‘ಕೇಸರಿ’ಪಡೆಯ ಅಸಮಾಧಾನಿತರಿಗೆ ‘ಹಸ್ತ’ಪಡೆ ಗಾಳ!

ವಿಜಯೇಂದ್ರಗೆ ಸಾರಥ್ಯ.. ಹಿರಿಯರಲ್ಲಿ ಬೇಸರದ ರೇಖೆ

ರಾಜ್ಯಾಧ್ಯಕ್ಷ ಸ್ಥಾನದ ಸಿಗದೇ ಸೋಮಣ್ಣ ಅಸಮಾಧಾನ

ಬೆಂಗಳೂರು: ಬಿಜೆಪಿ ಉಭಯ ಸಂಕಟದಲ್ಲಿ ಸಿಲುಕಿದೆ. ಬಿಎಸ್​ವೈ ಪುತ್ರ ವಿಜಯೇಂದ್ರಗೆ ರಾಜ್ಯಾಧ್ಯಕ್ಷ ಸ್ಥಾನ ಸಿಗುತ್ತಲೇ ಲೈಟ್​​ ಆಗಿ ಅಸಮಾಧಾನ ಶುರುವಾಗಿದೆ. ಇದೇ ಅಸಮಾಧಾನದ ಲಾಭಕ್ಕೆ ಕಾಂಗ್ರೆಸ್​ ಮುಂದಾಗಿದೆ. ಲಿಂಗಾಯತ ಪ್ರಬಲ ನಾಯಕ ಸೋಮಣ್ಣಗೆ ಖುದ್ದು ಡಿಕೆಶಿ ಗಾಳ ಹಾಕಿದ್ದಾರೆ.

ವಿಧಾನಸಭೆ ಎಲೆಕ್ಷನ್​​​ ಸೋಲಿನ ಬಳಿಕ ರಾಜ್ಯ ಕಮಲದಲ್ಲಿ ಬಣ ಬಂಡಾಟದ ಲಕ್ಷಣ ಕಾಣಿಸಿದೆ. ಆರಂಭದಲ್ಲಿ ವ್ಯಾಕ್ಸಿನ್​​​ ನೀಡದ ಬಿಜೆಪಿ, ಸೋಂಕು ಉಲ್ಬಣ ಬಳಿಕ ರಾಜ್ಯಾಧ್ಯಕ್ಷರ ನೇಮಕ ಮಾಡಿದೆ. ಅಳೆದು ತೂಗಿ ಕೈಗೊಂಡ ನಿಲುವು ಹೊಸ ಕಲಹಕ್ಕೆ ಮುನ್ನುಡಿ ಬರೆದಿದೆ. ವಿಜಯೇಂದ್ರ ಆಯ್ಕೆ ಬೆನ್ನಲ್ಲೇ ಹಿರಿಯರಲ್ಲಿ ಅಸಮಾಧಾನ ಮೂಡಿದೆ. ಹೀಗೆ ಈ ಅಸಮಾಧಾನ, ಅನುಮಾನ, ಆಪರೇಷನ್​​ ಹಸ್ತದ ಗುಲ್ಲು ಗಲ್ಲಿ ಗಲ್ಲಿ ಹಬ್ಬಿದೆ.

ಸೋಮಣ್ಣ ಸೆಳೆಯಲು ಆಪರೇಷನ್ ಹಸ್ತಕ್ಕೆ ಪ್ಲಾನ್!

