ಮೊದಲ ಪಂದ್ಯದಲ್ಲೇ ಮುಖಭಂಗ.. ಹೇಗಿತ್ತು ಸುಂದರ್ ಏಕಾಂಗಿ ಹೋರಾಟ..?

ಬ್ಯಾಟಿಂಗ್​ ಡ್ಯಾರಿಲ್ ಮಿಚೆಲ್ ಅಬ್ಬರ, ಬೌಲಿಂಗ್​ನಲ್ಲಿ ಕ್ಯಾಪ್ಟನ್ ಮಿಚೆಲ್ ಸ್ಯಾಂಟ್ನರ್ ಸ್ಪಿನ್ ಮ್ಯಾಜಿಕ್​. ಪರಿಣಾಮ ಟೀಮ್ ಇಂಡಿಯಾ ವಿರುದ್ಧದ ಮೊದಲ T20 ಪಂದ್ಯದಲ್ಲಿ ನ್ಯೂಜಿಲೆಂಡ್ ಗೆದ್ದು ಬೀಗಿದೆ.

ಕಿವೀಸ್​ಗೆ ಸಿಕ್ತು ಉತ್ತಮ ಆರಂಭ

Download the Newsfirstlive app

ರಾಂಚಿಯ JSCA ಸ್ಟೇಡಿಯಂನಲ್ಲಿ ನಡೆದ ಪಂದ್ಯದಲ್ಲಿ ಟಾಸ್,​​ ಟೀಮ್ ಇಂಡಿಯಾ ಪಾಲಾಯ್ತು. ಕ್ಯಾಪ್ಟನ್ ಹಾರ್ದಿಕ್ ಪಾಂಡ್ಯ, ಫೀಲ್ಡಿಂಗ್ ಆಯ್ಕೆ ಮಾಡಿಕೊಂಡ್ರು. ಇನ್ನಿಂಗ್ಸ್​ ಆರಂಭಿಸಿದ ನ್ಯೂಜಿಲೆಂಡ್​ಗೆ, ಆರಂಭಿಕರಾದ ಫಿನ್​ ಅಲೆನ್, ಡಿವಾನ್ ಕಾನ್ವೆ, ಉತ್ತಮ ಆರಂಭವನ್ನೇ ಒದಗಿಸಿದ್ರು. ಫಿನ್ ಅಲೆನ್, ಅಬ್ಬರದ ಬ್ಯಾಟಿಂಗ್ ಮೂಲಕ ಮಿಂಚಿದ್ರು. 23 ಎಸೆತಗಳಲ್ಲಿ 4 ಫೋರ್, 2 ಸಿಕ್ಸರ್​ ಸಹಿತ 35 ರನ್​ ಗಳಿಸಿದ ಅಲೆನ್, ವಾಷಿಂಗ್ಟನ್ ಸುಂದರ್​ಗೆ ವಿಕೆಟ್​ ಒಪ್ಪಿಸಿದ್ರು.

ಮಾರ್ಕ್ ಚಪ್​ಮ್ಯಾನ್, ಡಕೌಟ್ ಆದ್ರು. ತಮ್ಮದೇ ಬೌಲಿಂಗ್​ನಲ್ಲಿ ಸುಂದರ್, ಅದ್ಭುತ ರಿಟರ್ನ್​ ಕ್ಯಾಚ್ ಮೂಲಕ, ಚಪ್​ಮ್ಯಾನ್​ಗೆ ಪೆವಿಲಿಯನ್ ದಾರಿ ತೋರಿಸಿದ್ರು. 3ನೇ ವಿಕೆಟ್​ಗೆ ಡಿವಾನ್ ಕಾನ್ವೆ, ಗ್ಲೆನ್ ಫಿಲಿಪ್ಸ್​​ 60 ರನ್​ ಕಲೆಹಾಕಿದ್ರು. ಕಾನ್ವೆ, ಸ್ಫೋಟಕ ಬ್ಯಾಟಿಂಗ್ ಮೂಲಕ, ಅಬ್ಬರಿಸಿದ್ರು. ಫಿಲಿಪ್ಸ್​​ 17 ರನ್​ಗಳಿಸಿ ಔಟಾದ್ರು. ಕಾನ್ವೆ ಅರ್ಧಶತಕಗಳಿಸಿ, ಆರ್ಷ್​ದೀಪ್​ ಸಿಂಗ್​ಗೆ ಬಲಿಯಾದ್ರು. ಮೈಕಲ್ ಬ್ರೆಸ್​ವೆಲ್ ರನೌಟ್​ ಆಗಿ, ಬಂದಷ್ಟೇ ಬೇಗ ಪೆವಿಲಿಯನ್ ಸೇರಿದ್ರು.

