ವಿದೇಶಿ ಟೆಸ್ಟ್​ನಲ್ಲಿ ಮೂರಂಕಿ ದಾಟಲು ಕೊಹ್ಲಿ ವಿಫಲ

ವಿರಾಟ್​ ವಿದೇಶಿ ನೆಲದಲ್ಲಿ ಶತಕ ಸಿಡಿಸಿ ಎಷ್ಟು ವರ್ಷ?

ಕೆರಿಬಿಯನ್​ರ​ 2ನೇ ಟೆಸ್ಟ್​ ಟಾರ್ಗೆಟ್ ಮಾಡಿದ ವಿರಾಟ್!

ವಿರಾಟ್​ ಕೊಹ್ಲಿ ಶತಕಗಳ ಸಾಮ್ರಾಟ, ಮಾಡ್ರನ್ ಡೇ ಕ್ರಿಕೆಟ್ ಮಾಸ್ಟರ್​. ವಿಂಡೀಸ್ ಎದುರಿನ ಮೊದಲ ಟೆಸ್ಟ್​ನಲ್ಲಿ 75 ರನ್ ಗಳಿಸಿ ಭೇಷ್ ಎನಿಸಿಕೊಂಡ ಈ ಬ್ಯಾಟಿಂಗ್​ ಮಾಸ್ಟರ್​​ಗೆ​ ಒಂದು ಕೊರಗು ಕಾಡ್ತಾನೇ ಇದೆ. ಅಂದ್ಹಾಗೆ ಕೊಹ್ಲಿಗೆ ಕಾಡ್ತಿರೋ ಕೊರಗೇನು..?

ಕೊಹ್ಲಿ ಶತಕಗಳ ಸರದಾರ. ಪಿಚ್ ಯಾವುದೇ ಆಗಲಿ, ಬೌಲರ್ ಯಾರೇ ಆಗಲಿ, ಎದುರಾಳಿ ಯಾರೇ ಆಗಲಿ, ಅಲ್ಲಿ ಕಿಂಗ್ ಕೊಹ್ಲಿಯದ್ದೇ ರಾಜ್ಯಭಾರ. ಇದೇ ಕಾರಣಕ್ಕೆ ಮಾಡ್ರನ್ ಡೇ ಕ್ರಿಕೆಟ್​​ನ ಗಾಡ್ ಕರೆಸಿಕೊಳ್ಳುವ ವಿರಾಟ್​, ನಡೆದಿದ್ದೇ ದಾರಿ. ಇದೀಗ ಈ ಬ್ಯಾಟಿಂಗ್ ಖದರ್​ ಮಾಯವಾಗಿದೆ.

ಕಿಂಗ್​ ಕೊಹ್ಲಿಗೆ ಕಾಡುತ್ತಿದೆ ಆ ಕೊರಗು.!

ಸದ್ಯ ಡೊಮೆನಿಕಾದಲ್ಲಿ ನಡೆದ ಟೆಸ್ಟ್​ ಪಂದ್ಯದಲ್ಲಿ ಆಕರ್ಷಕ 75 ರನ್ ಗಳಿಸಿದ ವಿರಾಟ್​ ಕೊಹ್ಲಿ, ಗೆಲುವಿನಲ್ಲಿ ಮಹತ್ವದ ಪಾತ್ರವನ್ನೇ ವಹಿಸಿದ್ದಾರೆ. ಕ್ರಿಕೆಟ್​ ಅಭಿಮಾನಿಗಳ ಮನಗೆಲ್ಲುವಲ್ಲಿ ಯಶಸ್ವಿಯೂ ಆಗಿದ್ದಾರೆ. ಆದ್ರೆ, ಕಿಂಗ್ ಕೊಹ್ಲಿಗೆ 75 ರನ್ ಗಳಿಸಿದರೂ ಕೂಡ ಒಂದು ಕೊರಗು ಇನ್ನಿಲ್ಲದಂತೆ ಕಾಡ್ತಿದೆ. ಇದಕ್ಕೆ ಕಾರಣ ವಿದೇಶದಲ್ಲಿ ಕೊಹ್ಲಿ ಎದುರಿಸ್ತಿರೋ ರನ್ ಬರ.

