2ನೇ ಪಂದ್ಯದ ಹೀನಾಯ ಸೋಲಿನಿಂದ ಪಾಠ ಕಲಿತ ಭಾರತ

ಬೌಲಿಂಗ್, ಬ್ಯಾಟಿಂಗ್​​ನಲ್ಲೂ ಎರಡರಲ್ಲೂ ಭರ್ಜರಿ ಪ್ರದರ್ಶನ

ಹಾರ್ದಿಕ್, ಮುಕೇಶ್, ಸಂಜು, ಗಿಲ್, ಸೂರ್ಯ ಸೂಪರ್​ ಆಟ

ಕೆರಿಬಿಯನ್​ ನಾಡಲ್ಲಿ ಯಂಗ್​ ಇಂಡಿಯಾ ಘರ್ಜಿಸಿದೆ. 2ನೇ ಏಕದಿನದ ಹೀನಾಯ ಸೋಲಿನ ಟೀಕೆಗಳಿಗೆ ಅಬ್ಬರದ ಪ್ರದರ್ಶನದಿಂದಲೇ ಆನ್ಸರ್​​ ಕೊಟ್ಟಿದೆ. ಟ್ರಿನಿಡಾಡ್​ ಅಂಗಳದಲ್ಲಿ ಬ್ಯಾಟಿಂಗ್​ – ಬೌಲಿಂಗ್​ ಎರಡರಲ್ಲೂ ಟೀಮ್​ ಇಂಡಿಯಾದ ಆರ್ಭಟ ಹೇಗಿತ್ತು? ಪಂದ್ಯದ ಹೈಲೆಟ್ಸ್ ಇಲ್ಲಿದೆ.

ಗಿಲ್-ಕಿಶನ್​ ಆಟಕ್ಕೆ ವಿಂಡೀಸ್​ ಸುಸ್ತು..!

ಟಾಸ್​ ಸೋತು ಬ್ಯಾಟಿಂಗ್​ ಆರಂಭಿಸಿದ ಟೀಮ್​ ಇಂಡಿಯಾಗೆ ಶುಭ್​ಮನ್​ ಗಿಲ್​-ಇಶಾನ್​ ಕಿಶನ್​ ಸಾಲಿಡ್​ ಓಪನಿಂಗ್​ ನೀಡಿದ್ರು. ವಿಂಡೀಸ್​ ಬೌಲರ್​ಗಳ ಮೇಲೆ ಸವಾರಿ ಮಾಡಿ ಮೊದಲ ವಿಕೆಟ್​​ಗೆ ಬರೋಬ್ಬರಿ 143 ರನ್​ಗಳ ಜೊತೆಯಾಟವಾಡಿದ್ರು.

4ನೇ ಕ್ರಮಾಂಕದಲ್ಲಿ ಅಬ್ಬರಿಸಿದ ಸಂಜು..!

ಅಬ್ಬರದ ಹಾಫ್​ ಸೆಂಚುರಿ ಸಿಡಿಸಿದ ಇಶಾನ್​ ಕಿಶನ್​, 77 ರನ್​ ಸಿಡಿಸಿ ಔಟಾದ್ರು. ಆ ಬಳಿಕ ಕಣಕ್ಕಿಳಿದ ಋತುರಾಜ್​ ಗಾಯಕ್ವಾಡ್​​ ಬಿಗ್​ ಸ್ಕೋರ್​ ಕಲೆ ಹಾಕುವಲ್ಲಿ ವಿಫಲರಾದ್ರು. ಆದ್ರೆ 4ನೇ ಕ್ರಮಾಂಕದಲ್ಲಿ ಬ್ಯಾಟಿಂಗ್​ಗೆ ಬಂದ ಸಂಜು ಸ್ಯಾಮ್ಸನ್​ ಭರ್ಜರಿ ಅರ್ಧಶತಕ ಸಿಡಿಸಿದ್ರು.

ಹಾರ್ದಿಕ್​-ಸೂರ್ಯ ಕುಮಾರ್ ಸೂಪರ್​ ಆಟ..!

