ಬೆಸ್ಟ್ ಬೌಲಿಂಗ್ ಅಟ್ಯಾಕ್​.. ಮ್ಯಾನೇಜ್​ಮೆಂಟ್​ಗೆ ತಲೆನೋವು

ಹೇಗಿರಲಿದೆ ಭಾರತದ ಬೌಲಿಂಗ್ ಕಾಂಬಿನೇಷನ್​..?

ಶಮಿಯನ್ನೇ ಓವರ್ ಟೇಕ್ ಮಾಡ್ತಾರಾ ಶಾರ್ದೂಲ್..?

ಏಷ್ಯಾಕಪ್​​ ಕಿಕ್​​ ಸ್ಟಾರ್ಟ್​ ಆಗಿದಾಯ್ತು. ಟೀಮ್ ಇಂಡಿಯಾ ಸಿಂಹಳೀಯರ ನಾಡಿಗೆ ತೆರಳಿದ್ದೂ ಆಯ್ತು. ಇನ್ನೇನಿದ್ದರೂ ಮಹಾ ಸಂಗ್ರಾಮದಲ್ಲಿ ಅಖಾಡಕ್ಕಿಳಿಯೋದೊಂದೇ ಬಾಕಿ. ಈ ಮಹಾ ಸಮರಕ್ಕೂ ಮುನ್ನ ಟೀಮ್ ಇಂಡಿಯಾ ಗೊಂದಲದ ಗೂಡಾಗಿ ಮಾರ್ಪಟ್ಟಿದೆ. ಬ್ಯಾಟಿಂಗ್​ನದ್ದು ಒಂದು ಕಥೆಯಾದ್ರೆ, ಬೌಲಿಂಗ್​ನದ್ದು ಮತ್ತೊಂದು ಕಥೆ..!

ಏಷ್ಯಾಕಪ್​​ಗೆ ಅದ್ದೂರಿ ಚಾಲನೆ ಸಿಕ್ಕಿದೆ. ನಿರೀಕ್ಷೆಯಂತೆ ಮೊದಲ ಪಂದ್ಯದಲ್ಲಿ ಪಾಕ್, ನೇಪಾಳ ಎದುರು ಗೆದ್ದು ಬೀಗಿದೆ. ಇತ್ತ ಬೆಂಗಳೂರಿನಲ್ಲಿ ಕ್ಯಾಂಪ್​ ಮುಗಿಸಿ ಸಿಂಹಳೀಯರ ನಾಡಲ್ಲಿ ಘರ್ಜಿಸಲು ಟೀಮ್ ಇಂಡಿಯಾ ಕಾಲಿಟ್ಟಿದ್ದು, ಏಷ್ಯನ್​ ಅಧಿಪತಿಯಾಗಿ ಮೆರೆಯೋಕೆ ಸಕಲ ಸಿದ್ಧತೆ ನಡೆಸಿದೆ. ಆದರೆ ಆರಂಭಕ್ಕೂ ಮುನ್ನವೇ ಒಂದಿಲ್ಲೊಂದು ಗೊಂದಲಕ್ಕೆ ಸಿಲುಕಿರುವ ಟೀಮ್ ಇಂಡಿಯಾಗೆ, ಫಾಸ್ಟ್​ ಬೌಲಿಂಗ್ ಕಾಂಬಿನೇಷನ್ ಸೆಟ್​​ ಮಾಡೋದು ಕಬ್ಬಿಣದ ಕಡಲೆಯಾಗಿ ಮಾರ್ಪಟ್ಟಿದೆ.

