ಸುಗಂಧ ದ್ರವ್ಯ ವಿಚಾರಕ್ಕೆ ಗಂಡ-ಹೆಂಡತಿ ಮಧ್ಯೆ ಜಗಳ

ಪರ್ಫ್ಯೂಮ್​ ಜಾಸ್ತಿ ಸಿಂಪಡಿಸಿದ್ದಕ್ಕೆ ಶುರುವಾಯ್ತು ವಾಗ್ವಾದ

ಗನ್​ ತೆಗೆದು ಹೆಂಡತಿಗೆ ಶೂಟ್​ ಮಾಡಿದ ಪತಿ.. ಮುಂದೇನಾಯ್ತು?

ಮಧ್ಯ ಪ್ರದೇಶ: ಮನೆಯಿಂದ ಹೊರಗೆ ಹೋಗುವ ವೇಳೆ ಸುಗಂಧ ದ್ರವ್ಯ ಜಾಸ್ತಿ ಹಾಕಿದ್ದಕ್ಕೆ ಗಂಡನೇ ಹೆಂಡತಿಯನ್ನ ಶೂಟ್​​ ಮಾಡಿದ ಘಟನೆ ಗ್ವಾಲಿಯರ್​ನಲ್ಲಿ ನಡೆದಿದೆ. ಗುಂಡು ತಗುಲಿ ಗಂಭೀರವಾಗಿ ಗಾಯಗೊಂಡಿರುವ ಮಹಿಳೆ ಸದ್ಯ ಆಸ್ಪತ್ರೆಗೆ ದಾಖಲಾಗಿದ್ದಾಳೆ. ಅತ್ತ ಪತಿ ಮಾತ್ರ ಸ್ಥಳದಿಂದ ಕಾಲ್ಕಿತ್ತು ಪರಾರಿಯಾಗಿದ್ದಾನೆ.

ಗಣೇಶಪುರದ ನಿವಾಸಿ ನೀಲಂ ಜಾತವ್ ಎಂಬ ಮಹಿಳೆ​ ಎಂಟು ವರ್ಷದ ಹಿಂದೆ ಮಹೇಂದ್ರ ಜಾತವ್ ಎಂಬಾತನನ್ನು ವಿವಾಹವಾಗಿದ್ದಳು. ಮಹೇಂದ್ರ ಮಾತ್ರ ಕ್ರಿಮಿನಲ್​ ಹಿನ್ನಲೆಯಿದ್ದವನಾಗಿದ್ದು, ಆತನ ಮೇಲೆ ಕಳ್ಳತನದ ಆರೋಪಗಳು ಇದ್ದವು. ಹೀಗಾಗಿ ಜೈಲು ಕೂಡ ಸೇರಿದ್ದನು. 4 ವರ್ಷ ಬಳಿಕ ಜೈಲಿನಿಂದ ಬಂದ ಮಹೇಂದ್ರ ಪತ್ನಿ ನೀಲಂ ಜೊತೆ ವಾಸಿಸುತ್ತಿದ್ದನು.

ಶನಿವಾರದಂದು ನೀಲಂ ಮನೆಯಿಂದ ಹೊರಗಡೆ ಹೋಗಿ ಬರಲು ಮುಂದಾಗಿದ್ದಾಳೆ. ಈ ವೇಳೆ ಆಕೆ ಸುಗಂಧ ದ್ರವ್ಯ ಮೈಗೆ ಸಿಂಪಡಿಸಿಕೊಳ್ಳುತ್ತಾಳೆ. ಆದರೆ ಅತಿಯಾಗಿ ಸುಗಂಧ ದ್ರವ್ಯ ಸಿಂಪಡಿಸಿದ್ದೀಯಾ ಎಂಬ ಕಾರಣಕ್ಕೆ ಗಂಡ ಮಹೇಂದ್ರ ಮತ್ತು ನೀಲಂಗೆ ಜಗಳವಾಗುತ್ತದೆ. ಬಳಿಕ ಇಬ್ಬರ ಜಗಳ ತಾರಕಕ್ಕೇರುತ್ತದೆ. ಕೊನೆಗೆ ಮಹೇಂದ್ರ ತನ್ನ ಬಳಿಯಿದ್ದ ಗನ್ ತೆಗೆದು ಆಕೆಗೆ ಶೂಟ್​ ಮಾಡುತ್ತಾನೆ. ಬಳಿಕ ಸ್ಥಳದಿಂದ ಆತನ ಕಾಲ್ಕಿತ್ತಿದ್ದಾನೆ.

ಗುಂಡು ತಗುಲಿ ಗಂಭೀರವಾಗಿ ಗಾಯಗೊಂಡಿದ್ದ ನೀಲಂ ತಕ್ಷಣ ತನ್ನ ಸಹೋದರ ದಿನೇಶ್​​ಗೆ ಕರೆ ಮಾಡುತ್ತಾಳೆ. ಕೂಡಲೇ ಸ್ಥಳಕ್ಕೆ ಆಗಮಿಸಿದ ಆತ ಆಕೆಯನ್ನ ಆಸ್ಪತ್ರೆಗೆ ಸೇರಿಸಿದ್ದಾನೆ.

ಸದ್ಯ ನೀಲಂ ಕುಟುಂಬ ಮಹೇಂದ್ರನ ಮೇಲೆ ಬಿಜೋಯಿಲಿ ಪೊಲೀಸ್​​ ಠಾಣೆಯಲ್ಲಿ ದೂರು ನೀಡಿದ್ದಾರೆ. ಕೊಲೆ ಯತ್ನ ಪ್ರಕರಣದ ಮೇಲೆ ಕೇಸ್​​ ದಾಖಲಾಗಿದೆ. ಪೊಲೀಸರು ಆತನಿಗಾಗಿ ಹುಡುಕಾಡುತ್ತಿದ್ದಾರೆ.

ವಿಶೇಷ ಸೂಚನೆ: ಎಲ್ಲಾ DTH & Cableನಲ್ಲಿ ನ್ಯೂಸ್​ಫಸ್ಟ್​ ಚಾನೆಲ್​​​ ಲಭ್ಯ