10 ತಿಂಗಳಿಂದ ವಿರಾಟ್​ ವೀರಾವೇಶಕ್ಕಿಲ್ಲ ಬ್ರೇಕ್

10 ತಿಂಗಳಲ್ಲಿ 8 ಶತಕ ಸಿಡಿಸಿದ ವಿರಾಟ್​ ಕೊಹ್ಲಿ

ವೃತ್ತಿ ಜೀವನದ ಉತ್ತುಂಗ ದಿನಗಳನ್ನ ನೆನಪಿಸಿದ ಕೊಹ್ಲಿ

10 ತಿಂಗಳ ಹಿಂದೆ ವಿರಾಟ್​ ಕೊಹ್ಲಿಯನ್ನ ಆಡಿಕೊಂಡವರು ಒಂದಿಬ್ಬರಲ್ಲ. ಕ್ರಿಕೆಟ್​ನ ಗಂಧಗಾಳಿ ತಿಳಿಯದವನೂ ಕೊಹ್ಲಿ ಆಟವನ್ನು ನೋಡಿ ಟೀಕಿಸಿದ್ದೇ ಹೆಚ್ಚು. ಇದೀಗ ಅಕ್ಷರಶಃ ಸಿಡಿಲಬ್ಬರ ಬ್ಯಾಟಿಂಗ್ ನಡೆಸ್ತಿರೋ ವಿರಾಟ್​, ವಿರಾಟ ರೂಪವನ್ನೇ ಪ್ರದರ್ಶಿಸುತ್ತಿದ್ದಾರೆ. ಅಷ್ಟೇ ಅಲ್ಲ.. ಎಲ್ಲಾ ಟೀಕೆಗಳಿಗೂ 10 ತಿಂಗಳಲ್ಲೇ ಉತ್ತರ ನೀಡಿದ್ದಾರೆ.

23 ನವೆಂಬರ್​ 2019.. ಈಡನ್ ಗಾರ್ಡನ್​​ನ ಐತಿಹಾಸಿಕ ಡೇ ಆ್ಯಂಡ್ ನೈಟ್​​ ಟೆಸ್ಟ್​ನಲ್ಲಿ ಶತಕ ಸಿಡಿಸಿದ್ದ ವಿರಾಟ್​​, ನಂತರ ಮೂರಂಕಿ ಮೊತ್ತದ ಗಡಿ ದಾಟಲು ತೆಗೆದುಕೊಂಡಿದ್ದೂ ಬರೋಬ್ಬರಿ 1020 ದಿನಗಳು. ಈ ಅವಧಿಯಲ್ಲಿ ನಿಜಕ್ಕೂ ವಿರಾಟ್​ ಕೊಹ್ಲಿ ಎದುರಿಸಿದ್ದು ಟೀಕೆ, ಅಪಮಾನ, ಹತಾಶೆ, ನೋವು.. ಇದಕ್ಕೆ ದಿಟ್ಟ ಉತ್ತರ ನೀಡಿಲು ಶುರು ಮಾಡಿದ್ದು ಮಾತ್ರ 8 ಸೆಪ್ಟೆಂಬರ್ 2022
ಹೌದು! ಏಷ್ಯಾಕಪ್​ನ ಸೂಪರ್-4ನಲ್ಲಿ ಅಫ್ಘಾನ್ ವಿರುದ್ಧ ಘರ್ಜಿಸಿದ್ದ ಕೊಹ್ಲಿ,​ 3 ವರ್ಷ 3 ತಿಂಗಳ ನಂತರ ಶತಕದ ಬರ ನೀಗಿಸಿದ್ದರು. ವಿಶೇಷವಾಗಿ ಅಭಿಮಾನಿಗಳ​ ಕಾಯುವಿಕೆಗೆ ಬ್ರೇಕ್​ ಹಾಕಿದ್ದರು. ಏಕದಿನ ಹಾಗೂ ಟೆಸ್ಟ್​ ಕ್ರಿಕೆಟ್​ನಲ್ಲಿ ಶತಕ ಇಲ್ಲ ಎಂಬ ಟೀಕೆಗಳು ಕೇಳುತ್ತಲೇ ಇತ್ತು. ಇದಕ್ಕೆಲ್ಲ ನಂತರದ ದಿನಗಳಲ್ಲಿ ಉತ್ತರ ಕೊಟ್ರು. ಹಾಗಿದ್ರೂ ಓವರ್ ಸೆಂಚೂರಿ ಚರ್ಚೆ ಹಾಗೇ ಉಳಿದಿತ್ತು, ಅದಕ್ಕೂ ಈಗ ಉತ್ತರ ನೀಡಿ ಸೈ ಎನಿಸಿಕೊಂಡಿರುವ ಕೊಹ್ಲಿ, ಕಿಂಗ್ ಇಸ್ ಬ್ಯಾಕ್​​​​​ ಎಂಬ ಸ್ಟ್ರಾಂಗ್ ಮೆಸೇಜ್ ನೀಡಿದ್ದಾರೆ.