ಬೆಸ್ಟ್​ ಬೌಲಿಂಗ್ ಯುನಿಟ್​ನೊಂದಿಗೆ ಏಷ್ಯಾಕಪ್​​​​​​​​​​ ಸಮರಕ್ಕಿಳಿದಿರುವ ಟೀಮ್ ಇಂಡಿಯಾಗೆ ವೈರೆಟಿ ಆಫ್ ಬೌಲಿಂಗ್ ಇದೆ. ಕಾಂಬಿನೇಷನ್​ನಲ್ಲೂ ಹಲವು ಆಯ್ಕೆಗಳಿವೆ. ಬ್ಯಾಲೆನ್ಸಿಂಗ್ ಬೌಲಿಂಗ್ ಅಟ್ಯಾಕ್​ನ ಹೊಂದಿರುವ ಟೀಮ್ ಇಂಡಿಯಾ, ಬಲಿಷ್ಠವಾಗೇ ಕಾಣ್ತಿದೆ. ಆದರೆ, ಯಾವ ಕಾಂಬಿನೇಷನ್​ನಲ್ಲಿ ಕಣಕ್ಕಿಳಿಯಬೇಕು ಅನ್ನೋದೆ ಈಗ ಯಕ್ಷಪ್ರಶ್ನೆಯಾಗಿದೆ.

ಏಷ್ಯಾಕಪ್​​ನಲ್ಲಿ ಯಾವ ಡಿಪಾಟ್ಮೆಂಟ್ ಹೇಗಿದೆಯೋ ಏನೋ? ಆದರೆ, ಟೀಮ್ ಇಂಡಿಯಾದ ಫಾಸ್ಟ್​ ಬೌಲಿಂಗ್ ಡಿಪಾರ್ಟ್​ಟ್ಮೆಂಟ್ ಮಾತ್ರ. ಆನ್​​ ಪೇಪರ್ ಸಿಕ್ಕಾಪಟ್ಟೆ ಸ್ಟ್ರಾಂಗ್​ ಇದೆ. ಮೊಹಮ್ಮದ್​ ಶಮಿ, ಮೊಹಮ್ಮದ್ ಸಿರಾಜ್​​ ಜೊತೆಗೆ ಕಮ್​ಬ್ಯಾಕ್ ಸ್ಟಾರ್​ಗಳಾದ ಜಸ್​ಪ್ರಿತ್​ ಬೂಮ್ರಾ, ಪ್ರಸಿದ್ಧ್​ ಕಷ್ಣ ಬಲ ಹೆಚ್ಚಿಸಿದ್ದಾರೆ.

ಬೂಮ್ರಾ ಜೊತೆ ಮೊಹಮ್ಮದ್ ಸಿರಾಜ್ ಫಿಕ್ಸ್​..!

ಸದ್ಯದ ಪ್ರಶ್ನೆ ಇರೋ ನಾಲ್ವರ ಪೈಕಿ ಬೂಮ್ರಾಗೆ ಸ್ಥಾನ ಫಿಕ್ಸ್​. ಬೂಮ್ರಾ ಜೊತೆಗಾರ ಯಾರು ಅನ್ನೋ ಪ್ರಶ್ನೆಗೆ ಮೊದಲ ಉತ್ತರವೇ ಮೊಹಮ್ಮದ್ ಸಿರಾಜ್ ಆಗಿದ್ದಾರೆ​​​. ಪೇಸ್ ಅಟ್ಯಾಕರ್​ ಆಗಿ ಪವರ್​​ ಪ್ಲೇನಲ್ಲಿ ಮಾಡಿದ್ದ ಪವರ್​ಫುಲ್ ಸ್ಪೆಲ್ ಜೊತೆಗೆ ವಿಕೆಟ್ ಟೇಕರ್ ಬೌಲಿಂಗ್ ಆಪ್ಷನ್​ ಆಗಿ ಸಿರಾಜ್​​ ಇದ್ದಾರೆ.

