ರಾಜಕೀಯಕ್ಕೆ ಮತ್ತೊಬ್ಬ ಸ್ಟಾರ್​ ಹೀರೋ ಎಂಟ್ರಿ

ತೆಲುಗು ಸ್ಟಾರ್​ ಹೀರೋ ನಿತಿನ್​​ ರಾಜಕೀಯಕ್ಕೆ..!

ಕಾಂಗ್ರೆಸ್ಸಾ? ಬಿಜೆಪಿನಾ? ಯಾವ ಪಕ್ಷ ಸೇರೋದು?

ಹೈದರಾಬಾದ್​: ತೆಲುಗು ಸಿನಿಮಾ ಇಂಡಸ್ಟ್ರೀಗೂ ರಾಜಕೀಯಕ್ಕೂ ಅನಾದಿಕಾಲದ ನಂಟು. ಅನ್ನಗಾರು ಎಂದೇ ಖ್ಯಾತಿ ಹೊಂದಿರೋ ಮಹಾನ್​ ನಟ ನಂದಮೂರಿ ತಾರಕ ರಾಮಾರಾವ್, ತೆಲುಗು ದೇಶಂ ಪಕ್ಷ ಸ್ಥಾಪಿಸಿ ಕೇವಲ 8 ತಿಂಗಳಲ್ಲಿ ಅಧಿಕಾರಕ್ಕೆ ಬಂದರು. ಕೇವಲ ನಟನೆ ಮಾತ್ರವಲ್ಲದೆ ಆಂಧ್ರಪ್ರದೇಶದ ಸಿಎಂ ಆಗಿ ಅಪಾರ ಸೇವೆ ಸಲ್ಲಿಸಿದರು. ಇವರದ್ದೇ ಹಾದಿಯಲ್ಲಿ ಇಡೀ ತೆಲುಗು ಸಿನಿಮಾ ಇಂಡಸ್ಟ್ರೀ ಸಾಗುತ್ತಿದೆ. ಹಲವು ಕಲಾವಿದರು ಸಿನಿಮಾದ ಜತೆಗೆ ಒಂದಲ್ಲ, ಮತ್ತೊಂದು ರಾಜಕೀಯ ಪಕ್ಷದೊಂದಿಗೆ ಗುರುತಿಸಿಕೊಂಡಿದ್ದಾರೆ. ಸೀನಿಯರ್​ ಎನ್​ಟಿಆರ್​​, ಬಾಲಕೃಷ್ಣಾ, ಚಿರಂಜೀವಿ, ಪವನ್​ ಕಲ್ಯಾಣ್​​​, ಮೋಹನ್​ ಬಾಬು ಹೀಗೆ ಹಲವರು ರಾಜಕೀಯದಿಂದ ಬೆಳೆದವರೇ. ಈಗ ತೆಲುಗಿನ ಮತ್ತೊಬ್ಬ ನಾಯಕ ನಟನ ಸರದಿ.

ಯೆಸ್​​, ತೆಲುಗಿನ ಮತ್ತೊಬ್ಬ ನಟ ರಾಜಕೀಯಕ್ಕೆ ಎಂಟ್ರಿ ಕೊಡಲು ಸಿದ್ಧರಾಗಿದ್ದಾರೆ. ಅದು ಸಿನಿಮಾ ಇಂಡಸ್ಟ್ರಿಯಲ್ಲಿ ಭಾರೀ ಡಿಮ್ಯಾಂಡ್​ ಇರುವಾಗಲೇ ಈ ನಿರ್ಧಾರಕ್ಕೆ ಬಂದಿರುವುದು ಎಲ್ಲರಿಗೂ ಅಚ್ಚರಿ ಮೂಡಿಸಿದೆ. ಸದ್ಯ ರಾಜಕೀಯ ಬರಲು ಸಜ್ಜಾಗಿರೋ ನಟ ಮತ್ಯಾರು ಅಲ್ಲ, ಬದಲಿಗೆ ಜಯಂ ಸಿನಿಮಾ ಮೂಲಕ ಸಂಚಲನ ಸೃಷ್ಟಿಸಿದ್ದ ನಿತಿನ್.

ಸದ್ಯದಲ್ಲೇ ತೆಲಂಗಾಣ ವಿಧಾನಸಭೆ ಚುನಾವಣೆ ನಡೆಯಲಿದೆ. ಈ ವರ್ಷಾಂತ್ಯಕ್ಕೆ ನಡೆಯಲಿರೋ ವಿಧಾನಸಭಾ ಚುನಾವಣೆಯಲ್ಲಿ ಸ್ಪರ್ಧಿಸಲು ನಿತಿನ್ ಮುಂದಾಗಿದ್ದಾರೆ. ಹೀಗಾಗಿ ಕಾಂಗ್ರೆಸ್ ಪಕ್ಷದ ಕದವನ್ನು ನಿತಿನ್ ತಟ್ಟಿದ್ದಾರೆ ಎನ್ನಲಾಗಿದೆ. ನಿಜಾಮಾಬಾದ್ ಗ್ರಾಮಾಂತರ ವಿಧಾನಸಭಾ ಕ್ಷೇತ್ರದ ಟಿಕೆಟ್​ಗಾಗಿ ನಿತಿನ್ ಬೇಡಿಕೆ ಇಟ್ಟಿದ್ದಾರೆ ಎಂದು ತೆಲಂಗಾಣ ಕಾಂಗ್ರೆಸ್ ಮೂಲಗಳು ತಿಳಿಸಿವೆ.

ನಿತಿನ್​​ ಕುಟುಂಬಕ್ಕೂ ಕಾಂಗ್ರೆಸ್​​ಗೂ ಹಳೇ ನಂಟು

ನಟ ನಿತಿನ್ ಕುಟುಂಬಸ್ಥರು ಹಲವು ವರ್ಷಗಳಿಂದ ಕಾಂಗ್ರೆಸ್​ನೊಂದಿಗೆ ಗುರುತಿಸಿಕೊಂಡಿದ್ದಾರೆ. ಇವರದ್ದು ಸಿನಿಮಾ, ರಾಜಕೀಯ ಎರಡು ರಂಗಗಳಲ್ಲೂ ತೊಡಗಿಸಿಕೊಂಡ ಕುಟುಂಬ. ಹೀಗಾಗಿ ಮೊದಲಿನಿಂದಲೂ ರಾಜಕೀಯಕ್ಕೆ ಬರಬೇಕು ಎಂಬ ಒತ್ತಡವಿದ್ದರೂ ನಿತಿನ್​ ಮನಸ್ಸು ಮಾಡಿರಲಿಲ್ಲ. ಈಗ ರಾಜಕೀಯಕ್ಕೆ ಬರಲು ನಿತಿನ್​​ ಆಸಕ್ತಿ ತೋರಿದ್ದಾರೆ ಎನ್ನಲಾಗಿದೆ.

ವಿಶೇಷ ಸೂಚನೆ: ಸಿನಿಮಾ ಲೋಕದ ಸ್ಪೆಷಲ್ ಸುದ್ದಿಗಳಿಗಾಗಿ ಪ್ರತಿದಿನ ಸಂಜೆ 6.27ಕ್ಕೆ ನ್ಯೂಸ್‌ ಫಸ್ಟ್‌ ಚಾನೆಲ್​​ನಲ್ಲಿ ‘ಫಿಲ್ಮಿ ಫಸ್ಟ್’ ವೀಕ್ಷಿಸಿ