5 ವರ್ಷಗಳಿಂದ ವಿದೇಶಿ ಟೆಸ್ಟ್​ನಲ್ಲಿ ಸಿಡಿಯಲಿಲ್ಲ ಶತಕ

3 ವರ್ಷ ಭಾರೀ ನಿರಾಸೆಯನ್ನೇ ವ್ಯಕ್ತಪಡಿಸಿದ್ದ ಕೊಹ್ಲಿ, ಕಳೆದ ಒಂದು ವರ್ಷದಿಂದ ಮೂರು ಫಾರ್ಮೆಟ್​ನಲ್ಲಿ ಅಬ್ಬರಿಸಿ ಬೊಬ್ಬೆರೆದಿದ್ದಾರೆ. ಶತಕದ ಬರವನ್ನೂ ನೀಗಿಸಿಕೊಂಡಿದ್ದಾರೆ. ಆದ್ರೆ, ವಿದೇಶದಲ್ಲಿ ಮಾತ್ರ ಕಿಂಗ್ ಕೊಹ್ಲಿಯ ಶತಕದ ಬರ ನೀಗಿಲ್ಲ. ಅದರಲ್ಲೂ ಟೆಸ್ಟ್​ ಫಾರ್ಮೆಟ್​ನಲ್ಲಿ ಪರದಾಟ ನಡೆಸ್ತಿರೋ ವಿರಾಟ್​, ಸಾಗರದಾಚೆ ಸೆಂಚೂರಿ ಸಿಡಿಸಿ ಬರೋಬ್ಬರಿ 5 ವರ್ಷಗಳೇ ಕಳೆದಿದೆ.

29 ಇನ್ನಿಂಗ್ಸ್​.. ಕೊಹ್ಲಿಗೆ ಕಾಡಿದ ಶತಕದ ಕೊರಗು

14 ಡಿಸೆಂಬರ್​​​​​​​​​​​​​​​​​​ 2018.. ಆಸ್ಟ್ರೇಲಿಯಾ ವಿರುದ್ಧ ಕೊನೆ ವಿದೇಶಿ ಟೆಸ್ಟ್ ಶತಕ ಸಿಡಿಸಿದ್ದ ಕೊಹ್ಲಿ, ಈ ಬಳಿಕ ಆಡಿರೋ 16 ಟೆಸ್ಟ್​ ಪಂದ್ಯಗಳ 29 ಇನ್ನಿಂಗ್ಸ್​ಗಳಿಂದ ಒಂದೇ ಒಂದು ಶತಕ ಸಿಡಿಸಲು ವಿಫಲರಾಗಿದ್ದಾರೆ. ಇಂಟ್ರೆಸ್ಟಿಂಗ್ ವಿಚಾರ ಅಂದ್ರೆ, ಈ 29 ಇನ್ನಿಂಗ್ಸ್​ಗಳಿಂದ ಜಸ್ಟ್​ ಏಳೇ 7 ಅರ್ಧಶತಕ ದಾಖಲಿಸಿರೋ ವಿರಾಟ್, ಒಟ್ಟು ಗಳಿಸಿರೋ ರನ್​​​​ 806. ಇದೇ ಈಗ ಕಿಂಗ್ ಕೊಹ್ಲಿಯ ಕೊರಗನ್ನ ದುಪ್ಪಾಟ್ಟಾಗಿಸಿದೆ.

ಡೊಮಿನಿಕಾದಲ್ಲಿ 75 ರನ್ ಸಿಡಿಸಿದ್ರೂ ಕೊಹ್ಲಿಗಿಲ್ಲ ತೃಪ್ತಿ

ಡೊಮೆನಿಕಾದಲ್ಲಿ ಕೊಹ್ಲಿ ಅಮೋಘ 75 ರನ್ ಸಿಡಿಸಿದ್ದು ನಿಜ. ಆದ್ರೆ, ಈ ಇನ್ನಿಂಗ್ಸ್​ ಕೊಹ್ಲಿಗೆ ತೃಪ್ತಿದಾಯಕ ಎನಿಸಿಲ್ಲ. ಇದಕ್ಕೆ ಕಾರಣ​ ಕೊಹ್ಲಿ ಬ್ಯಾಟ್ ಬೀಸಿದ ಪರಿಯೇ ಆಗಿದೆ. ಯಾಕಂದ್ರೆ, ಈ ಟೆಸ್ಟ್​ನಲ್ಲಿ ಹಲವು ಜೀವದಾನಗಳನ್ನ ಪಡೆದ್ರೂ, ಕೊಹ್ಲಿ ಒಂದೇ ಒಂದು ಬೌಂಡರಿ ಗಳಿಸಲು ತೆಗೆದುಕೊಂಡಿದ್ದು ಬರೋಬ್ಬರಿ 81 ಬಾಲ್. ಇದು ನಿಜಕ್ಕೂ ವಿರಾಟ್​​ ಬ್ಯಾಟಿಂಗ್ ಶೈಲಿಯನ್ನೇ ಆತ್ಮವಲೋಕನ ಮಾಡಿಕೊಳ್ಳುವಂತೆ ಮಾಡಿದೆ.

