‘ವಿ’ ಫಾರ್ ವಿಕ್ಟರ್, V3 ದಾಳಿಗೆ ಎದುರಾಳಿಗಳು ಢರ್

ಈ ತ್ರಿಮೂರ್ತಿಗಳಿಂದ ಸುಲಭವಾಗಿ ಒಲಿಯುತ್ತೆ ವಿಕ್ಟರಿ

ದೇಶಿ ಕ್ರಿಕೆಟ್​ನಲ್ಲಿ ಈ ತ್ರಿವಳಿಗಳು ತಂಡದಲ್ಲಿದ್ರೆ ಸಾಕು

‘ವಿ’ ಫಾರ್ ವಿಕ್ಟರ್​​. ಈ ಮೂರು ಅಕ್ಷರದ ವಿಕ್ಟರಿ ಬೇಕು ಅಂದ್ರೆ ಈ ವಿ3 ತಂಡದಲ್ಲಿ ಇರಲೇಬೇಕು. ಈ ತ್ರಿಮೂರ್ತಿಗಳು ತಂಡದಲ್ಲಿದ್ರೆ ಗೆಲ್ಲೋದೇನು ಮಹಾ ಕಷ್ಟವೇನಲ್ಲ. ಹೌದು, ಪ್ರತಿ ಟೀಮ್ ಅಂಗಳದ ಮಹಾ ಕಾಳಗಕ್ಕೆ ಇಳಿಯೋದೇ ವಿಕ್ಟರಿಗಾಗಿ.
ಈ ವಿಕ್ಟರಿಗಾಗಿ ತಂಡಗಳು ಇನ್ನಿಲ್ಲದ ಕಸರತ್ತನ್ನೇ ನಡೆಸುತ್ವೆ. ಆದ್ರೆ ದೇಶಿ ಕ್ರಿಕೆಟ್​ನಲ್ಲಿ ಈ ತ್ರಿವಳಿಗಳು ತಂಡದಲ್ಲಿದ್ರೆ ಸಾಕು.

ಗೆಲ್ಲೋದು ಅಸಾಧ್ಯದ ಮಾತೇ ಅಲ್ಲ. ಎಂತಹ ಘಟಾನುಘಟಿಗಳು ಕ್ರೀಸ್​ನಲ್ಲಿದ್ರೂ, ಚಳ್ಳೆ ಹಣ್ಣು ತಿನ್ನಿಸೋ ಇವರಿಗೆ ಗೆಲುವು ಸುಲಭದ ತುತ್ತಾಗಿ ಮಾರ್ಪಟ್ಟಿದೆ. ಈ ವಿಕ್ಟರಿಯನ್ನು ಸುಲಭವಾಗಿ ನೀಡೋದೇ ವಿ3 ಗ್ಯಾಂಗ್​. ಅಂದ್ಹಾಗೆ ಈ ವಿ3 ಗ್ಯಾಂಗ್ ಬೇಱರೂ ಅಲ್ಲ. ಕರ್ನಾಟಕದ ವೇಗಿಗಳಾದ ವಿದ್ವತ್​.. ವೈಶಾಕ್.. ವಾಸುಕಿ ಕೌಶಿಕ್​.

ಉದಯೋನ್ಮುಕ ವೇಗಿಗಳಾದ ಈ ಮೂವರೇ ವಿ3.. ದೇಶಿ ಕ್ರಿಕೆಟ್​ನಲ್ಲಿ ದಿನದಿಂದ ದಿನಕ್ಕೆ ಡೇಂಜರಸ್​ ಬೌಲರ್​ಗಳಾಗಿ ಕಾಣುತ್ತಿರುವ ಇವರು, ಎದುರಾಳಿಗಳ ಪಾಲಿಗೆ ಸಿಂಹಸ್ವಪ್ನವಾಗ್ತಿದ್ದಾರೆ. ಮಿಸೈನ್​​​​ಗಳಂತೆ ಎದುರಾಳಿ ಮೇಲೆ ಅಟ್ಯಾಕ್​ ಮಾಡ್ತಿರೋ ಇವರು, ಡೆಡ್ಲಿ ಕಾಂಬಿನೇಷನ್​ ಆಗಿ ದೇಶಿ ಕ್ರಿಕೆಟ್​ನಲ್ಲಿ ಸಂಚಲನ ಮೂಡಿಸ್ತಿದ್ದಾರೆ. ತಂಡದ ನಾಯಕನ ಕೆಲಸವನ್ನೇ ಸುಲಭವಾಗಿಸ್ತಿದ್ದಾರೆ. ಇದಕ್ಕೆ ಬೆಸ್ಟ್​ ಎಕ್ಸಾಂಪಲ್​.. ದೇವದರ್ ಆ್ಯಂಡ್ ದುಲೀಪ್ ಟ್ರೋಫಿ..

