ಟೀಮ್​ನಲ್ಲಿ ಅತಿ ಹೆಚ್ಚು ರನ್ ಬಿಟ್ಟುಕೊಟ್ಟ ಫೇಸರ್ ಶಾಹೀನ್ ಆಫ್ರಿದಿ

ವಿಕೆಟ್​ ಒಪ್ಪಿಸದೇ ಸೆಂಚುರಿ ಸಿಡಿಸಿ, ಆಟ ಮುಗಿಸಿದ ಕೊಹ್ಲಿ, ರಾಹುಲ್

ಕುಲ್​ದೀಪ್ ಸ್ಪಿನ್​ ಜಾಲಕ್ಕೆ ಬಳ.. ಬಳ ಉದುರಿದ ಪಾಕ್​ ಬ್ಯಾಟ್ಸ್​ಮನ್ಸ್​ ​

2023ರ ಏಷ್ಯಾಕಪ್​ ಟೂರ್ನಿಯ ಸೂಪರ್-4 ಪಂದ್ಯದಲ್ಲಿ ರೋಹಿತ್​ ಶರ್ಮಾ ಸಾರಥ್ಯದ ಭಾರತ ತಂಡವು ಪಾಕ್ ಪಡೆಯನ್ನು ಧೂಳಿಪಟ ಮಾಡಿದೆ. ಕನ್ನಡಿಗ ಕೆ.ಎಲ್​ ರಾಹುಲ್​ ಮತ್ತು ವಿರಾಟ್​ ಕೊಹ್ಲಿಯ ಮನಮೋಹಕವಾದ ಸೆಂಚುರಿಯಿಂದ ಭಾರತ ತಂಡ ಪಾಕ್​ ವಿರುದ್ಧ ಬೃಹತ್​ ರನ್​ ಪೇರಿಸಿತು. 50 ಓವರ್​ಗಳಲ್ಲಿ ಬರೋಬ್ಬರಿ 356 ರನ್​ಗಳನ್ನು ಕಲೆ ಹಾಕಿತ್ತು. ಆದ್ರೆ ಪಾಕ್ ಮಾತ್ರ ಕುಲ್​ದೀಪ್​ ಸ್ಪಿನ್​ ಮೋಡಿಗೆ ಅಲ್ಪ ಮೊತ್ತಕ್ಕೆ ಆಲೌಟ್ ಆಗೋ ಮೂಲಕ ಸೋಲೋಪ್ಪಿಕೊಂಡಿತು.

ನಿನ್ನೆಗೆ ಕ್ರೀಸ್​ ಕಾಯ್ದುಕೊಂಡಿದ್ದ ಮಧ್ಯಕ ಕ್ರಮಾಂಕದ ಬ್ಯಾಟ್ಸ್​ಮನ್​ಗಳಾದ ವಿರಾಟ್​ ಕೊಹ್ಲಿ ಹಾಗೂ ರಾಹುಲ್​ ಅಕ್ಷರಶ ಮೈದಾನದಲ್ಲಿ ಸಾಮ್ರಾಟರಾಗಿ ಮೆರೆದರು. ಪಾಕ್​ ಬೌಲರ್​ಗಳನ್ನು ಒಬ್ಬರು ಬಿಟ್ಟರೇ ಇನ್ನೊಬ್ಬರು ಬೌಂಡರಿ ಬಾರಿಸೋ ಮೂಲಕ ಮನಸೋಯಿಚ್ಚೆ ದಂಡಿಸಿದರು. ಹೀಗಾಗಿ ರಾಹುಲ್​ 106 ಎಸೆತಗಳಲ್ಲಿ 12 ಫೋರ್, 2 ಸಖತ್ ಸಿಕ್ಸರ್​ನಿಂದ 111 ರನ್​ಗಳನ್ನ ಬಾರಿಸಿದರು. ಇತ್ತ ರಾಹುಲ್​ ಸೆಂಚುರಿ ಬಾರಿಸುತ್ತಿದ್ದಂತೆ ನೆಕ್ಸ್ಟ್​ ಓವರ್​ನಲ್ಲಿ ಕಿಂಗ್​ ಕೊಹ್ಲಿ ಕೂಡ ಶತಕ ಸಿಡಿಸಿ ಸಂಭ್ರಮಿಸಿದರು. ವಿರಾಟ್ 94 ಬೌಲ್​ಗಳಲ್ಲಿ 9 ಬೌಂಡರಿ, 3 ಅಮೋಘ ಸಿಕ್ಸರ್​ನಿಂದ 122 ರನ್​ ಸಿಡಿಸಿದರು.

