ಇಡೀ ವಿಶ್ವವನ್ನೇ ಬೆಚ್ಚಿ ಬೀಳಿಸಿದ್ದ ಕೊರೊನಾ

ಕಾಂಗ್ರೆಸ್​ - ಬಿಜೆಪಿ ಮಧ್ಯೆ ತನಿಖೆ ವಾಗ್ಯುದ್ಧ!

ಬಿಜೆಪಿ ವಿರುದ್ಧ ಸತೀಶ್​ ಜಾರಕಿಹೊಳಿ ವಾಗ್ದಾಳಿ

ಇಡೀ ವಿಶ್ವವನ್ನೇ ಬೆಚ್ಚಿ ಬೀಳಿಸಿದ್ದ ಕೊರೊನಾ. ಕರುನಾಡನ್ನೂ ಅಲ್ಲೋಲ-ಕಲ್ಲೋಲ ಮಾಡಿತ್ತು. ರಾಜ್ಯಾದ್ಯಂತ ಆತಂಕ ಮನೆಮಾಡಿ ಸಾವು-ನೋವುಗಳ ಸರಮಾಲೆಯೇ ಸೃಷ್ಟಿಯಾಗಿತ್ತು. ಅದರಲ್ಲೂ ಚಾಮರಾಜನಗರದಲ್ಲಿ ನಡೆದ ದುರಂತ ಇಡೀ ರಾಜ್ಯವನ್ನೇ ತಲ್ಲಣಗೊಳಿಸಿತ್ತು. ಜುಲೈ 2, 2021. ಈ ದಿನ ಇಡೀ ಕರ್ನಾಟಕದ ಜನರ ಕಣ್ಣುಗಳನ್ನ ತೇವಗೊಳಿಸಿದ್ದ ದಿನ. ಅದಕ್ಕೆ ಕಾರಣವಾಗಿದ್ದು, ಪ್ರಾಣವಾಯು ಅರ್ಥಾತ್​ ಆಕ್ಸಿಜನ್​.

ಇದೇ ಆಕ್ಸಿಜನ್​ ಕೊರತೆಯಿಂದ ಗಡಿಜಿಲ್ಲೆಯ ಚಾಮರಾಜನಗರದಲ್ಲಿ 36 ಜನರ ಪ್ರಾಣ ಪಕ್ಷಿ ಹಾರಿಹೋಗಿತ್ತು. ಒಂದ್ಕಡೆ ಕೋವಿಡ್​ ಆತಂಕ, ಮತ್ತೊಂದ್ಕಡೆ ಆಕ್ಸಿಜನ್ ಆಘಾತ, ಇವೆರಡೂ 36 ಕುಟಂಬಗಳನ್ನ ಕಣ್ಣೀರಲ್ಲಿ ಕೈತೊಳೆಯುವಂತೆ ಮಾಡಿತ್ತು.. ಅಂದು ನಡೆದ ಈ ದುರಂತ ಹಾಗೂ ರಾಜ್ಯದಲ್ಲಿ ಕೊವೀಡ್​ನಂತ ಸಂಕಷ್ಟದಲ್ಲಿ ಅಂದಿನ ಸಚಿವರು ನಡೆಸಿದ್ದಾರೆ ಎನ್ನಲಾದ ಅಕ್ರಮಗಳ ಆಟಾಟೋಪ ರಾಜ್ಯದ ಜನರ ಕೆಂಗಣ್ಣಿಗೆ ಗುರಿಯಾಗಿತ್ತು.