ದೇವಧರ್ ಟ್ರೋಫಿಯಲ್ಲಿ ವಿ3 ದಾಳಿಗೆ ಎದುರಾಳಿ ಢರ್

ದೇವಧರ್ ಟ್ರೋಫಿ 4 ವರ್ಷಗಳ ಬಳಿಕ ಆಯೋಜಿಸಿರುವ ಪ್ರತಿಷ್ಠಾತ್ಮಕ ಟೂರ್ನಿ. ಸೌತ್ ಜೋನ್​ ತಂಡದಲ್ಲಿ ಸ್ಥಾನ ಪಡೆದಿರೋ ಈ ಕರ್ನಾಟಕದ ಸೀಮರ್ಸ್​, ನಾರ್ಥ್​ ಜೋನ್​ ಎದುರಿನ ಫಸ್ಟ್​ ಮ್ಯಾಚ್​ನಲ್ಲೇ ಧೂಳ್​ ಎಬ್ಬಿಸಿದ್ರು. ವಿದ್ವತ್ ಉರಿದಾಳಿಗೆ ನಾರ್ಥ್​ ಜೋನ್ ಉಡೀಸ್ ಆಗಿತ್ತು. ಈ ಪಂದ್ಯದಲ್ಲಿ 6 ಓವರ್​​ ಎಸೆದಿದ್ದ ವಿದ್ವತ್, 1 ಓವರ್ ಮೆಡನ್ ಸಹಿತ 5 ವಿಕೆಟ್ ಬೇಟೆಯಾಡಿದ್ರು.

ವಿದ್ವತ್​ಗೆ ಸಾಥ್​ ನೀಡಿದ ವೈಶಾಕ್, 2 ವಿಕೆಟ್ ಬೇಟೆಯಾಡಿದ್ರೆ, ವಾಸುಕಿ ಕೌಶಿಕ್ 5 ಓವರ್​ಗಳಿಂದ 11 ರನ್ ನೀಡಿ 1 ವಿಕೆಟ್ ಉರುಳಿಸುವಲ್ಲಿ ಯಶಸ್ವಿಯಾಗಿದ್ರು. ಈ ಡೆಡ್ಲಿ ಕಾಂಬಿನೇಷನ್​​​ಗೆ ನಾರ್ಥ್ ಜೋನ್ ಜಸ್ಟ್​ 60 ರನ್​ಗಳಿಗೆ ಚಟ್ಟ ಕಟ್ಟಿತ್ತು.

ದುಲೀಪ್ ಟ್ರೋಫಿ ಫೈನಲ್​​ನಲ್ಲೂ ಇವರದ್ದೇ ಆರ್ಭಟ

ಸದ್ಯ ನಡೆದ ದೇವಧರ್ ಟ್ರೋಫಿಯಲ್ಲಿ ಮಾತ್ರವಲ್ಲ. ಇತ್ತಿಚೆಗೆ ಮುಕ್ತಾಯಗೊಂಡ ದುಲೀಪ್ ಟ್ರೋಫಿಯಲ್ಲೂ ಮ್ಯಾಜಿಕ್ ಮಾಡಿದ್ರು. ಈ ಮೂವರ ಅಟ್ಯಾಕಿಂಗ್​ ಸ್ಪೆಲ್​ಗೆ ವೆಸ್ಟ್​ ಝೋನ್​ನಲ್ಲಿದ್ದ ಪೃಥ್ವಿ ಶಾ, ಪ್ರಿಯಾಂಕ್ ಪಾಂಚಲ್​​​​​​​​​​​​, ಚೇತೇಶ್ವರ್ ಪೂಜಾರ, ಸೂರ್ಯಕುಮಾರ್ ಯಾದವ್, ದೇಶಿ ಕ್ರಿಕೆಟ್​ನ ಬ್ರಾಡ್ಮನ್ ಖ್ಯಾತಿಯ ಸರ್ಫರಾಜ್ ಸಹಿತ ಹಲ್ಲಿಲ್ಲದ ಹಾವಿನಂತಾಗಿದ್ದರು.

ಇಲ್ಲೂ ಕೂಡ ನಡೆದಿದ್ದೂ ವಿ3 ಆಟವೇ ಅನ್ನೋದನ್ನು ಮರೆಯುವಂತಿಲ್ಲ. ವಿದ್ವತ್ ಕಾವೇರಪ್ಪ ಎರಡು ಇನ್ನಿಂಗ್ಸ್​ಗಳಿಂದ ಒಟ್ಟು 8 ವಿಕೆಟ್ ಉರುಳಿಸಿದ್ರೆ, ವಾಸುಕಿ ಕೌಶಿಕ್ 5 ವಿಕೆಟ್ ಬೇಟೆಯಾಡಿದರು. ಈ ಇಬ್ಬರಿಗೆ ಉತ್ತಮ ಸಾಥ್ ನೀಡಿದ್ದ ವೈಶಾಕ್ 3 ವಿಕೆಟ್ ಉರುಳಿಸಿ ಫೈನಲ್​ ಗೆಲುವಿನಲ್ಲಿ ಮೇನ್ ರೋಲ್ ಪ್ಲೇ ಮಾಡಿದ್ರು. ಟೂರ್ನಿಯಲ್ಲಿ ಗಮನಾರ್ಹ ಪ್ರದರ್ಶನವನ್ನೇ ನೀಡಿದ್ರು.

