ಕೊಹ್ಲಿ ಪಾಲಿಗೆ ಇದೇ ನೋಡಿ ಕನಸಿನ ವಿಶ್ವಕಪ್​..!

ಅತ್ಯಮೋಘ ಫಾರ್ಮ್​ನಲ್ಲಿ ವಿರಾಟ ಆರ್ಭಟ

ಸಾಲು ಸಾಲು ಸಾಧನೆಗಳು, ದಾಖಲೆಗಳು ಬ್ರೇಕ್​

15 ವರ್ಷಗಳ ಸುದೀರ್ಘ ಕ್ರಿಕೆಟ್​ ಜರ್ನಿಯಲ್ಲಿ ವಿರಾಟ್​ ಕೊಹ್ಲಿ 3 ಐಸಿಸಿ ಏಕದಿನ ವಿಶ್ವಕಪ್​ ಟೂರ್ನಿಯನ್ನು ಆಡಿದ್ದಾರೆ. ಟಿ20 ವಿಶ್ವಕಪ್​, ಟೆಸ್ಟ್​ ಚಾಂಪಿಯನ್​ಶಿಪ್​ನಲ್ಲೂ ಖದರ್​​ ತೋರಿದ್ದಾರೆ. ಈ ಬಾರಿ ಆಡ್ತಿರೋ 4ನೇ ಏಕದಿನ ವಿಶ್ವಕಪ್​ ಟೂರ್ನಿಯಿದ್ಯಲ್ಲ.. ಇದು ವಿರಾಟ್​​ ಪಾಲಿನ ಕನಸಿನ ಟೂರ್ನಿ. ದಾಖಲೆಗಳ ಒಡೆಯ, ಶತಕದ ಸರದಾರ ಕೊಹ್ಲಿಗೆ ಈ ಟೂರ್ನಿ ತುಂಬಾನೇ ಸ್ಪೆಷಲ್ ಆಗಿದೆ​.

ಭಾರತೀಯ ಕ್ರಿಕೆಟ್​ ಲೋಕದಲ್ಲಿ ಸದ್ಯ ಎರಡೇ ಸುದ್ದಿಗಳ ಆರ್ಭಟ. ಒಂದು ಟೀಮ್​ ಇಂಡಿಯಾ ಅಜೇಯವಾಗಿ ಸೆಮಿಫೈನಲ್​ ಪ್ರವೇಶಿಸಿದ್ದಾದ್ರೆ, ಇನ್ನೊಂದು ವಿರಾಟ್​ ಕೊಹ್ಲಿಯ ದಾಖಲೆಯ ಶತಕ. ವಿರಾಟ್​ 50ನೇ ಸೆಂಚುರಿ ಸಿಡಿಸಿ ದಿನವೇ ಉರುಳಿದೆ. ಅಭಿಮಾನಿಗಳು ಮಾತ್ರ ಇನ್ನೂ ಅದೇ ಸೆಂಚುರಿಯ ಗುಂಗಲ್ಲೇ ಇದ್ದಾರೆ.

ಕಿಂಗ್​ ಕೊಹ್ಲಿ ಪಾಲಿಗೆ ಇದೇ ನೋಡಿ ಕನಸಿನ ವಿಶ್ವಕಪ್

ಮೈದಾನ ಕ್ಕಿಕ್ಕಿರಿದು ತುಂಬಿತ್ತು. ಸ್ಟ್ಯಾಂಡ್​ನಲ್ಲಿ ಸಾಲು ಸಾಲು ಸೆಲೆಬ್ರಿಟಿಗಳು ನೆರೆದಿದ್ರು. ಇಷ್ಟು ದಿನ ಆ ದಾಖಲೆಯ ಒಡೆಯನಾಗಿದ್ದ ಸ್ವತಃ ಕ್ರಿಕೆಟ್​ ದೇವರು ಸಚಿನ್​ ತೆಂಡುಲ್ಕರ್​ ಕೂಡ ಈ ಶತಕಕ್ಕೆ ಸಾಕ್ಷಿಯಾಗಿದ್ರು. ಅಂತಾ ಹೈ ಪ್ರೆಶರ್​ ಗೇಮ್​ನಲ್ಲಿ ವಿರಾಟ್​ ಕೊಹ್ಲಿ ಸಿಡಿಸಿದ್ದು ಅವಿಸ್ಮರಣೀಯ ಶತಕ. ವಾಂಖೆಡೆ ಮೈದಾನದಲ್ಲಿ ನ್ಯೂಜಿಲೆಂಡ್​ ತಂಡವನ್ನ ಬೆಂಡೆತ್ತಿದ ವಿರಾಟ್​ ಕೊಹ್ಲಿ ಯಾರೂ ಮಾಡದ ಸಾಧನೆ ಮಾಡಿದ್ರು. ಎಲ್ಲರೂ ಅಸಾಧ್ಯ ಅಂದಿದ್ದ ಸಚಿನ್​ ದಾಖಲೆಯನ್ನ ಉಡಾಯಿಸಿದ್ರು. 50 ಸೆಂಚುರಿಗಳ ಸಾಧನೆ ಅಂದ್ರೆ ಅದು ಸಾಮಾನ್ಯದ ಮಾತಾ?

