ಏಕದಿನ ಅಂದರೆ ವಿರಾಟ್ ಕೊಹ್ಲಿಗೆ ಸಖತ್ ಇಷ್ಟ

ಒನ್ ಡೇ ಮ್ಯಾಚ್​ಗಳಿಂದಲೇ ಕೊಹ್ಲಿ ಸೂಪರ್ ಸ್ಟಾರ್

ವಿರಾಟ್ ಕೊಹ್ಲಿ ಆಡಿರುವ ಆ ಮಾತುಗಳು ಏನೇನು?

ಏಕದಿನ ವಿಶ್ವಕಪ್​ ಬಳಿಕ ವಿರಾಟ್ ಕೊಹ್ಲಿ​, ಒಂದು ಮಾದರಿಯ ಕ್ರಿಕೆಟ್​ನಿಂದ ದೂರವಾಗ್ತಾರೆ ಎಂಬ ಮಾತು ಹಲವು ದಿನದಿಂದ ಚರ್ಚೆಯಲ್ಲಿದೆ. ಇದೀಗ, ಈ ಬಗ್ಗೆ ಸ್ವತಃ ಕಿಂಗ್ ಕೊಹ್ಲಿಯೇ ಹಿಂಟ್ ನೀಡದ್ದಾರೆ. ಹಾಗಾದ್ರೆ, ಕೊಹ್ಲಿ ನೀಡಿರುವ ಆ ಹಿಂಟ್​ ಏನು..?

ಟೆಸ್ಟ್​ ಕ್ರಿಕೆಟ್​ಗೆ ಕಿಂಗ್​​ ಕೊಹ್ಲಿ ಗುಡ್​ಬೈ..?

ಏಕದಿನ ವಿಶ್ವಕಪ್​ ಬಳಿಕ ವಿರಾಟ್​, ಕ್ರಿಕೆಟ್​​ಗೆ ಗುಡ್​ ಬೈ ಹೇಳ್ತಾರಾ..? ಈ ಪ್ರಶ್ನೆ ಕಳೆದೊಂದು ವರ್ಷದಿಂದ ವಿಶ್ವ ಕ್ರಿಕೆಟ್​ನ ಹಾಟ್​ ಟಾಪಿಕ್​ ಸುದ್ದಿಯಾಗಿದೆ. ಬಿಸಿಸಿಐ ವಲಯದಲ್ಲೂ ಕೊಹ್ಲಿಯನ್ನ ಒಂದು ಫಾರ್ಮೆಟ್​​ನಿಂದ ಕೈ ಬಿಡೋ ಕಸರತ್ತು ನಡೆಯುತ್ತಿದೆ. ಈ ಬಗ್ಗೆ ಸಿಕ್ಕಾಪಟ್ಟೆ ಚರ್ಚೆಗಳು ನಡೆದಿದ್ದು, ಒಬ್ಬೊಬ್ಬರು ಒಂದೊಂದು ಅಭಿಪ್ರಾಯ ನೀಡಿದ್ದಾಗಿದೆ. ಆದ್ರೆ, ಕೊಹ್ಲಿ ಮಾತ್ರ ಈ ವಿಚಾರದಲ್ಲಿ ಸೈಲೆಂಟ್​ ಆಗಿದ್ರು. ಇದೀಗ ವಿರಾಟ್​ ಕೊಹ್ಲಿ ಮೊದಲ ಬಾರಿ ಈ ಬಗ್ಗೆ ಮಾತನಾಡಿದ್ದಾರೆ.

