ಸತತ 3 ದಿನದಿಂದ ಟೀಮ್ ಇಂಡಿಯಾ ಬ್ಯುಸಿ

ಅಳಿವು-ಉಳಿವಿನ ಪ್ರಶ್ನೆ.. ಗೆಲುವೊಂದೇ ​ಗುರಿ

ಏಷ್ಯಾಕಪ್​​ ವೇಳಾಪಟ್ಟಿ ಅವ್ಯವಸ್ಥೆಗೆ ಹೊಣೆ ಯಾರು?

ಟೀಮ್ ಇಂಡಿಯಾ ಅಭಿಮಾನಿಗಳಿಗೆ ದಿಪಾವಳಿ ಬೇಗ ಬಂದಿದೆ. ಇದಕ್ಕೆ ಕಾರಣ ಏಷ್ಯನ್ ಕ್ರಿಕೆಟ್ ಕೌನ್ಸಿಲ್ ಅಧ್ಯಕ್ಷ ಜಯ್ ಶಾ, ಟೀಮ್ ಇಂಡಿಯಾಗೆ ಉಡುಗೊರೆವೊಂದನ್ನು ನೀಡಿದ್ದಾರೆ. ಆ ಒಂದು ಉಡುಗೊರೆ ಈಗ ಟೀಮ್ ಇಂಡಿಯಾಗೆ ಥ್ರೆಟ್ ಆಗಿ ಪರಿಣಮಿಸಿದ್ದರೂ ಅಚ್ಚರಿ ಇಲ್ಲ.

ಒನ್​ ಡೇ ಗೇಮ್​.. 50 ಓವರ್​ಗಳ ಪಂದ್ಯ.. ಒಂದೇ ದಿನದಲ್ಲಿ ಮುಗಿಯೋ ಈ ಪಂದ್ಯ.. ಆದರೆ ಟೀಮ್ ಇಂಡಿಯಾ, ಸತತ ಮೂರು ದಿನಗಳಿಂದ ಆಡ್ತಾನೇ ಇದೆ. ಪಾಕ್ ವಿರುದ್ಧದ ಸೂಪರ್​-4 ಪಂದ್ಯವನ್ನು 2 ದಿನಗಳ ಕಾಲ ಆಡಿದ್ದ ಟೀಮ್ ಇಂಡಿಯಾ, 3ನೇ ದಿನವಾದ ಇಂದು ಸಿಂಹಳೀಯರ ಬೇಟೆಗೆ ಸಜ್ಜಾಗಿದೆ. ಸೂಪರ್​-4 ಹಂತದಿಂದ ಫೈನಲ್​​ಗೇರುವ ಲೆಕ್ಕಚಾರದಲ್ಲಿದೆ. ಆದ್ರೆ, ಇದು ಅಂದುಕೊಂಡಷ್ಟು ಸುಲಭದ್ದಾಗಿಲ್ಲ.

ಇಂದೇ ನಿರ್ಣಯವಾಗುತ್ತಾ ಟೀಮ್ ಇಂಡಿಯಾ ಭವಿಷ್ಯ..!

ಮಳೆಯಿಂದಾಗಿ ಟೀಮ್ ಇಂಡಿಯಾದ ಭವಿಷ್ಯ ಅತಂತ್ರಕ್ಕೆ ಸಿಲುಕಿದೆ. ಹೀಗಾಗಿ ಶ್ರೀಲಂಕಾ ವಿರುದ್ಧದ 2ನೇ ಸೂಪರ್​​​-4 ಮ್ಯಾಚ್​ನಲ್ಲಿ ಗೆಲ್ಲಲೇಬೇಕಾದ ಒತ್ತಡಕ್ಕೆ ಸಿಲುಕಿರುವ ಟೀಮ್ ಇಂಡಿಯಾ, ಗೆಲುವಿನ ಮಂತ್ರವನ್ನು ಪಠಿಸುತ್ತಿದೆ. ಕಾರಣ, ಏಷ್ಯನ್ ಕೌನ್ಸಿಲ್ ಅಧ್ಯಕ್ಷ ಜಯ ಶಾ, ಟೀಮ್ ಇಂಡಿಯಾಗೆ ನೀಡಿರೋ ಗಿಫ್ಟ್​ ಅನ್ನೋದನ್ನು ಬಿಡಿಸಿ ಹೇಳಬೇಕಿಲ್ಲ.

