ಈ ಎಡಗೈ ಬ್ಯಾಟರ್ಸ್​ ಹುಟ್ಟಿರೋದು ನವೆಂಬರ್​ ತಿಂಗಳನಲ್ಲಿ..!

ಕ್ರಿಕೆಟ್​ನ ಎಲ್ಲಾ ವಿಚಾರದಲ್ಲೂ ರೈನಾ, ತಿಲಕ್​ ವರ್ಮಾಗೆ ಸಾಮ್ಯತೆ

T20I ಡೆಬ್ಯು ಮ್ಯಾಚ್​ನ ಮೊದಲ ಓವರ್​ನಲ್ಲಿ ವಿಕೆಟ್, 2 ಕ್ಯಾಚ್​

ಗುರು ಹಾಕಿಕೊಟ್ಟ ಮಾರ್ಗದಲ್ಲಿ ಎಡವದೆ ನಡೆಯೋದು ಕಷ್ಟ. ಅಂತಹದ್ರಲ್ಲಿ ಗುರುವಿನ ಹಾದಿಯನ್ನ ಡಿಟ್ಟೋ ಫಾಲೋ ಮಾಡೋಕಾಗುತ್ತಾ? ಇದನ್ನ ಗುರುವಿನ ಹಾದಿಯಲ್ಲಿ ಶಿಷ್ಯ ಅನ್ನಬೇಕೋ ಅಥವಾ ಕಾಕತಾಳೀಯ ಅನ್ನಬೇಕೋ ಕನ್ಫೂಷನ್​ ಆಗ್ತಿದೆ. ಯಂಗ್​ ಬ್ಯಾಟರ್ ತಿಲಕ್​ ವರ್ಮಾ ಅವರು ತನ್ನ ಗುರು ರೈನಾರನ್ನ ಹೇಗೆ ಫಾಲೋ ಮಾಡ್ತೊರೋ ಗೊತ್ತಾ?

ತಿಲಕ್​ ವರ್ಮಾ ಟೀಮ್​ ಇಂಡಿಯಾದ ಸದ್ಯದ ಸೆನ್ಸೇಷನ್​. ಆಡಿದ ಒಂದೇ ಸಿರೀಸ್​ನಿಂದ ಭವಿಷ್ಯದ ಭರವಸೆ ಅನಿಸಿಕೊಂಡಿರುವ ಕ್ರಿಕೆಟಿಗ. ತಿಲಕ್ ಆಟವನ್ನ ನೋಡಿದ ಪ್ರತಿಯೊಬ್ಬರೂ ಲೆಜೆಂಡ್​ ಸುರೇಶ್​ ರೈನಾಗೆ ಹೋಲಿಕೆ ಮಾಡ್ತಿದ್ದಾರೆ. ಅಸಲಿ ವಿಚಾರ ಏನಪ್ಪಾ ಅಂದ್ರೆ, ಲೆಜೆಂಡ್​ ರೈನಾ ತಿಲಕ್​ ವರ್ಮಾ ಪಾಲಿನ ಗುರು.

ಕ್ರಿಕೆಟರ್​ ಆಗಬೇಕು ಎಂದು ಕನಸು ಕಂಡಾಗಿನಿಂದ ಹಿಡಿದು ಈವರೆಗೂ ತಿಲಕ್, ರೈನಾರನ್ನು​ ಫಾಲೋ ಮಾಡಿರೋದು. ಅದೆಷ್ಟು ಮಟ್ಟಿಗೆ ಅಂದ್ರೆ ಒಂದಿಂಚೂ ಆ ಕಡೆ, ಈ ಕಡೆ ಇಲ್ಲ ಅಂತಾರಲ್ಲಾ ಹಾಗೇ. ಎಡಗೈ ಬ್ಯಾಟ್ಸ್​ಮನ್​, ಫಾರ್ಟ್​​ ಟೈಮ್​ ಬೌಲರ್​, ಸಾಲಿಡ್​ ಫೀಲ್ಡರ್​, ಹುಟ್ಟಿದ್ದು ನವೆಂಬರ್​​ ಅನ್ನೋದನೆಲ್ಲ ಬಿಟ್ಟು ಬಿಡಿ. ಸಾಧನೆ ವಿಚಾರದಲ್ಲೂ ಸೇಮ್​ ಟು ಸೇಮ್​. ಅಷ್ಟರ ಮಟ್ಟಿಗೆ ಸಾಮ್ಯತೆಯಿದೆ.

