ಪುತ್ರನ ರಾಜಕೀಯ ಭವಿಷ್ಯಕ್ಕಾಗಿ ಹಸ್ತಕ್ಕೆ ಆಹ್ವಾನ!

ಅಸೆಂಬ್ಲಿ ಕ್ಷೇತ್ರದ ನಾಯಕರ ಆಪರೇಷನ್​​ಗೆ ಪ್ಲಾನ್​​​!

ಕುತೂಹಲ ಮೂಡಿಸಿದ ಎಂಪಿ ರೇಣುಕಾಚಾರ್ಯ ನಡೆ

ರಾಜ್ಯ ರಾಜಕೀಯದಲ್ಲೀಗ ಆಪರೇಷನ್ ಹಸ್ತದ್ದೇ ಸದ್ದು. ಬೆಂಗಳೂರು ಕೇಂದ್ರಿತ ರಾಜಕಾರಣ, ದಶ ದಿಕ್ಕಿನಲ್ಲೂ ಪ್ರತಿಫಲಿಸ್ತಿದೆ. ಕಾಂಗ್ರೆಸ್​​​ ಬಿಟ್ಟು ಹೋದ ನಾಯಕರು, ಮೂಲ ಬಿಜೆಪಿಗರು ಕೂಡ ಹಸ್ತದತ್ತ ಚಿತ್ತ ನೆಟ್ಟಿದ್ದಾರೆ. ಡಿಕೆಶಿ ಉರುಳಿಸಿದ ದಾಳ, ಧಾರವಾಡ, ವಿಜಯನಗರ, ದಾವಣಗೆರೆಯಲ್ಲೂ ಫಲ ಕೊಡ್ತಿದೆ. ಚುನಾವಣೆ ಬಳಿಕ ಸಂಪ್​​ ಆಗ್ತಿದ್ದ ಜಂಪಿಂಗ್​​ ಈ ಬಾರಿ ಅದಕ್ಕೆ ತದ್ವಿರುದ್ಧವಾಗ್ತಿದೆ.

ರಾಜ್ಯದಲ್ಲಿ ಕಾಂಗ್ರೆಸ್​​ ಅಧಿಕಾರದ ಗದ್ದುಗೆ ಹಿಡಿಯುತ್ತಲೆ, ಘರ್​​ ವಾಪ್ಸಿಗೆ ಚಾಲನೆ ಕೊಟ್ಟಿದೆ. ಈಗಾಗಲೇ ಬಿಜೆಪಿ ಹಲವು ನಾಯಕರು, ಕಾಂಗ್ರೆಸ್​​ನ ಹೊಸ್ತಿಲಲ್ಲಿ ನಿಂತಿದ್ದಾರೆ. ಲೋಕಸಭೆ ಚುನಾವಣೆ ಮೇಲೆ ಕಣ್ಣಿಟ್ಟಿರುವ ಈ ನಾಯಕರು, ಹಸ್ತಲಾಘವದಿಂದ ರಾಜಕೀಯ ಲಾಭ ಅಂತ ಲೆಕ್ಕಾಚಾರ ಹಾಕ್ತಿದ್ದಾರೆ. ಈ ಬೆನ್ನಲ್ಲೆ ಜಿಲ್ಲಾವಾರು ಬಲಿಷ್ಠ ನಾಯಕರನ್ನ ಪಕ್ಷಕ್ಕೆ ಸೆಳೆಯಲಾಗ್ತಿದೆ.

ಧಾರವಾಡ ಇಬ್ಬರು ಲಿಂಗಾಯತ ನಾಯಕರಿಗೆ ಆಪರೇಷನ್​​!
ಮುನೇನಕೊಪ್ಪ, ಚಿಕ್ಕನಗೌಡರ್​​​ಗೆ ಕಾಂಗ್ರೆಸ್​​​ ಹಾಕಿದ್ಯಾ ಗಾಳ?

ಬೆಂಗಳೂರಿನಲ್ಲಿ ಆಪರೇಷನ್​​ ಹಸ್ತದ ಕಾರ್ಯಾಚರಣೆಗೆ ಬ್ಲೂಪ್ರಿಂಟ್​​​ ಸಿದ್ಧಗೊಳ್ತಿದೆ. ಶಿವಮೊಗ್ಗದ ಆಯನೂರು ಮಂಜುನಾಥ್​​, ಯಶವಂತಪುರದ ಸೋಮಶೇಖರ್​​ ಆಪ್ತರು ಹಸ್ತಾಕ್ಷರ ಹಾಕಿದ್ದಾರೆ. ಈಗ ದೂರದ ಧಾರವಾಡದಲ್ಲೂ ಆಪರೇಷನ್​ ಹಸ್ತದ ದಾಳ ಉರುಳಿದೆ. ಲಿಂಗಾಯತ ನಾಯಕರಾದ ಮಾಜಿ ಸಚಿವ ಶಂಕರ ಪಾಟೀಲ್ ಮುನೇನಕೊಪ್ಪ​, ಚಿಕ್ಕನಗೌಡರ್​ ಕಾಂಗ್ರೆಸ್​​​ ಸೇರ್ತಾರೆ ಅಂತ ಸ್ವತಃ ಸಚಿವ ಸಂತೋಷ ಲಾಡ್ ಮಾಹಿತಿ ರಿವೀಲ್​​​ ಮಾಡಿದ್ದಾರೆ.

