ಲಿಂಗಾಯತ, ಎಸ್​ಸಿ-ಎಸ್​ಟಿ ಮತ್ತು ಅಲ್ಪಸಂಖ್ಯಾತ ಸಮುದಾಯಕ್ಕೆ ಸ್ಥಾನ ಕಲ್ಪಿಸಿ!

ಡಿಕೆ ಶಿವಕುಮಾರ್​ ಹೊತ್ತ ನಂಬರ್​ 2 ಬ್ಯಾಡ್ಜ್​​ ಮೇಲೆ ಹಲವು ನಾಯಕರು ಕಣ್ಣು

ಬಹಳಷ್ಟು ಜನಕ್ಕೆ ಡಿಸಿಎಂ ಅಲ್ಲ, ಸಿಎಂ ಆಗುವ ಅರ್ಹತೆ ಇದೆ- ಪ್ರಿಯಾಂಕ್​ ಖರ್ಗೆ!

ರಾಜ್ಯ ರಾಜಕೀಯದಲ್ಲಿ ಡಿಸಿಎಂ ಸ್ಥಾನಕ್ಕಾಗಿ ಸಂಘರ್ಷವೊಂದು ಜನ್ಮ ತಾಳಿದೆ. ಡಿ.ಕೆ.ಶಿವಕುಮಾರ್ ಜೊತೆ ಮತ್ತೆ 3 ಡಿಸಿಎಂ ಸ್ಥಾನಕ್ಕೆ ಸಚಿವರು ಬೇಡಿಕೆ ಇಡುತ್ತಿದ್ದಾರೆ. ಈ ಬಗ್ಗೆ ಹೈಕಮಾಂಡ್​​ಗೆ ಪತ್ರ ಬರೆಯಲು ಸಚಿವ ಕೆ.ಎನ್. ರಾಜಣ್ಣ ಮುಂದಾಗಿದ್ದು, ಸಂಚಲನ ಸೃಷ್ಟಿಸಿದೆ. ಅಧಿಕಾರಕ್ಕೆ ಬಂದ ಕಾಂಗ್ರೆಸ್​ನಲ್ಲಿ ಅಂತರ್​​​ ಕಲಹ ಸೃಷ್ಟಿಯಾಗಿದೆ. ಡಿಕೆ ಶಿವಕುಮಾರ್​ ಹೊತ್ತ ನಂಬರ್​ 2 ಬ್ಯಾಡ್ಜ್​​ ಮೇಲೆ ಹಲವು ನಾಯಕರು ಕಣ್ಣು ನೆಟ್ಟಿದ್ದಾರೆ. ಸರ್ಕಾರ ರಚನೆಯ ಕಸರತ್ತಿನ ವೇಳೆ ಕತ್ತೆತ್ತಿ ನಡೆದ ಜಗಳದ ಬಳಿಕ ಎಲ್ಲವೂ ಶಾಂತವಾಗಿದೆ ಅನ್ನೋಷ್ಟರಲ್ಲಿ ವಿರಸಕ್ಕೆ ನಾಂದಿ ಹಾಡಲಾಗಿದೆ. ಈ ಸಮರಸದ ನಡುವೆ ಡಿಸಿಎಂ ಪಟ್ಟಕ್ಕಾಗಿ ಸಚಿವ ಕೆ.ಎನ್​​​ ರಾಜಣ್ಣ ಸಿಡಿಸಿದ ಅದೊಂದು ಬಾಂಬ್​​.

ಡಿಕೆ ಶಿವಕುಮಾರ್​​​ ಜತೆ ಇನ್ನೂ ಮೂವರಿಗೆ ಡಿಸಿಎಂ ಸ್ಥಾನ ನೀಡಿ
ಲೋಕಸಭೆ ನೆಪದಲ್ಲಿ ಹೈಕಮಾಂಡ್​ಗೆ ಪತ್ರ ಬರೆಯಲು ತಯಾರಿ!