ವಿ.ಸೋಮಣ್ಣ.. ಮಾಜಿ ಸಚಿವ.. ಲಿಂಗಾಯತ ಸಮುದಾಯದ ಪ್ರಬಲ ನಾಯಕ.. ಬಿಜೆಪಿ ಹೈಕಮಾಂಡ್​​​ ಮೆಚ್ಚಿದ ಲೋಕಲ್​ ಲೀಡರ್ಸ್​​​.. ಸಂಪನ್ಮೂಲ, ಸಂಘಟನಾ ಚತುರತೆ ಮೆಚ್ಚಿ ಸಿದ್ದು ವಿರುದ್ಧ ಸೋಮಣ್ಣಗೆ ಗರಡಿ ಮನೆಗೆ ಇಳಿಸಲಾಗಿತ್ತು.. ಆ ಬಳಿಕ ನೆಲೆ ಕಳೆದುಕೊಂಡ ಸೋಮಣ್ಣ, ಆಗಾಗ ಬುಸುಗುಟ್ಟಿ, ರಾಜ್ಯಾಧ್ಯಕ್ಷ ಸ್ಥಾನದ ಮೇಲೆ ಚಾತಕ ಪಕ್ಷಿಯಂತೆ ಕಾಯ್ದಿದ್ರು.. ಆದ್ರೆ, ಬದಲಾದ ಹೈಕಮಾಂಡ್​​ ಮನಸ್ಸು, ಬಿಎಸ್​​ವೈ ಪುತ್ರನಿಗೆ ಪಟ್ಟ ಕಟ್ಟಿದೆ.. ಹೀಗೆ ವಿಜಯೇಂದ್ರಗೆ ಕಟ್ಟಿದ ಪಟ್ಟವೇ ಸೋಮಣ್ಣರ ಸಿಟ್ಟಿನ ಕಟ್ಟೆ ಒಡೆದಿದೆ ಎಂದು ಹೇಳಲಾಗ್ತಿದೆ..

ಬಿಜೆಪಿಯಲ್ಲಿ ಮಾಜಿ ವಸತಿ ಸಚಿವರಿಗೆ ಸೂರು ಸಿಗದ ಕಾರಣ, ಕಾಂಗ್ರೆಸ್ ಆಸರೆ ಬಯಸ್ತಿದ್ದಾರೆ ಅಂತ ಗೊತ್ತಾಗಿದೆ.. ಸೋಮಣ್ಣರನ್ನ ಕಾಂಗ್ರೆಸ್​ಗೆ ಕರೆತರಲು ಖುದ್ದು ಆಪರೇಷನ್​​​ ಮಾಸ್ಟರ್​​​​ ಡಿಕೆಶಿ ಫೀಲ್ಡ್​​ಗಿಳಿದಿದ್ದಾರೆ.. ಹಿಂದೆ ಸೋಮಣ್ಣ ಸೇರ್ಪಡೆ ಬಗ್ಗೆ ಡಿಕೆಶಿ ಮಾತುಕತೆ ನಡೆಸಿದ್ದರು.. ಆಗ ಬಿಜೆಪಿ ರಾಜ್ಯಾಧ್ಯಕ್ಷ ಸ್ಥಾನದ ಮೇಲೆ ಕಣ್ಣಿಟ್ಟಿದ್ದ ಸೋಮಣ್ಣಗೆ ಈ ನಿರಾಸೆ ಆಗಿದೆ.. ಹೀಗಾಗಿ ಪಕ್ಷ ತೊರೆಯುವ ಆಲೋಚನೆಯಲ್ಲಿದ್ದಾರೆ ಅನ್ನೋ ಸುದ್ದಿ ಗಾಳಿಪಟದಂತೆ ಹಾರಾಡಾಡ್ತಿದೆ..

ಸೋಮಣ್ಣಗೆ ಕಾಂಗ್ರೆಸ್​ ಆಫರ್​​!

ಎರಡು ಕ್ಷೇತ್ರದಿಂದ ಸೋಮಣ್ಣಗೆ ಕೈ ಪಡೆ ಆಫರ್​​ ಕೊಟ್ಟಿದೆ ಅನ್ನೋ ಮಾತು ಕೇಳಿ ಬರ್ತಿದೆ.. ತುಮಕೂರಿನಿಂದ ಕಣಕ್ಕಿಳಿಸಲು ಡಿಕೆ ಬ್ರದರ್​​​ ಪ್ಲಾನ್​​ ಮಾಡಿದ್ದಾರೆ ಎನ್ನಲಾಗಿದೆ.. ಕಳೆದ ಬಾರಿ ತುಮಕೂರು ಕ್ಷೇತ್ರ ಬಿಜೆಪಿ ವಶವಾಗಿದೆ.. ಸೋಮಣ್ಣ ಸ್ಪರ್ಧೆಯಿಂದ ಹಳೇ ಮೈಸೂರು ಭಾಗದ ಲಿಂಗಾಯತ ಮತ ಸೆಳೆಯಲು ಪ್ಲಾನ್ ರೂಪಿಸಲಾಗಿದೆ ಎಂದು ಗೊತ್ತಾಗಿದೆ.. ಈ ಮಧ್ಯೆ, ಮೈಸೂರು – ಕೊಡಗು ಕ್ಷೇತ್ರದಿಂದ ಸೋಮಣ್ಣ ಹೆಸರು ಚರ್ಚೆ ಆಗ್ತಿದೆ..