10 ತಿಂಗಳಿಂದ ಸೆಂಚೂರಿ ಸರದಾರನ ಶತಕದ ಭರಾಟೆ..!

2022ರ ಏಷ್ಯಾಕಪ್​ನಲ್ಲಿ ಅಫ್ಘಾನ್ ವಿರುದ್ಧ ಟಿ20 ಶತಕ ಸಿಡಿಸಿದ್ದ ಕೊಹ್ಲಿ, ಚೊಚ್ಚಲ ಟಿ20 ಶತಕದ ಜೊತೆ ಜೊತೆಗೆ ಶತಕದ ಬರವನ್ನೂ ನೀಗಿಸಿಕೊಂಡಿದ್ದರು. ಈ ಬೆನ್ನಲ್ಲೇ ಬಾಂಗ್ಲಾ ವಿರುದ್ಧದ ಏಕದಿನ ಸರಣಿಯ 3ನೇ ಏಕದಿನ ಪಂದ್ಯದಲ್ಲಿ ಶತಕ ದಾಖಲಿಸಿದ್ದ ಕೊಹ್ಲಿ, ಏಕದಿನ ಶತಕಕ್ಕೂ ಬ್ರೇಕ್ ಹಾಕಿದ್ದರು. ಅಷ್ಟೇ ಅಲ್ಲ.. ಶ್ರೀಲಂಕಾ ವಿರುದ್ಧದ ಏಕದಿನ ಸರಣಿಯಲ್ಲಿ ಎರಡು ಶತಕ ಸಿಡಿಸಿದ್ದ ಕೊಹ್ಲಿ, ಜಸ್ಟ್​ ಮೂರೇ ವಾರದಲ್ಲಿ ಮೂರು ಬಾರಿ ಮೂರಂಕಿ ಗಡಿದಾಟಿ ಕಮಾಲ್​​​​​​​​​ ಮಾಡಿದರು.
ಟೆಸ್ಟ್​ ಕ್ರಿಕೆಟ್​​ನಲ್ಲಿ ಶತಕ ಇಲ್ಲ ಎಂಬ ಕೊರಗು ಇನ್ನಿಲ್ಲದಂತೆ ಕಾಡಿತ್ತು. ಇದಕ್ಕೆ ಆಸ್ಟ್ರೇಲಿಯಾ ವಿರುದ್ಧದ ಟೆಸ್ಟ್​ ಸರಣಿಯ ಅಂತಿಮ ಪಂದ್ಯದಲ್ಲಿ ಬ್ರೇಕ್​ ಹಾಕಿದ್ದ ಕೊಹ್ಲಿಗೆ ಕಾಡಿದ್ದು, 5 ವರ್ಷಗಳಿಂದ ಓವರ್​ಸೀಸ್ ಟೆಸ್ಟ್​ ಶತಕವಿಲ್ಲ ಎಂಬ ಕಾಲೆಳೆಯುವಿಕೆ. ಇದಕ್ಕೆ ವಿಂಡೀಸ್ ವಿರುದ್ಧದ 2ನೇ ಟೆಸ್ಟ್​ನಲ್ಲಿ ತೀರಿಸಿದಿದ್ದಾರೆ. ಅಷ್ಟೇ ಅಲ್ಲ. ಪ್ರತಿ ಫಾರ್ಮೆಟ್​​ನಲ್ಲೂ ಧೂಳ್​ ಎಬ್ಬಿಸಿ ರನ್​​ದಾಹ ತೀರಿಸಿಕೊಳ್ಳುತ್ತಿದ್ದಾರೆ.