2022ರಿಂದ ಸಿರಾಜ್​​ ಬೌಲಿಂಗ್

2022ರಿಂದ ಏಕದಿನ ಫಾರ್ಮೆಟ್​ನಲ್ಲಿ ಕನ್ಸಿಸ್ಟೆನ್ಸಿ ಪರ್ಫಾಮೆನ್ಸ್ ನೀಡ್ತಿರುವ ಸಿರಾಜ್, ಪವರ್​​ ಪ್ಲೇನಲ್ಲಿ ಪವರ್ ಫುಲ್ ಸ್ಪೆಲ್ ಮೂಲಕ 26 ವಿಕೆಟ್ ಉರುಳಿಸಿದ್ರ, 4.3ರ ಏಕಾನಮಿಯಲ್ಲಿ ರನ್ ಬಿಟ್ಟುಕೊಟ್ಟಿದ್ದಾರೆ. ಮಿಡಲ್ ಓವರ್​ನಲ್ಲಿ 12 ವಿಕೆಟ್ ಉರುಳಿಸಿರುವ ಸಿರಾಜ್, ಪ್ರತಿ ಓವರ್​ಗೆ 4.8ರಂತೆ ರನ್ ನೀಡಿದ್ದಾರೆ. ಡೆತ್ ಓವರ್​​​ಗಳಲ್ಲಿ 5 ವಿಕೆಟ್ ಉರುಳಿಸಿರುವ ಸಿರಾಜ್, 6.7ರ ಏಕಾನಮಿಯಲ್ಲಿ ರನ್ ನೀಡಿದ್ದಾರೆ.
ಕನ್ನಡಿಗ ಪ್ರಸಿದ್ಧ್ ಕೃಷ್ಣ ಮೂರನೇ ಆಯ್ಕೆಯ ಬೌಲರ್ ಆಗಿ ಸದ್ಯ ಗುರುತಿಸಿಕೊಂಡಿದ್ದಾರೆ. 2022ರಿಂದ ಸಿರಾಜ್​ ಜೊತೆ ಪ್ರಸಿದ್ಧ್​ ಏಕದಿನ ಫಾರ್ಮೆಟ್​ನಲ್ಲಿ ಉತ್ತಮ ಸಾಧನೆ ಮಾಡಿದ್ದಾರೆ. ಮೂರೂ ಹಂತಗಳಲ್ಲಿ ಸ್ಥಿರ ಪ್ರದರ್ಶನ ನೀಡುವಲ್ಲಿ ಯಶಸ್ವಿಯಾಗಿದ್ದಾರೆ..

2022ರಿಂದ ಪ್ರಸಿದ್ಧ್​​ ಬೌಲಿಂಗ್

ಪವರ್​ ಪ್ಲೇನಲ್ಲಿ ಪ್ರಸಿದ್ಧ್​, 5.8ರ ಏಕಾನಮಿ ಕಾಯ್ದುಕೊಂಡು 2 ವಿಕೆಟ್ ಉರುಳಿಸಿದ್ರೆ. ಮಿಡಲ್ ಓವರ್​ಗಳಲ್ಲಿ 16 ವಿಕೆಟ್ ಬೇಟೆಯಾಡಿ, 5.1ರ ಏಕಾನಮಿ ಕಾಯ್ದಕೊಂಡಿದ್ದಾರೆ. ಇಷ್ಟೇ ಅಲ್ಲ. ಡೆತ್ ಓವರ್​ನಲ್ಲಿ 5.3ರ ಏಕಾನಮಿ ಕಾಯ್ದುಕೊಂಡಿರುವ ಕನ್ನಡಿಗ 7 ವಿಕೆಟ್ ಉರುಳಿಸಿದ್ದಾರೆ. ಅಂಕಿ-ಅಂಶದ ಲೆಕ್ಕಾಚಾರ ನೋಡಿದ್ರೆ ಪೇಸ್ ಅಟ್ಯಾಕರ್​ಗಳಾಗಿ ಬೂಮ್ರಾ-ಸಿರಾಜ್-ಪ್ರಸಿದ್ಧ್ ಕಣಕ್ಕಿಳಿಯುವ ಸಾಧ್ಯತೆಯನ್ನ ತಳ್ಳಿಹಾಕುವಂತಿಲ್ಲ. ಮತ್ತೆರಡು ಪ್ರಶ್ನೆ ಕಾಡುತ್ತಿದೆ.

ಅನುಭವಿ ಮೊಹಮ್ಮದ್ ಶಮಿ-ಶಾರ್ದೂಲ್ ಕಥೆ ಏನು..?