ಕಾಂಗ್ರೆಸ್​ ಸರ್ಕಾರದಿಂದ ಹೊರಬಿತ್ತು ಮಹತ್ವದ ಆದೇಶ

ಅಂದು ಕೆಪಿಸಿಸಿ ಅಧಕ್ಯರಾಗಿದ್ದ ಡಿ.ಕೆ ಶಿವಕುಮಾರ್​ ಆಡಿದ್ದ ಮಾತುಗಳು ಇಂದು ಸತ್ಯವಾಗುವ ಸಮಯ ಸನಿಹವಾಗಿದೆ. ರಾಜ್ಯದಲ್ಲಿ ಕೋವಿಡ್​ ಸಂಕಷ್ಟದ ನಡುವೆಯೂ ಅಕ್ರಮಗಳ ಆಟವಾಡಿದ ಕ್ರಿಮಿಗಳನ್ನ ಕೆಡ್ಡಾಗೆ ಕೆಡವಲು ಸರ್ಕಾರ ಮುಂದಾಗಿದೆ. ಇದಕ್ಕಾಗಿ ಸರ್ಕಾರ ಆಯೋಗವೊಂದನ್ನೂ ರಚನೆಮಾಡಿದೆ. ನಿವೃತ್ತ ನ್ಯಾಯಾಧೀಶ ಮೈಕೆಲ್ ಡಿ. ಕುನ್ಹಾ ನೇತೃತ್ವದಲ್ಲಿ ಕೋವಿಡ್​ ಅಕ್ರಮಗಳ ಬಗ್ಗೆ ತನಿಖೆ ನಡೆಸಲು ಒಳಾಡಳಿತ ಇಲಾಖೆಯಿಂದ ಮಹತ್ವದ ಆದೇಶ ಹೊರಬಿದ್ದಿದೆ. 3 ತಿಂಗಳೊಳಗೆ ಈ ಬಗ್ಗೆ ವರದಿ ಕೊಡಲು ಸೂಚನೆ ಸಹ ನೀಡಲಾಗಿದೆ. ಗಡಿಜಿಲ್ಲೆ ಚಾಮರಾಜನಗರ ಜಿಲ್ಲಾಸ್ಪತ್ರೆಯಲ್ಲಿ ನಡೆದ ಆಕ್ಸಿಜನ್​ ದುರಂತದಲ್ಲಿ 36 ಮಂದಿ ಮೃತಪಟ್ಟ ಪ್ರಕರಣವನ್ನೇ ಮೈನ್ ಟಾರ್ಗೆಟ್​ ಮಾಡಿ ತನಿಖೆ ನಡೆಸಲಾಗುತ್ತೆ. ಇನ್ನೂ ಕೋವಿಡ್​ ಅವಧಿಯಲ್ಲಿ ರಾಜ್ಯದಲ್ಲಿ ನಡೆದ ಔಷಧಿ ಖರೀದಿ ಮತ್ತು ಉಪಕರಣ ಖರೀದಿಯಲ್ಲಿ ಅಕ್ರಮ ನಡೆದಿದೆ ಎನ್ನಲಾಗಿದ್ದು ಈ ಬಗ್ಗೆಯೂ ತನಿಖೆ ನಡೆಯಲಿದೆ.. ಇದರ ಜೊತೆ ಕೋವಿಡ್​ ವೇಳೆ ರೋಗಿಗಳಿಗೆ ಬೆಡ್​ ಹಂಚಿಕೆಯಲ್ಲೂ ಅಕ್ರಮ ನಡೆದಿರೋ ಆರೋಪ ಕೇಳಿಬಂದಿರೋದ್ರಿಂದ ಈ ಆಯಮದಲ್ಲೂ ತನಿಖೆ ನಡೆಯಲಿದೆ.

ಕಾಂಗ್ರೆಸ್​ – ಬಿಜೆಪಿ ಮಧ್ಯೆ ತನಿಖೆ ವಾಗ್ಯುದ್ಧ!

