ಎಷ್ಟೇ ಹೋರಾಟ ಮಾಡಿದ್ರೂ ICC ಟ್ರೋಫಿ ದೂರ

ನಿರಾಸೆಯ ಕಡಲಲ್ಲಿ ಮುಳುಗಿದ ಟೀಮ್​ ಇಂಡಿಯಾ

ಕೊನೆಗೂ ಈಡೇರಲಿಲ್ಲ.. ರೋಹಿತ್, ಕೊಹ್ಲಿ​ ಕನಸು

ಇವರಿಬ್ಬರು ಕ್ರಿಕೆಟ್​ ಲೋಕದ ಬಿಗ್ಗೆಸ್ಟ್​ ಸೂಪರ್​ ಸ್ಟಾರ್ಸ್​. ದಾಖಲೆಗಳ ಒಡೆಯರು. ಕ್ರಿಸ್​ಗೆ ಕಚ್ಚಿ ನಿಂತು ರನ್​ಭೂಮಿಯಲ್ಲಿ ಘರ್ಜಿಸಿದ್ರೆ ಎದುರಾಳಿ ಪಡೆ ಅಕ್ಷರಶಃ ಬೆಚ್ಚಿ ಬೀಳುತ್ತೆ. ಇವರಿಬ್ಬರ ಆಟ ಗತ್ತೇ ಬೇರೆ. ಸಾಲಿಡ್​ ಆಟ ಇವರಿಬ್ಬರಿಗೂ ಅದೃಷ್ಟವೇ ಕೈ ಹಿಡಿಯಲ್ಲ. ಎಷ್ಟೇ ಹೋರಾಟ ಮಾಡಿದ್ರೂ ಅಲ್ಟಿಮೇಟ್​ ಕನಸು ಈಡೆರ್ತಿಲ್ಲ.

ನಮೋ ಮೈದಾನದಲ್ಲಿ ಟೀಮ್​ ಇಂಡಿಯಾ ಮುಗ್ಗರಿಸಿ ದಿನ ಕಳೆದ್ರೂ ಆ ಸೋಲಿನ ಆಘಾತ ಇಡೀ ಭಾರತವನ್ನು ಆವರಿಸಿದೆ. ಟೂರ್ನಿಯುದ್ದಕ್ಕೂ ಅಜೇಯ ಓಟ ನಡೆಸಿದ ಟೀಮ್​ ಇಂಡಿಯಾ, ಫೈನಲ್​ನಲ್ಲಿ ಸೋತಿದ್ದು ಅಭಿಮಾನಿಗಳನ್ನು ತೀವ್ರ ನಿರಾಸೆಗೆ ದೂಡಿದೆ. ಆಟಗಾರರೂ ಕೂಡ ಇದರಿಂದ ಹೊರತಾಗಿಲ್ಲ.

ನಿರಾಸೆಯ ಕಡಲಲ್ಲಿ ಮುಳುಗಿದ ಟೀಮ್​ ಇಂಡಿಯಾ

ಆಸಿಸ್​ ವಿರುದ್ಧದ ಪಂದ್ಯದಲ್ಲಿ ಈ ಫಲಿತಾಂಶವನ್ನು ಟೀಮ್​ ಇಂಡಿಯಾದ ಯಾವೊಬ್ಬ ಆಟಗಾರ ಕೂಡ ನಿರೀಕ್ಷೆ ಮಾಡಿರಲಿಲ್ಲ. ಕಪ್​ ಗೆದ್ದೇ ಗೆಲ್ಲುವ ವಿಶ್ವಾಸ ಡ್ರೆಸ್ಸಿಂಗ್​ ರೂಮ್​ನಲ್ಲಿತ್ತು. ಅದೇ ಆತ್ಮವಿಶ್ವಾಸದಲ್ಲಿ ಕಣಕ್ಕಿಳಿದ ಆಟಗಾರರಿಗೆ ಆನ್​ಫೀಲ್ಡ್​ನಲ್ಲಿ ಆಗಿದ್ದು ನಿರಾಸೆ. ಸೋಲಿನ ಬಳಿಕ ಟೀಮ್​ ಇಂಡಿಯಾ ನಾಯಕ ರೋಹಿತ್​ ಶರ್ಮಾ, ವಿರಾಟ್​ ಕೊಹ್ಲಿ ಅನುಭವಿಸಿದ ಯಾತನೆ ಅಷ್ಟಿಷ್ಟಲ್ಲ. ಮನದಾಳದ ನೋವನ್ನ ಪದಗಳಲ್ಲಿ ಹೇಳಲು ಸಾಧ್ಯವೇ ಇಲ್ಲ.

