Morgan Retired: ಕ್ರಿಕೆಟ್​​ ಬದುಕಿಗೆ ವಿದಾಯ ಹೇಳಿದ ಮಾರ್ಗನ್​..!​

ಇಂಗ್ಲೆಂಡ್ ತಂಡಕ್ಕೆ ಏಕದಿನ ವಿಶ್ವಕಪ್​ ಗೆದ್ದುಕೊಟ್ಟ ನಾಯಕ ಇಯಾನ್ ಮಾರ್ಗನ್​​ ಅಂತಾರಾಷ್ಟ್ರೀಯ ಕ್ರಿಕೆಟ್​ ವಿದಾಯ ಘೋಷಿಸಿದ್ದಾರೆ. ಆ ಮೂಲಕ ಹಲವು ದಿನಗಳಿಂದ ಎದ್ದಿದ್ದ ಊಹಾಪೋಹಗಳಿಗೆ ತೆರೆ ಎಳೆದಿದ್ದಾರೆ. ಏಕದಿನ ಮತ್ತು ಟಿ20 ನಾಯಕ ಮಾರ್ಗನ್​ ಕ್ರಿಕೆಟ್​ಗೆ ನಿವೃತ್ತಿ ಘೋಷಿಸಿರುವ ಬಗ್ಗೆ ಇಂಗ್ಲೆಂಡ್​ ಕ್ರಿಕೆಟ್​ ಬೋರ್ಡ್​ ಖಚಿತಪಡಿಸಿದೆ.

ಕಳಪೆ ಫಾರ್ಮ್​ ಮತ್ತು ಪದೆಪದೇ ಇಂಜುರಿಗೆ ಒಳಗಾಗುತ್ತಿದ್ದ ಕಾರಣ ವಿಶ್ವಕಪ್​ ಹೀರೋ, ನಿವೃತ್ತಿ ಪಡೆದಿದ್ದಾರೆ. ಏಕದಿನ ಮತ್ತು ಟಿ20 ತಂಡದ ಕ್ಯಾಪ್ಟನ್​ ಆಗಿದ್ದ ಮಾರ್ಗನ್​, ಇಂಗ್ಲೀಷ್​ ಕ್ರಿಕೆಟ್​​​​ ಅನ್ನೇ ಬದಲಾಯಿಸಿದ ಕೀರ್ತಿಗೆ ಪಾತ್ರರಾಗಿದ್ದಾರೆ. ಈ ಬಗ್ಗೆ ಟ್ವೀಟ್​ ಮಾಡಿರೋ ಇಸಿಬಿ, THANK YOU MORGAN ಎಂದು ಹೇಳಿದೆ.

ಎಲ್ಲರಿಗೂ ಧನ್ಯವಾದ ಎಂದ ಮಾರ್ಗನ್​

Download the Newsfirstlive app

ನನ್ನ ವೃತ್ತಿಜೀವನ ಅತ್ಯಂತ ಆನಂದದಾಯಕವಾಗಿತ್ತು. ನಿವೃತ್ತಿ ನಿರ್ಧಾರ ಸುಲಭಕ್ಕೆ ತೆಗೆದುಕೊಳ್ಳುವಂಥದಲ್ಲ. ಆದರೆ ಇದೇ ಸರಿಯಾದ ಸಮಯ. ನನ್ನ ವೃತ್ತಿಜೀವನದ ಯಶಸ್ಸಿಗೆ ಕಾರಣರಾದ ತಂಡದ ಆಟಗಾರರು, ಕೋಚ್​​ಗಳಿಗೆ, ಕುಟುಂಬ ಸದಸ್ಯರು ಮತ್ತು ಪ್ರೇಕ್ಷಕರಿಗೆ ನಾನು ಧನ್ಯವಾದ ಹೇಳಲೇಬೇಕು. ಏಕಂದ್ರೆ ಅವರೇ ಇಲ್ಲದಿದ್ದರೆ, ಇಂದು ನಾನು ಏನೂ ಅಲ್ಲ. ಅವರನ್ನೂ ಎಂದಿಗೂ ಮರೆಯಲ್ಲ. ಸದಾ ನೆನಪಿಸಿಕೊಳ್ಳುತ್ತೇನೆ ಎಂದು ತಮ್ಮ ವಿದಾಯದ ನುಡಿಗಳನ್ನು ಹೇಳಿದ್ದಾರೆ ಮಾರ್ಗನ್.

ಬಟ್ಲರ್​​ಗೆ ನಾಯಕತ್ವ ಸಾಧ್ಯತೆ.?

