ಡಾರ್ಲಿಂಗ್​​​ ಪ್ರಭಾಸ್‌ ಬಹುನಿರೀಕ್ಷಿತ ಆದಿಪುರುಷ ವಿಶ್ವಾದ್ಯಂತ ರಿಲೀಸ್

5 ಭಾಷೆಗಳಲ್ಲಿ ಗ್ರ್ಯಾಂಡ್​ ಆಗಿ ತೆರೆಗೆ ಅಪ್ಪಳಿಸಿದ 'ಆದಿಪುರುಷ' ಸಿನಿಮಾ

ಸಿನಿಮಾದಲ್ಲಿ 'ಸೀತಾ ಭಾರತದ ಮಗಳು' ಡೈಲಾಗ್‌ಗೆ ಸೆನ್ಸಾರ್ ಬಿದ್ದಿದ್ದೇಕೆ?

ಡಾರ್ಲಿಂಗ್​​​ ಪ್ರಭಾಸ್‌ ಅಭಿನಯದ ಬಹುನಿರೀಕ್ಷಿತ ಪ್ಯಾನ್ ಇಂಡಿಯಾ ಸಿನಿಮಾ ‘ಆದಿಪುರುಷ’ ಇಂದು ದೇಶಾದ್ಯಂತ ಗ್ರ್ಯಾಂಡ್​ ಆಗಿ ತೆರೆಗೆ ಅಪ್ಪಳಿಸಿದೆ. ಆದಿಪುರುಷ ಚಿತ್ರವು ಬಿಡುಗಡೆಗೂ ಮುನ್ನ ತೀವ್ರ ಕುತೂಹಲ ಹುಟ್ಟಿಸಿದ್ದ ಹಾಗೂ ಕಳಪೆ ಗ್ರಾಫಿಕ್ಸ್​ ಹೀಗೆ ಹತ್ತಾರು ವಿವಾದಾತ್ಮಕ ವಿಷಯಗಳಿಂದ ಸುದ್ದಿಯಲ್ಲಿದ್ದ ಈ ಸಿನಿಮಾವು ಸುಮಾರು 7000ಕ್ಕೂ ಹೆಚ್ಚು ಥಿಯೇಟರ್‌ಗಳಲ್ಲಿ ಭರ್ಜರಿಯಾಗಿ ಬಿಡುಗಡೆಯಾಗಿದೆ.

ಈ ಚಿತ್ರದಲ್ಲಿ ರಾಮನ ಪಾತ್ರದಲ್ಲಿ ಪ್ರಭಾಸ್ ನಟಿಸಿದ್ದಾರೆ. ರಾವಣ ಪಾತ್ರದಲ್ಲಿ ಸೈಫ್ ಅಲಿಖಾನ್ ಅವರು ಅಭಿನಯಿಸಿದ್ದಾರೆ. ಶ್ರೀರಾಮನ ಪತ್ನಿ ಸೀತೆಯ ಪಾತ್ರದಲ್ಲಿ ನಟಿ ಕೃತಿ ಸನೋನ್ ನಟಿಸಿದ್ದಾರೆ. ಈ ಚಿತ್ರವು ಹಿಂದಿ, ತೆಲುಗು, ತಮಿಳು, ಕನ್ನಡ, ಮಲಯಾಳಂ, ಒಟ್ಟು 5 ಭಾಷೆಗಳಲ್ಲಿ ತೆರೆ ಕಂಡಿದೆ. ಇನ್ನು, ಈ ಸಿನಿಮಾವನ್ನು ನೋಡಿದ ಕೆಲ ಅಭಿಮಾನಿಗಳು ಚಿತ್ರ ಚನ್ನಾಗಿದೆ ಎಂದು ಉತ್ತಮ ಪ್ರತಿಕ್ರಿಯೆ ನೀಡಿದ್ದರೆ, ಇನ್ನು ಕೆಲವರು ಕಳಪೆ ಮಟ್ಟದ ಚಿತ್ರ ಇದಾಗಿದೆ ಎಂದು ಸಾಮಾಜಿಕ ಜಾಲತಾಣದಲ್ಲಿ ಕಾಮೆಂಟ್​​ ಮಾಡಿ ಪ್ರತಿಕ್ರಿಯೆ ನೀಡುತ್ತಿದ್ದಾರೆ.

ಆದಿಪುರುಷ ಚಿತ್ರದಲ್ಲಿ ‘ಸೀತಾ ಭಾರತದ ಮಗಳು’ ಎಂದು ಡೈಲಾಗ್​ ಇತ್ತು. ಈ ಡೈಲಾಗ್​ ಇದ್ದಿದ್ದಕ್ಕೆ ಆದಿಪುರುಷ ಚಿತ್ರವನ್ನು ನೇಪಾಳದ ಥಿಯೇಟರ್‌ಗಳಲ್ಲಿ ರಿಲೀಸ್​ ಮಾಡುವುದಿಲ್ಲ ಎಂದು ಕಠ್ಮಂಡು ಮೇಯರ್ ಬಲೇನ್ ಎಂಬುವವರು ಹೇಳಿದ್ದರು. ಬಳಿಕ ಈ ಚಿತ್ರದಲ್ಲಿ ‘ಸೀತಾ ಭಾರತದ ಮಗಳು’ ಸಂಭಾಷಣೆಯನ್ನು ಕಟ್​ ಮಾಡಿ ಚಿತ್ರವನ್ನು ರಿಲೀಸ್​​ ಮಾಡಲಾಗಿದೆ.

ಕಳೆದ ವರ್ಷ ಈ ಸಿನಿಮಾದ ಟೀಸರ್‌ ಅನ್ನು ಬಿಡುಗಡೆ ಮಾಡಲಾಗಿತ್ತು. ಟೀಸರ್ ಹಾಗೂ ಟ್ರೈಲರ್‌‌​​ ನೋಡಿದ ಫ್ಯಾನ್ಸ್​​​​​​​​​ ಕಳಪೆ ಪ್ರತಿಕ್ರಿಯೆ ನೀಡಿದ್ದರು. ಇದೀಗ ಪೌರಾಣಿಕ ಸಿನಿಮಾವನ್ನು ನೋಡಿದ ಸಿನಿ ಪ್ರೇಕ್ಷಕರ ಮೆಚ್ಚುಗೆಯನ್ನು ವ್ಯಕ್ತಪಡಿಸುತ್ತಿದ್ದಾರೆ. ಈ ಚಿತ್ರವು ಬರೋಬ್ಬರಿ 500 ಕೋಟಿ ಬಜೆಟ್‌ನಲ್ಲಿ ತಯಾರಾಗಿದೆ. ಇದೀಗ ಆದಿಪುರುಷ ಚಿತ್ರವು ರಿಲೀಸ್​​ ಆದ ಮೊದಲ ದಿನ ಎಷ್ಟು ಕೋಟಿ ಗಳಿಕೆ ಮಾಡಬಹುದು ಎಂದು ಕಾದುನೋಡಬೇಕಿದೆ.

ವಿಶೇಷ ಸೂಚನೆ: ಸಿನಿಮಾ ಲೋಕದ ಸ್ಪೆಷಲ್ ಸುದ್ದಿಗಳಿಗಾಗಿ ಪ್ರತಿದಿನ ಸಂಜೆ 6.27ಕ್ಕೆ ನ್ಯೂಸ್‌ ಫಸ್ಟ್‌ ಚಾನೆಲ್​​ನಲ್ಲಿ ‘ಫಿಲ್ಮಿ ಫಸ್ಟ್’ ವೀಕ್ಷಿಸಿ