ಮಾಲಿನ್ಯಮುಕ್ತ ಬೆಂಗಳೂರು ಕಡೆಗೆ ಬಿಎಂಟಿಸಿ ದಿಟ್ಟ ಹೆಜ್ಜೆ..!

ಟಾಟಾ ಕಂಪನಿಯ 921 ಇವಿ ಬಸ್​​ಗಳು ಶೀಘ್ರವೇ ಆಗಮನ

ಕೆಲಸ ಕಳೆದುಕೊಳ್ಳುವ ಆತಂಕದಲ್ಲಿ‌ ಸರ್ಕಾರಿ ಬಸ್​​ ಚಾಲಕರು

ಬೆಂಗಳೂರು: ಶಕ್ತಿ ಯೋಜನೆಯನ್ನ ಮೆಚ್ಚಿಕೊಂಡ ನಾರಿಯರು ಬಸ್​ ಹತ್ತಿ ತಮ್ಮಿಷ್ಟದೂರಿಗೆ ಪ್ರಯಾಣ ಬೆಳೆಸುತ್ತಿದ್ದಾರೆ. ಇದರಿಂದಾಗಿ ದಿನನಿತ್ಯ ಓಡಾಡುವ ವಿದ್ಯಾರ್ಥಿಗಳು, ಉದ್ಯೋಗಿಗಳಿಗೆ ಬಸ್​ ರಷ್​​ ಆಗಿ ಸರಿಯಾದ ಸಮಯಕ್ಕೆ ನಿಗದಿತ ಸ್ಥಳಕ್ಕೆ ತಲುಪಲು ಸಾಧ್ಯವಾಗುತ್ತಿರಲಿಲ್ಲ. ಅಲ್ಲದೇ ಅಲ್ಲಲ್ಲಿ ಬಸ್​ನ ಕೊರತೆಯೂ ಎದ್ದು ಕಾಣುತ್ತಿತ್ತು. ಈಗ ಇದೆಲ್ಲದಕ್ಕೂ ಮುಕ್ತಿ ಹಾಡಲು ಸರ್ಕಾರ ಮುಂದಾಗಿದೆ.

ಮಾಲಿನ್ಯ ಮುಕ್ತ ಬೆಂಗಳೂರು ಕಡೆಗೆ ಬಿಎಂಟಿಸಿ ದಿಟ್ಟ ಹೆಜ್ಜೆ ಇಟ್ಟಿದ್ದು, ಮತ್ತಷ್ಟು ಎಲೆಕ್ಟ್ರಿಕ್ ಬಸ್​​ಗಳು ಬರಲಿವೆ. ಶಾಂತಿನಗರದ ಬಿಎಂಟಿಸಿ ಕೇಂದ್ರ ಕಚೇರಿಯಲ್ಲಿ ಟಾಟಾ ಕಂಪನಿಯ ಎಲೆಕ್ಟ್ರಿಕ್ ಬಸ್​ಗೆ ಇಂದು ಸಾರಿಗೆ ಸಚಿವ ರಾಮಲಿಂಗ ರೆಡ್ಡಿ ಚಾಲನೆ ನೀಡಿದ್ದಾರೆ.

ಮತ್ತಷ್ಟು ‘ಇವಿ’ ಆಗಮನ

• ಟಾಟಾ ಕಂಪನಿಯ 921 ಇವಿ ಬಸ್​​ಗಳು ಶೀಘ್ರವೇ ಆಗಮನ
• 921 ಬಸ್ ಇನ್ನೂ ಮೂರು ತಿಂಗಳಿನಲ್ಲಿ ರೋಡಿಗಿಳಿಯಲಿವೆ
• ಇಲ್ಲಿಯವರೆಗೆ 390 ಎಲೆಕ್ಟ್ರಿಕ್ ಬಸ್​​ಗಳಿಂದ ಬಿಎಂಟಿಸಿ ಸೇವೆ
• ಇದೀಗ 921 ಬಸ್ ಟಾಟಾ ಕಂಪನಿ ಇವಿ ಬಸ್ ಆಗಮನ
• ಪ್ರೋಟೋಟೈಪ್ ಬಸ್​ಗೆ ಸಾರಿಗೆ ಸಚಿವರಿಂದ ಹಸಿರು ನಿಶಾನೆ

ಟಾಟಾ ಇವಿ ಬಸ್ ವಿಶೇಷತೆಯೇನು?

