ರಾಜ್ಯದ ಎರಡನೇ ಅತಿ ದೊಡ್ಡ ರನ್​ ವೇ ಎಂಬ ಖ್ಯಾತಿ

460 ಕೋಟಿ ವೆಚ್ಚದಲ್ಲಿ ನಿರ್ಮಾಣಗೊಂಡ ಏರ್​ಪೋರ್ಟ್

ತಮ್ಮ ಮೇಲಿನ ಆರೋಪಕ್ಕೆ ಉತ್ತರ ಕೊಟ್ಟ ಸಂಸದ ರಾಘವೇಂದ್ರ

ರಾಜ್ಯದ ಎರಡನೇ ಅತಿ ದೊಡ್ಡ ರನ್​ ವೇ ಎಂಬ ಖ್ಯಾತಿ ಪಡೆದಿರೋ ಶಿವಮೊಗ್ಗದ ನೂತನ ವಿಮಾನ ನಿಲ್ದಾಣಕ್ಕೆ ಉದ್ಘಾಟನೆಯಾದ ಕೆಲವೇ ತಿಂಗಳಲ್ಲಿ ಕಳಂಕವೊಂದು ಅಂಟಿದೆ. ಸುಮಾರು 460 ಕೋಟಿ ರೂಪಾಯಿ ವೆಚ್ಚದಲ್ಲಿ ನಿರ್ಮಾಣಗೊಂಡ ಏರ್​ಪೋರ್ಟ್​​ ನಿರ್ಮಾಣದಲ್ಲಿ ಭಾರೀ ಭ್ರಷ್ಟಾಚಾರ ನಡೆದಿದೆ ಎಂಬ ಆರೋಪ ಕೇಳಿ ಬರುತ್ತಿದೆ.

‘ಬಿ.ವೈ.ರಾಘವೇಂದ್ರ ಪ್ರಭಾವ ಇದೆ’ ಎಂದ ಗುತ್ತಿಗೆದಾರರ ಸಂಘ

ಈ ಬಗ್ಗೆ ಕಾಂಗ್ರೆಸ್​ ಎಂಎಲ್​ಸಿ ಮಂಜುನಾಥ ಭಂಡಾರಿ ಮಾಡಿದ್ದ ಆರೋಪ ಬೆನ್ನಲ್ಲೆ ಜಿಲ್ಲಾ ಎಸ್ಸಿ-ಎಸ್ಟಿ ಗುತ್ತಿಗೆದಾರರ ಸಂಘ ಸಹ ಆರೋಪಿಸಿದೆ. ವಿಮಾನ ನಿಲ್ದಾಣ ನಿರ್ಮಿಸಿದ ಅನುಭವವೇ ಇಲ್ಲದ ಹಾಗೂ ಹೈವೇ ಕೆಲಸ ಮಾಡುತ್ತಿದ್ದ ಗುತ್ತಿಗೆದಾರಿಗೆ ಏರ್​ಪೋರ್ಟ್ ಗುತ್ತಿಗೆ ನೀಡಿದ್ದರ ಹಿಂದೆ ದೊಡ್ಡಮಟ್ಟದ ಭ್ರಷ್ಟಾಚಾರ ನಡೆದಿದೆ. ಕೆಟಿಪಿಪಿ ಆ್ಯಕ್ಟ್​ ಪ್ರಕಾರ ಕೆಲಸ ನಡೆದಿಲ್ಲ. ಒಂದೇ ಕುಟುಂಬದವರಿಗೆ ಟೆಂಡರ್​ ನೀಡಲಾಗಿದೆ. ಅವಕಾಶ ಇಲ್ಲದಿದ್ದರೂ ಟೆಂಡರ್ ​ದಾರರಿಗೆ 4ಜಿ ವಿನಾಯಿತಿ ನೀಡಲಾಗಿದೆ. ಇದರ ಹಿಂದೆ ಸಂಸದ ಬಿ.ವೈ.ರಾಘವೇಂದ್ರರ ಪ್ರಭಾವ ಕೆಲಸ ಮಾಡಿದೆ. ಇದರ ಬಗ್ಗೆ ಲೋಕಾಯುಕ್ತ ಹಾಗೂ ರಾಜ್ಯಪಾಲರಿಗೆ ದೂರು ನೀಡಲಾಗುವುದು ಎಂದು ಸಂಘದ ಅಧ್ಯಕ್ಷ ಶಶಿಕುಮಾರ್ ಹೇಳಿದ್ದಾರೆ.