2ನೇ ಐಪಿಎಲ್​ ಪಂದ್ಯದಲ್ಲೇ ಅರ್ಧಶತಕ

2008ರ ಉದ್ಘಾಟನಾ ಆವೃತ್ತಿಯ ಐಪಿಎಲ್​ನಲ್ಲಿ ಆಡಿದ 2ನೇ ಪಂದ್ಯದಲ್ಲೇ ಮುಂಬೈ ಇಂಡಿಯನ್ಸ್​ ವಿರುದ್ಧ ಸುರೇಶ್​ ರೈನಾ ಹಾಫ್​ ಸೆಂಚುರಿ ಸಿಡಿಸಿದ್ರು. ತಿಲಕ್​ ವರ್ಮಾ ಕೂಡ ಐಪಿಎಲ್​ ಟೂರ್ನಿಯಲ್ಲಿ ಆಡಿದ 2ನೇ ಪಂದ್ಯದಲ್ಲಿ ರಾಜಸ್ಥಾನ್​ ವಿರುದ್ಧ ಅರ್ಧಶತಕ ಸಿಡಿಸಿದ್ರು. ಒಂದು ಚೈಂಜ್​ ಏನಪ್ಪಾ ಅಂದ್ರೆ, ರೈನಾ ಮುಂಬೈ ವಿರುದ್ಧ ಅರ್ಧ ಶತಕಗಳಿಸಿದ್ರೆ, ತಿಲಕ್​ ಮುಂಬೈ ಪರ ಹಾಫ್​ ಸೆಂಚುರಿ ದಾಖಲಿಸಿದ್ರು.

ಮೊದಲ 2 IPL ಸೀಸನ್​​ನಲ್ಲಿ 350+ ರನ್​​

2008 ಹಾಗೂ 2009ರ ಐಪಿಎಲ್​ ಸೀಸನ್​ನಲ್ಲಿ ಸಾಲಿಡ್​ ಆಟವಾಡಿದ್ದ ರೈನಾ ಎರಡೂ ಆವೃತ್ತಿಗಳಲ್ಲಿ 350+ ರನ್​ ಸಿಡಿಸಿದ್ರು. ಕಾಕತಾಳೀಯ ಎಂಬಂತೆ 2022ರಲ್ಲಿ ಐಪಿಎಲ್​​ ಡೆಬ್ಯು ಮಾಡಿದ್ದ ತಿಲಕ್​, 2022 ಹಾಗೂ 2023 ಎರಡೂ ಸೀಸನ್​ನಲ್ಲಿ 350+ ರನ್​​ ಕೊಳ್ಳೆ ಹೊಡೆದ್ರು.

T20I ಡೆಬ್ಯು ಮ್ಯಾಚ್​ನಲ್ಲಿ 2 ಕ್ಯಾಚ್​​

ಸುರೇಶ್​ ರೈನಾ ಹಾಗೂ ತಿಲಕ್​ ವರ್ಮಾ ಟಿ20 ಅಂತರಾಷ್ಟ್ರೀಯ ಮಾದರಿಗೆ ಡೆಬ್ಯು ಮಾಡಿದ್ದು ತಮ್ಮ 20ನೇ ವಯಸ್ಸಿನಲ್ಲಿ. ಯಂಗ್​ಗನ್​ಗಳಾಗಿ ಎಂಟ್ರಿ ಕೊಟ್ಟ ಇಬ್ರೂ ಡೆಬ್ಯೂ ಮ್ಯಾಚ್​ನಲ್ಲೇ ಕ್ಯಾಚ್​ ಹಿಡಿದು ಕಮಾಲ್​ ಮಾಡಿದ್ರು. ಸೌತ್​ ಆಫ್ರಿಕಾ ವಿರುದ್ಧ ಡೆಬ್ಯು ಮಾಡಿದ ರೈನಾ 2 ಕ್ಯಾಚ್​ ಹಿಡಿದ್ರೆ, ವಿಂಡೀಸ್​ ವಿರುದ್ಧ ಡೆಬ್ಯು ಮಾಡಿದ ತಿಲಕ್​ ಕೂಡ 2 ಕ್ಯಾಚ್​​ ಹಿಡಿದು ತಂಡಕ್ಕೆ ನೆರವಾದ್ರು.