ಕಿಂಗ್​​ ಕೊಹ್ಲಿಯ ರನ್​​ ದಾಹಕ್ಕಿಲ್ಲ ಬ್ರೇಕ್​

ವಿರಾಟ್​ ಕೊಹ್ಲಿ ಒಂದೇ ಒಂದು ಫಾರ್ಮೆಟ್​ನಲ್ಲಿ ರನ್​ ಗಳಿಸದಿದ್ರೆ ಸಾಕು. ಅದನ್ನೇ ಬೊಟ್ಟು ಮಾಡುತ್ತಿದ್ದವರು. ಟ್ರೋಲ್ ಮಾಡುತ್ತಿದ್ದವರು. ಒಂದಿಬ್ಬರಲ್ಲ. ಒಂದು ಪಂಗಡವೇ ಇದೆ. ಇದಕ್ಕೆಲ್ಲಾ ವಿರಾಟ್​​ ಕೊಹ್ಲಿ, ರನ್​ ಶಿಖರ ಕಟ್ಟುವ ಮೂಲಕ ಖಡಕ್ ಅನ್ಸರ್ ನೀಡಿದ್ದಾರೆ. ಯಾವೊಂದು ಫಾರ್ಮೆಟ್​ನಲ್ಲಿ ತಾನೂ ಹಿಂದೆ ಬಿದ್ದಿಲ್ಲ ಅನ್ನೋದನ್ನ ತೋರಿಸಿಕೊಡ್ತಿದ್ದಾರೆ. ಇದಕ್ಕೆ ಈ ಅಂಕಿಅಂಶಗಳೇ ಸಾಕ್ಷಿ.

2023ರಿಂದ ಕಿಂಗ್ ಕೊಹ್ಲಿಯ ರನ್ ಶಿಕಾರಿ

2023ರಿಂದ ಒಟ್ಟು 7 ಟೆಸ್ಟ್​ ಪಂದ್ಯಗಳ 10 ಇನ್ನಿಂಗ್ಸ್​ಗಳಲ್ಲಿ ಬ್ಯಾಟ್ ಬೀಸಿರುವ ವಿರಾಟ್, 557 ರನ್ ಕಲೆಹಾಕಿದ್ದಾರೆ. 55.70 ಸರಾಸರಿಯಲ್ಲಿ ರನ್ ಗಳಿಸಿರುವ ಕೊಹ್ಲಿ 1 ಅರ್ಧಶತಕ, 2 ಶತಕ ಸಿಡಿಸಿದ್ದಾರೆ. ಇನ್ನೂ ಏಕದಿನ ಫಾರ್ಮೆಟ್​ನಲ್ಲಿ ಆಡಿರೋ 9 ಪಂದ್ಯಳಿಂದ 427 ರನ್ ದಾಖಲಿಸಿರೋ ವಿರಾಟ್, 53.37ರ ಅವರೇಜ್​​ನಲ್ಲಿ ರನ್​​​​ ಗಳಿಸಿದ್ದಾರೆ. ಈ ಪೈಕಿ 1 ಅರ್ಧಶತಕ, 2 ಶತಕ ಸಿಡಿಸಿದ್ದಾರೆ. ಇನ್ನೂ ಐಪಿಎಲ್ ಸೀಸನ್​​-16ರಲ್ಲಿ ಅತ್ಯದ್ಬುತ ಪ್ರದರ್ಶನ ತೋರಿದ್ದ ವಿರಾಟ್​, 14 ಪಂದ್ಯಗಳಿಂದ 639 ರನ್​ ಗಳಿಸಿದ್ದಾರೆ. ಸುಮಾರು 53.25ರ ಸರಾಸರಿಯಲ್ಲಿ ಬ್ಯಾಟ್ ಬೀಸಿರುವ ಕೊಹ್ಲಿ, ತಲಾ 2 ಅರ್ಧಶತಕ, ಶತಕ ಸಿಡಿಸಿದ್ದಾರೆ.