ಕೊನೆಗೂ ಈಡೇರಲಿಲ್ಲ.. ರೋಹಿತ್​ ಕನಸು..!

2011ರಲ್ಲಿ ತವರಲ್ಲಿ ನಡೆದ ಏಕದಿನ ವಿಶ್ವಕಪ್​ ಟೂರ್ನಿ ತಂಡದಿಂದ ಹೊರ ಬಿದ್ದಿದ್ದ ರೋಹಿತ್​ ಶರ್ಮಾ, ಈ ಬಾರಿಯಲ್ಲಿ ತವರಿನಲ್ಲೆ ತನ್ನ ನಾಯಕತ್ವದಲ್ಲಿ ಕಪ್​ ಗೆಲ್ಲಿಸಿಕೊಡೋ ಪಣ ತೊಟ್ಟಿದ್ರು. ಕ್ಯಾಪ್ಟೆನ್ಸಿ, ಬ್ಯಾಟಿಂಗ್​ ಎಲ್ಲದರಲ್ಲೂ ಅದ್ಭುತ ಪರ್ಫಾಮೆನ್ಸ್​ ಕೂಡ ನೀಡಿದ್ರು. ಕಪ್​ ಗೆಲ್ಲೋ ಕನಸನ್ನು ನನಸು ಮಾಡುಕೊಳ್ಳುವಲ್ಲಿ ಫೇಲ್ ಆದರು.

ಐಸಿಸಿ ಟೂರ್ನಮೆಂಟ್​ನಲ್ಲಿ ರೋಹಿತ್​ಗೆ ಅನ್​ಲಕ್!

2015 ವಿಶ್ವಕಪ್​ನಲ್ಲಿ 47.14ರ ಸರಾಸರಿಯಲ್ಲಿ ಬ್ಯಾಟ್ ಬೀಸಿದ್ದ ರೋಹಿತ್​, 2019ರಲ್ಲಿ 5 ಶತಕ ಸಹಿತ, 81ರ ಎವರೇಜ್​ನಲ್ಲಿ ಬ್ಯಾಟಿಂಗ್​ ನಡೆಸಿದ್ರು. ಈ ವಿಶ್ವಕಪ್​ನಲ್ಲೂ ಹಿಟ್​ಮ್ಯಾನ್​ ದರ್ಬಾರ್​ ನಡೆಸಿದ್ರು. ಆದ್ರೆ ಕಪ್​ ಮಾತ್ರ ನಮ್ಮದಾಗಲಿಲ್ಲ.. ಈ ವಿಶ್ವಕಪ್​ ಮಾತ್ರವಲ್ಲ.. 2022ರ ವಿಶ್ವಕಪ್​, 2023ರ ವಿಶ್ವ ಟೆಸ್ಟ್​ ಚಾಂಪಿಯನ್​ಶಿಪ್​ ಫೈನಲ್​ನಲ್ಲೂ ರೋಹಿತ್​ ನಾಯಕತ್ವದಲ್ಲಿ ಟೀಮ್​ ಇಂಡಿಯಾ ಸೋಲುಂಡಿತು.

ವಿರಾಟ್​ ಕೊಹ್ಲಿಯ ಬೆನ್ನುಬಿದ್ದ ದುರಾದೃಷ್ಟ..!