ಮಾಜಿ ಸಚಿವ ಆನಂದ್ ಸಿಂಗ್​ಗೆ ಆಪರೇಷನ್ ಹಸ್ತ​​!
ಪುತ್ರನ ರಾಜಕೀಯ ಭವಿಷ್ಯಕ್ಕಾಗಿ ಹಸ್ತಕ್ಕೆ ಆಹ್ವಾನ!

ಇತ್ತ, ಬಾಂಬೆ ಫ್ರೆಂಡ್ಸ್​​​ನ ಪ್ರಮುಖ ನಾಯಕ ಮಾಜಿ ಸಚಿವ ಆನಂದ್​ ಸಿಂಗ್​ಗೂ ಆಪರೇಷನ್​​​ ಹಸ್ತದ ಗಾಳ ಹಾಕಲಾಗಿದೆ. ಪುತ್ರನ ರಾಜಕೀಯ ಭವಿಷ್ಯದ ದಾಳ ಉರುಳಿಸಿದ ಡಿಕೆಶಿ, ಕಾಂಗ್ರೆಸ್​ಗೆ ಬರುವಂತೆ ಆಹ್ವಾನ ನೀಡಿದ್ದಾರೆ ಅನ್ನೋ ಚರ್ಚೆ ಶುರುವಾಗಿದೆ. ಚುನಾವಣಾ ನಂತ್ರ ಬಿಜೆಪಿಯಲ್ಲಿದ್ರೂ ಹೆಚ್ಚಾಗಿ ಕಾಣಿಸದ ಆನಂದ್ ಸಿಂಗ್, ಡಿಕೆಶಿ ಬಳಿ ಸಮಯಾವಕಾಶ ಕೇಳಿದ್ದಾರೆ ಎನ್ನಲಾಗಿದೆ.

ಕಮಲಕ್ಕೆ ಅನುಮಾನ ತಂದ ರೇಣುಕಾಚಾರ್ಯ ನಿಗೂಢ ನಡೆ!
ಸಿಎಂ, ಡಿಸಿಎಂ ಬಳಿಕ ಸಚಿವ ಎಸ್​​.ಎಸ್​ ಮಲ್ಲಿಕಾರ್ಜುನ್​ ಭೇಟಿ

ಮಾಜಿ ಸಚಿವ ರೇಣುಕಾಚಾರ್ಯ ನಡೆ ಬಿಜೆಪಿಯನ್ನೇ ದಂಗು ಬಡಿಸ್ತಿದೆ. ದಾವಣಗೆರೆ ಲೋಕಸಭೆ ಟಿಕೆಟ್​​​ ಮೇಲೆ ಕಣ್ಣಿಟ್ಟಿರುವ ರೇಣುಕಾಚಾರ್ಯ ನಡೆ ಅನುಮಾನ ಹೆಚ್ಚಿಸಿದೆ. ಒಬ್ಬರಾದ ಮೇಲೆ ಒಬ್ಬರಂತೆ ಕಾಂಗ್ರೆಸ್​ ನಾಯಕರನ್ನ ರೇಣುಕಾಚಾರ್ಯ ಭೇಟಿ ಮಾಡ್ತಿದ್ದಾರೆ. ಸಿಎಂ, ಡಿಸಿಎಂ ಭೇಟಿ ಬಳಿಕ ಎಸ್​​.ಎಸ್​​​ ಮಲ್ಲಿಕಾರ್ಜುನ್​​​ ಭೇಟಿ ಆಗಿದ್ದಾರೆ. ಶಾಮನೂರು ಶಿವಶಂಕರಪ್ಪ ಬಳಿ ಪಕ್ಷ ಸೇರುವ ಬಗ್ಗೆ ಚರ್ಚೆ ನಡೆಸಿದ್ದಾರೆ ಎನ್ನಲಾಗಿದೆ.

ಡಿಸಿಎಂ ಡಿಕೆಶಿಯಿಂದ ಟಾರ್ಗೆಟ್​​ ಬೆಂಗಳೂರು ನಾರ್ಥ್​
8 ಅಸೆಂಬ್ಲಿ ಕ್ಷೇತ್ರದ ನಾಯಕರ ಆಪರೇಷನ್​​ಗೆ ಪ್ಲಾನ್​​​!