ಬೂಮ್ರಾ, ಸಿರಾಜ್​, ಹಾಗೂ ಪ್ರಸಿದ್ಧ್​ ಜೋಡಿ ಕಣಕ್ಕಿಳಿದ್ರೆ, ಅನುಭವಿ ಮೊಹಮ್ಮದ್ ಶಮಿ ಹಾಗೂ ಶಾರ್ದೂಲ್ ಬೆಂಚ್ ಕಾಯಬೇಕಾಗುತ್ತೆ. ಆದ್ರೆ, ಶಮಿಯನ್ನ ಡ್ರಾಪ್​ ಮಾಡೋ ಕೈ ಸುಟ್ಟುಕೊಂಡಂತೆ. ಹೊಸ ಬಾಲ್​​ನಲ್ಲಿ ಕಮಾಲ್ ಮಾಡೋ ಮೊಹಮ್ಮದ್ ಶಮಿ, ಕಂಡೀಷನ್​​ ಅನುಗುಣವಾಗಿ ಬೌಲಿಂಗ್ ಮಾಡಬಲ್ಲರು. ಜೊತೆಗೆ ಬ್ಯಾಟಿಂಗ್​​ಗೆ ವಿಭಾಗಕ್ಕೆ ಒಂದಿಷ್ಟು ಕೊಡುಗೆಯನ್ನು ನೀಡಬಲ್ಲರು.

ಆಲ್​ರೌಂಡರ್ ಶಾರ್ದೂಲ್ ರನ್ನೂ ತಳ್ಳಿಹಾಕುವಂತಿಲ್ಲ. ಯಾಕಂದ್ರೆ, ಮಿಡಲ್ ಓವರ್​ಗಳಲ್ಲಿ ವಿಕೆಟ್ ಟೇಕಿಂಗ್ ಎಬಿಲಿಟಿ ಹೊಂದಿರುವ ಶಾರ್ದೂಲ್, ಟೀಮ್ ಇಂಡಿಯಾ ಬ್ಯಾಟಿಂಗ್ ವಿಭಾಗದ ಬಲವನ್ನೂ ಹೆಚ್ಚಿಸಬಲ್ಲರು. ಹೀಗಾಗಿ ಮೊಹಮ್ಮದ್ ಶಮಿ ಹಾಗೂ ಪ್ರಸಿದ್ಧ್​ ಕೃಷ್ಣರನ್ನ ಓವರ್​ ಟೇಕ್​ ಮಾಡಿ ಶಾರ್ದೂಲ್ ಠಾಕೂರ್ ಚೆಂಡು ಹಂಚಿಕೊಂಡರು ಅಚ್ಚರಿ ಇಲ್ಲ.

ಟೀಮ್ ಇಂಡಿಯಾ ಬತ್ತಳಿಕೆಯಲ್ಲಿ ವೈರೈಟಿ ಆಫ್ ಬೌಲಿಂಗ್ ಅಪ್ಷನ್ ಇದೆ. ಹೀಗಾಗಿ ಇಂಜುರಿ ಮ್ಯಾನೇಜ್​ಮೆಂಟ್​ ಗಮನದಲ್ಲಿರಿಸಿಕೊಂಡು ರೊಟೇಶನ್​ ಆಧಾರದಲ್ಲಿ ಚಾನ್ಸ್​ ನೀಡೋ ಸಾಧ್ಯತೆ ದಟ್ಟವಾಗಿದೆ. ಟೀಮ್ ಮ್ಯಾನೇಜ್​ಮೆಂಟ್ ವೇಗಿಗಳಿಗೆ ಯಾವ ಲೆಕ್ಕಾಚಾರದಲ್ಲಿ ಚಾನ್ಸ್​ ನೀಡುತ್ತೆ ಅನ್ನೋದನ್ನ ಕಾದು ನೋಡಬೇಕಿದೆ.
ವಿಶೇಷ ವರದಿ: ಸಂತೋಷ್

ವಿಶೇಷ ಸೂಚನೆ: ಕ್ರಿಕೆಟ್​​ನ ವಿಶೇಷ ಸುದ್ದಿಗಳಿಗಾಗಿ ವೀಕ್ಷಿಸಿ ‘ರನ್ ಭೂಮಿ’ ಪ್ರತಿದಿನ ಬೆಳಗ್ಗೆ 8.27ಕ್ಕೆ ನ್ಯೂಸ್ ಫಸ್ಟ್ ಚಾನೆಲ್