ಪರಿಸರ ಸ್ನೇಹಿ, ಮಾಲಿನ್ಯರಹಿತ ಬಸ್, ಅಂಗವಿಕಲರು, ಹಿರಿಯ ನಾಗರಿಕರಿಗೆ ಇದರಿಂದ ಅನುಕೂಲವಾಗಲಿದೆ. ಅಂಗವಿಕಲರಿಗೆ ಬಸ್ ಹತ್ತಲು ತುಂಬ ಅನುಕೂಲಕಾರಿಯಾಗಿ ಲೋ ಪ್ಲೋರ್ ವ್ಯವಸ್ಥೆ ಇದರಲ್ಲಿ ಇರಲಿದೆ. ಇದು 12 ಮೀಟರ್​​ ಉದ್ದವಿದೆ. ಹಾಗೆ 35 ಆಸನದ ವ್ಯವಸ್ಥೆಯಿದೆ. ನಾಲ್ಕು ಕಡೆ ಸಿಸಿಟಿವಿ ಅಳವಡಿಕೆ, ಒಂದು ಬಾರಿ ಚಾರ್ಜ್ ಮಾಡಿದ್ರೆ 200 ಕಿ.ಮೀಟರ್​​ವರೆಗೆ ಓಡಾಡಲಿದೆ. ಡ್ರೈವರ್ ಎಕ್ಸ್ ಲೇಟರ್ ಒತ್ತದಿದ್ದರೆ ಆಟೋಮೆಟಿಕ್ ಚಾರ್ಜಿಂಗ್ ಆಗಲಿದೆ. ಈ ಬಸ್​​ನಲ್ಲಿ ಖಾಸಗಿ ಚಾಲಕರು, ನಿರ್ವಾಹಕರು ಮಾತ್ರ ಇರಲಿದ್ದಾರೆ. ಸದ್ಯ ಈ ಬಸ್​ಗಳು ಮೆಜೆಸ್ಟಿಕ್ ಟು ರಾಜಾಜಿನಗರ ಇಂಡಸ್ಟ್ರಿಯಲ್ ಏರಿಯಾಗೆ ಒಂದು ವಾರ ಟ್ರಯಲ್ ರನ್ ಆಗಲಿದೆ. ಇದಾದ ನಂತ್ರ ಮೂರು ತಿಂಗಳಿನಲ್ಲಿ ಇವಿ 921 ಬಸ್ ಸೇವೆ ಲಭ್ಯವಾಗಲಿದೆ.

ಕೆಲಸ ಕಳೆದುಕೊಳ್ಳುವ ಆತಂಕದಲ್ಲಿ‌ ಚಾಲಕರು

ಇವಿ ಬಸ್​ಗಳು ಪರಿಸರ ಸ್ನೇಹಿ ಮತ್ತಷ್ಟು ಅನುಕೂಲಕರ ಎಲ್ಲವೂ ಸರಿ ಆದ್ರೆ, ಎಲೆಕ್ಟ್ರಿಕ್ ಬಸ್​ಗಳ ಸೇರ್ಪಡೆಯಿಂದಾಗಿ ಕೆಲಸ ಕಳೆದುಕೊಳ್ಳುವ ಆತಂಕ ಬಿಎಂಟಿಸಿ ಚಾಲಕರಲ್ಲಿ ಹೆಚ್ಚಾಗಿದೆ. ಎಲೆಕ್ಟ್ರಿಕ್ ಬಸ್​ಗಳಿಗೆ ಖಾಸಗಿ ಸಂಸ್ಥೆ ಡ್ರೈವರ್​ಗಳೇ ನೇಮಕವಾಗಲಿರುವುದೇ ಇದಕ್ಕೆ ಕಾರಣ. ಹೀಗಾಗಿ, ಎಲೆಕ್ಟ್ರಿಕ್ ಬಸ್ ಗಳಲ್ಲಿ ಖಾಸಗಿ ಡ್ರೈವರ್ ನೇಮಕಕ್ಕೆ ಮತ್ತೆ ಆಕ್ರೋಶ ಭುಗಿಲೆದ್ದಿದೆ.

ವಿಶೇಷ ಸೂಚನೆ: ಎಲ್ಲಾ DTH & Cableನಲ್ಲಿ ನ್ಯೂಸ್​ಫಸ್ಟ್​ ಚಾನೆಲ್​​​ ಲಭ್ಯ