ತಂಡ ಸೋತ ಪಂದ್ಯದಲ್ಲಿ ಮೊದಲ ಅರ್ಧಶತಕ

ಟಿ20 ಇಂಟರ್​ನ್ಯಾಷನಲ್​ ಕ್ರಿಕೆಟ್​​ನಲ್ಲಿ ಸುರೇಶ್​ ರೈನಾ ಹಾಗೂ ತಿಲಕ್​​ ವರ್ಮಾರ ಮೊದಲ ಅರ್ಧಶತಕ ದಾಖಲಾಗಿದ್ದು ಸೋತ ಪಂದ್ಯದಲ್ಲೇ. ನ್ಯೂಜಿಲೆಂಡ್​​ ವಿರುದ್ಧದ ಪಂದ್ಯದಲ್ಲಿ ರೈನಾ ಅರ್ಧಶತಕ ಸಿಡಿಸಿದ್ರೆ, ವಿಂಡೀಸ್​ ವಿರುದ್ಧದ ಪಂದ್ಯದಲ್ಲಿ ತಿಲಕ್​ ವರ್ಮಾ ಮೊದಲ ಹಾಫ್​ ಸೆಂಚುರಿ ಸಿಡಿಸಿದ್ರು. ಆದ್ರೆ, ಈ ಎರಡೂ ಪಂದ್ಯಗಳಲ್ಲಿ ಟೀಮ್​ ಇಂಡಿಯಾ ಸೋಲುಂಡಿತ್ತು.

ಚೇಸಿಂಗ್​ನಲ್ಲಿ ಅಜೇಯ 49 ರನ್​

ಇನ್ನು ಚೇಸಿಂಗ್​ ವೇಳೆ 4ನೇ ಕ್ರಮಾಂಕದಲ್ಲಿ ಕಣಕ್ಕಿಳಿದಾಗಲೂ ಸೇಮ್​ ಕಥೆ. ವಿಂಡೀಸ್​ ವಿರುದ್ಧದ 3ನೇ ಟಿ20 ಪಂದ್ಯದಲ್ಲಿ ಚೇಸಿಂಗ್​ ವೇಳೆ ತಿಲಕ್​ ವರ್ಮಾ ಅಜೇಯ 49 ರನ್​ ಸಿಡಿಸಿದ್ರು. ಈ ಹಿಂದೆ ಸುರೇಶ್​ ರೈನಾ ಕೂಡ ಇದೇ ಸಾಧನೆ ಮಾಡಿದ್ರು.

T20Iನಲ್ಲಿ ಹಾಕಿದ ಮೊದಲ ಓವರ್​ನಲ್ಲೇ ವಿಕೆಟ್​

ಟಿ20 ಇಂಟರ್​ನ್ಯಾಷನಲ್​ ಕ್ರಿಕೆಟ್​ನಲ್ಲಿ ಹಾಕಿದ ಮೊದಲ ಓವರ್​ನಲ್ಲೇ ಇಬ್ರೂ ವಿಕೆಟ್​ ಕಬಳಿಸಿದ್ರು. ಸುರೇಶ್​ ರೈನಾ ಸೌತ್​ ಆಫ್ರಿಕಾ ವಿರುದ್ಧ ರೈನಾ ಮೊದಲ ವಿಕೆಟ್​ ಕಬಳಿಸಿದ್ರೆ, ವಿಂಡೀಸ್​ ವಿರುದ್ಧ ತಿಲಕ್​ ವರ್ಮಾ ಹಾಕಿದ ಮೊದಲ ಓವರ್​ನಲ್ಲೇ ವಿಕೆಟ್​ ಕಬಳಿಸಿದ್ರು.

ಈ ಎಲ್ಲ ಸಾಮ್ಯತೆಗಳನ್ನ ನೋಡಿದ ಮೇಲೆ ಗುರುವಿನ ಹಾದಿಯಲ್ಲಿ ಶಿಷ್ಯ ಅನ್ನದೇ ಇರೋಕಾಗುತ್ತಾ..? ಸದ್ಯ ಇಂಟರ್​ನ್ಯಾಷನಲ್​ ಕ್ರಿಕೆಟ್​ನಲ್ಲಿ ರೈನಾ ರಂತೇ ಇಂಪ್ಯಾಕ್ಟ್​ ಮಾಡೋ ನಿರೀಕ್ಷೆಯನ್ನ ತಿಲಕ್​ ವರ್ಮಾ ಹುಟ್ಟು ಹಾಕಿರೋದಂತೂ ಸುಳ್ಳಲ್ಲ. ಅಭಿಮಾನಿಗಳ ಆ ನಿರೀಕ್ಷೆಗಳನ್ನ ತಿಲಕ್​ ಹುಸಿಯಾಗಿಸದಿರಲಿ ಅನ್ನೋದೆ ಅಭಿಮಾನಿಗಳ ಆಶಯ.

ವಿಶೇಷ ಸೂಚನೆ: ಕ್ರಿಕೆಟ್‌ನ ಸುದ್ದಿಗಳಿಗಾಗಿ ಪ್ರತಿದಿನ ಬೆಳಗ್ಗೆ 8.27ಕ್ಕೆ ನ್ಯೂಸ್‌ಫಸ್ಟ್‌ಚಾನೆಲ್​​ನಲ್ಲಿ ‘ರನ್ ಭೂಮಿ’ ವೀಕ್ಷಿಸಿ