ಅಂಡರ್​ 19 ವಿಶ್ವಕಪ್​ ಗೆದ್ದ ಬಳಿಕ ವಿಶ್ವ ಕ್ರಿಕೆಟ್​ ಲೋಕಕ್ಕೆ ಕಾಲಿಟ್ಟ ಕೊಹ್ಲಿ, 2011ರಲ್ಲಿ ವಿಶ್ವಕಪ್​, 2013ರಲ್ಲಿ ಚಾಂಪಿಯನ್ಸ್​ ಟ್ರೋಫಿ ಜಯಿಸಿದ್ರು. ಆ ಬಳಿಕ ದುರಾದೃಷ್ಟ ಬೆನ್ನುಬಿದ್ದಿದೆ. 2014ರ ಟಿ20 ವಿಶ್ವಕಪ್​, 2016 ಟಿ20 ವಿಶ್ವಕಪ್​, ಮತ್ತು ಈ ಬಾರಿ ಏಕದಿನ ವಿಶ್ವಕಪ್​ನಲ್ಲಿ ಅಮೋಘ ಆಟವಾಡಿ ಪ್ಲೇಯರ್​ ಆಫ್​ ದ ಟೂರ್ನಮೆಂಟ್​ ಅನ್ನಿಸಿಕೊಂಡ ಕೊಹ್ಲಿಗೆ ಐಸಿಸಿ ಟ್ರೋಫಿ ಗೆಲ್ಲಲಾಗಲಿಲ್ಲ.

‘ನಾಯಕ’ ಕೊಹ್ಲಿಗೂ ಐಸಿಸಿ ಟೂರ್ನಿಯಲ್ಲಿ ಬ್ಯಾಡ್​ಲಕ್​

ನಾಯಕನಾಗಿಯೂ ಐಸಿಸಿ ಟೂರ್ನಿಗಳಲ್ಲಿ ಕೊಹ್ಲಿ ಹಿನ್ನಡೆ ಅನುಭವಿಸಿದ್ದಾರೆ. 2017ರ ಚಾಂಪಿಯನ್ಸ್​ ಟ್ರೋಫಿ ಫೈನಲ್​ನಲ್ಲಿ ಸೋಲುಂಡರೆ, 2019 ವಿಶ್ವಕಪ್​ ಸೆಮಿಸ್​ನಲ್ಲಿ ವಿರಾಟ್​ ನಾಯಕತ್ವದಲ್ಲಿ ಟೀಮ್​ ಇಂಡಿಯಾ ಸೋಲುಂಡಿತು. 2021ರ ವಿಶ್ವ ಟೆಸ್ಟ್​ ಚಾಂಪಿಯನ್​ಶಿಪ್​ ಫೈನಲ್​​ನಲ್ಲೂ ಕ್ಯಾಪ್ಟನ್​ ಕೊಹ್ಲಿ ಅನುಭವಿಸಿದ್ದು ನಿರಾಸೆಯನ್ನೇ.

ಒಟ್ಟಿನಲ್ಲಿ, ವಿಶ್ವ ಕ್ರಿಕೆಟ್​ ಲೋಕದ ಸೂಪರ್​​ ಸ್ಟಾರ್​ಗಳು ಅನಿಸಿಕೊಂಡರೂ ಕೊಹ್ಲಿ, ರೋಹಿತ್​ಗೆ ಐಸಿಸಿ ಟೂರ್ನಿಯ ಹಿನ್ನಡೆಯ ಕೊರಗು ತೀವ್ರವಾಗಿ ಕಾಡ್ತಿದೆ. ಮುಂದಿನ ವರ್ಷ ನಡೆಯೋ ಟಿ20 ವಿಶ್ವಕಪ್​ನಲ್ಲಾದ್ರೂ ಈ ಕೊರಗಿಗೆ ಫುಲ್​ಸ್ಟಾಫ್​ ಬೀಳಲಿ. ಸೀನಿಯರ್​ ಆಟಗಾರರಿಗೆ ಟ್ರೊಫಿಯ ಗೌರವ ಸಿಗಲಿ ಅನ್ನೋದು ಫ್ಯಾನ್ಸ್​ ಆಶಯವಾಗಿದೆ.

ವಿಶೇಷ ಸೂಚನೆ: ಕ್ರಿಕೆಟ್​​ನ ವಿಶೇಷ ಸುದ್ದಿಗಳಿಗಾಗಿ ವೀಕ್ಷಿಸಿ ‘ರನ್ ಭೂಮಿ’ ಪ್ರತಿದಿನ ಬೆಳಗ್ಗೆ 8.27ಕ್ಕೆ ನ್ಯೂಸ್ ಫಸ್ಟ್ ಚಾನೆಲ್