ದುಲೀಪ್ ಟ್ರೋಫಿಯಲ್ಲಿ ಪ್ರದರ್ಶನ

ದುಲೀಪ್ ಟ್ರೋಫಿಯಲ್ಲಿ ವಿದ್ವತ್​, 4 ಇನ್ನಿಂಗ್ಸ್​ಗಳಿಂದ 15 ವಿಕೆಟ್ ಉರುಳಿಸಿದ್ರೆ, ವೈಶಾಕ್ 9 ವಿಕೆಟ್ ಉರುಳಿಸುವಲ್ಲಿ ಯಶಸ್ವಿಯಾಗಿದ್ದರು. ಇನ್ನೂ ಫೈನಲ್​ ಪಂದ್ಯದಲ್ಲಿ ಕಣಕ್ಕಿಳಿದಿದ್ದ ವಾಸುಕಿ 5 ವಿಕೆಟ್ ಬೇಟೆಯಾಡಿದರು.

ದಕ್ಷಿಣ ಭಾರತದ ಡೆಡ್ಲಿ ಪೇಸರ್​​ಗಳು ಈ ವಿ3

ದಕ್ಷಿಣ ಭಾರತ ಎಂದಾಕ್ಷಣ ನೆನಪಿಗೆ ಬರೋದು ಸ್ಪಿನ್ನರ್​ಗಳ ಪ್ರಾಬಲ್ಯ. ಆದ್ರೆ ಈ ಲೆಕ್ಕಚಾರವನ್ನು ದೇಶಿ ಕ್ರಿಕೆಟ್​​ನಲ್ಲಿ ಉಲ್ಟಾ ಮಾಡ್ತಿರೋದು ವಿದ್ವತ್​. ವೈಶಾಕ್.. ವಾಸುಕಿ ಕೌಶಿಕ್​.. ರೆಡ್ ಬಾಲ್ ಆ್ಯಂಡ್ ವೈಟ್​ ಬಾಲ್​ನಲ್ಲಿ ಶೈನ್​ ಆಗ್ತಿದ್ದಾರೆ. ಅಷ್ಟೇ ಅಲ್ಲ, ದಿನದಿಂದ ದಿನಕ್ಕೆ ಮೋಸ್ಟ್​ ಸಕ್ಸಸ್​​ಫುಲ್ ಬೌಲರ್​​ಗಳಾಗಿ ಕಾಣಿಸಿಕೊಳ್ಳುತ್ತ ಸೆಲೆಕ್ಷನ್ ಕಮಿಟಿ ಗಮನ ಕೂಡ ಸೆಳೆದಿದ್ದಾರೆ. ಈಗಾಗಲೇ ಟೀಮ್ ಇಂಡಿಯಾ ಬಾಗಿಲು ಬಡೆಯುತ್ತಿರುವ ಈ ಕನ್ನಡಿಗರು, ಇದೇ ಮ್ಯಾಚ್ ವಿನ್ನಿಂಗ್ ಪರ್ಫಾಮೆನ್ಸ್ ನೀಡುತ್ತಾ ಮುಂದೆ ಸಾಗಿದ್ರೆ, ಏಕದಿನ ವಿಶ್ವಕಪ್​ ಬಳಿಕ ಟೀಮ್ ಇಂಡಿಯಾ ಎಂಟ್ರಿಯಂತೂ ಗ್ಯಾರಂಟಿ.

ಒಟ್ನಲ್ಲಿ.. ಸಿಕ್ಕ ಸಿಕ್ಕ ಚಾನ್ಸ್​ನ ಸದ್ಭಳಕೆ ಮಾಡಿಕೊಳ್ಳುತ್ತ ಟೀಮ್ ಇಂಡಿಯಾ ಎಂಟ್ರಿಯ ಶಪಥ ಮಾಡಿರೋ ಇವರು, ಅದಷ್ಟು ಬೇಗ ಟೀಮ್ ಇಂಡಿಯಾ ಸೇರಲಿ ಅನ್ನೋದೇ ನಮ್ಮಲ್ಲರ ಆಶಯ.

ವಿಶೇಷ ವರದಿ: ಸಂತೋಷ್

ವಿಶೇಷ ಸೂಚನೆ: ಕ್ರಿಕೆಟ್​​ನ ವಿಶೇಷ ಸುದ್ದಿಗಳಿಗಾಗಿ ವೀಕ್ಷಿಸಿ ‘ರನ್ ಭೂಮಿ’ ಪ್ರತಿದಿನ ಬೆಳಗ್ಗೆ 8.27ಕ್ಕೆ ನ್ಯೂಸ್ ಫಸ್ಟ್ ಚಾನೆಲ್