ಸಚಿನ್ ತೆಂಡೂಲ್ಕರ್​ ತವರಲ್ಲಿ 49ನೇ ಶತಕ ಸಿಡಿಸ್ತಾರಾ ವಿರಾಟ್ ಕೊಹ್ಲಿ?

ಸಿಂಹಳೀಯರ ಬೇಟೆ ಆಡೋದು ಎಂದರೆ ವಿರಾಟ್ ಕೊಹ್ಲಿಗೆ ಫೇವರಿಟ್

ಅಜರುದ್ದೀನ್, ತೆಂಡೂಲ್ಕರ್​ ಬಿಟ್ರೆ ವಾಂಖೆಡೆಗೆ ಕಿಂಗ್ ಅಂದ್ರೆ ಕೊಹ್ಲಿನೇ

ಕ್ಯಾಪ್ಟನ್​ ರೋಹಿತ್​ ಶರ್ಮಾಗೆ ಮುಂಬೈ ಹೋಮ್​ಗ್ರೌಂಡ್ ಆಗಿರಬಹುದು. ಆದ್ರೆ, ಇಲ್ಲಿ ನಡೆದಿರೋದು ಎಲ್ಲ ಕಿಂಗ್​ ಕೊಹ್ಲಿ ದರ್ಬಾರ್. ಇಂದೂ ಲಂಕನ್​​ ಲಯನ್ಸ್​ ಬೇಟೆಯಾಡೋದು ವಿರಾಟನೇ. ವಾಂಖೆಡೆಯ ಅಸಲಿ ರಾಜ, ಸಿಂಹಳೀಯರನ್ನ ಸಿಂಹಸ್ವಪ್ನವಾಗಿ ಕಾಡುವ ಕೊಹ್ಲಿ.

ಇಂಡೋ-ಲಂಕಾ ವಿಶ್ವಕಪ್​ ಫೈಟ್​​ಗೆ ವೇದಿಕೆ ಸಜ್ಜಾಗಿದೆ. ವಿಶ್ವಕಪ್​ ಮಹಾ ಸಮರದಲ್ಲಿ ಅಜೇಯ ಓಟ ಓಡ್ತಿರೋ ಟೀಮ್​ ಇಂಡಿಯಾ, ಮತ್ತೊಂದು ಭರ್ಜರಿ ಗೆಲುವನ್ನ ಎದುರು ನೋಡ್ತಿದೆ. ಮುಂಬೈನ ವಾಂಖೆಡೆಯಲ್ಲಿ ಇಂದು ನಡೆಯೋ ಯುದ್ಧದಲ್ಲಿ ಗೆದ್ದು ಸೆಮೀಸ್​​ಗೆ​​ ಎಂಟ್ರಿ ಕೊಡೋದು ರೋಹಿತ್​ ಪಡೆಯ ಲೆಕ್ಕಾಚಾರ.

ಮುಂಬೈನಲ್ಲಿ ಲಂಕಾ ದಹನಕ್ಕೆ ಕಿಂಗ್ ಕೊಹ್ಲಿ​ ರೆಡಿ.!

ಕಳೆದ ಇಂಗ್ಲೆಂಡ್​ ವಿರುದ್ಧದ ಪಂದ್ಯದಲ್ಲಿ ವಿರಾಟ್​ ಕೊಹ್ಲಿ ಡಕೌಟ್​ ಆಗಿ ನಿರ್ಗಮಿಸಿದ್ರು ನಿಜ. ಆದ್ರೆ, ಟೂರ್ನಿಯಲ್ಲಿ ನೀಡಿರೋ ಕನ್ಸಿಸ್ಟೆಂಟ್​ ಪ್ರದರ್ಶನವನ್ನ ಮರೆಯೋಕೆ ಮಾಡೋಕಾಗುತ್ತಾ.? form is temporary class is permanent ಅನ್ನೋ ಮಾತನ್ನ ಅಕ್ಷರಶಃ ನಿಜವಾಗಿಸಿದ ಪ್ಲೇಯರ್​​​ ಕಿಂಗ್​ ಕೊಹ್ಲಿ. ಹೀಗಾಗಿಯೇ ಇಂದಿನ ಪಂದ್ಯದಲ್ಲೂ ಫ್ಯಾನ್ಸ್ ಕಣ್ಣು​, ಕೊಹ್ಲಿಯ ಮೇಲೇ ಇದೆ.