‘ಸೆಮಿಸ್​ ಫೋಬಿಯಾ’ಗೆ ಬ್ರೇಕ್​ ಹಾಕಿದ ವಿರಾಟ್​

ಈ ವಿಶ್ವಕಪ್​ ಲೀಗ್​ ಹಂತದಲ್ಲಿ ವಿರಾಟ್​ ಅದ್ಭುತ ಆಟವಾಡಿದ್ರೂ ಅಭಿಮಾನಿಗಳಲ್ಲಿ ಸೆಮಿಫೈನಲ್​ ಪಂದ್ಯಕ್ಕೂ ಮುನ್ನ ಆತಂಕವಿತ್ತು. ಈ ಹಿಂದಿನ ಏಕದಿನ ವಿಶ್ವಕಪ್​ ಸೆಮಿಸ್​ ಪಂದ್ಯಗಳಲ್ಲಿ ಕಿಂಗ್​ ಕೊಹ್ಲಿ ಆ ರೀತಿಯಲ್ಲಿ ಮುಗ್ಗರಿಸಿದ್ರು. 2011ರ ವಿಶ್ವಕಪ್​ ಸೆಮಿಸ್​ ಫೈಟ್​ನಲ್ಲಿ 9 ರನ್​ಗಳಿಸಿದ್ದ ಕೊಹ್ಲಿ 2015, 2019ರ ವಿಶ್ವಕಪ್ ಸೆಮಿಸ್​ನಲ್ಲಿ ಕೇವಲ 1 ರನ್​ಗೆ ಶರಣಾಗಿದ್ರು. ಸೆಮಿಸ್​ ಫೋಬಿಯಾ ಕೊಹ್ಲಿಯನ್ನ ಅಷ್ಟು ಕಾಡಿತ್ತು. ಇದಕ್ಕೆ ಕಿಂಗ್​ ಕೊಹ್ಲಿ ಈ ಬಾರಿ ಬ್ರೇಕ್​ ಹಾಕಿದ್ರು.

ಏಕದಿನ ವಿಶ್ವಕಪ್ ಟೂರ್ನಿ​ಗೆ ಕೊಹ್ಲಿಯೇ ಕಿಂಗ್​

ಏಕದಿನ ಮಾದರಿಯ ಶತಕದ ದಾಖಲೆ ಮಾತ್ರವಲ್ಲ. ಏಕದಿನ ವಿಶ್ವಕಪ್​ ಟೂರ್ನಿಯೊಂದರಲ್ಲಿ ಹೆಚ್ಚು ರನ್​ಗಳಿಸಿದ್ದ ಸಚಿನ್​ ದಾಖಲೆಯನ್ನೂ ವಿರಾಟ್​ ಈ ಬಾರಿ ಧ್ವಸಂಗೊಳಿದ್ದಾರೆ. 2003ರ ವಿಶ್ವಕಪ್​ನಲ್ಲಿ 11 ಪಂದ್ಯ ಆಡಿದ್ದ ಸಚಿನ್​​ 673 ರನ್​ ಸಿಡಿಸಿದ್ರು. ಈ ಬಾರಿ 10 ಪಂದ್ಯಗಳಲ್ಲೇ 711 ರನ್​ ಸಿಡಿಸಿರೋ ವಿರಾಟ್​ ಮಾಸ್ಟರ್​ ದಾಖಲೆಯನ್ನ ಚಿಂದಿ ಉಡಾಯಿಸಿದ್ದಾರೆ.

ಯಾರೂ ಮಾಡದ ಸಾಧನೆ ಮಾಡಿದ್ದಾರೆ ವಿರಾಟ್​

ಈ ಬಾರಿಯ ವಿಶ್ವಕಪ್​ ಟೂರ್ನಿಯಲ್ಲಿ ವಿರಾಟ ಪರ್ವವೇ ನಡೆದಿದೆ. ವಿರಾಟ ರೂಪ ದರ್ಶನ ಮಾಡಿದ ಎದುರಾಳಿಗಳು ಸುಟ್ಟು ಹೋಗಿದ್ದಾರೆ. ಆಡಿರೋ 10 ಪಂದ್ಯಗಳ ಪೈಕಿ 8 ಪಂದ್ಯಗಳಲ್ಲಿ ಕಿಂಗ್​ ಕೊಹ್ಲಿ 50+ ರನ್​ಗಳಿಸಿದ್ದಾರೆ. ಏಕದಿನ ವಿಶ್ವಕಪ್​ ಟೂರ್ನಿಯ ಇತಿಹಾಸದಲ್ಲೇ ಯಾರೂ ಈ ಸಾಧನೆಯನ್ನ ಮಾಡಿಲ್ಲ ಗೊತ್ತಾ?