ಕೊನೆಯಲ್ಲಿ ಡ್ಯಾರಿಲ್ ಮಿಚೆಲ್ ಆರ್ಭಟ

5ನೇ ಕ್ರಮಾಂಕದಲ್ಲಿ ಬ್ಯಾಟಿಂಗ್ ಮಾಡಲಿಳಿದ ಡ್ಯಾರಿಲ್ ಮಿಚೆಲ್, ಸಿಡಿಲಬ್ಬರದ ಬ್ಯಾಟಿಂಗ್ ಮೂಲಕ ಆರ್ಭಟಿಸಿದ್ರು. ಮೈದಾನದಲ್ಲಿ ಬೌಂಡರಿ, ಸಿಕ್ಸರ್​ಗಳ ಸುರಿಮಳೆಗೈದ್ರು. ಆರ್ಷ್​ದೀಪ್​ ಸಿಂಗ್​ ಎಸೆದ ಕೊನೆಯ ಓವರ್​ನಲ್ಲಿ ಮಿಚೆಲ್, 3 ಸಿಕ್ಸರ್​ 1 ಫೋರ್ ಚಚ್ಚಿದ್ರು. ಈ ಓವರ್​ನಲ್ಲಿ 27 ರನ್ ಹರಿದು ಬಂದ್ರು. ಮಿಚೆಲ್ ಆರ್ಭಟದಿಂದಾಗಿ ನ್ಯೂಜಿಲೆಂಡ್ 20 ಓವರ್​ಗಳಲ್ಲಿ, 6 ವಿಕೆಟ್​ ನಷ್ಟಕ್ಕೆ 176 ರನ್ ಗಳಿಸ್ತು. ಸುಂದರ್, ಕುಲ್​ದೀಪ್ ಯಾದವ್​ ಅದ್ಭುತ ಸ್ಪೆಲ್ ಮೂಲಕ ಮಿಂಚಿದ್ರು.

ಟೀಮ್ ಇಂಡಿಯಾಗೆ ಆರಂಭಿಕ ಆಘಾತ..!

177 ರನ್​ಗಳ ಟಾರ್ಗೆಟ್​ ಬೆನ್ನಟ್ಟಿದ ಟೀಮ್ ಇಂಡಿಯಾಗೆ ಉತ್ತಮ ಆರಂಭ ಸಿಗಲಿಲ್ಲ. ಲೋಕಲ್ ಬಾಯ್ ಇಶನ್ ಕಿಶನ್, ಕೇವಲ 4 ರನ್​ಗಳಿಸಿ ಔಟಾದ್ರು. ರಾಹುಲ್ ತ್ರಿಪಾಠಿ ಡಕೌಟ್ ಆದ್ರು. ಶುಭ್​ಮನ್​ ಗಿಲ್ ಕೂಡ ಸಿಂಗಲ್​ ಡಿಜಿಟ್​​​ಗೆ ಜಾಗ ಖಾಲಿ ಮಾಡಿದ್ರು.

4ನೇ ವಿಕೆಟ್​ಗೆ ಸೂರ್ಯ-ಹಾರ್ದಿಕ್ ಅರ್ಧಶತಕದ ಜೊತೆಯಾಟ

4ನೇ ವಿಕೆಟ್​ಗೆ ಜೊತೆಯಾದ ಸೂರ್ಯಕುಮಾರ್ ಯಾದವ್, ಕ್ಯಾಪ್ಟನ್​ ಹಾರ್ದಿಕ್ ಪಾಂಡ್ಯ, 68 ರನ್​ಗಳ ಜೊತೆಯಾಟವಾಡಿದ್ರು. ಸೂರ್ಯಕುಮಾರ್ ಎಂದಿನಂತೆ ಅದ್ಭುತ ಬ್ಯಾಟಿಂಗ್ ಮೂಲಕ ಮಿಂಚಿದ್ರು. ಕಿವೀಸ್ ಬೌಲರ್​ಗಳಿಗೆ ನಡುಕ ಹುಟ್ಟಿಸಿದ್ರು. ಅರ್ಧಶತಕದತ್ತ ಮುನ್ನುಗ್ಗುತ್ತಿದ್ದ ಸೂರ್ಯ, 47 ರನ್​ಗಳಿಸಿ ಸ್ಪಿನ್ನರ್ ಐಶ್ ಸೋಧಿಗೆ ವಿಕೆಟ್ ಒಪ್ಪಿಸಿದ್ರು. ಸೂರ್ಯ ಔಟಾದ ನಂತರ, ಹಾರ್ದಿಕ್ ಪಾಂಡ್ಯ ಕೂಡ ಹೆಚ್ಚು ಹೊತ್ತು ನಿಲ್ಲಲಿಲ್ಲ. ದೀಪಕ್ ಹೂಡ ಹೋರಾಟ 10 ರನ್​ಗೆ ಅಂತ್ಯವಾಯ್ತು. ಮಾವಿ 2 ರನ್​ಗಳಿಸಿ ಔಟಾದ್ರು. ಕುಲ್​ದೀಪ್ ಯಾದವ್ ಡಕೌಟ್ ಆದ್ರು.

ಒಂದೆಡೆ ಮೇಲಿಂದ ಮೇಲೆ ವಿಕೆಟ್ ಬೀಳ್ತಿದ್ರು, ವಾಷಿಂಗ್ಟನ್ ಸುಂದರ್ ಏಕಾಂಗಿ ಹೋರಾಟ ನಡೆಸಿದ್ರು. ಜಸ್ಟ್​ 28 ಎಸೆತಗಳಲ್ಲಿ 3 ಭರ್ಜರಿ ಸಿಕ್ಸರ್, 5 ಫೋರ್​ಗಳಿಂದ ಭರ್ತಿ ಅರ್ಧಶತಕ ಸಿಡಿಸಿ ಔಟಾದ್ರು. ಅಂತಿಮವಾಗಿ ಟೀಮ್ ಇಂಡಿಯಾ, 20 ಓವರ್​ಗಳಲ್ಲಿ 9 ವಿಕೆಟ್​ ನಷ್ಟಕ್ಕೆ 155 ರನ್​ಗಳಿಸ್ತು. 21 ರನ್​ಗಳಿಂದ ನ್ಯೂಜಿಲೆಂಡ್ ಗೆಲುವು ಸಾಧಿಸ್ತು.

ವಿಶೇಷ ಸೂಚನೆ: ಎಲ್ಲಾ DTH & Cableನಲ್ಲಿ ನ್ಯೂಸ್​ಫಸ್ಟ್​ ಚಾನೆಲ್​​​ ಲಭ್ಯ