PFI ಬ್ಯಾನ್​​ ಬೆನ್ನಲ್ಲೇ ಕೇಂದ್ರಕ್ಕೆ ಬಹುದೊಡ್ಡ ಸವಾಲ್-ಏನದು? ಸುಮ್ಮನೆ ಕೂರುವಂತಿಲ್ಲ NIA..

ಪಿಎಫ್​ಐ ಬ್ಯಾನ್​ ಏನೋ ಮಾಡಲಾಯ್ತು. ಹಾಗಂತ ಇಷ್ಟಕ್ಕೆ ಕೇಂದ್ರ ಗೃಹ ಇಲಾಖೆ ಕೈತೊಳೆದುಕೊಳ್ಳುವ ಹಾಗಿಲ್ಲ. ಇಷ್ಟು ದಿನ ಒಂದು, ಇನ್ಮೆಲೆ ಮತ್ತೊಂದು ಸವಾಲು ಹೆಗಲೇರಿದೆ.

ದುಷ್ಟ ಸಂಹಾರ, ಶಿಷ್ಟ ರಕ್ಷಕ.. ಇದು ಈ ನಾಡು ಪಾಲಿಸಿಕೊಂಡು ಬಂದ ನೆಲದ ಕಾನೂನು. ವಿಜಯ ದಶಮಿಗೂ ಮುನ್ನವೇ ಪಿಎಫ್​ಐನ ಪಾಪಕ್ಕೆ ಪ್ರತಿಫಲ ಸಿಕ್ಕಿದೆ. 15 ವರ್ಷಗಳ ಹಿಂದೆ ಅಸ್ತಿತ್ವಕ್ಕೆ ಬಂದ ಪಿಎಫ್​ಐ, ಈಗ ಇತಿಹಾಸದ ಕರಾಳ ಗರ್ಭ ಸೇರಿದೆ. ಸಾಕ್ಷಿಗಳು ಮಿಸ್​ ಆಗದಂತೆ ಪ್ಲಾನ್​ ಮಾಡಿ ರೇಡ್​ ಮಾಡಿದ ಎನ್​​ಐಎ, ತಿಂಗಳ ಹಿಂದೆಯೇ ಬ್ಯಾನ್​​​ಗಾಗಿ ಮುಹೂರ್ತ ಫಿಕ್ಸ್​ ಮಾಡಿತ್ತು.

ಪಿಎಫ್​ಐ ಬ್ಯಾನ್​ ಬಳಿಕ ಮುಂದಿದೆ ಕಾನೂನು ಕದನ!

ದಸರೆಯ ಹೊತ್ತಿಗೆ ಎನ್​ಐಎ ಒಂದು ರಣಬೇಟೆ ಆಡಿ ಮುಗಿಸಿದೆ. ಈಗ ಕಾನೂನು ಕಟ್ಟಳೆ ಬಹುದೊಡ್ಡ ಸವಾಲು ಎನ್​​​ಐಎ ಮುಂದಿದೆ. ದೇಶಾದ್ಯಂತ ರೇಡ್​​ ಮೂಲಕ ರೈಡ್​ ಮಾಡಿದ ಎನ್​​ಐಎ, ತಾನು ಸಂಗ್ರಹಿಸಿದ ಪಿಎಫ್​ಐನ ಪಾಪದ ಕೊಡವನ್ನ ಪ್ರಜೆಂಟ್​ ಮಾಡಬೇಕಿದೆ.

• PFI ಸಂಘಟನೆಯ ಬಲಾಬಲ

ದೇಶದ 22 ರಾಜ್ಯಗಳಲ್ಲಿ ಪಿಎಫ್​​​ಐ ಮತ್ತು ಅದರ ಸಹ ಸಂಘಟನೆಗಳು ಸಕ್ರಿಯವಾಗಿವೆ. 2017ರಲ್ಲಿ NIA ದಾಖಲೆಯ ಪ್ರಕಾರವೇ ದೇಶದಲ್ಲಿ 50 ಸಾವಿರ ಸದಸ್ಯರನ್ನ ಪಿಎಫ್​ಐ ಸಂಘಟನೆ ಹೊಂದಿದೆ. ನೆರೆಯ ಕೇರಳದಲ್ಲಿ ಪಿಎಫ್​​ಐ ಸಂಘಟನೆಯ ಮೇಲೆ ಸುಮಾರು ಒಂದೂವರೆ ಲಕ್ಷ ಜನ ಒಲವು ಹೊಂದಿದ್ದಾರೆ ಅಂತ ಎನ್​ಐಎ ತನ್ನ ದಾಖಲೆಯಲ್ಲಿ ಉಲ್ಲೇಖಿಸಿದೆ.

ಪ್ರತಿವರ್ಷ ಕೂಡ ಬಲವೃದ್ಧಿಸಿಕೊಳ್ತಿರುವ ಪಿಎಫ್​​ಐ ಶೇ.3-5ರಷ್ಟು ಸದಸ್ಯರ ಸಂಖ್ಯೆಯಲ್ಲಿ ಏರಿಕೆ ಆಗ್ತಿದೆ ಅಂತ ಮಾಹಿತಿ ಬಿಚ್ಚಿಟ್ಟಿದೆ. ಈ ಮಧ್ಯೆ, ಪಿಎಫ್​​ಐ ಬ್ಯಾನ್​​​ ಮಾಡಿ ಕೇಂದ್ರ ಗೃಹ ಇಲಾಖೆ ಕೈತೊಳೆದುಕೊಳ್ಳುವಂತಿಲ್ಲ. ಪುಂಡರ ಪುಂಡಾಟಕ್ಕೆ ಈಗಾಗಲೇ ಪ್ರಚಂಡ ಉತ್ತರ ಕೊಟ್ಟ ಕೇಂದ್ರ ಸರ್ಕಾರದ ಮುಂದೆ ಕಾನೂನಿನ ಸವಾಲುಗಳಿವೆ.