ವಾಂಖೆಡೆ ಅಂಗಳದಲ್ಲಿ ಕೊಹ್ಲಿಯೇ ಕಿಂಗ್​..!

ವಾಂಖೆಡೆ ಮೈದಾನ ಟೀಮ್​ ಇಂಡಿಯಾ ನಾಯಕ ರೋಹಿತ್​ ಶರ್ಮಾ ಹೋಮ್​ಗ್ರೌಂಡ್​ ಆಗಿದ್ರೂ, ಇಲ್ಲಿ ದರ್ಬಾರ್​ ನಡೆಸಿರೋದು ಮಾತ್ರ ಕಿಂಗ್​ ಕೊಹ್ಲಿ. ಸಚಿನ್, ಅಜರುದ್ದೀನ್​ ಬಿಟ್ರೆ ವಾಂಖೆಡೆ ಅಂಗಳಕ್ಕೆ ಕೊಹ್ಲಿಯೇ ರಾಜ. ಏಕದಿನ ಫಾರ್ಮೆಟ್ಸ್​ನಲ್ಲಿ ಕೊಹ್ಲಿ ಮಾಡಿರುವ ಸಾಧನೆ ಈ ಮಾತನ್ನ ಸಾರಿ ಸಾರಿ ಹೇಳ್ತಿದೆ.

ವಾಂಖೆಡೆಯಲ್ಲಿ ಕೊಹ್ಲಿಯೇ ಕಿಂಗ್​

ವಾಂಖೆಡೆ ಮೈದಾನದಲ್ಲಿ ಈವರೆಗೆ 6 ಏಕದಿನ ಪಂದ್ಯ ಆಡಿರುವ ಕೊಹ್ಲಿ, 269 ರನ್ ಗಳಿಸಿದ್ದಾರೆ. ಬರೋಬ್ಬರಿ 53.80ರ ಸರಾಸರಿಯಲ್ಲಿ ರನ್​ಗಳಿಸಿದ್ದು, 1 ಸೆಂಚುರಿ, 1 ಹಾಫ್​ ಸೆಂಚುರಿ ಸಿಡಿಸಿದ್ದಾರೆ.

ಕೊಹ್ಲಿ ಅಂದ್ರೆ ಬೆಚ್ಚಿ ಬೀಳ್ತಾರೆ ಲಂಕನ್​ ಲಯನ್ಸ್​.!

ವಿರಾಟ್ ಕೊಹ್ಲಿ ಅನ್ನೋ ಹೆಸರು ಕೇಳಿದ್ರೆ ಸಾಕು ಲಂಕಾ ಪಡೆ ಬೆಚ್ಚಿ ಬೀಳುತ್ತೆ. ಕರಿಯರ್​ ಆರಂಭದಿಂದ ಹಿಡಿದು ಈವರೆಗೂ ಸಿಂಹಳೀಯರ ಬೇಟೆಯಾಡೋದು ಕಿಂಗ್​ ಕೊಹ್ಲಿಗೆ ಫೇವರಿಟ್​. ಕ್ರಿಸ್​ ಕಚ್ಚಿ ನಿಂತ್ರೆ ಲಂಕಾ ಕಥೆ ಮುಗಿದೇ ಹೋಯ್ತು. ಕೊಹ್ಲಿಯನ್ನ ಕಟ್ಟಿ ಹಾಕೋಕೆ ಸಾಧ್ಯ ಇಲ್ಲ. ಈ ಹಿಂದಿನ ಅಂಕಿ-ಅಂಶಗಳೇ ಇದಕ್ಕೆ ಬೆಸ್ಟ್​ ಎಕ್ಸಾಂಪಲ್​ ಆಗಿವೆ.

