ಸಾಲಿಸಿಟರ್ ನಾದರ್ ಮೋದಿಯವರ ಮಗಳು ನವಾಜ್‌ ಮೋದಿ

ಪತ್ನಿ ಜತೆಗಿನ 32 ವರ್ಷಗಳ ಸುಂದರ ಸಂಬಂಧಕ್ಕೆ ನೋವಿನ ವಿದಾಯ

ಹೆಂಡತಿ ಜತೆ ಸಂಬಂಧ ಕಡಿದುಕೊಳ್ಳುತ್ತಿರುವುದೇಕೆ ರೇಮಂಡ್ ಚೇರ್ಮನ್​​

ಪ್ರತಿಷ್ಠಿತ ಕಂಪನಿ ರೇಮಂಡ್ ಲಿಮಿಟೆಡ್‌ನ ಅಧ್ಯಕ್ಷ ಮತ್ತು ವ್ಯವಸ್ಥಾಪಕ ನಿರ್ದೇಶಕ ಗೌತಮ್ ಸಿಂಘಾನಿಯಾ ಅವರು ತನ್ನ ಪತ್ನಿಗೆ ಡಿವೋರ್ಸ್ ನೀಡುವುದಾಗಿ ಎಕ್ಸ್​​ನಲ್ಲಿ ಪೋಸ್ಟ್ ಶೇರ್ ಮಾಡಿದ್ದಾರೆ. ಈ ದೀಪಾವಳಿಯು ಈ ಹಿಂದಿನ ದೀಪಾವಳಿಯಂತೆ ಇರುವುದಿಲ್ಲ ಎಂದು ಹೇಳುವ ಮೂಲಕ ಬೇಸರ ವ್ಯಕ್ತಪಡಿಸಿದ್ದಾರೆ ಎನ್ನಲಾಗಿದೆ.

ಗೌತಮ್ ಸಿಂಘಾನಿಯಾ (58) ಅವರು ತನ್ನ ಪತ್ನಿ ನವಾಜ್‌ ಮೋದಿಯವರೊಂದಿಗಿನ 32 ವರ್ಷಗಳ ಸಂಬಂಧವನ್ನು ಕಡಿದುಕೊಳ್ಳುವುದಾಗಿ ಎಕ್ಸ್​ನಲ್ಲಿ ಮಾಹಿತಿ ನೀಡಿದ್ದಾರೆ. ಪತ್ನಿ ನವಾಜ್‌ ಮೋದಿ ಸಾಲಿಸಿಟರ್ ನಾದರ್ ಮೋದಿಯವರ ಪುತ್ರಿಯಾಗಿದ್ದಾರೆ. ಈ ದಂಪತಿಗೆ ಇಬ್ಬರು ಮಕ್ಕಳಿದ್ದಾರೆ. ಇನ್ಮುಂದೆ ನವಾಜ್ ಮೋದಿ ಹಾಗೂ ನಾನು ವಿಭಿನ್ನ ಹಾದಿಯಲ್ಲಿ ಸಾಗುತ್ತೇವೆ. ಆದರೆ ಇಬ್ಬರ ಮಕ್ಕಳ ಜೀವನ ಇನ್ನಷ್ಟು ಸುಂದರವಾಗಿ ಇರುವಂತೆ ನೋಡಿಕೊಳ್ಳುತ್ತೇವೆ ಎಂದು ಹೇಳಿದ್ದಾರೆ.

pic.twitter.com/kW853q7Kc0

— Gautam Singhania (@SinghaniaGautam) November 13, 2023

ಬದ್ಧತೆ, ಸಂಕಲ್ಪ, ನಂಬಿಕೆಯೊಂದಿಗೆ ಇಷ್ಟು ವರ್ಷ ದಂಪತಿಯಾಗಿ ಒಟ್ಟಿಗೆ ಇದ್ದೆವು. ಪೋಷಕರಾಗಿಯು ಯಾವಾಗಲೂ ಒಬ್ಬರಿಗೊಬ್ಬರು ಉತ್ತಮ ರೀತಿಯಲ್ಲಿ ಜೀವನ ನಡೆಸಿದ್ದೇವೆ. ಆದರೆ ಇತ್ತೀಚಿನ ದಿನಗಳಲ್ಲಿ ಕೆಲವೊಂದು ವದಂತಿಗಳು ನಮ್ಮಿಬ್ಬರನ್ನು ಸಾಕಷ್ಟು ನೋಯಿಸಿವೆ. ನಮ್ಮ ಜೀವನವನ್ನು ಸುತ್ತುವರೆದಿರುವ ಗಾಸಿಪ್​ಗಳು ಚೆನ್ನಾಗಿರಲಿಲ್ಲ. ಹೀಗಾಗಿ ಈ ನಿರ್ಧಾರಕ್ಕೆ ಬರಲಾಗಿದೆ ಎಂದು ರೇಮಂಡ್ ಕಂಪನಿ ಚೇರ್ಮನ್ ಗೌತಮ್ ಸಿಂಘಾನಿಯಾ ತಿಳಿಸಿದ್ದಾರೆ.

ವಿಶೇಷ ಸೂಚನೆ: ಎಲ್ಲಾ DTH & Cableನಲ್ಲಿ ನ್ಯೂಸ್​ಫಸ್ಟ್​ ಚಾನೆಲ್​​​ ಲಭ್ಯ