ಟೀಮ್​ ಇಂಡಿಯಾಕ್ಕೆ ಅಜೇಯ ಓಟ ಮುಂದುವರೆಸೋ ತವಕ.!

2016ರಲ್ಲಿ ಟಿ20 ವಿಶ್ವಕಪ್​ಗೆ ಬಂದಿದ್ದ ಪಾಕಿಸ್ತಾನ​ ಸೋತು ಹೋಗಿತ್ತು

ವಿಶ್ವಕಪ್​ನಲ್ಲಿ ಪಾಕ್​-ಭಾರತ ಎದುರಾಗೋದು ಎಷ್ಟು ಪಂದ್ಯ ಗೊತ್ತಾ?

ವಿಶ್ವಕಪ್​ ಶೆಡ್ಯೂಲ್​ ರಿಲೀಸ್​ ಆಗಿದ್ದೇ ಆಗಿದ್ದು, ಇಂಡೋ- ಪಾಕ್​ ಫೈಟ್​ನ ಕಿಡಿ ಹೊತ್ತಿದೆ. ಪ್ರತಿಷ್ಠೆಯ ಕದನದ ಕಾವು ಅಭಿಮಾನಿಗಳ ವಲಯದಲ್ಲಿ ಎಷ್ಟಿದೆ ಅಂದ್ರೆ ಎಲ್ಲಿ ನೋಡಿದ್ರೂ ಬದ್ಧವೈರಿಗಳ ನಡುವಿನ ಕಾದಾಟದ ಸುದ್ದಿಯದ್ದೇ ಚರ್ಚೆ. ಯಾಕಂದ್ರೆ ಈ ಬಾರಿ ಅಭಿಮಾನಿಗಳಿಗೆ ಡಬಲ್​ ಧಮಾಕಾ ಕಾದಿದೆ. 

ಭಾರತ -ಪಾಕಿಸ್ತಾನ ನಡುವಿನ ಪಂದ್ಯ ಅಂದರೆ, ಅದಕ್ಕಿರೋ ಗತ್ತೆ ಬೇರೆ. ಅದ್ರಲ್ಲೂ ಪ್ರತಿಷ್ಠೆಯ ವಿಶ್ವಕಪ್​ ಟೂರ್ನಿಯಲ್ಲಿ ಮುಖಾಮುಖಿ ಅಂದ್ರೆ, ಅದು ಕೇವಲ ಪಂದ್ಯವಾಗಿ ಉಳಿದಿರಲ್ಲ. ಇಲ್ಲಿ ಬ್ಯಾಟ್​ & ಬಾಲ್​ ವೆಪನ್​ಗಳಾಗಿ ಬದಲಾದ್ರೆ, ಇಡೀ ಮೈದಾನ ಅಕ್ಷರಶಃ ಯುದ್ಧ ಭೂಮಿಯಾಗಿ ಪರಿವರ್ತನೆಯಾಗುತ್ತೆ. ಒಂದೊಂದು ಎಸೆತ, ಒಂದೊಂದು ರನ್​ ಅಭಿಮಾನಗಳ ಹಾರ್ಟ್​​ ಬೀಟ್​​ ಜೋರಾಗಿಸುತ್ತದೆ.

ಭಾರತ- ಪಾಕಿಸ್ತಾನ​ ಕ್ರಿಕೆಟ್​​ ಫೀಲ್ಡ್​ನಲ್ಲಿ ಮುಖಾಮುಖಿ ಆಗ್ತಿವೆ ಅಂದ್ರೆ, ಇಡೀ ವಿಶ್ವವೇ ನೋಡೋಕೆ ಕಾದು ಕುಳಿತಿರುತ್ತೆ. ಯಾಕಂದ್ರೆ ಇಲ್ಲಿ ಸೋಲು ಅನ್ನೋ ಪದವನ್ನ ಯಾರು ಸಹಿಸಲ್ಲ. ಹೀಗಾಗಿಯೇ ಈ ಪಂದ್ಯದಲ್ಲಿ ಹೈವೋಲ್ಟೆಜ್​ ಟ್ರೀಟ್​ ಸಿಗುತ್ತೆ ಅನ್ನೋದು ಎಲ್ಲರ ನಿರೀಕ್ಷೆ. ಆ ನಿರೀಕ್ಷೆ ಹುಸಿಯಾಗಿದ್ದೇ ಇಲ್ಲ. ಇದಕ್ಕೆ ಕಳೆದ ವರ್ಷ ನಡೆದ ಟಿ20 ವಿಶ್ವಕಪ್ ಟೂರ್ನಿ ರೋಚಕ​ ಹಣಾಹಣಿಯೇ ಸಾಕ್ಷಿ.

ಇಂಡೋ- ಪಾಕ್​ ಫೈಟ್​​ಗೆ ಡೇಟ್​ ಫಿಕ್ಸ್​, ಫ್ಯಾನ್ಸ್​ ಫುಲ್​ ಖುಷ್​.!

