ದೇಶಿ ಕ್ರಿಕೆಟ್​ನಲ್ಲಿ ಮಾಯಾಂಕ್​ ಅಗರ್​ವಾಲ್ ಬ್ಯಾಟಿಂಗ್​ ಮಿಂಚು

ಈ ಹಿಂದೆ ತಂಡದಲ್ಲಿ ಬ್ಯಾಟಿಂಗ್​ ಸತತ ವಿಫಲ, ಟೀಮ್​ನಿಂದ ಕೊಕ್

ಕಮ್​ಬ್ಯಾಕ್​ ಮಾಡೋ ಲೆಕ್ಕಾಚಾರದಲ್ಲಿ ಮಯಾಂಕ್​ ಅಗರ್​ವಾಲ್..!

ವಿಶ್ವ ಟೆಸ್ಟ್​​ ಚಾಂಪಿಯನ್​ಶಿಪ್​ ಸೋಲಿನ ಬಳಿಕ ಟೀಮ್​ ಇಂಡಿಯಾದಲ್ಲಿ ಬದಲಾವಣೆಯದ್ದೇ ದೊಡ್ಡ ಸುದ್ದಿಯಾಗಿದೆ. ತಂಡದಿಂದ ಹೊರ ಬಿದ್ದ ಆಟಗಾರರೆಲ್ಲ ಕಮ್​ಬ್ಯಾಕ್​ ಕನವರಿಕೆಯಲ್ಲಿದ್ದಾರೆ. ನಮ್ಮ ಕನ್ನಡಿಗ ಮಯಾಂಕ್​ ಅಗರ್​ವಾಲ್​ ಕೂಡ ಕಮ್​ಬ್ಯಾಕ್​ ಮಾಡೋ ಲೆಕ್ಕಾಚಾರದಲ್ಲಿದ್ದು ಕಠಿಣ ಅಭ್ಯಾಸದ ಮೊರೆ ಹೋಗಿದ್ದಾರೆ.

ಇಂಡಿಯಾದಲ್ಲಿ ಬದಲಾವಣೆಯ ಗಾಳಿ ಬೀಸ್ತಿದ್ದಂತೆ, ಚಾನ್ಸ್​ ಗಿಟ್ಟಿಸಿಕೊಳ್ಳೋಕೆ ಪೈಪೋಟಿ ಆರಂಭವಾಗಿದೆ. ದಿಗ್ಗಜರು, ಎಕ್ಸ್​ಪರ್ಟ್​ಗಳೆಲ್ಲ ಒಬ್ಬೊಬ್ಬ ಆಟಗಾರನ ಪರ ಬ್ಯಾಟಿಂಗ್​ ನಡೆಸ್ತಿದ್ದಾರೆ. ಯಾವೆಲ್ಲ ಆಟಗಾರರನ್ನ ತಂಡದಿಂದ ಕೈ ಬಿಡಬೇಕು ಅನ್ನೋದ್ರ ಜೊತೆಗೆ ಇವ್ರಿಗೆ ಚಾನ್ಸ್​ ಕೊಡಿ ಅಂತಾ ಲಾಬಿ ನಡೆಸ್ತಿದ್ದಾರೆ.

ಕಮ್​ಬ್ಯಾಕ್​ಗೆ ಪಣತೊಟ್ಟ ಕನ್ನಡಿಗ.!
ತಂಡಕ್ಕೆ ಮಯಾಂಕ್​ ಅಗರ್​ವಾಲ್​ ಡೆಬ್ಯೂ ಮಾಡಿದಾಗ ಟೆಸ್ಟ್​​ ತಂಡದ ಓಪನರ್​ ಸ್ಥಾನಕ್ಕೆ ಫಿಕ್ಸ್​ ಎಂಬ ಟಾಕ್​ ಶುರುವಾಗಿತ್ತು. ಆರಂಭಿಕ ದಿನಗಳಲ್ಲಿ ಮಯಾಂಕ್​ ನೀಡಿದ ಅಬ್ಬರದ ಪ್ರದರ್ಶನ ಹಾಗಿತ್ತು. ಆದ್ರೆ, ಆ ಬಳಿಕ ಆಗಿದ್ದೇ ಬೇರೆ. ಅದನ್ನ ಅನ್​ಲಕ್​ ಅನ್ನಬೇಕೋ, ಮಯಾಂಕ್​ ಸಾಮರ್ಥ್ಯವೇ ಇಷ್ಟು ಅನ್ನಬೇಕೋ ಗೊತ್ತಿಲ್ಲ. ಒಂದೆಡೆ ಇಂಜುರಿಗಳು ಬಾದಿಸಿದ್ರೆ, ಇನ್ನೊಂದೆಡೆ ಫಾರ್ಮ್​ ಸಮಸ್ಯೆ ಮಯಾಂಕ್​ಗೆ ಕಾಡ್ತು. ಪರಿಣಾಮ ತಂಡದಿಂದ ಹೊರಬಿದ್ದ ಮಯಾಂಕ್​ ಇದೀಗ ಕಮ್​ಬ್ಯಾಕ್​ಗೆ ಸರ್ಕಸ್​​ ಮಾಡ್ತಿದ್ದಾರೆ.