3ನೇ ದಿನವೂ ಕಾಡಲಿದೆ ಟೀಮ್ ಇಂಡಿಯಾಗೆ ಮಳೆ

ಟೀಮ್ ಇಂಡಿಯಾ, ಏಷ್ಯಾಕಪ್​ನ ಫೈನಲ್​​​​ಗೆ ಏರಾಬೇಕಾದ್ರೆ ಇಂದು ಗೆಲುವು ಅನಿವಾರ್ಯ. ಅಕಸ್ಮಾತ್​ ಮತ್ತೆ ಮಳೆರಾಯನ ಅವಕೃಪೆಗೆ ತುತ್ತಾದ್ರೆ, ಟೀಮ್ ಇಂಡಿಯಾ ಫೈನಲ್​​ಗೇರುವ ಕನಸು ಮಳೆಯಲ್ಲೇ ಕೊಚ್ಚಿ ಹೋಗೋದ್ರಲ್ಲಿ ಅನುಮಾನ ಇಲ್ಲ. ಇದಕ್ಕೆ ಕಾರಣ ಈಗಾಗಲೇ ಲಂಕಾ ಹಾಗೂ ಪಾಕ್ ತಂಡಗಳು, ಸೂಪರ್​-4ನಲ್ಲಿ ಗೆಲುವಿನ ಶುಭಾರಂಭ ಕಂಡಿರುವುದೇ ಆಗಿದೆ.

ಬಲಿಷ್ಠ ಭಾರತಕ್ಕೆ ಸಿಂಹಳೀಯರ ಬೇಟೆ ಸಲಭವಲ್ಲ

ಗೆಲುವಿನ ಲಯದಲ್ಲಿ ಮುಂದುವರಿಯುತ್ತಿರೋ ಶನಕ ಪಡೆಯನ್ನು ಬಗ್ಗುಬಡೆಯೋದು ಸುಲಭದ ಮಾತೇ ಅಲ್ಲ. ಇನ್​ಫ್ಯಾಕ್ಟ್ ಪ್ರಮುಖ ಆಟಗಾರರು ಇಂಜುರಿಯಿಂದ ಗೈರಾಗಿದ್ರೂ, ತವರಿನ ಲಾಭ.. ಗೆಲುವಿನ ಹಸಿವು, ಸಂಘಟಿತ ಆಟ ಗೆಲ್ಲುವ ಫೇವರಿಟ್ ಆಗಿಸಿದೆ.

ಸತತ 3ನೇ ದಿನವೂ ಪಂದ್ಯ.. ಭಾರತಕ್ಕೆ ಆಗುತ್ತಾ ಹಿನ್ನಡೆ..?

50 ಓವರ್​ಗಳ ಪಂದ್ಯದ ನಂತರ, ಆಟಗಾರರ ಚೇತರಿಕೆಗೆ ಕನಿಷ್ಠ 2 ದಿನ ಬೇಕು. ಆದ್ರೆ ಪ್ರಸಾರಕರ ಲಾಭಕ್ಕಾಗಿ ಇಂಡೋ-ಪಾಕ್ ಪಂದ್ಯಕ್ಕೆ ರಿಸರ್ವ್​ ಡೇ ನಿಗದಿಪಡಿಸಲಾಯ್ತು. ಪ್ರಯಾಣಿಸಿ ಪ್ರಯಾಣಿಸಿ ಸುಸ್ತಾಗುವ ಆಟಗಾರರು, ಚೇತರಿಸಿಕೊಳ್ಳುವ ಮುಂಚೆಯೇ ಲಂಕಾ ಪಂದ್ಯಕ್ಕೆ ಆಣಿಯಾಗ್ತಿದ್ದಾರೆ. ಈ ಪಂದ್ಯದ ಮುಗಿದ 72 ಗಂಟೆಗಳ ಬಳಿಕ ಟೀಮ್ ಇಂಡಿಯಾ, ಬಾಂಗ್ಲಾವನ್ನ ಎದುರಿಸಲಿದೆ. ಒಂದು ವೇಳೆ ಫೈನಲ್‌ಗೆ ಅರ್ಹತೆ ಪಡೆದರೆ 48 ಗಂಟೆಗಳ ಅವಧಿಯಲ್ಲಿ ಮತ್ತೊಂದು ಪಂದ್ಯ ಆಡಬೇಕಾದ ಇಕ್ಕಟ್ಟಿಗೆ ಸಿಲುಕಲಿದೆ. ಎಲ್ಲಕ್ಕೂ ಮಿಗಿಲಾಗಿ ತಂಡದ ಪ್ರಮುಖ ಆಟಗಾರರಾದ ಕೆ.ಎಲ್.ರಾಹುಲ್, ಶ್ರೇಯಸ್​ ಅಯ್ಯರ್, ಜಸ್​ಪ್ರೀತ್​ ಬೂಮ್ರಾ ಇಂಜುರಿಯಿಂದ ವಾಪಸ್ ಆಗಿದ್ದಾರೆ. ಇಂಥ ಪರಿಸ್ಥಿತಿಯಲ್ಲಿ ಹೆಚ್ಚುವರಿ ವರ್ಕ್​ಲೋಡ್​​​ನಿಂದ ಮತ್ತೊಮ್ಮೆ ಗಾಯಗೊಂಡರೆ, ಟೀಮ್ ಇಂಡಿಯಾ ಮತ್ತಷ್ಟು ಸಂಕಷ್ಟಕ್ಕೆ ಸಿಲುಕೋದು ಗ್ಯಾರಂಟಿ.