ಈ ಬಾರಿಯ ಏಕದಿನ ವಿಶ್ವಕಪ್​ ಕದನದಲ್ಲಿ ಅಕ್ಟೋಬರ್​​ 15ರಂದು ಇಂಡೋ- ಪಾಕ್​ ಫೈಟ್​​ಗೆ ಐಸಿಸಿ ಮಹೂರ್ತ ಇಟ್ಟಿದೆ. ಇದರ ಬೆನ್ನಲ್ಲೇ ಫ್ಯಾನ್ಸ್​ ಫುಲ್​ ಖುಷ್​ ಆಗಿದ್ದಾರೆ. ಏಕದಿನ ವಿಶ್ವಕಪ್​ ಶೆಡ್ಯೂಲ್​ ಅನೌನ್ಸ್​ ಆಗಿದ್ದೇ ಆಗಿದ್ದು, ಸೋಷಿಯಲ್​ ಪ್ಲಾಟ್​​ಫಾರ್ಮ್​​ಗಳಲ್ಲಿ ಉಳಿದೆಲ್ಲ ಪಂದ್ಯಗಳಿಗಿಂತ ಹೆಚ್ಚು ಸದ್ದು ಮಾಡಿದ್ದು ಇಂಡೋ -ಪಾಕ್​ ಫೈಟ್​. ಅಭಿಮಾನಿಗಳ ವಲಯದಲ್ಲಿ ಈ ಪಂದ್ಯಕ್ಕೆ ಎಂತಾ ಕ್ರೇಜ್​ ಇದೆ ಅನ್ನೋದಕ್ಕೆ ಇದೇ ಬೆಸ್ಟ್​ ಎಕ್ಸಾಂಪಲ್​.

ಭಾರತದಲ್ಲೇ ಪಂದ್ಯ, ಗೆಲುವೊಂದೆ ಗುರಿ.!

ಹೇಳಿ-ಕೇಳಿ ಈ ಬಾರಿ ವಿಶ್ವಕಪ್​ ನಡೆಯುತ್ತಿರುವುದು ಭಾರತದಲ್ಲಿ. ಇನ್ನು ಕ್ರೆಜ್​ ಬಗ್ಗೆ ನಾವ್​ ಹೇಳ್ಬೇಕಾ?. ಅಕ್ಟೋಬರ್​ 15ಕ್ಕೆ ಅಹಮದಾಬಾದ್​ನ ನರೇಂದ್ರ ಮೋದಿ ಮೈದಾನ ಹೌಸ್​ಫುಲ್​ ಆಗೋದ್ರಲ್ಲಿ ಅನುಮಾನವೇ ಇಲ್ಲ. ಏಕದಿನ ವಿಶ್ವಕಪ್​ನಲ್ಲಿ ಈವರೆಗೆ ಇಂಡೋ -ಪಾಕ್​ ಒಟ್ಟು 7 ಬಾರಿ ಮುಖಾಮುಖಿ ಆಗಿವೆ. ಈವರೆಗೂ ಸೋಲು ಅನ್ನೋ ಪದದ ಸಮೀಪಕ್ಕೂ ಟೀಮ್​ ಇಂಡಿಯಾ ಹೋಗಿಲ್ಲ. ತವರಿನಲ್ಲಿ ನಡೆಯುವ ಈ ಟೂರ್ನಿಯಲ್ಲಿ ಭಾರತದ ಗುರಿ ಗೆಲುವೊಂದೆ.

7 ವರ್ಷದ ಬಳಿಕ ಭಾರತಕ್ಕೆ ಪಾಕ್​ ತಂಡ.!

2016 ಮಾರ್ಚ್​ 25, ಅದೇ ಕೊನೆಯ ಬಾರಿ ಪಾಕಿಸ್ತಾನ ಕ್ರಿಕೆಟ್​ ತಂಡ ಭಾರತದಲ್ಲಿ ಆಡಿದ್ದು. ಅಂದು ಪ್ಲೇಯಿಂಗ್​ ಇಲೆವೆನ್​ನಲ್ಲಿದ್ದ ಒಬ್ಬ ಆಟಗಾರ ಕೂಡ ಈಗ ಪಾಕ್​ ತಂಡದಲ್ಲೇ ಇಲ್ಲ. ಅಂದು, ಟಿ20 ವಿಶ್ವಕಪ್​ ಟೂರ್ನಿಗೆಂದು ಬಂದಿದ್ದ ಪಾಕ್​, 4 ಪಂದ್ಯ ಆಡಿ ಕೇವಲ 1 ಪಂದ್ಯ ಗೆದ್ದು ಹೀನಾಯ ಸೋಲುಂಡು ತವರಿಗೆ ತೆರಳಿತ್ತು.

ಅಭಿಮಾನಿಗಳಿಗೆ ಸಿಗುತ್ತಾ ಡಬಲ್​ ಟ್ರೀಟ್​​.?