ಸುರಿವ ಮಳೆಯಲಿ ಮಯಾಂಕ್​ ಕಠಿಣ ಅಭ್ಯಾಸ.!
ಕಮ್​ಬ್ಯಾಕ್​ಗೆ ಪಣ ತೊಟ್ಟಿರುವ ಮಯಾಂಕ್​ ಅಗರ್​ವಾಲ್​ ಕಠಿಣ ಅಭ್ಯಾಸದ ಮೊರೆ ಹೋಗಿದ್ದಾರೆ. ಟೀಮ್​ಗೆ ವಾಪಾಸ್ಸಾಗ ಬೇಕು ಮತ್ತೆ ವೈಟ್​ ಜೆರ್ಸಿಯನ್ನ ತೊಡಬೇಕು ಅನ್ನೋ ಹಂಬಲ ಮಯಾಂಕ್​ರಲ್ಲಿ ಎಷ್ಟರ ಮಟ್ಟಿಗೆ ಬಂದಿದೆ ಅಂದ್ರೆ, ಸುರಿವ ಮಳೆಯನ್ನೂ ಲೆಕ್ಕಿಸದೆ ಅಭ್ಯಾಸದ ಅಖಾಡಕ್ಕೆ ಧುಮುಕಿದ್ದಾರೆ.

9 ಇನ್ನಿಂಗ್ಸ್​​ನಲ್ಲಿ ಫ್ಲಾಪ್​, ಮಯಾಂಕ್​ಗೆ ಕೊಕ್​..!
ಟ್ರ್ಯಾಕ್​ ರೆಕಾರ್ಡ್​ ತೆಗೆದು ನೋಡಿದ್ರೆ ನಿಮಗೂ ಆಶ್ಚರ್ಯ ಆಗಬಹುದು. 2021ರಲ್ಲಿ ನ್ಯೂಜಿಲೆಂಡ್​ ವಿರುದ್ಧ 2ನೇ ಟೆಸ್ಟ್​ನಲ್ಲಿ ಆರ್ಭಟಿಸಿದ್ದ ಮಯಾಂಕ್​ ಆ ಬಳಿಕ ಆಡಿದ ಕೊನೆಯ 5 ಟೆಸ್ಟ್​​​ಗಳಲ್ಲಿ ನಿರೀಕ್ಷಿತ ಪರ್ಫಾಮೆನ್ಸ್ ನೀಡಲಿಲ್ಲ. ಕೊನೆಯದಾಗಿ ಆಡಿದ ಶ್ರೀಲಂಕಾ ವಿರುದ್ಧದ ಸರಣಿಯಲ್ಲಿ ಮಯಾಂಕ್ ಹೀನಾಯ ಪ್ರದರ್ಶನ ನೀಡಿದ್ರು. ಅದಕ್ಕೂ ಹಿಂದಿನ ಸೌತ್​ ಆಫ್ರಿಕಾ ಸಿರೀಸ್​​​ನಲ್ಲೂ ರನ್ ​​ಗಳಿಸಲು ಪರದಾಡಿದ್ರು. ಅದಕ್ಕೆ ತಂಡದಿಂದ ಕೊಕ್​ ಕೊಡಲಾಗಿತ್ತು. ಆದ್ರೆ, ಸಾಲು ಸಾಲು ಫ್ಲಾಪ್​ ಶೋ ನೀಡ್ತಿದ್ರು ಅನುಭವಿಗಳನ್ನ ಮಾತ್ರ ಟೀಮ್​ ಮ್ಯಾನೇಜ್​ಮೆಂಟ್​ ಬ್ಯಾಕ್​ ಮಾಡ್ತಿದೆ.

