ಮಧ್ಯಪ್ರದೇಶ ಗೆಲ್ಲಲು ಬಿಜೆಪಿ-ಕಾಂಗ್ರೆಸ್​ ಶಸ್ತ್ರಾಭ್ಯಾಸ!

ಕರುನಾಡಲ್ಲಿ ಪೇ ಸಿಎಂ.. ಮಧ್ಯಪ್ರದೇಶದಲ್ಲಿ ಫೋನ್ ಪೇ

ಸಿಎಂ​ ಮೇಲೆ​ 50% ಕಮಿಷನ್ ಆರೋಪ ಮಾಡಿದ ‘ಕೈ’!

ಭೂಪಾಲ್​​: ಪೇ ಸಿಎಂ ಇದು ರಾಜ್ಯ ಕಾಂಗ್ರೆಸ್​ಗೆ ಮರುಭೂಮಿಯಲ್ಲಿ ಎಳನೀರು ಸಿಕ್ಕಂತೆ ಮಾಡಿದ್ದ ಅಭಿಯಾನ. ಈ ಪೇ ಸಿಎಂ ಅಸ್ತ್ರವನ್ನ ಬಳಲಿ ರಾಜ್ಯದಲ್ಲಿ ವಿಜಯಲಕ್ಷ್ಮಿ ಒಲಿಸಿಕೊಂಡಿದ್ದ ಕೈಪಡೆ ಮಧ್ಯಪ್ರದೇಶದಲ್ಲೂ ಇದೇ ಅಸ್ತ್ರವನ್ನ ಹೂಡಲು ಮುಂದಾಗಿದೆ. ಆದ್ರೆ ಮೊದಲ ಹೆಜ್ಜೆಯಲ್ಲೇ ಅದೊಂದು ಯಡವಟ್ಟವನ್ನ ಮಾಡಿಕೊಂಡು ಪೇಚಿಗೂ ಸಿಲುಕಿದೆ.

ಕರುನಾಡಲ್ಲಿ ಕಮಾಲ್​ ಮಾಡಿ ಅಧಿಕಾರದ ಗದ್ದುಗೆ ಏರಿದ ಕಾಂಗ್ರೆಸ್​ ಹೊಸ ಇತಿಹಾಸವನ್ನೇ ಸೃಷ್ಟಿಸಿತ್ತು. ಕೇಸರಿ ಪಡೆಯನ್ನ ಮಣಿಸಲು ಕೈ ಪಾಳಯದಿಂದ ಚಿಮ್ಮಿದ ಅದೊಂದು ಬ್ರಹ್ಮಾಸ್ತ್ರ ಗೆಲುವಿನ ನಾಗಾಲೋಟಕ್ಕೆ ಶಕ್ತಿ ತುಂಬಿತ್ತು. ಪೇ ಸಿಎಂ ಅನ್ನೋ ಸಕ್ಸಸ್​ಫುಲ್​ ಅಭಿಯಾನದ ಮೂಲಕ ಬಿಜೆಪಿಗೆ ಟಕ್ಕರ್​ ನೀಡಿದ್ದ ಕಾಂಗ್ರೆಸ್​ ರಾಜ್ಯದಲ್ಲಿ ಟ್ರೆಂಡ್​ ಸೃಷ್ಟಿಮಾಡಿತ್ತು. ಸದ್ಯ ಇದೇ ಪೇ ಸಿಎಂ ಅಸ್ತ್ರವನ್ನ ಮಧ್ಯಪ್ರದೇಶದಲ್ಲೂ ಬಳಸಲು ಕಾಂಗ್ರೆಸ್​ ಮುಂದಾಗಿದೆ.

ಮಧ್ಯಪ್ರದೇಶ ಗೆಲ್ಲಲು ಬಿಜೆಪಿ-ಕಾಂಗ್ರೆಸ್​ ಶಸ್ತ್ರಾಭ್ಯಾಸ!