ಇತ್ತ, ರಾಜ್ಯ ರಾಜಧಾನಿ ಬೆಂಗಳೂರಿನ ಮೇಲೆ ನಿಯಂತ್ರಣ ಸಾಧಿಸಲು ಡಿಸಿಎಂ ಡಿಕೆಶಿ ಬಿಗ್​​​ ಪ್ಲಾನ್​​​ ರೂಪಿಸ್ತಿದ್ದಾರೆ. ಬೆಂಗಳೂರು ಉತ್ತರ ಲೋಕಸಭೆ ಕ್ಷೇತ್ರ ಅಂದ್ರೆ ಅದು ಬೆಂಗಳೂರಿನ ಒಕ್ಕಲಿಗರ ಕೋಟೆ. ಸದ್ಯ ಇದೇ ಕೋಟೆ ಮೇಲೆ ಡಿಕೆಶಿ ಕಣ್ಣಿಟ್ಟಿದ್ದಾರೆ. ಈ ಕಾರಣಕ್ಕೆ ಎಂಟು ಅಸೆಂಬ್ಲಿ ಕ್ಷೇತ್ರದ ನಾಯಕರ ಆಪರೇಷನ್​ಗೆ ಡಿಕೆಶಿ ಇಳಿದಿದ್ದಾರೆ. ಮಾಜಿ ಸಚಿವ ಎಸ್.ಟಿ ಸೋಮಶೇಖರ್ ಪ್ರತಿನಿಧಿಸುವ ಯಶವಂತಪುರ ಕ್ಷೇತ್ರ, ಬೈರತಿ ಬಸವರಾಜ್​​ ಅವರ ಕೆ.ಆರ್ ಪುರಂ, ಕೆ.ಗೋಪಾಲಯ್ಯ ಶಾಸಕರಾಗಿರುವ ಮಹಾಲಕ್ಷ್ಮಿ ಲೇಔಟ್ ಕ್ಷೇತ್ರವನ್ನ ಡಿಕೆಶಿ ಟಾರ್ಗೆಟ್​​ ಮಾಡಿದ್ದಾರೆ. ದಾಸರಹಳ್ಳಿ ಕ್ಷೇತ್ರ ಮೇಲೂ ಕಣ್ಣಿಟ್ಟಿದ್ದಾರೆ ಎನ್ನಲಾಗಿದೆ.

ಇತ್ತ, ರಾಜ್ಯ ರಾಜಕಾರಣ ಸದ್ದು ಮಾಡ್ತಿರುವ ಘರ್​ವಾಪ್ಸಿ ಬಿಬಿಎಂಪಿಯಲ್ಲೂ ಸದ್ದು ಮಾಡ್ತಿದೆ. ಕಾಂಗ್ರೆಸ್ ತೆರೆದು ಹೋದವರು ಮರಳಿ ಗೂಡು ಸೇರ್ತಿದ್ದಾರೆ. ಶಾಸಕರು ಮಾತ್ರವಲ್ಲ ಅವರ ಬೆಂಬಲಿಗರೂ ಕಾಂಗ್ರೆಸ್​ಗೆ ಸೇರ್ಪಡೆ ಆಗ್ತಿದ್ದಾರೆ. ಈಗಾಗಲೇ ಹಲವು ಬಿಬಿಎಂಪಿ ಮಾಜಿ ಕಾರ್ಪೊರೇಟರ್ ಮರಳಿದ್ದು, ಇನ್ನೂ 50 ಹೆಚ್ಚು ಜನ ತವರಿಗೆ ಮರಳಲು ಸಿದ್ಧರಾಗಿದ್ದಾರಂತೆ. ಒಟ್ಟಾರೆ, ಬಿಬಿಎಂಪಿ ಚುನಾವಣೆ ಆ ಬಳಿಕ ಬರುವ ಲೋಕಸಭೆ ಕದನಕ್ಕೆ ಕಮಲ-ದಳಕ್ಕೂ ಮುನ್ನವೇ ಕಾಂಗ್ರೆಸ್​​ ಸಮರ ಸನ್ನದ್ಧಗೊಳ್ತಿದೆ. ರಾಜ್ಯದಲ್ಲಿ ಪಾರಮ್ಯ ಮೆರೆಯಲು ಕಾಂಗ್ರೆಸ್​ ಹಸ್ತ ಎಂಬ ವ್ಯೂಹ ರಚಿಸಿದ್ದು, ಮುಂದಿನ ದಿನಗಳಲ್ಲಿ ಆಪರೇಷನ್​​​ ತೀವ್ರಗೊಳ್ಳೋದು ಪಕ್ಕಾ ಆಗಿದೆ.

ವಿಶೇಷ ಸೂಚನೆ: ಎಲ್ಲಾ DTH & Cableನಲ್ಲಿ ನ್ಯೂಸ್​ಫಸ್ಟ್​ ಚಾನೆಲ್​​​ ಲಭ್ಯ