ಈ ಹೊಸ ಟರ್ಮಿನಲ್​ಗೆ ಎಷ್ಟು ಕೋಟಿ ರೂಪಾಯಿ ವೆಚ್ಚ?

ಬೋಯಿಂಗ್, ಏರ್‌ಬಸ್ ರನ್​ವೇಗೆ ₹80 ಕೋಟಿ ಖರ್ಚು

ಪೋರ್ಟ್ ಬ್ಲೇರ್‌ನ ವೀರ್ ಸಾವರ್ಕರ್ ವಿಮಾನ ನಿಲ್ದಾಣ

ಅಂಡಮಾನ್​ ಮತ್ತು ನಿಕೋಬರ್​ನ ರಾಜಧಾನಿ ಪೋರ್ಟ್ ಬ್ಲೇರ್‌ನ ವೀರ್ ಸಾವರ್ಕರ್ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದ ಹೊಸ ಇಂಟಿಗ್ರೇಟೆಡ್ ಟರ್ಮಿನಲ್ ಕಟ್ಟಡವನ್ನು ಪ್ರಧಾನಿ ಮೋದಿಯವರು ನಾಳೆ ವಿಡಿಯೋ ಕಾನ್ಫರೆನ್ಸಿಂಗ್ ಮೂಲಕ ಉದ್ಘಾಟನೆ ಮಾಡಲಿದ್ದಾರೆ.

ಮೊದಲಿದ್ದ ವಿಮಾನ ನಿಲ್ದಾಣ ಸೇರಿದಂತೆ ಹೊಸ ಟರ್ಮಿನಲ್ ಕಟ್ಟಡವು ಸುಮಾರು 40,800 ಚದರ ಮೀಟರ್‌ ವಿಸ್ತಾರದಲ್ಲಿ ನಿರ್ಮಾಣಗೊಂಡಿದೆ. ಇದು ವಾರ್ಷಿಕವಾಗಿ ಸುಮಾರು 50 ಲಕ್ಷ ಪ್ರಯಾಣಿಕರನ್ನು ನಿಭಾಯಿಸುವ ಸಾಮರ್ಥ್ಯ ಹೊಂದಿದೆ. ಇನ್ನು ಈ ಹೊಸ ಟರ್ಮಿನಲ್​ನಲ್ಲಿ 80 ಕೋಟಿ ರೂಪಾಯಿ ವೆಚ್ಚದಲ್ಲಿ 2 ಬೋಯಿಂಗ್-767-400 ಮತ್ತು 2 ಏರ್‌ಬಸ್- 321 ಮಾದರಿಯ ವಿಮಾನಗಳು ಲ್ಯಾಂಡ್​ ಆಗುವ ವಿಶೇಷವಾದ ರನ್​ವೇ ನಿರ್ಮಾಣ ಮಾಡಲಾಗಿದೆ. ಅಲ್ಲದೇ ಈಗ ಒಮ್ಮೆಗೆ 10 ವಿಮಾನಗಳು ನಿಲ್ದಾಣದಲ್ಲಿ ನಿಲ್ಲಿಸಬಹುದಾಗಿದೆ.

ಈ ಮೊದಲು ವಿಮಾನ ನಿಲ್ದಾಣದಲ್ಲಿ ಪ್ರಯಾಣಿಕರು ಹೆಚ್ಚಾಗಿ ಬರುತ್ತಿದ್ದರಿಂದ ಕೆಲ ಸಮಸ್ಯೆಗಳು ಉಂಟಾಗುತ್ತಿದ್ದವು. ಹೀಗಾಗಿ ಕೇಂದ್ರ ಸರ್ಕಾರ ಹೊಸ ಟರ್ಮಿನಲ್​ ನಿರ್ಮಾಣದ ಕಾರ್ಯ ಕೈಗೊಂಡಿತ್ತು. ಸದ್ಯ ಈ ನಿರ್ಮಾಣದ ಕಾರ್ಯಗಳೆಲ್ಲ ಮುಗಿದಿದ್ದು ಹೊಸ ಟರ್ಮಿನಲ್​ಗಾಗಿ ಬರೋಬ್ಬರಿ 707 ಕೋಟಿ ರೂ.ಗಳನ್ನು ವೆಚ್ಚ ಮಾಡಲಾಗಿದೆ.

ಒಟ್ಟು 28 ಚೆಕ್​ ಮಾಡುವ ಕೌಂಟರ್​ಗಳನ್ನು ಹೊಂದಿದ್ದು ಮೂರು ಪ್ರಯಾಣಿಕರ ಬೋರ್ಡಿಂಗ್​ ಬ್ರಿಡ್ಜ್​ಗಳನ್ನ ನಿರ್ಮಿಸಲಾಗಿದೆ. ಉನ್ನತ ತಂತ್ರಜ್ಞಾನದೊಂದಿಗೆ ಟರ್ಮಿನಲ್​ ರೂಫ್​ಗೆ ಸ್ಕೈಲೈಟ್ಸ್​ ಅನ್ನು ಅಳವಡಿಸಲಾಗಿದ್ದು ಇವು ದಿನದ 12 ಗಂಟೆವರೆಗೆ ನೈಸರ್ಗಿವಾದ ಬೆಳಕನ್ನು ನೀಡುತ್ತವೆ. ಈ ಸಮಯದಲ್ಲಿ ವಿದ್ಯುತ್​ ಅನ್ನು ಬಳಕೆ ಮಾಡುವುದಿಲ್ಲ ಎನ್ನಲಾಗಿದೆ.

ವಿಶೇಷ ಸೂಚನೆ: ಎಲ್ಲಾ DTH & Cableನಲ್ಲಿ ನ್ಯೂಸ್​ಫಸ್ಟ್​ ಚಾನೆಲ್​​​ ಲಭ್ಯ