ಮಧ್ಯಪ್ರದೇಶದಲ್ಲಿ ವಿಧಾನಸಭೆ ಚುನಾವಣೆ ಗೆಲ್ಲಲು ಬಿಜೆಪಿ ಹಾಗೂ ಕಾಂಗ್ರೆಸ್​ ಪಕ್ಷಗಳು ಭರ್ಜರಿ ಶಸ್ತ್ರಭ್ಯಾಸ ನಡೆಸಿವೆ. ಕರುನಾಡನ್ನ ಗೆದ್ದ ಹುಮ್ಮಸ್ಸಿನಲ್ಲೇ ಮಧ್ಯಪ್ರದೇಶದಲ್ಲೂ ಗೆಲವು ದಾಖಲಿಸಲು ಕಾಂಗ್ರೆಸ್​ ಪಣತೊಟ್ಟಿದೆ. ಸಿಎಂ ಶಿವರಾಜ್​ ಸಿಂಗ್​ ಚೌಹಾಣ್​ ನೇತೃತ್ವದ ಬಿಜೆಪಿ ಸರ್ಕಾರದ ವಿರುದ್ಧ ರಣಕಹಳೆ ಮೊಳಗಿಸಿದೆ. ಮಧ್ಯಪ್ರದೇಶದ ಕಾಂಗ್ರೆಸ್ ಅಧ್ಯಕ್ಷ ಕಮಲನಾಥ್ ನೇತೃತ್ವದಲ್ಲಿ ಗೆಲುವಿನ ಇತಿಹಾಸ ಸೃಷ್ಟಿಸಿಲು ದಂಡು ದಾಳಿಯೊಂದಿಗೆ ಲಗ್ಗೆ ಇಟ್ಟಿದೆ.

ರಾಜ್ಯದಲ್ಲಿ ಬಸವರಾಜ್​ ಬೊಮ್ಮಾಯಿ ನೇತೃತ್ವದ ಬಿಜೆಪಿ ಸರ್ಕಾರದ ವಿರುದ್ಧ ಕಾಂಗ್ರೆಸ್​ ಹೂಡಿದ್ದ ಪೇ ಸಿಎಂ ಬಾಣ ನಿರೀಕ್ಷೆಗೂ ಮೀರಿ ಸದ್ದು ಮಾಡಿತ್ತು. ಸದ್ಯ ಇದೇ ಅಸ್ತ್ರವನ್ನ ಮಧ್ಯಪ್ರದೇಶದಲ್ಲೂ ಹೂಡಲು ಕಾಂಗ್ರೆಸ್​ ಮುಂದಾಗಿದೆ. ಆದ್ರೆ ಪೇ ಸಿಎಂ ಬದಲು ಫೋಸ್​ ಪೇ ಅನ್ನೋ ಹೆಸರು ಬಳಸಿ ಸಿಎಂ ಶಿವರಾಜ್​ ಸಿಂಗ್​ ಚೌಹಾಣ್​ ವಿರುದ್ಧ ಮುಗಿಬಿದ್ದಿದೆ. ಬಿಜೆಪಿ ಸರ್ಕಾರದ ವಿರುದ್ಧ ಭ್ರಷ್ಟಾಚಾರದ ಆರೋಪ ಮಾಡಿದೆ. ಫೋನ್​ ಪೇ ಪೋಸ್ಟರ್​ಗಳಲ್ಲಿ ಸಿಎಂ ಪೋಟೋವನ್ನ ಮುದ್ರಿಸಿ ರಾಜಧಾನಿ ಭೂಪಾಲ್​ನ ಸಾರ್ವಜನಿಕ ಸ್ಥಳದಲ್ಲಿ ಅಂಟಿಸಿದೆ. ಈ ಬಗ್ಗೆ ಟ್ರೀಟ್​ ಸಹ ಮಾಡಿ ಬಿಜೆಪಿಗೆ ಕುಟುಕಿದೆ.

ಇಂದೋರ್​ನ ವಿಜಯನಗರದ ಬೀದಿಗಳಲ್ಲಿ ಶಿವರಾಜ್ ಭ್ರಷ್ಟಾಚಾರ. 50% ತನ್ನಿ, ಫೋನ್‌ನಲ್ಲಿ ಕೆಲಸ ಮಾಡಿ. ಮಧ್ಯಪ್ರದೇಶದ ಜನರಿಗೆ ಇದು ಗೊತ್ತು, ಅವರು 50% ಕಮಿಷನ್ ತೆಗೆದುಕೊಳ್ಳುವವರನ್ನು ಗುರುತಿಸುತ್ತಾರೆ.

– ಮಧ್ಯಪ್ರದೇಶ ಕಾಂಗ್ರೆಸ್​

ಫೋನ್​ ಪೇ ಅಧಿಕೃತ ಲೋಗೋ ಬಳಸಿ ಪೇಚಿಗೆ ಸಿಲುಕಿದ ‘ಕೈ’!