ಭಾರತ-ಪಾಕ್​ ನಡುವಿನ ಪಂದ್ಯವು ಸೆ.10 ರಂದು ಪ್ರಾರಂಭವಾಗಿದ್ದು ಭಾರತ ತಂಡ ಬ್ಯಾಟಿಂಗ್ ಮಾಡುವಾಗ ಮಳೆ ಸುರಿದಿತ್ತು. ಹೀಗಾಗಿ ರೀಸರ್ವ್​ ಡೇಯನ್ನು ನಿನ್ನೆ ಅಂದರೆ ಸೆ.11ಕ್ಕೆ ಮುಂದೂಡಲಾಗಿತ್ತು. ಮೊದಲ ದಿನ ಅಬ್ಬರದ ಬ್ಯಾಟಿಂಗ್ ಮಾಡಿದ್ದ ಓಪನರ್ಸ್​ ರೋಹಿತ್​ ಮತ್ತು ಗಿಲ್​ ತಲಾ ಒಂದು ಅರ್ಧಶತಕ ಸಿಡಿಸಿ ಔಟ್​ ಆಗಿದ್ದರು. ಬಳಿಕ ಬ್ಯಾಟಿಂಗ್​ ಮಾಡಲು ಕ್ರೀಸ್​ಗೆ ಆಗಮಿಸಿದ್ದ ಕನ್ನಡಿಗ ಕೆ.ಎಲ್​ ರಾಹುಲ್ ಮತ್ತು ವಿರಾಟ್​ ಕೊಹ್ಲಿ ನಿನ್ನೆಗೆ ಕ್ರೀಸ್​ಗೆ ಕಾಯ್ದುಕೊಂಡು ಪಾಕ್​ ಬೌಲರ್​ಗಳನ್ನು ಸದೆಬಡಿದರು. ವಿಕೆಟ್​ ಒಪ್ಪಿಸಿದೇ ಆಡಿದ ಈ ಇಬ್ಬರು ಶಾಹೀನ್​ ಆಫ್ರಿದಿ (10 ಓವರ್ಸ್​ 79 ರನ್​), ಫಹೀಂ ಅಶ್ರಫ್ (10 ಓವರ್ಸ್​ 74 ರನ್), ಶಾದಾಬ್ ಖಾನ್ (10 ಓವರ್ಸ್ 71 ರನ್)​ ಬೌಲಿಂಗ್​ಗೆ ಮನ ಬಂದಂತೆ ಚಚ್ಚಿದರು. ಇದರಿಂದ ಇಡೀ ಪಂದ್ಯದಲ್ಲಿ ಈ ಮೂವರು ಅತ್ಯಧಿಕ ರನ್​ಗಳನ್ನು ಬಿಟ್ಟುಕೊಟ್ಟರು.

ಭಾರತ 50 ಓವರ್​ಗಳಲ್ಲಿ 356 ರನ್​ಗಳನ್ನು ಕಲೆ ಹಾಕಿತ್ತು. ಈ ಗುರಿಯನ್ನು ಬೆನ್ನತ್ತಿದ ಪಾಕ್ ಯಾವುದೇ ಹಂತದಲ್ಲಿ ಪಂದ್ಯ ಗೆಲ್ಲುವ ಸೂಚನೆಯನ್ನೇ ನೀಡಲಿಲ್ಲ. ತಂಡದ ಮೊತ್ತ 47 ರನ್​ ಇರುವಾಗ ಪ್ರಮುಖವಾದ 3 ವಿಕೆಟ್​ಗಳನ್ನು ಕಳೆದುಕೊಂಡಿತು. ಓಪನರ್​ ಆದ ಫಖರ್ ಜಮಾನ್ ಅವರ 27 ರನ್​ಗಳ ಮಾತ್ರ ತಂಡದ ಪರ ಅಧಿಕ ರನ್​ ಎನಿಸಿತು. ಉಳಿದವಱರು 25 ರನ್​ಗಳ ಗಡಿಯನ್ನ ದಾಟಲಿಲ್ಲ. ಭಾರತದ ಪರ ಕುಲ್​ದೀಪ್​ ಯಾದವ್ ಮಿಂಚಿನ ಸ್ಪಿನ್​ ಬೌಲಿಂಗ್ ಮಾಡುವ ಮೂಲಕ 8 ಓವರ್​ಗಳಲ್ಲಿ ಕೇವಲ 25 ರನ್ ನೀಡಿ ಪ್ರಮುಖವಾದ 5 ವಿಕೆಟ್​ಗಳನ್ನು ಕಬಳಿಸಿದರು. ಹೀಗಾಗಿ ಪಾಕಿಸ್ತಾನ್ 32 ಓವರ್​ಗಳಲ್ಲಿ 128 ರನ್​ಗೆ ತನ್ನೆಲ್ಲಾ ವಿಕೆಟ್​ಗಳನ್ನ ಕಳೆದುಕೊಂಡು ಹೀನಾಯವಾಗಿ ಸೋತಿದೆ. ನೇಪಾಳ ವಿರುದ್ಧ ಅಬ್ಬರಿಸಿದ್ದ ಪಾಕ್ ಭಾರತದ ಜೊತೆಗೆ ಮಕಾಡೆ ಮಲಗಿತು.

ವಿಶೇಷ ಸೂಚನೆ: ಕ್ರಿಕೆಟ್‌ನ ಸುದ್ದಿಗಳಿಗಾಗಿ ಪ್ರತಿದಿನ ಬೆಳಗ್ಗೆ 8.27ಕ್ಕೆ ನ್ಯೂಸ್‌ಫಸ್ಟ್‌ಚಾನೆಲ್​​ನಲ್ಲಿ ‘ರನ್ ಭೂಮಿ’ ವೀಕ್ಷಿಸಿ