ಅಕ್ಟೋಬರ್​​ 15ಕ್ಕೆ ನಡೆಯೋ ಒಂದು ಪಂದ್ಯದ ಡೇಟ್​ ಅಫಿಶಿಯಲ್​ ಆಗೇ ಫಿಕ್ಸ್​ ಆಗಿದೆ. ಅದು ಎಲ್ಲರಿಗೂ ಗೊತ್ತಿರೋ ಸತ್ಯ. ಆದ್ರೆ, ವಿಶ್ವಾದ್ಯಂತ ಫ್ಯಾನ್ಸ್​ ನಿರೀಕ್ಷೆ ಡಬಲ್​ ಆಗಿದೆ. ಅಂದ್ರೆ, ಟೂರ್ನಿಯಲ್ಲಿ 2 ಬಾರಿ ಇಂಡೋ- ಪಾಕ್​ ಮುಖಾಮುಖಿಯಾಗಲಿ ಅನ್ನೋದು ಫ್ಯಾನ್ಸ್​ ಮಹದಾಸೆಯಾಗಿದೆ. ಅದಕ್ಕೆ ಅವಕಾಶ ಇದೆ. ಒಂದು ವೇಳೆ ಅಂಕಪಟ್ಟಿಯ ಟಾಪರ್ ಆಗಿ ಒಂದು ತಂಡ, 4ನೇ ಸ್ಥಾನಿಯಾಗಿ ಒಂದು ತಂಡ ಸೆಮಿಫೈನಲ್​ಗೆ ಎಂಟ್ರಿ ಕೊಟ್ರೆ, ಮತ್ತೊಂದು ಇಂಡೋ -ಪಾಕ್​ ಹೈವೋಲ್ಟೆಜ್​ ಕದನ ಫಿಕ್ಸ್​.

ಅಭಿಮಾನಿಗಳಿಗೆ ನಾಯಕನ ವಾಗ್ದಾನ.!

ವಿಶ್ವಕಪ್​ ವೇಳಾಪಟ್ಟಿ ಪ್ರಕಟವಾಗ್ತಿದ್ದಂತೆ ಟೀಮ್​ ಇಂಡಿಯಾ ಕ್ಯಾಪ್ಟನ್​ ರೋಹಿತ್​ ಶರ್ಮಾ ಫ್ಯಾನ್ಸ್​ಗೆ ಪ್ರಾಮಿಸ್​ ಮಾಡಿದ್ದಾರೆ. ಈ ಬಾರಿ ತವರಲ್ಲೇ ವಿಶ್ವಕಪ್​ ನಡೀತಾ ಇರೋ ನಿಮಗೆಲ್ಲಾ ಖುಷಿ ಅಂತಿದೆ ಅಂತಾ ನಂಗೊತ್ತು. ನಾವು ಕೂಡ ಗೆಲುವಿಗೆ ಪಣ ತೊಟ್ಟು ಹೋರಾಡ್ತಿವಿ ಅಂತಾ ಮಾತು ಕೊಟ್ಟಿದ್ದಾರೆ. ಈ ಮೂಲಕ ಐಸಿಸಿ ಟ್ರೋಫಿ ಗೆಲುವಿನ ಬರಕ್ಕೆ ಬ್ರೇಕ್​ ಹಾಕೋ ಇರಾದೆ ವ್ಯಕ್ತಪಡಿಸಿದ್ದಾರೆ.

ಇಂಡೋ- ಪಾಕ್​ ಮುಖಾಮುಖಿ ಅಂದ್ರೆ ಯಾವಾಗ್ಲೂ ಟೀಮ್​ ಇಂಡಿಯಾನೆ ಗೆಲ್ಲೋ ಹಾಟ್​ ಫೇವರಿಟ್​​ ಅನ್ನೋ ಟಾಕ್​ ಶುರುವಾಗಿ ಬಿಡುತ್ತೆ. ಸದ್ಯ ವಿಶ್ವಕಪ್​ ಶೆಡ್ಯೂಲ್​ ಅನೌನ್ಸ್​ ಆಗ್ತಿದ್ದಂತೆ ಆಗಿರೋದು ಅದೇ. ಅದ್ರಲ್ಲೂ ಭಾರತದಲ್ಲೇ ಈ ಬಾರಿ ಟೂರ್ನಿ ನಡೆಯೋದ್ರಿಂದ ಭಾರತ ಗೆಲ್ಲುತ್ತೆ ಅನ್ನೋ ನಿರೀಕ್ಷೆ ದುಪ್ಪಟ್ಟಿದೆ. ಈ ನಿರೀಕ್ಷೆ ಆಟಗಾರರ ಮೇಲೆ ಒತ್ತಡವಾಗದಿರಲಿ ಅನ್ನೋದೆ ಎಲ್ಲರ ಆಶಯ.

ವಿಶೇಷ ಸೂಚನೆ: ಕ್ರಿಕೆಟ್‌ನ ಸುದ್ದಿಗಳಿಗಾಗಿ ಪ್ರತಿದಿನ ಬೆಳಗ್ಗೆ 8.27ಕ್ಕೆ ನ್ಯೂಸ್‌ ಫಸ್ಟ್‌ ಚಾನೆಲ್​​ನಲ್ಲಿ ‘ರನ್ ಭೂಮಿ’ ವೀಕ್ಷಿಸಿ