ಕಾಂಗ್ರೆಸ್​ ಸರ್ಕಾರ ಕೋವಿಡ್​ ಅಕ್ರಮಗಳ ಮೇಲೆ ತನಿಖಾ ತಂಡವನ್ನ ಛೂ ಬಿಡುತ್ತಿದ್ದಂತೆ ಕಾಂಗ್ರೆಸ್ ಹಾಗೂ ಬಿಜೆಪಿ ಮಧ್ಯೆ ವಾಗ್ಯುದ್ಧವೇ ಏರ್ಪಟ್ಟಿದೆ. ಈ ಬಗ್ಗೆ ಮಾತನಾಡಿರೋ ಆರೋಗ್ಯ ಸಚಿವ ದಿನೇಶ್‌ ಗುಂಡೂರಾವ್‌, ಕೋವಿಡ್​ ಅಕ್ರಮದ ಜೊತೆ ಬಿಜೆಪಿ ಸರ್ಕಾರದ 40% ಕಮಿಷನ್​ ಆರೋಪದ ಬಗ್ಗೆಯೂ ತನಿಖೆ ನಡೆಲಿದೆ ಎಂದಿದ್ದಾರೆ. ಇದಕ್ಕೆ ತಿರುಗೇಟು ನೀಡಿರೋ ಮಾಜಿ ಸಿಎಂ ಬಸವರಾಜ ಬೊಮ್ಮಾಯಿ, 40% ಬಗ್ಗೆ ಯಾವುದೇ ಸಾಕ್ಷಿಗಳಿಲ್ಲ, ಎರಡು ವರ್ಷವಾದರೂ ಗುತ್ತಿಗೆದಾರರ ಸಂಘ ಕೋರ್ಟ್​​ಗೆ ದಾಖಲೆಗಳನ್ನ ಕೊಟ್ಟಿಲ್ಲ ಅಂತ ಟಾಂಗ್​ ನೀಡಿದ್ದಾರೆ.

ಬಿಜೆಪಿ ವಿರುದ್ಧ ಸತೀಶ್​ ಜಾರಕಿಹೊಳಿ ವಾಗ್ದಾಳಿ

ಬಿಜೆಪಿ ಸರ್ಕಾರದ ಅವಧಿಯ ಅಕ್ರಮದ ಬಗ್ಗೆ ಸಚಿವ ಸತೀಶ್​ ಜಾರಕಿಹೊಳಿ ಪ್ರತಿಕ್ರಿಯೆ ನೀಡಿದ್ದಾರೆ, ಕೋವಿಡ್​ ಅವಧಿಯಲ್ಲಿ ಬಿಜೆಪಿ ಸರ್ಕಾರ 10 ರೂಪಾಯಿಗೆ ಇದ್ದ ವಸ್ತುಗಳನ್ನ 100 ರೂಪಾಯಿಗೆ ಖರೀದಿ ಮಾಡಿದೆ ಅಂತ ಆರೋಪಿಸಿದ್ದಾರೆ. ರಾಜ್ಯರಾಜಕೀಯದಲ್ಲಿ ತನಿಖಾಸ್ತ್ರದ ಪ್ರಯೋಗ ಮತ್ತೆ ಮುನ್ನೆಲೆಗೆ ಬಂದಿದೆ. ತನಿಖೆಯ ಗುಮ್ಮವನ್ನ ಬಿಟ್ಟು ಬಿಜೆಪಿ ನಾಯಕರ ನಿದ್ದೆಗೆಡಸಲು ಕೈ ಪಡೆ ರಣತಂತ್ರ ರಚಿಸಿದೆ. ಕೋವಿಡ್​ ಅಕ್ರಮಗಳ ತನಿಖೆಯಲ್ಲಿ ಆರೋಪ ಪ್ರತ್ಯಾರೋಪಗಳ ಅಸಲಿ ಸತ್ಯ ಬಯಲಿಗೆ ಬರುತ್ತಾ ಅಂತ ಕಾದುನೋಡಬೇಕಿದೆ.

ವಿಶೇಷ ಸೂಚನೆ: ಎಲ್ಲಾ DTH & Cableನಲ್ಲಿ ನ್ಯೂಸ್​ಫಸ್ಟ್​ ಚಾನೆಲ್​​​ ಲಭ್ಯ