ಇದನ್ನು ಓದಿ: 2023 ವಿಂಬಲ್ಡನ್​ ಪ್ರಶಸ್ತಿಗೆ ಮುತ್ತಿಕ್ಕಿದ ಸ್ಪೆನ್​ನ ನವಯುವಕ.. ಸರ್ಬಿಯಾದ ನೋವಾಕ್ ರೇಸ್​ಗೆ ಬ್ರೇಕ್​ ಹಾಕಿದ ಕಾರ್ಲೋಸ್ ಅಲ್ಕರಾಜ್

ಒಂದು ಕಾಲದಲ್ಲಿ ಸೆಂಚೂರಿ ಸಿಡಿಸಿಯೂ ಸಂಭ್ರಮಿಸದ ಕೊಹ್ಲಿ, ಈಗ ಬೌಂಡರಿಗೂ ಸಂಭ್ರಮಿಸುವ ದುಸ್ಥಿತಿಗೆ ತಲುಪಿದ್ದಾರೆ. ಇದು ಸಹಜವಾಗಿ​ ಕೊಹ್ಲಿಯ ಬ್ಯಾಟಿಂಗ್​​ ಅನ್ನ ಪ್ರಶ್ನಿಸುವಂತೆ ಮಾಡಿದೆ. ಇದಿಷ್ಟೇ ಅಲ್ಲ, ಸಿನೀಯರ್ ಆಟಗಾರರ ಮುಂದೆ, ಯುವ ಆಟಗಾರರು ಸಲೀಸಾಗಿ ರನ್​​​ ಕೊಳ್ಳೆ ಹೊಡೆಯುತ್ತಿದ್ದಾರೆ. ಹೀಗಾಗಿ ಸಿನೀಯರ್ಸ್​ ರನ್​ ಗಳಿಸಲೇಬೇಕಾದ ಇಕ್ಕಟ್ಟಿಗೆ ಸಿಲುಕಿದ್ದಾರೆ.

ಸಂಕಷ್ಟದಲ್ಲಿ ಕೊಹ್ಲಿ.. 2ನೇ ಟೆಸ್ಟ್​ ಪಂದ್ಯವೇ ಟಾರ್ಗೆಟ್!

ವಿದೇಶಿ ಟೆಸ್ಟ್​ಗಳಲ್ಲಿ ಒಂದು ಕಡೆ ವಿರಾಟ್​ ಕೊಹ್ಲಿ ರನ್​ ಗಳಿಸಲು ಹೆಣಗಾಡ್ತಿದ್ರೆ. ಮತ್ತೊಂದ್ಕಡೆ ಸಿಕ್ಕ ಸಿಕ್ಕ ಅವಕಾಶಗಳಲ್ಲೇ ಅಬ್ಬರದ ಬ್ಯಾಟಿಂಗ್ ನಡೆಸ್ತಿರೋ ಯುವಕರು ಸಿನೀಯರ್​ಗಳಿಗೆ ಪ್ರಬಲ ಪೈಪೋಟಿ ನೀಡ್ತಿದ್ದಾರೆ. ಇದು ಸಹಜವಾಗೇ ಕೊಹ್ಲಿಯನ್ನ ಒತ್ತಡಕ್ಕೆ ದೂಡುತ್ತಿದೆ. ಹೀಗಾಗಿ ವಿಂಡೀಸ್ ವಿರುದ್ಧದ 2ನೇ ಟೆಸ್ಟ್​ನ ಟಾರ್ಗೆಟ್ ಮಾಡಿರೋ ಕೊಹ್ಲಿ, ಮನದಲ್ಲಿ ಕಾಡ್ತಿರೋ ಕೊರಗು ಈಡೇರಿಸಿಕೊಳ್ಳುವ ಪಣತೊಟ್ಟಿದ್ದಾರೆ.

ವಿಶೇಷ ಸೂಚನೆ: ಕ್ರಿಕೆಟ್‌ನ ಸುದ್ದಿಗಳಿಗಾಗಿ ಪ್ರತಿದಿನ ಬೆಳಗ್ಗೆ 8.27ಕ್ಕೆ ನ್ಯೂಸ್‌ ಫಸ್ಟ್‌ ಚಾನೆಲ್​​ನಲ್ಲಿ ‘ರನ್ ಭೂಮಿ’ ವೀಕ್ಷಿಸಿ