ಏಷ್ಯಾಕಪ್​​ಗೂ ಮುನ್ನ ಕೊಹ್ಲಿ ಹೇಳಿರುವ ಒಂದೇ ಒಂದು ಹೇಳಿಕೆ ಸದ್ಯ ಸಂಚಲನ ಮೂಡಿಸಿದೆ. ಏಕದಿನ ವಿಶ್ವಕಪ್ ಬಳಿಕ ಚಾಂಪಿಯನ್ ಕೊಹ್ಲಿ, ಯಾವೂದಾದರೂ ಒಂದು ಫಾರ್ಮೆಟ್​​ಗೆ ಗುಡ್​ಬೈ ಹೇಳೋ ಬಗ್ಗೆ ಹಿಂಟ್​ ನೀಡಿದ್ದಾರೆ. ವಿರಾಟ್​ ಕೊಹ್ಲಿಯ ಮಾತುಗಳನ್ನ ಗಮನಿಸಿದ್ರೆ ಟೆಸ್ಟ್​ ಕ್ರಿಕೆಟ್​ಗೆ ಗುಡ್​ ಬೈ ಹೇಳೋ ಲೆಕ್ಕಾಚಾರದಲ್ಲಿ ಇದ್ದಾರೆ.

ನಾನು ಏಕದಿನ ಕ್ರಿಕೆಟ್ ಆಡುವುದನ್ನ ಪ್ರೀತಿಸುತ್ತೇನೆ. ನನ್ನ ಪ್ರಕಾರ, ಏಕದಿನ ಕ್ರಿಕೆಟ್​ ನಿಮ್ಮನ್ನ ಸಂಪೂರ್ಣ ಪರೀಕ್ಷಿಸುವ ಫಾರ್ಮೆಟ್​. ನಿಮ್ಮ ಟೆಕ್ನಿಕ್​, ತಾಳ್ಮೆ ಹಾಗೂ ಪ್ಲೇಯಿಂಗ್ ಕಂಡೀಷನ್ಸ್​ ಸೇರಿದಂತೆ ವಿವಿಧ ಹಂತಗಳಲ್ಲಿ ವಿಭಿನ್ನವಾಗಿ ಆಡಬೇಕು. ಆದ್ದರಿಂದ ಏಕದಿನ ಫಾರ್ಮೆಟ್​​ ನಿಮ್ಮನ್ನು ಪರೀಕ್ಷಿಸುತ್ತದೆ. ಏಕದಿನ ಕ್ರಿಕೆಟ್​ ನನ್ನಿಂದ ಉತ್ತಮವಾದುದ್ದನ್ನ ಹೊರ ತಂದಿದೆ. ಸವಾಲನ್ನ ಸ್ವೀಕರಿಸಲು ಇಷ್ಟ ಪಡುತ್ತೇನೆ. ತಂಡದ ಗೆಲುವಿಗೆ ಅನುಗುಣವಾಗಿ ಆಡಲು ಇಷ್ಟಪಡುತ್ತೇನೆ. ನನ್ನ ಬ್ಯಾಟಿಂಗ್‌ನ ಪರೀಕ್ಷಿಸಲು ಅವಕಾಶ ನೀಡುತ್ತದೆ. ಅದಕ್ಕಾಗಿಯೇ ಏಕದಿನ ಕ್ರಿಕೆಟ್‌ ಆಡುವುದನ್ನ ನಿಜವಾಗಿ ಆನಂದಿಸುತ್ತೇನೆ.

ವಿರಾಟ್​ ಕೊಹ್ಲಿ, ಟೀಮ್ ಇಂಡಿಯಾ ಆಟಗಾರ

ಕೊಹ್ಲಿ ಹೇಳಿರುವ ಈ ಒಂದೇ ಒಂದು ಹೇಳಿಕೆಯೇ, ಏಕದಿನ ವಿಶ್ವಕಪ್​ ಬಳಿಕ ವಿರಾಟ್ ಕೊಹ್ಲಿ, ಟೆಸ್ಟ್​ ಕ್ರಿಕೆಟ್​ಗೆ ಗುಡ್​​ ಬೈ ಹೇಳ್ತಾರಾ ಎಂಬ ಅನುಮಾನವನ್ನ ಹುಟ್ಟು ಹಾಕಿದೆ.

ಏಕದಿನದಲ್ಲಿ ಮುಂದುವರೀತಾರಾ ಕೊಹ್ಲಿ..?

