್ ಮಿನಿಸ್ಟರ್​ಗೆ ಕೊಟ್ಟು.. ರವಿಶಂಕರ್ ಅಂತ ನಾನು

ಶಾಸಕ ಪಿ.ರಾಜೀವ್ ಪಿಎ: ತಪ್ಪು ಮಾಡಿದಾರೆ ಅದು ತಪ್ಪು. ಸುಮ್ನೆ ಏನ್ ಮಾಡೋಕ್ಕಾಗುತ್ತೆ ಸರ್.. 60 ಮಂದಿ ಬಂದುಬಿಟ್ಟು, ಗೋಳೋ ಅಂತಿದ್ರು.. ಇನ್ನೇನ್ ಮಾಡೋಕ್ಕಾಗುತ್ತೆ ಸಾಹೇಬ್ರು ಅಷ್ಟ್ ಜನ ಬಂದ್ಮೇಲೆ. ಆಯ್ತು ಲೆಟರ್ ಕೊಟ್ಟು ಕಳಿಸಿ ಅಂತ ಅಂದ್ರು..

ರವಿಶಂಕರ್; ಹೌದು ಹೌದು. ಕರೆಕ್ಟ್ ಐತೆ ಬಿಡ್ರಿ. ಆ ಲೆಟರ್​ನಿಂದಾನೂ ಏನೂ ಆಗಲ್ಲ.

ಶಾಸಕ ಪಿ.ರಾಜೀವ್ ಪಿಎ: ಹಂಗಾಂಗಿದ್ರೆ, ಯಾರೂ ಇರಂಗೆ ಇರಲಿಲ್ಲ ಇಲ್ಲಿ.

ರವಿಶಂಕರ್: ಹಃ ಹಃ. ಹೌದು ಸರ್ ಹೌದು. ಕರೆಕ್ಟ್​ ಐತೆ

ಶಾಸಕ ಪಿ.ರಾಜೀವ್ ಪಿಎ: ಏನ್ ಮಾಡೋದು ಸಮಾಧಾನಕ್ಕೋಸ್ಕರ.. ಮತ್ತೆ ಇವ್ರು ಸಮಾಜದವರು ಬಂದಿದ್ರು ಯಾಱರೋ ಬಂದಿದ್ರು. ಮತ್ತೆ ಏನೂ ಹೇಳೋಕ್ಕಾಗಲ್ಲ ಅಂತ. ಆಯ್ತು ತಗೊಳ್ಳಪ್ಪ ಅಂತ ಹೇಳ್ಬಿಟ್ಟು ಕೊಟ್ಟು ಕಳಿಸಿದ್ರು.

ರವಿಶಂಕರ್: ಓ ಹಿಂಗೇನು..

ಶಾಸಕ ಪಿ.ರಾಜೀವ್ ಪಿಎ: ಸಾಹೇಬ್ರು ಕೂಡ ಇದರಲ್ಲಿ ಏನು ಮ್ಯಾಟರ್ ಏನಿದೆ ಅಂತಾನೂ ಓದಲಿಲ್ಲ.. ಏನೂ ಬರೆದಿದೆ ಅಂತ.

ರವಿಶಂಕರ್: ಅದೇ

ಶಾಸಕ ಪಿ.ರಾಜೀವ್ ಪಿಎ: ಯಾವ ರೀತಿ ಬರೆದಿದ್ದಾರೆ ಏನೂ ಬರೆದಿದ್ದಾರೆ ಅಂತ ಏನೂ ಓದ್ಲಿಲ್ಲ.