ಸಿಎಂ ಸಿದ್ದರಾಮಯ್ಯರನ್ನೇ ಓವರ್​ರೈಟ್​ ಮಾಡುತ್ತಿರುವ ಡಿಸಿಎಂ ಡಿಕೆಶಿಗೆ ಹೊಸ ಚಳುವಳಿ, ತಳಮಳ ಸೃಷ್ಟಿಸ್ತಿದೆ. ಡಿ.ಕೆ. ಶಿವಕುಮಾರ್ ಜೊತೆ ಮತ್ತೆ ಮೂವರು ನಾಯಕರಿಗೆ ಡಿಸಿಎಂ ಸ್ಥಾನ ನೀಡುವಂತೆ ಬೇಡಿಕೆ ಮಂಡನೆ ಆಗಿದೆ. ಸಹಕಾರ ಕ್ಷೇತ್ರದ ಪ್ರಬಲ ನಾಯಕ, ಸಿಎಂ ಆಪ್ತ ಬಣದ ಸಚಿವ ಕೆ.ಎನ್​ ರಾಜಣ್ಣ, ಈ ಬಗ್ಗೆ ಹೈಕಮಾಂಡ್​​ಗೆ ಪತ್ರ ಬರೆಯಲು ಮುಂದಾಗಿರೋದು ಕಾಂಗ್ರೆಸ್​ನಲ್ಲಿ ಸಂಚಲನ ಮೂಡಿಸಿದ್ದಾರೆ. ಇನ್ನೂ ಮೂರು ಡಿಸಿಎಂ ಸ್ಥಾನಗಳ ಸೃಷ್ಟಿಗೆ ಸಚಿವರು ಆಗ್ರಹಿಸ್ತಿದ್ದಾರೆ. ವೀರಶೈವ ಲಿಂಗಾಯತ, ಎಸ್​ಸಿ-ಎಸ್​ಟಿ ಮತ್ತು ಅಲ್ಪಸಂಖ್ಯಾತ ಸಮುದಾಯಕ್ಕೆ ಸ್ಥಾನ ಕಲ್ಪಿಸಿ ಅಂತ ಬೇಡಿಕೆ ಮಂಡಿಸಿದ್ದಾರೆ.

ಲೋಕಸಭೆ ಚುನಾವಣೆ ದೃಷ್ಟಿಯಿಂದ ಡಿಸಿಎಂ ಸ್ಥಾನ ನೀಡಿ ಎನ್ನುತ್ತಿರುವ ಸಚಿವರು, ಲೋಕಸಭೆ ಎಲೆಕ್ಷನ್​​​ನಲ್ಲಿ ಹೆಚ್ಚು ಸ್ಥಾನ ಗೆಲ್ಲಲು ಇದು ಅನುಕೂಲ ಅಂತ ವಾದಿಸಿದ್ದಾರೆ. ಇದಕ್ಕೆ ಕಳೆದ ವಿಧಾನಸಭೆ ಚುನಾವಣೆಯನ್ನ ಎಕ್ಸಾಂಪಲ್​​ ನೀಡಿರುವ ಸಚಿವರು, ಜಾತಿ ಸಮೀಕರಣದಿಂದಲೇ ಕಾಂಗ್ರೆಸ್​​ ಜಯಭೇರಿ ಬಾರಿಸಿದೆ ಅಂತ ಹೇಳುತ್ತಿದ್ದಾರೆ. ಈ ಬಗ್ಗೆ ಹೈಕಮಾಂಡ್​ಗೆ ಕೆ.ಎನ್. ರಾಜಣ್ಣ ಪತ್ರ ಬರೆಯಲು ಮುಂದಾಗಿದ್ದಾರೆ. ಡಿಸಿಎಂ ಸ್ಥಾನದ ಬಗ್ಗೆ ತಗಾದೆ ಎತ್ತಿದ್ದು ಇದೇ ಮೊದಲಲ್ಲ. ಕಳೆದ ಎರಡು ತಿಂಗಳ ಹಿಂದೆ ಗೃಹ ಸಚಿವ ಪರಮೇಶ್ವರ್​ ಕೂಡ ಈ ಸ್ಥಾನದ ಬಗ್ಗೆ ಪರೋಕ್ಷವಾಗಿ ಬೇಡಿಕೆ ಮಂಡಿಸಿದ್ದರು. ಪರಮೇಶ್ವರ್ ಮಾತಿಗೆ ಸಚಿವ ಎಂ.ಬಿ. ಪಾಟೀಲ್ ಸಹ ದನಿಗೂಡಿಸಿದ್ದರು. ಮೊನ್ನೆ ಮೊನ್ನೆಯಷ್ಟೇ ಹಿರಿಯ ನಾಯಕ ಬಿ.ಕೆ. ಹರಿಪ್ರಸಾದ್​ ಇದೇ ರೀತಿ ಒತ್ತಾಯ ಮಾಡಿದ್ದರು.