ಏಷ್ಯಾಕಪ್​​ ವೇಳಾಪಟ್ಟಿ ಅವ್ಯವಸ್ಥೆಗೆ ಹೊಣೆ ಯಾರು?

ರಾಜತಾಂತ್ರಿಕ ಕಾರಣಗಳಿಂದಾಗಿ ಪಾಕ್​ಗೆ, ಪ್ರಯಾಣಿಸಲು ನಿರಾಕರಿಸಿದೆ. ಪಾಕ್​​ನಲ್ಲಿನ ಅವ್ಯವಸ್ಥೆ ಇದಕ್ಕೆಲ್ಲಾ ಕಾರಣ ಅನ್ನೋದನ್ನ ಬಿಡಿಸಿ ಹೇಳಬೇಕಿಲ್ಲ. ಸೆಪ್ಟೆಂಬರ್‌ನಲ್ಲಿ ಶ್ರೀಲಂಕಾವನ್ನು ಆಯ್ಕೆ ಮಾಡಿರೋದು ಅಭಿಮಾನಿಗಳ ಕೆಂಗಣ್ಣಿಗೆ ಗುರಿಯಾಗಿದೆ. 10 ದಿನಗಳ ಮುನ್ನವೇ ಕೊಲಂಬೊದ ಹವಾಮಾನ ಬಗ್ಗೆ ಗೊತ್ತಿದ್ದರೂ, ಪ್ರತಿಕೂಲ ಹವಾಮಾನ ಹೊಂದಿದ್ದ ಹಂಬಂಟೋಟಾಕ್ಕೆ ಪಂದ್ಯಗಳನ್ನ ಶಿಫ್ಟ್​ ಮಾಡಬಹುದಿತ್ತು. ಏಷ್ಯನ್ ಕೌನ್ಸಿಲ್ ಅಧ್ಯಕ್ಷ ಜಯ ಶಾ, ಈ ಬಗ್ಗೆ ಮನಸ್ಸೂ ಮಾಡದ್ದು ನಿಜಕ್ಕೂ ದುರಾದೃಷ್ಟವೇ ಸರಿ. ಒಂದ್ಕಡೆ ಮಳೆರಾಯ ಟೀಮ್ ಇಂಡಿಯಾಗೆ ಕನಸಿಗೆ ಕೊಳ್ಳಿ ಇಡ್ತಿದ್ರೆ, ಮತ್ತೊಂದೆಡೆ ಜಯ ಶಾರ ಬೇಕಾಬಿಟ್ಟಿ ಶೆಡ್ಯೂಲಿಂಗ್, ಟೀಮ್ ಇಂಡಿಯಾಗೆ ಆಪತ್ತಿಗೆ ದೂಡುವಂತೆ ಮಾಡ್ತಿರೋದು ಸುಳ್ಳಲ್ಲ.

ವಿಶೇಷ ವರದಿ: ಸಂತೋಷ್

ವಿಶೇಷ ಸೂಚನೆ: ಕ್ರಿಕೆಟ್​​ನ ವಿಶೇಷ ಸುದ್ದಿಗಳಿಗಾಗಿ ವೀಕ್ಷಿಸಿ ‘ರನ್ ಭೂಮಿ’ ಪ್ರತಿದಿನ ಬೆಳಗ್ಗೆ 8.27ಕ್ಕೆ ನ್ಯೂಸ್ ಫಸ್ಟ್ ಚಾನೆಲ್