ಬಹುನಿರೀಕ್ಷಿತ 2025ರ ಇಂಡಿಯನ್ ಪ್ರೀಮಿಯರ್​ ಲೀಗ್​ಗೆ ತಯಾರಿ!

ವರ್ಷದ ಕೊನೆಯಲ್ಲಿ ನಡೆಯಲಿರೋ​ 2025ರ ಐಪಿಎಲ್​​ ಮೆಗಾ ಆಕ್ಷನ್​​

ಸ್ಟಾರ್​ ಆಲ್​ರೌಂಡರ್​ ಮೇಲೆ ರಾಯಲ್​ ಚಾಲೆಂಜರ್ಸ್​ ಬೆಂಗಳೂರು ಕಣ್ಣು

ಬಹುನಿರೀಕ್ಷಿತ 2025ರ ಇಂಡಿಯನ್ ಪ್ರೀಮಿಯರ್​ ಲೀಗ್​ಗೆ ತಯಾರಿ ಶುರುವಾಗಿದೆ. ವರ್ಷದ ಕೊನೆಯಲ್ಲಿ ನಡೆಯಲಿರೋ​ ಮೆಗಾ ಆಕ್ಷನ್​​ನಲ್ಲಿ ಬಲಿಷ್ಠ ತಂಡಗಳನ್ನ ಕಟ್ಟುವ ಲೆಕ್ಕಚಾರದಲ್ಲೇ ಎಲ್ಲ ಫ್ರಾಂಚೈಸಿಗಳು ಇವೆ. ಈ ವಿಚಾರದಲ್ಲಿ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ಸಹ ಹೊರತಾಗಿಲ್ಲ.

ಕ್ಯಾಪ್ಟನ್ ಫಾಫ್​​ ಡುಪ್ಲೆಸಿಗೆ ಗೇಟ್ ಪಾಸ್ ನೀಡೋ ಲೆಕ್ಕಾಚಾರದಲ್ಲಿರುವ ಫ್ರಾಂಚೈಸಿ, ಈಗಾಗಲೇ ನ್ಯೂ ಕ್ಯಾಪ್ಟನ್​​ ಹುಡುಕಾಟದಲ್ಲಿ ಬ್ಯುಸಿಯಾಗಿದೆ. ಈ ಸ್ಥಾನಕ್ಕೆ ಕಪ್ ಗೆಲ್ಲಿಸಿಕೊಡಬಲ್ಲ ನಾಯಕನ ಕರೆತರುವ ಯತ್ನದಲ್ಲಿದೆ. ಸ್ಟಾರ್ ಆಲ್​​ರೌಂಡರ್ ಹಾರ್ದಿಕ್ ಪಾಂಡ್ಯ ಮೇಲೆ ಇದೀಗ ಆರ್​​ಸಿಬಿ ಕಣ್ಣು ಬಿದ್ದಿದೆ.

ಮೆಗಾ ಹರಾಜು ಹತ್ತಿರವಾಗ್ತಿದ್ದಂತೆ ದಿನಕ್ಕೊಂದು ಹೆಸರು ಆರ್​ಸಿಬಿ ಅಂಗಳದಲ್ಲಿ ಗಿರಗಿಟ್ಲೆ ಹೊಡೀತಿದೆ. ಮೊನ್ನೆ ತನಕ ಲಕ್ನೋ ತೊರೆಯೋ ಕೆ.ಎಲ್.ರಾಹುಲ್, ಆರ್​ಸಿಬಿ ಸೇರ್ತಾರೆ.. ಕ್ಯಾಪ್ಟನ್ ಆಗ್ತಾರೆ ಅನ್ನೋ ಸುದ್ದಿ ಹರಿದಾಡಿತ್ತು. ಆದ್ರೀಗ ಕೆ.ಎಲ್.ರಾಹುಲ್​ ಬಿಟ್ಟು, ಸ್ಟಾರ್ ಆಲ್​ರೌಂಡರ್ ಹಾರ್ದಿಕ್ ಪಾಂಡ್ಯ ಹೆಸರು ಕೇಳಿ ಬರುತ್ತಿದೆ. ಮೂಲಗಳ ಪ್ರಕಾರ ಮೆಗಾ ಹರಾಜಿನಲ್ಲಿ ಪಾಂಡ್ಯಗೆ ಮಣೆ ಹಾಕಲು ರಾಯಲ್ ಚಾಲೆಂಜರ್ಸ್ ಬೆಂಗಳೂರು ಹದ್ದಿನ ಕಣ್ಣಿಟ್ಟಿದೆ ಎನ್ನಲಾಗ್ತಿದೆ.

ಪಾಂಡ್ಯಗಾಗಿ ಬರೋಬ್ಬರಿ 25 ಕೋಟಿ ಮೀಸಲು

ಕಳೆದ ಎರಡು ಸೀಸನ್​ಗಳಲ್ಲಿ ಫಾಫ್ ಡುಪ್ಲೆಸಿ ನೇತೃತ್ವದ ಆರ್​ಸಿಬಿ ನಿರೀಕ್ಷಿತ ಪ್ರದರ್ಶನ ತೋರಿಲ್ಲ. ಇದೀಗ ಮೊದಲ ಯತ್ನದಲ್ಲೇ ಟ್ರೋಫಿ ಗೆದ್ದ ಹಾರ್ದಿಕ್ ಮೇಲೆ ಒಲವು ತೋರಿರುವ ಆರ್​ಸಿಬಿ ಮ್ಯಾನೇಜ್​ಮೆಂಟ್, ಶತಯಾ ಗತಯಾ ಆರ್​​​​ಸಿಬಿಗೆ ಸೇರಿಸಿಕೊಳ್ಳುವ ಲೆಕ್ಕಚಾರದಲ್ಲಿದೆ. ಮುಂಬೈ ಕ್ಯಾಪ್ಟನ್​ಗಾಗಿ ಒಂದಲ್ಲ.. ಎರಡಲ್ಲ ಬರೋಬ್ಬರಿ 20ರಿಂದ 25 ಕೋಟಿ ಹಣ ಬಿಡ್ ಮಾಡುವ ಚಿಂತನೆ ನಡೆಸಿದ್ಯಂತೆ.

ವಿಶೇಷ ಸೂಚನೆ: ಕ್ರಿಕೆಟ್‌ನ ಸುದ್ದಿಗಳಿಗಾಗಿ ಪ್ರತಿದಿನ ಬೆಳಗ್ಗೆ 8.27ಕ್ಕೆ ನ್ಯೂಸ್‌ಫಸ್ಟ್‌ಚಾನೆಲ್​​ನಲ್ಲಿ ‘ರನ್ ಭೂಮಿ’ ವೀಕ್ಷಿಸಿ