ಏಕದಿನ ಕ್ರಿಕೆಟ್​ನ ವಿರಾಟ್​ ಕೊಹ್ಲಿ ಬಹುವಾಗಿ ಪ್ರೀತಿ ಮಾಡ್ತಾರೆ. ಇದಕ್ಕೆ ಕಾರಣ ವೃತ್ತಿ ಜೀವನದಲ್ಲಿ ವಿರಾಟ್​, ಇಂದು ಏನೆಲ್ಲ ಸಾಧನೆ ಮಾಡಿದ್ದಾರೋ ಅದಕ್ಕೆ ಏಕದಿನ ಕ್ರಿಕೆಟ್​ ಪ್ರಮುಖ ಕಾರಣ. ವಿಶ್ವ ಕ್ರಿಕೆಟ್​ನಲ್ಲಿ ಬಹು ಎತ್ತರಕ್ಕೆ ಬೆಳೆದು, ಸೂಪರ್ ಸ್ಟಾರ್ ಆಗಿ ಗುರುತಿಸಿಕೊಂಡಿರುವುದರ ಹಿಂದೆ ಏಕದಿನ ಫಾರ್ಮೆಟ್​ ಕೊಡುಗೆ ಅಪಾರ. ಇದೇ ಕಾರಣಕ್ಕೆ ವಿರಾಟ್​, ಏಕದಿನ ಫಾರ್ಮೆಟ್​ನಲ್ಲಿ ಮುಂದುವರಿಯೋ ಸಾಧ್ಯತೆ ಇದೆ.

ಉತ್ತಮ ಟಚ್​ನಲ್ಲಿದ್ದಾರೆ ವಿರಾಟ್​ ಕೊಹ್ಲಿ..!

35ರ ವಿರಾಟ್​, ರೆಡ್​ ಬಾಲ್​ ಕ್ರಿಕೆಟ್​ಗೆ ಹೋಲಿಸಿದ್ರೆ. ವೈಟ್​ಬಾಲ್ ಫಾರ್ಮೆಟ್​ನಲ್ಲಿ ಅದ್ಭುತ ಲಯದಲ್ಲಿದ್ದಾರೆ. ಅದರಲ್ಲೂ ವೈಟ್​ಬಾಲ್ ಕ್ರಿಕೆಟ್​ನಲ್ಲಿ ಸಹಸ್ರಾರು ರನ್​ ಕಲೆ ಹಾಕಿರುವ ವಿರಾಟ್ ಕೊಹ್ಲಿಯ ದೃಷ್ಟಿ, ಈಗ ಏಕದಿನ ವಿಶ್ವಕಪ್​ ಮೇಲೆ ನೆಟ್ಟಿದೆ. ಹೀಗಾಗಿ ವೈಟ್​ಬಾಲ್​ನತ್ತ ಗಮನ ಹರಿಸಿರುವ ವಿರಾಟ್​, ಏಕದಿನ ವಿಶ್ವಕಪ್​ ಹಾಗೂ ನಂತರದ ಟಿ20 ವಿಶ್ವಕಪ್​​ ಗೆಲುವಿನೊಂದಿಗೆ ಗುಡ್​ ಬೈ ಹೇಳೋ ಲೆಕ್ಕಾಚಾರದಲ್ಲಿದ್ದಾರೆ. ಹೀಗಾಗಿ ಮುಂದಿನ ಒಂದೆರೆಡು ವರ್ಷ ಏಕದಿನ ಫಾರ್ಮೆಟ್​ನಲ್ಲಿ ಮುಂದುವರಿಯೋ ಸಾಧ್ಯತೆಯಿದೆ.

ವಿಶೇಷ ಸೂಚನೆ: ಕ್ರಿಕೆಟ್‌ನ ಸುದ್ದಿಗಳಿಗಾಗಿ ಪ್ರತಿದಿನ ಬೆಳಗ್ಗೆ 8.27ಕ್ಕೆ ನ್ಯೂಸ್‌ಫಸ್ಟ್‌ಚಾನೆಲ್​​ನಲ್ಲಿ ‘ರನ್ ಭೂಮಿ’ ವೀಕ್ಷಿಸಿ