ರಾಜ್ಯ ಕಾಂಗ್ರೆಸ್​ನಲ್ಲಿ ಸಂಚಲನ ಮೂಡಿಸಿದ ರಾಜಣ್ಣ ನಡೆ!
ಮುನಿಯಪ್ಪ ಸಪೋರ್ಟ್​​​, ಸುರೇಶ್​ ಸೈಲೆಂಟ್​, ಖರ್ಗೆ ಗರಂ

ಮೂರು ಡಿಸಿಎಂ ಹುದ್ದೆ ಬಗ್ಗೆ ರಾಜಣ್ಣ ನೀಡಿದ ಹೇಳಿಕೆ ಬಗ್ಗೆ ಅವರೇ ಉತ್ತರ ನೀಡಬೇಕು ಅಂತ ಸಂಸದ ಡಿಕೆ ಸುರೇಶ್​​ ಪ್ರತಿಕ್ರಿಯಿಸಿದ್ದಾರೆ. ಸಚಿವ ರಾಜಣ್ಣ ಸರ್ಕಾರ ನಡೆಸ್ತಿರೋದು ಕಾಲೆಳೆದರೇ ಸಚಿವ ಪ್ರಿಯಾಂಕ್​ ಖರ್ಗೆ ವರ್ಷನ್​ ಬೇರೆ ಇದೆ. ಹೈಕಮಾಂಡ್ ಮುಂದೆ ಡಿಸಿಎಂ ಪ್ರಸ್ತಾವನೆ ಇಲ್ಲ. ಬಹಳಷ್ಟು ಜನಕ್ಕೆ ಡಿಸಿಎಂ ಅಲ್ಲ, ಸಿಎಂ ಆಗುವ ಅರ್ಹತೆ ಇದೆ ಅಂತ ಗರಂ ಆಗಿದ್ದಾರೆ. ಇತ್ತ ಮುನಿಯಪ್ಪ ಇದು ಹೈಕಮಾಂಡ್​​ ತೀರ್ಮಾನ ಅಂತ ಹೇಳಿದ್ದಾರೆ. ಒಟ್ಟಾರೆ, ಬಿಕೆಹೆಚ್​ ಮೂಲಕ ಉರುಳಿಸಿದ ತೆರೆಮರೆಯ ದಾಳ ಈಗ ತಿರುಗುಬಾಣ ಆಗುವ ಲಕ್ಷಣ ಗೋಚರಿಸ್ತಿದೆ. ಈ ಹಿಂದೆ ಕೆಪಿಸಿಸಿ ಕಾರ್ಯಾಧ್ಯಕ್ಷ ಸ್ಥಾನದ ವಿಚಾರದಲ್ಲೂ ಸಿದ್ಧಾಸ್ತ್ರ ಪ್ರಯೋಗ ಆಗಿತ್ತು. ಈಗ ಅದೇ ಪ್ರಯೋಗ ಸರ್ಕಾರದ ನಂಬರ್​ 2 ಸ್ಥಾನದ ಮೇಲೆ ಆಗುತ್ತಿದೆ.

ವಿಶೇಷ ಸೂಚನೆ: ಎಲ್ಲಾ DTH & Cableನಲ್ಲಿ ನ್ಯೂಸ್​ಫಸ್ಟ್​ ಚಾನೆಲ್​​​ ಲಭ್ಯ