ಮೆಗಾ ಟೂರ್ನಿಯಲ್ಲಿ ವಿರಾಟ ಪರ್ವ..!

ಈ ಬಾರಿಯ ಟೂರ್ನಿ ಕಿಂಗ್​ ಕೊಹ್ಲಿ ಪಾಲಿಗೆ ಡ್ರೀಮ್​ ಟೂರ್ನಿ ಅನ್ನೋದಕ್ಕೆ ಈ ಟೂರ್ನಿಯಲ್ಲಿ ಮಾಡಿರುವ ಸಾಧನೆಯೇ ಇದಕ್ಕೆ ಬೆಸ್ಟ್​ ಎಕ್ಸಾಂಪಲ್​. ಈ ವರೆಗೆ ಆಡಿದ 10 ಪಂದ್ಯಗಳಲ್ಲಿ ಕಿಂಗ್​ ಕೊಹ್ಲಿ ಮಾಡಿರೋದು ಅತ್ಯಮೋಘ ಸಾಧನೆ.
ಪ್ರಸಕ್ತ ಟೂರ್ನಿಯಲ್ಲಿ ವಿರಾಟ್​

ಟೂರ್ನಿಯಲ್ಲಿ 10 ಪಂದ್ಯಗಳನ್ನಾಡಿರುವ ವಿರಾಟ್​ ಕೊಹ್ಲಿ, ಬರೋಬ್ಬರಿ 101.57ರ ಸರಾಸರಿಯಲ್ಲಿ 711 ರನ್​ ಸಿಡಿಸಿದ್ದಾರೆ. 3 ಶತಕ, 5 ಅರ್ಧಶತಕಗಳ ಇನ್ನಿಂಗ್ಸ್​ ಕಟ್ಟಿದ್ದಾರೆ.

ಕೊನೆಯ ವಿಶ್ವಕಪ್​, ಅದೊಂದೇ ಅಲ್ಟಿಮೇಟ್​ ಕನಸು

ನಂಬೋಕ್ಕೆ ಕಷ್ಟ ಆದ್ರೂ ವಾಸ್ತವವನ್ನ ಅರ್ಥ ಮಾಡಿಕೊಳ್ಳಲೇ ಬೇಕು. 35 ವರ್ಷದ ವಿರಾಟ್​ ಕೊಹ್ಲಿ ಫುಲ್​ ಫಿಟ್​ ಆಗಿದ್ದಾರೆ. ಫಾರ್ಮ್​ನಲ್ಲೂ ಇದ್ದಾರೆ. ಆದ್ರೆ, ಮುಂದಿನ ವಿಶ್ವಕಪ್​ ಆಡೋದು ಬಹುತೇಕ ಅನುಮಾನವೇ. ಹೀಗಾಗಿ ಈ ಬಾರಿ ತವರಿನಂಗಳದಲ್ಲಿ ವಿಶ್ವಕಪ್​ ಗೆಲ್ಲಬೇಕು ಅನ್ನೋದು ಕೊಹ್ಲಿಯ ಅಲ್ಟಿಮೇಟ್​ ಕನಸು. 12 ವರ್ಷಗಳ ಕೊರಗಿದೆ ಬ್ರೇಕ್​​ ಹಾಕೋದೆ ಮನದಾಳದ ಹಂಬಲ..! ಅದಕ್ಕಾಗಿಯೇ ಈ ಕೆಚ್ಚೆದೆಯ ಹೋರಾಟ.. ಕೊಹ್ಲಿಯ ಆ ಕನಸು ನನಸಾಗಲಿ ಅನ್ನೋದೇ ಅಸಂಖ್ಯ ಅಭಿಮಾನಿಗಳ ಪ್ರಾರ್ಥನೆ ಕೂಡ.

ವಿಶೇಷ ಸೂಚನೆ: ಕ್ರಿಕೆಟ್​​ನ ವಿಶೇಷ ಸುದ್ದಿಗಳಿಗಾಗಿ ವೀಕ್ಷಿಸಿ ‘ರನ್ ಭೂಮಿ’ ಪ್ರತಿದಿನ ಬೆಳಗ್ಗೆ 8.27ಕ್ಕೆ ನ್ಯೂಸ್ ಫಸ್ಟ್ ಚಾನೆಲ್