ಮಾರ್ಗನ್​​ ನಿವೃತ್ತಿಯ ಬಳಿಕ ಸೀಮಿತ ಓವರ್​​​ಗಳಿಗೆ ನಾಯಕನನ್ನಾಗಿ ಜೋಸ್​ ಬಟ್ಲರ್​​ರನ್ನು ನೇಮಿಸುವ ಸಾಧ್ಯತೆ ಇದೆ. ಏಕೆಂದರೆ ಅವರೇ ಈಗ ಏಕದಿನ ಮತ್ತು ಟಿ20 ತಂಡದ ಉಪನಾಯಕ. ಈ ಹಿಂದೆ ಮಾರ್ಗನ್​ ಅಲಭ್ಯತೆಯಲ್ಲಿ ಬಟ್ಲರ್​​ ತಂಡವನ್ನು ಮುನ್ನಡೆಸಿದ ಅನುಭವ ಹೊಂದಿದ್ದಾರೆ. ಹೀಗಾಗಿ ಅವರಿಗೇ ಪಟ್ಟ ಕಟ್ಟೋದು ಖಚಿತ ಎನ್ನಲಾಗ್ತಿದೆ. ಮಾರ್ಗನ್​​​, ಅಲೆಸ್ಟರ್​​​ ಕುಕ್​​ ಅವರಿಂದ ನಾಯಕತ್ವ ಪಡೆದಿದ್ದರು.

ಮಾರ್ಗನ್​ ವೃತ್ತಿ ಜೀವನ

ಇಯಾನ್​ ಮಾರ್ಗನ್​ ನಾಯಕತ್ವದಲ್ಲಿ ಅಲ್ಲದೆ, ಬ್ಯಾಟಿಂಗ್​​​ನಲ್ಲೂ ಅಪಾರ ಸಾಧನೆ ಮಾಡಿದ್ದಾರೆ. ಮಾರ್ಗನ್ ಒಟ್ಟು​ 16 ಟೆಸ್ಟ್​ ಪಂದ್ಯಗಳನ್ನಾಡಿದ್ದು, 2 ಶತಕ, 3 ಅರ್ಧಶತಕಗಳ ನೆರವಿನಿಂದ 700 ರನ್​ ಕಲೆಹಾಕಿದ್ದಾರೆ. 2010ರಲ್ಲಿ ಟೆಸ್ಟ್​​ ಪದಾರ್ಪಣೆ ಮಾಡಿದ್ದ ಅವರು, 2012ರಲ್ಲಿ ತಮ್ಮ ಕೊನೆಯ ಟೆಸ್ಟ್​ ಪಂದ್ಯವನ್ನು ಆಡಿದ್ದರು.

ಏಕದಿನ ಕ್ರಿಕೆಟ್​​ನಲ್ಲಿ 248 ಪಂದ್ಯಗಳಲ್ಲಿ ಕಣಕ್ಕಿಳಿದಿದ್ದು, 39.29ರ ಸರಾಸರಿಯಲ್ಲಿ 7701 ರನ್​ ಸಿಡಿಸಿದ್ದಾರೆ. 14 ಶತಕ, 47 ಅರ್ಧಶತಕ ಬಾರಿಸಿದ್ದಾರೆ. 2006ರಲ್ಲಿ ಏಕದಿನ ಕ್ರಿಕೆಟ್​​ಗೆ ಡೆಬ್ಯೂ ಮಾಡಿದ್ದ ಇಂಗ್ಲೀಷ್​ ನಾಯಕ ಇದೇ ತಿಂಗಳು ನೆದರ್​ಲೆಂಡ್​ ವಿರುದ್ಧ (ಜೂನ್​​ 19, 2022) ಕೊನೆಯದಾಗಿ ಆಡಿದ್ದರು.

ಇನ್ನೂ ಚುಟುಕು ಕ್ರಿಕೆಟ್​​​ನಲ್ಲೂ ಅಪಾರ ಸಾಧನೆ ಮಾಡಿರುವ ಮಾರ್ಗನ್​​​ 115 ಪಂದ್ಯಗಳಲ್ಲಿ ಬ್ಯಾಟ್​ ಬೀಸಿದ ಸಾಧನೆ ಮಾಡಿದ್ದಾರೆ. ಒಟ್ಟು 14 ಅರ್ಧಶತಕಗಳನ್ನು ಸಿಡಿಸಿದ್ದು, 2458 ರನ್​ಗಳನ್ನು ಟಿ20 ಕ್ರಿಕೆಟ್​​​​ನಲ್ಲಿ ದಾಖಲಿಸಿದ್ದಾರೆ. 2009ರಲ್ಲಿ ಟಿ20ಗೆ ಪದಾರ್ಪಣೆ ಮಾಡಿದ್ದ ಮಾರ್ಗನ್​, 2022ರ ಜನವರಿಯಲ್ಲಿ ತಮ್ಮ ಕೊನೆಯ ಟಿ20 ಆಡಿದ್ದರು.