ಕಳೆದ ಸೀಸನ್​ ರಣಜಿ ಟೂರ್ನಿಯಲ್ಲಿ ಕಮಾಲ್​.!
ಟೀಮ್​ನಿಂದ ಡ್ರಾಪ್​ ಆದ ಮಾತ್ರಕ್ಕೆ ಮಯಾಂಕ್​ ಅಗರ್​ವಾಲ್​ ಸುಮ್ಮನೆ ಕೂರಲಿಲ್ಲ. ಡೊಮೆಸ್ಟಿಕ್​ ಅಖಾಡಕ್ಕೆ ನೇರವಾಗಿ ಧುಮಿಕಿದ್ರು. ಕಳೆದ ಸೀಸನ್​ನಲ್ಲಿ ಕರ್ನಾಟಕ ತಂಡವನ್ನ ಮುನ್ನಡೆಸಿದ್ದ ಮಯಾಂಕ್​, ಭರ್ಜರಿ ಬ್ಯಾಟಿಂಗ್​ ನಡೆಸಿದ್ರು. ಆಡಿದ 13 ಇನ್ನಿಂಗ್ಸ್​ಗಳಲ್ಲೇ ಬರೋಬ್ಬರಿ 990 ರನ್​ ಸಿಡಿಸಿದ್ರು. ಬರೋಬ್ಬರಿ 82.50ರ ಸರಾಸರಿಯಲ್ಲಿ 2 ದ್ವಿಶತಕ ಸೇರಿ 3 ಶತಕ, 6 ಅರ್ಧಶತಕ ಸಿಡಿಸಿದ್ದಾರೆ.

ಇಂಡೀಸ್​​ ಪ್ರವಾಸದಲ್ಲಿ ಮಯಾಂಕ್​ಗೆ ಸಿಗುತ್ತಾ ಚಾನ್ಸ್​?.​

ತಂಡದಿಂದ ಡ್ರಾಪ್​ ಆದ ಬಳಿಕ ರಣಜಿ ಅಖಾಡಕ್ಕೆ ದುಮುಕಿ ರನ್​ ಕೊಳ್ಳೆ ಹೊಡೆದ್ರೂ, ಬಾರ್ಡರ್​​ -ಗವಾಸ್ಕರ್​ ಸರಣಿಯ ವೇಳೆ ಮಯಾಂಕ್​ರನ್ನ ಕಡೆಗಣಿಸಲಾಯಿತು. ಬದಲಾವಣೆಯ ಗಾಳಿ ಬೀಸಿರುವ ಈ ಸಂದರ್ಭದಲ್ಲಿ ವೆಸ್ಟ್​ ಇಂಡೀಸ್​ ಪ್ರವಾಸ ಮಯಾಂಕ್​ಗೆ ಅವಕಾಶ ನೀಡೋಕೆ ಉತ್ತಮ ವೇದಿಕೆಯಾಗಿದೆ. ಕೆ.ಎಲ್​ ರಾಹುಲ್​ ತಂಡದಲ್ಲಿ ಇಲ್ಲದೇ ಇರೋದ್ರಿಂದ ಬ್ಯಾಕ್​ ಅಪ್​ ಓಪನರ್​ ಆಗಿ ಮಣೆ ಹಾಕಬಹದು. ಮಿಡಲ್​ ಆರ್ಡರ್​ನಲ್ಲಿ ಬ್ಯಾಟಿಂಗ್​ ನಡೆಸಲು ಮಯಾಂಕ್​ ಸಿದ್ಧರಿದ್ದಾರೆ. ಆದ್ರೆ, ಆಯ್ಕೆ ಸಮಿತಿ ಅವಕಾಶ ನೀಡುತ್ತಾ ಅನ್ನೋದಷ್ಟೇ ಸದ್ಯದ ಪ್ರಶ್ನೆ.

ವಿಶೇಷ ಸೂಚನೆ: ಕ್ರಿಕೆಟ್‌ನ ಸುದ್ದಿಗಳಿಗಾಗಿ ಪ್ರತಿದಿನ ಬೆಳಗ್ಗೆ 8.27ಕ್ಕೆ ನ್ಯೂಸ್‌ ಫಸ್ಟ್‌ ಚಾನೆಲ್​​ನಲ್ಲಿ ‘ರನ್ ಭೂಮಿ’ ವೀಕ್ಷಿಸಿ

Rain doesn't play a spoil sport if you use it to train yourself pic.twitter.com/O0XW1AGLwW

— Mayank Agarwal (@mayankcricket) June 20, 2023