• ಮುಂದಿದೆ ಕಾನೂನು ಸಮರ!

ಪಿಎಫ್‌ಐ ಮತ್ತು ಅಂಗಸಂಸ್ಥೆಗಳ ಮೇಲೆ ಯುಎಪಿಎ ಕೇಸ್​​ ಬಿದ್ದಿದೆ. ಯುಎಪಿಎ ಸೆಕ್ಷನ್ 3ರ ಅಡಿಯಲ್ಲಿ ಬ್ಯಾನ್​​​ ಮಾಡಿ ಕೇಂದ್ರ ಗೃಹ ಇಲಾಖೆ ಅಧಿಸೂಚನೆ ಹೊರಡಿಸಿದೆ. ಈ ಅಧಿಸೂಚನೆ ಹೊರಬಿದ್ದ 30 ದಿನದಲ್ಲಿ ನ್ಯಾಯಮಂಡಳಿಗೆ ಆ ಬಗ್ಗೆ ವರದಿ ಸಲ್ಲಿಸಬೇಕು. ಈ ಸಂಘಟನೆಯನ್ನ ಏಕೆ ನಿಷೇಧಿಸಬಾರದೆಂದು ಲಿಖಿತ ಉತ್ತರ ಕೊಡಬೇಕಾಗುತ್ತದೆ. ಕಾನೂನುಬಾಹಿರ ಎಂದು ಘೋಷಿಸಲು ಕಾರಣ ನೀಡಬೇಕು.

Download the Newsfirstlive app

ಎನ್​ಐಎ, ಇ.ಡಿ, ರಾಜ್ಯ ಪೊಲೀಸ್​ ಪಡೆಗಳು ವಿವರಣೆ ಕೊಡಬೇಕು. ದೇಶ ವಿರೋಧಿ ಚಟುವಟಿಕೆಯನ್ನ ನ್ಯಾಯಮಂಡಳಿಯಲ್ಲಿ ಸಾಬೀತು ಮಾಡಬೇಕು. ಅಲ್ಲದೆ, ವಿದೇಶಿ ವಿದ್ರೋಹಿ ಸಂಘಟನೆಗಳ ಸಂಪರ್ಕದ ಬಗ್ಗೆ ಗೃಹ ಇಲಾಖೆ ಪುರಾವೆ ಸಲ್ಲಿಸಬೇಕಾಗುತ್ತದೆ. ಈ ಎಲ್ಲಾ ಲಿಖಿತ ವರದಿ ಸಲ್ಲಿಕೆ ಬಳಿಕ ಪಿಎಫ್‌ಐಗೆ ನ್ಯಾಯಮಂಡಳಿ ಶೋಕಾಸ್ ನೋಟಿಸ್ ಜಾರಿಮಾಡಲಿದೆ. ಅಲ್ಲದೆ, ಪಿಎಫ್‌ಐನ ಕಾನೂನು ತಂಡಕ್ಕೆ ತನ್ನ ವಾದ ಮಂಡಿಸಲು ನ್ಯಾಯ ಮಂಡಳಿ ಅವಕಾಶ ಕಲ್ಪಿಸಲಿದೆ. ವಾದ ಪ್ರತಿವಾದ ಬಳಿಕ ಪಿಎಫ್​​ಐ ಬ್ಯಾನ್​​​ ಬಗ್ಗೆ ತೀರ್ಮಾನ ಆಗಲಿದೆ. ಈ ಎಲ್ಲಾ ಪ್ರಕ್ರಿಯೆ ಪೂರ್ಣಗೊಳ್ಳಲು ಕನಿಷ್ಟ 6 ತಿಂಗಳು ಬೇಕಾಗಲಿದೆ.

ಪಿಎಫ್​​ಐ ಪಾಪದ ಕೊಡದ ಬಗ್ಗೆ ಕೊಡಬೇಕು ಮಾಹಿತಿ!

ಒಟ್ಟಾರೆ, ಪಿಎಫ್​ಐ ಸಂಘಟನೆಯ ಹಲವು ಕಾರ್ಯಗಳಿಗೆ ಈ ಸಮಯದಲ್ಲಿ ಬ್ರೇಕ್​ ಬೀಳಲಿದೆ. ಮತ್ತಷ್ಟು ರೇಡ್​ಗಳನ್ನ ಎನ್​ಐಎ ಆಯೋಜಿಸಬಹುದು. ಆದರೆ, ಪಿಎಫ್​ಐ ಒಂದು ದೇಶ ದ್ರೋಹಿ ಸಂಘಟನೆ ಅನ್ನೋದನ್ನ ನ್ಯಾಯಮಂಡಳಿಯಲ್ಲಿ ಸರ್ಕಾರ ಸಾಕ್ಷಿ ಸಮೇತ ರುಜುಪಡಿಸಬೇಕು.