ಶ್ರೀಲಂಕಾ ವಿರುದ್ಧ ಕೊಹ್ಲಿ ಏಕದಿನ ಸಾಧನೆ

ಶ್ರೀಲಂಕಾ ವಿರುದ್ಧ ಈವರೆಗೆ 52 ಏಕದಿನ ಪಂದ್ಯಗಳನ್ನಾಡಿರುವ ಕೊಹ್ಲಿ, 2,506 ರನ್ ​ಗಳಿಸಿದ್ದಾರೆ. 62.65ರ ಸರಾಸರಿಯಲ್ಲಿ ರನ್ ​ಗಳಿಸಿರೋ ವಿರಾಟ್​, 10 ಸೆಂಚುರಿ, 11 ಹಾಫ್​ ಸೆಂಚುರಿ ಸಿಡಿಸಿ ಘರ್ಜಿಸಿದ್ದಾರೆ.

49ನೇ ಶತಕ ಕಣ್ತುಂಬಿಕೊಳ್ಳಲು ಫ್ಯಾನ್ಸ್​ ಕಾತರ.!

ಸದ್ಯ ವಿಶ್ವಕಪ್​ ಕ್ರಿಕೆಟ್ ಲೋಕ ಕೊಹ್ಲಿಯ 49ನೇ ಶತಕದ ಕನವರಿಕೆಯಲ್ಲಿದೆ. ಇಂದಿನ ಪಂದ್ಯದಲ್ಲಿ ಶತಕ ಸಿಡಿಸಿದ್ರೆ ಕೊಹ್ಲಿ, ಮಾಸ್ಟರ್​ ಬ್ಲಾಸ್ಟರ್​​ ಸಚಿನ್ ತೆಂಡುಲ್ಕರ್​ ದಾಖಲೆಯನ್ನ ಸರಿಗಟ್ಟಲಿದ್ದಾರೆ. ಏಕದಿನ ಮಾದರಿಯಲ್ಲಿ ಅತಿ ಹೆಚ್ಚು ಶತಕ ಸಿಡಿಸಿದ ಆಟಗಾರರ ಪಟ್ಟಿಯಲ್ಲಿ ಜಂಟಿಯಾಗಿ ಅಗ್ರಸ್ಥಾನಕ್ಕೇರಲಿದ್ದಾರೆ. ಈ ಅಪರೂಪದ ದಾಖಲೆಯನ್ನ ಕಣ್ತುಂಬಿಕೊಳ್ಳೋ ಕಾತರ ಅಭಿಮಾನಿಗಳದ್ದಾಗಿದೆ. ಇಂಗ್ಲೆಂಡ್​​ ವಿರುದ್ಧದ ಪಂದ್ಯ ಹೊರತು ಪಡಿಸಿದ್ರೆ, ಟೂರ್ನಿಯಲ್ಲಿ ಉತ್ತಮ ಪ್ರದರ್ಶನ ನೀಡಿರುವ ಕೊಹ್ಲಿಗೆ ಕ್ರಿಕೆಟ್​​ ದೇವರ ದಾಖಲೆ ಮುರಿಯೋದು ಅಸಾಧ್ಯದ ವಿಚಾರವೇನಲ್ಲ. ಸಚಿನ್​ ಹೋಮ್​​ ಗ್ರೌಂಡ್​ನಲ್ಲಿ ಸಚಿನ್​ ದಾಖಲೆಯನ್ನು ಕಿಂಗ್​ ಕೊಹ್ಲಿ ಸರಿಗಟ್ಟುತ್ತಾರಾ ಕಾದು ನೋಡೋಣ.

ವಿಶೇಷ ಸೂಚನೆ: ಕ್ರಿಕೆಟ್‌ನ ಸುದ್ದಿಗಳಿಗಾಗಿ ಪ್ರತಿದಿನ ಬೆಳಗ್ಗೆ 8.27ಕ್ಕೆ ನ್ಯೂಸ್‌ಫಸ್ಟ್‌ಚಾನೆಲ್​​ನಲ್ಲಿ ‘ರನ್ ಭೂಮಿ’ ವೀಕ್ಷಿಸಿ