ಅರ್ಧಶತಕದ ಬೆನ್ನಲ್ಲೇ ಸಂಜು ಸ್ಯಾಮ್ಸನ್​ ಔಟಾದ್ರೆ, ಶತಕದಂಚಿನಲ್ಲಿ ಶುಭ್​ಮನ್​ ಗಿಲ್​ ಎಡವಿದ್ರು. 11 ಬೌಂಡರಿ ಸಿಡಿಸಿ 85 ರನ್​ಗಳಿಸಿದ್ದ ಗಿಲ್​, ಸೆಂಚುರಿ ಸಿಡಿಸೋ ಅವಕಾಶವನ್ನು ಮಿಸ್​ ಮಾಡಿಕೊಂಡ್ರು. ಆ ಬಳಿಕ ಜೊತೆಯಾದ ಸೂರ್ಯ ಕುಮಾರ್​ ಯಾದವ್​, ಹಾರ್ದಿಕ್​ ಪಾಂಡ್ಯ ಜೋಡಿ ವಿಂಡೀಸ್​ ಬೌಲರ್​ಗಳ ಬೆವರಿಳಿಸಿದ್ರು. ಸೂರ್ಯ ಕುಮಾರ್​ ಯಾದವ್​, 35 ರನ್​ ಸಿಡಿಸಿದ್ರೆ, ಹಾರ್ದಿಕ್​ ಪಾಂಡ್ಯ ಸ್ಫೋಟಕ 70 ರನ್​ಗಳ ಇನ್ನಿಂಗ್ಸ್​ ಕಟ್ಟಿದ್ರು. 50 ಓವರ್​ಗಳ ಅಂತ್ಯಕ್ಕೆ 5 ವಿಕೆಟ್​ ಕಳೆದುಕೊಂಡ ಟೀಮ್​ ಇಂಡಿಯಾ 351 ರನ್​ಗಳ ಬೃಹತ್​ ಮೊತ್ತ ಕಲೆಹಾಕ್ತು.

ಆರಂಭದಲ್ಲೇ ಕಂಗಾಲಾದ ವೆಸ್ಟ್​ ಇಂಡೀಸ್​..!

ಬೆಟ್ಟದಂತಹ ಸವಾಲನ್ನು ಬೆನ್ನತ್ತಿದ ವಿಂಡೀಸ್​ ಪಡೆ ಆರಂಭದಲ್ಲೇ ಎಡವಿತು. ಮುಖೇಶ್​ ಕುಮಾರ್​ ಆರ್ಭಟದ ಮುಂದೆ ಕಂಗಾಲಾದ ವಿಂಡೀಸ್​ ಪಡೆ 17 ರನ್​ಗಳಿಸುವಷ್ಟರಲ್ಲೇ 3 ವಿಕೆಟ್​​ ಕಳೆದುಕೊಳ್ತು. ಬ್ರೆಂಡನ್​ ಕಿಂಗ್​, ಕೈಲ್​ ಮೆಯರ್ಸ್​, ಶಾಯ್​ ​ ಹೋಪ್​ ಪೆವಿಲಿಯನ್​ ಪರೇಡ್​ ನಡೆಸಿದ್ರು.

151 ರನ್​ಗಳಿಗೆ ವಿಂಡೀಸ್​​ ಆಲೌಟ್​.​.!

ಆರಂಭಿಕ ಆಘಾತ ಕಂಡ ಕೆರಬಿಯನ್​ ಪಡೆಗೆ ಸುಧಾರಿಸಿಕೊಳ್ಳಲು ಟೀಮ್​ ಇಂಡಿಯನ್ಸ್​ ಅವಕಾಶವನ್ನೇ ನೀಡಲಿಲ್ಲ.. ಜಯದೇವ್​ ಉನಾದ್ಕತ್​, ಶಾರ್ದೂಲ್​ ಠಾಕೂರ್, ಕುಲ್​ದೀಪ್​ ಯಾದವ್​ ಮತ್ತೆ ಶಾಕ್​ ಟ್ರೀಟ್​ಮೆಂಟ್​ ನೀಡಿದ್ರು. ಪರಿಣಾಮ 151 ರನ್​ಗಳಿಗೆ ವಿಂಡೀಸ್​ ಆಲೌಟ್​ ಆಯ್ತು. 200 ರನ್​ ಅಂತರದ ಬೃಹತ್​ ಜಯ ಸಾಧಿಸಿದ ಟೀಮ್​ ಇಂಡಿಯಾ 2-1 ಅಂತರದಲ್ಲಿ ಸರಣಿ ಕೈ ವಶ ಮಾಡಿಕೊಳ್ತು.

ವಿಶೇಷ ಸೂಚನೆ: ಕ್ರಿಕೆಟ್​​ನ ವಿಶೇಷ ಸುದ್ದಿಗಳಿಗಾಗಿ ವೀಕ್ಷಿಸಿ ‘ರನ್ ಭೂಮಿ’ ಪ್ರತಿದಿನ ಬೆಳಗ್ಗೆ 8.27ಕ್ಕೆ ನ್ಯೂಸ್ ಫಸ್ಟ್ ಚಾನೆಲ್