ಸೀಟು ಹಂಚಿಕೆ ಮುನ್ನವೇ ಕ್ಷೇತ್ರಕ್ಕಾಗಿ ಕಮಲ-ದಳದ ಫೈಟ್!

ಇತ್ತ, ಸೀಟು ಹಂಚಿಕೆ ಮುನ್ನವೇ ಜೆಡಿಎಸ್​-ಬಿಜೆಪಿ ತಿಕ್ಕಾಟ ಶುರುವಾಗಿದೆ.. ಮೈಸೂರ ಮತ್ತು ತುಮಕೂರು ಟಿಕೆಟ್​ಗಾಗಿ ಕಮಲ-ದಳ ಫೈಟ್ ಏರ್ಪಟ್ಟಿದೆ.. ಮೈಸೂರು-ಕೊಡಗು ಟಿಕೆಟ್​ಗಾಗಿ ಸಾ.ರಾ ಮಹೇಶ್ ಬೇಡಿಕೆ ಇಟ್ಟಿದ್ದಾರೆ.. ಸಾ.ರಾ.ಮಹೇಶ್ ನಿಂತರೇ ಗೆಲ್ಲಿಸ್ತೇವೆ ಅಂತ ಜಿ.ಟಿ ದೇವೇಗೌಡ ಘೋಷಣೆ ಮಾಡಿದ್ದಾರೆ.. ಅತ್ತ, ತುಮಕೂರಲ್ಲಿ ಜೆಡಿಎಸ್​ಗೆ ಟಿಕೆಟ್ ನೀಡದಂತೆ ಒತ್ತಡ ಹೇರಲಾಗ್ತಿದೆ ಎಂದು ಹೇಳಲಾಗ್ತಿದೆ..

ಇತ್ತ ಹುಬ್ಬಳ್ಳಿಯಲ್ಲಿ ಮಾತ್ನಾಡಿದ ಮಾಜಿ ಸಚಿವ ನಿರಾಣಿ, ರಾಜ್ಯದಲ್ಲಿ ಮೈತ್ರಿ ಸರ್ಕಾರ ಅಂತ ಗೇಲಿ ಮಾಡಿದ್ದಾರೆ.. ಒಳ ಜಗಳದಲ್ಲೇ ಸರ್ಕಾರ ಬಿದ್ದೋಗುತ್ತೆ ಅಂತ ಅಂತ ಬಾಂಬ್​ ಸಿಡಿಸಿದ್ದಾರೆ..

ಒಟ್ಟಾರೆ, ವಿಜಯೇಂದ್ರಗೆ ಪಟ್ಟ ಸಿಗುತ್ತಲೇ ಲೈಟ್​ ಆಗಿ ಕರೆಂಟ್​​ ಸ್ಪಾರ್ಕ್​ ಆಗ್ತಿದೆ.. ಬಣ ಮೇಲಾಟದಲ್ಲಿ ಸ್ಪಷ್ಟ ಮುನ್ನಡೆ ಸಾಧಿಸಿದ ಬಿಎಸ್​​ವೈ, ಎದುರಾಳಿ ಬಣಕ್ಕೆ ಶಾಕ್​​ ನೀಡಿದ್ದಾರೆ.. ವಿಪಕ್ಷ ನಾಯಕನ ಸ್ಥಾನ ಯಾರಿಗೆ ದಕ್ಕಲಿದೆ ಅನ್ನೋದರ ಮೇಲೆ ಬಣ ಕಿತ್ತಾಟದ ತೀವ್ರತೆ ಅವಲಂಬಿಸಿದೆ.

ವಿಶೇಷ ಸೂಚನೆ: ಎಲ್ಲಾ DTH & Cableನಲ್ಲಿ ನ್ಯೂಸ್​ಫಸ್ಟ್​ ಚಾನೆಲ್​​​ ಲಭ್ಯ