ಫೋನ್​ ಪೇ ಅಭಿಯಾನ ಮಾಡೋ ಭರದಲ್ಲಿ ಕಾಂಗ್ರೆಸ್​ ಒಂದು ಎಡವಟ್ಟುವನ್ನೂ ಮಾಡಿಕೊಂಡುಬಿಟ್ಟಿದೆ. ರಾಜ್ಯದಲ್ಲಿ ಚಾಣಾಕ್ಷತನದಿಂದ ಕಾನೂನು ತೊಡಕಾದಂತೆ ಕಾಂಗ್ರೆಸ್​ ಪೇಟಿಎಂ ಬದಲು ಪೇಸಿಎಂ ಅನ್ನೋ ಪದ ಬಳಸಿ ಗೆದ್ದಿತ್ತು. ಆದ್ರೆ ಇದೇ ದಾರಿಯಲ್ಲಿ ಹೆಜ್ಜೆ ಇಟ್ಟ ಮಧ್ಯಪ್ರದೇಶ ಕಾಂಗ್ರೆಸ್​ ಮೊದಲ ಹೆಜ್ಜೆಯಲ್ಲೇ ಎಡವಿಬಿಟ್ಟಿದೆ. ಪೇಸಿಎಂ ಬಸಲು ಫೋನ್​ ಪೇ ಎಂಬ ಪದ ಬಳಸಲು ಮುಂದಾದ ಕಾಂಗ್ರೆಸ್​ ಯಾವುದೇ ಬದಲಾವಣೆ ಮಾಡದೇ ಫೋನ್ ಪೇ ಲೋಗೋವನ್ನೇ ಬಳಸಿ ಪೋಸ್ಟರ್​ ಅಂಟಿಸಿದೆ. ಹೀಗಾಗಿ ಫೋನ್​ ಪೇ ಸಂಸ್ಥೆ ಕಾಂಗ್ರೆಸ್​ಗೆ ಕಾನೂನು ಕ್ರಮದ ಚಾಟಿ ಬೀಸಿದೆ.

ಫೋನ್​ ಪೇ ತನ್ನ ಬ್ರ್ಯಾಂಡ್ ಲೋಗೋದ ಅನಧಿಕೃತ ಬಳಕೆಯನ್ನು ಯಾವುದೇ ಮೂರನೇ ವ್ಯಕ್ತಿಯೊಂದಿಗೆ ಹೊಂದಿಲ್ಲ.. ನಾವು ಯಾವುದೇ ರಾಜಕೀಯ ಅಥವಾ ರಾಜಕೀಯೇತರ ವ್ಯಕ್ತಿಗಳೊಂದಿಗೆ ಮತ್ತು ರಾಜಕೀಯ ಪ್ರಚಾರ ಅಥವಾ ಪಕ್ಷದೊಂದಿಗೆ ಸಂಬಂಧ ಹೊಂದಿಲ್ಲ.

– ಫೋನ್​​ ಪೇ

ಇನ್ನೂ ಕಾಂಗ್ರೆಸ್​ನ ಈ ಫೋನ್ ಪೇ ​ಅಭಿಯಾನದ ವಿರುದ್ಧ ಬಿಜೆಪಿ ದೂರು ಸಹ ದಾಖಲಿಸಿದೆ.. ಬಿಜೆಪಿ ದೂರಿನನ್ವಯ ಅಪರಿಚಿತ ವ್ಯಕ್ತಿ ಮೇಲೆ ಭೂಪಾಲ್​ ಪೊಲೀಸರು ಎಫ್‌ಐಆರ್ ದಾಖಲಿಸಿ ತನಿಖೆ ನಡೆಸಿದ್ದಾರೆ.

ಒಟ್ನಲ್ಲಿ ರಾಜ್ಯದಲ್ಲಿ ಪೇ ಸಿಎಂ ಅಭಿಮಾನದ ಮೂಲಕ ಸಕ್ಸಸ್​ ಕಂಡ ಕಾಂಗ್ರೆಸ್​ ಮಧ್ಯಪ್ರದೇಶದಲ್ಲಿ ಮೊದಲ ಹೆಜ್ಜೆಯಲ್ಲೇ ಮುಗ್ಗರಿಸಿದೆ.. ಇದೇ ಅಸ್ತ್ರವನ್ನ ಬಳಸಿಕೊಂಡು ಕೈ ಪಡೆ ಮೇಲೆ ಬಿಜೆಪಿ ಪ್ರತ್ಯಾಸ್ತ್ರ ಹೂಡುತ್ತಾ ಅಂತ ಕಾದುನೋಡಬೇಕಿದೆ.