ಕರಿಯರ್​ನ ಪೀಕ್ ಇಯರ್ ನೆನಪಿಸಿದ ವಿರಾಟ್​

ಟಿ20 ಏಕದಿನ, ಟೆಸ್ಟ್​ ಕ್ರಿಕೆಟ್​​ನಲ್ಲಿ ಶತಕಗಳ ಸುರಿಮಳೆಯನ್ನೇ ಸುರಿಸಿರುವ ವಿರಾಟ್​, ಕಳೆದ 10 ತಿಂಗಳಲ್ಲಿ ಬರೋಬ್ಬರಿ 8 ಶತಕ ಸಿಡಿಸಿದ್ದಾರೆ. ಇದು ವಿರಾಟ್​ ಕೊಹ್ಲಿಯ ವೃತ್ತಿ ಜೀವನದ ಫೀಕ್ ಇಯರ್​ ಅನ್ನೇ ನೆನಪಿಸುವಂತೆ ಮಾಡಿದೆ. 2017 ಹಾಗೂ 2018ರ ವರ್ಷದಲ್ಲಿ ವೃತ್ತಿ ಜೀವನದ ಉತ್ಸುಂಗದಲ್ಲಿದ್ದ ಕೊಹ್ಲಿ, ಅಂತಾರಾಷ್ಟ್ರೀಯ ಕ್ರಿಕೆಟ್​ನಲ್ಲಿ ಕ್ರಮವಾಗಿ 11, 11 ಶತಕ ಸಿಡಿಸಿ ಮಿಂಚಿದ್ದರು. 2022 ಗ್ರೇಟ್​ ಕಮ್​​ಬ್ಯಾಕ್​ ಬಳಿಕ ವಿರಾಟ್​ ವೀರಾವೇಶ ನೋಡ್ತಿದ್ರೆ. ಕೊಹ್ಲಿ 2.O ವರ್ಷನ್ ಅನ್ನೇ ಅಭಿಮಾನಿಗಳಿಗೆ ತೋರಿಸ್ತಿದ್ದಾರೆ.

ಅದೇನೇ ಆಗಲಿ, ಕೊಹ್ಲಿ ಶತಕದ ಬರ ಅನುಭವಿಸಿದಾಗ ರನ್​ಗಳಿಸಿದಿದ್ದಾಗ ಕೊಹ್ಲಿ ಕಥೆ ಮುಗೀತು ಅನ್ನೋ ಟೀಕೆಗಳಿಗೆಲ್ಲ ಈ 10 ತಿಂಗಳಲ್ಲೇ ಉತ್ತರಿಸಿರೋದು ಸುಳ್ಳಲ್ಲ.

ವಿಶೇಷ ವರದಿ: ಸಂತೋಷ್

ವಿಶೇಷ ಸೂಚನೆ: ಕ್ರಿಕೆಟ್​​ನ ವಿಶೇಷ ಸುದ್ದಿಗಳಿಗಾಗಿ ವೀಕ್ಷಿಸಿ ‘ರನ್ ಭೂಮಿ’ ಪ್ರತಿದಿನ ಬೆಳಗ್ಗೆ 8.27ಕ್ಕೆ ನ್ಯೂಸ್ ಫಸ್ಟ್ ಚಾನೆಲ್