ಖಾರವಾಗಿ ಉತ್ತರ ಕೊಟ್ಟ ಬಿವೈ ರಾಘವೇಂದ್ರ

ಏರ್​ಪೋರ್ಟ್​ ಕಾಮಗಾರಿಗೆ ಸಂಬಂಧಿಸಿದಂತೆ ಕೇಳಿ ಬರುತ್ತ್ತಿರುವ ಆರೋಪಗಳಿಗೆ ಸಂಸದ ಬಿ.ವೈ.ರಾಘವೇಂದ್ರ ಖಾರವಾಗಿ ಉತ್ತರ ನೀಡಿದ್ದಾರೆ. ಕಾಮಗಾರಿಗೆ ಸಂಬಂಧಿಸಿದಂತೆ ಯಾವುದೇ ತನಿಖೆ ನಡೆಸಲಿ. ಜನರು ಅವರಿಗೆ ಅಧಿಕಾರ ನೀಡಿದ್ದಾರೆ. ಆದರೆ ಮೂಲ ಸೌಕರ್ಯ ಸಚಿವ ಎಂ.ಬಿ.ಪಾಟೀಲ್​ ಅವರೇ ಶಿವಮೊಗ್ಗ ಏರ್​ಪೋರ್ಟ್​ ಕಾಮಗಾರಿ ಬಗ್ಗೆ ಮಾತನಾಡಿದ್ದಾರೆ. ಎಟಿಆರ್​ ವಿಮಾನ ನಿಲುಗಡೆ ವಿನ್ಯಾಸಗೊಂಡಿದ್ದ ಏರ್​​ಪೋರ್ಟ್ ನಂತರದಲ್ಲಿ ಏರ್​ಬಸ್​ ನಂತಹ ದೊಡ್ಡ ವಿಮಾನ ಸಹ ಇಳಿಯಲು ಅನುಕೂಲವಾಗುವಂತೆ ಮರು ವಿನ್ಯಾಸಗೊಂಡಿದೆ. ಬೆಂಗಳೂರು ಏರ್​​ಪೋರ್ಟ್ ನಂತರದಲ್ಲಿ ರಾಜ್ಯದಲ್ಲಿ ಅತಿದೊಡ್ಡ ರನ್​ ವೇ ಹೊಂದಿರೋ ಏರ್​​ಪೋರ್ಟ್ ಎಂದು ಗುರುತಿಸಿಕೊಂಡಿದೆ. ಹೀಗಿರುವಾಗ ಯಾವುದೇ ತನಿಖೆ ನಡೆದರೂ ಅದಕ್ಕೆ ಸಿದ್ಧ ಎಂದಿದ್ದಾರೆ.

ಸುಮಾರು 450 ಕೋಟಿ ರೂಪಾಯಿ ವೆಚ್ಚದಲ್ಲಿ ನಿರ್ಮಾಣಗೊಂಡ ಅತ್ಯಾಧುನಿಕ ಏರ್​ಪೋರ್ಟ್​ಅ​ನ್ನು ಪ್ರಧಾನಿ ನರೇಂದ್ರ ಮೋದಿ ಸ್ವತಃ ಶಿವಮೊಗ್ಗಕ್ಕೆ ಆಗಮಿಸಿ ಉದ್ಘಾಟಿಸಿದ್ದಾರೆ. ಇದೀಗ ವಿಮಾನ ಹಾರಾಟಕ್ಕೆ ಸಂಬಂಧಿಸಿದಂತೆ ಇದ್ದ ಎಲ್ಲಾ ಅಡೆ ತಡೆಗಳು ನಿವಾರಣೆಯಾಗಿದ್ದು ಆಗಸ್ಟ್​ 31 ರಿಂದ ವಿಮಾನ ಸೇವೆ ಆರಂಭಗೊಳ್ಳಲಿದೆ. ಈ ನಡುವೆ ಏರ್ಪೋರ್ಟ್​ ನಿರ್ಮಾಣದಲ್ಲಿ ಭಾರೀ ಭ್ರಷ್ಟಾಚಾರ ನಡೆದಿದೆ ಎಂಬ ಆರೋಪ ಕೇಳಿ ಬರುತ್ತಿದೆ.

ವಿಶೇಷ ಸೂಚನೆ: ಎಲ್ಲಾ DTH & Cableನಲ್ಲಿ ನ್ಯೂಸ್​ಫಸ್ಟ್​ ಚಾನೆಲ್​​​ ಲಭ್ಯ