ಆಟಗಾರರ 'ರಿವರ್ಸ್​​ ಗೇರ್​' ಆಟ, ದಂಗಾದ ಬಿಸಿಸಿಐ.!

IPL ಮಾರ್ಕೆಟ್​ ಬೀಳುವ ಭಯದಲ್ಲಿ ಬಿಸಿಸಿಐ, ಯಾಕೆ?

ರಾಯಡು ರಿಟೈರ್​​ಮೆಂಟ್​ನಿಂದ ಬಿಸಿಸಿಐಗೆ ಫುಲ್ ಶಾಕ್

ಮಹತ್ವದ ಬೆಳವಣಿಗೆಯೊಂದರಲ್ಲಿ ಖಡಕ್​ ನಿರ್ಧಾರ ಕೈಗೊಳ್ಳೋಕೆ ಬಿಸಿಸಿಐ ಮುಂದಾಗಿದೆ. ಈ ನಿರ್ಧಾರ ಕೈಗೊಳ್ಳದಿದ್ರೆ ಐಪಿಎಲ್​ನ ಮಾರ್ಕೆಟ್​ ಬಿದ್ದೋಗುತ್ತೆ ಅನ್ನೋ ಆತಂಕ ಬಾಸ್​​ಗಳನ್ನ ಕಾಡ್ತಿದೆ. ಬಿಸಿಸಿಐ ಏನಾದ್ರೂ ಕಠಿಣ ನಿರ್ಧಾರ ತೆಗೆದುಕೊಂಡ್ರೆ, ಆಟಗಾರರ ಹೊಟ್ಟೆ ಮೇಲೆ ಹೊಡೆದಂತಾಗುತ್ತೆ. ಅಷ್ಟಕ್ಕೂ BCCI ಅಧಿಕಾರಿಗಳು ಕೈಗೊಳ್ಳೋಕೆ ಹೊರಟಿರೋ ನಿರ್ಧಾರ ಯಾವುದು.? ಯಾಕಾಗಿ.?

ಬಿಸಿಸಿಐ ವಿಶ್ವ ಶ್ರೀಮಂತ ಕ್ರಿಕೆಟ್​ ಬೋರ್ಡ್​. ಅಂತರಾಷ್ಟ್ರೀಯ ಕ್ರಿಕೆಟ್​ ಕೌನ್ಸಿಲ್​​ ಕೂಡ ಬಿಸಿಸಿಐನ ಹಾಕಿದ ಗೆರೆಯನ್ನ ದಾಟಲ್ಲ ಅನ್ನೋದು ಎಲ್ಲರಿಗೂ ತಿಳಿದಿರೋ ಓಪನ್​ ಸೀಕ್ರೆಟ್​​. ಭಾರತೀಯ ಕ್ರಿಕೆಟ್​ ನಿಯಂತ್ರಣ ಮಂಡಳಿ ವಿಶ್ವ ಕ್ರಿಕೆಟ್​​ನ ಪವರ್​​ ಹೌಸ್​ ಅಂದ್ರೂ ತಪ್ಪಾಗಲ್ಲ. ಇದಕ್ಕೆಲ್ಲಾ ಕಾರಣ ಒನ್ಸ್​​ ಅಗೇನ್​ ಶ್ರೀಮಂತ ಕ್ರಿಕೆಟ್​ ಸಂಸ್ಥೆ ಅನ್ನೋ ಟ್ಯಾಗ್​ಲೈನ್​.

ಪವರ್​​ ಹೌಸ್​ ಬಿಸಿಸಿಐಗೆ ಶುರುವಾಯ್ತು ಆತಂಕ.!

ಐಸಿಸಿಯ ಬಹುದೊಡ್ಡ ಪಾಲುದಾರ ಆಗಿರುವ ಬಿಸಿಸಿಐಗೆ ಈಗ ಹೊಸದೊಂದು ಟೆನ್ಶನ್​​ ಶುರುವಾಗಿದೆ. ಎಷ್ಟರ ಮಟ್ಟಿಗೆ ಅಂದ್ರೆ, ಕಠಿಣ ನಿರ್ಧಾರ ತೆಗೆದುಕೊಳ್ಳಬೇಕು ಅನ್ನೋ ಬಿಸಿಸಿಐ ಬಂದು ಬಿಟ್ಟಿದೆ. ಪರೋಕ್ಷವಾಗಿ ವಿಶ್ವ ಕ್ರಿಕೆಟ್​ನ್ನ ಆಳ್ತಿದ್ದ ಬಿಸಿಸಿಐ ಅಧಿಕಾರಿಗಳು ಇಷ್ಟು ಚಿಂತೆಗೆ ದೂಡಿರೋದು ಬೇರಾರೂ ಅಲ್ಲ, ನಮ್ಮ ಆಟಗಾರರೇ.

ಭಾರತೀಯ ಕ್ರಿಕೆಟ್​ಗೆ ಗುಡ್​ ಬೈ, ಫಾರಿನ್​ ಲೀಗ್​ಗೆ ಜೈ.!

ಭಾರತೀಯ ಕ್ರಿಕೆಟಿಗರು ಈಗ ವಿದೇಶಿ ಲೀಗ್​ಗಳಲ್ಲಿ ಆಡಬೇಕು ಅಂದ್ರೆ, ನಿವೃತ್ತಿ ಘೋಷಿಸೋದು ಕಡ್ಡಾಯಮಾಡಲಾಗಿದೆ. ಇಲ್ಲದಿದ್ರೆ, NOC ಸಿಗಲ್ಲ. ಹೀಗಾಗಿ ಕಡಿಮೆ ಅವಕಾಶಗಳನ್ನ ಪಡೆದುಕೊಳ್ತಿರೋ ಆಟಗಾರರ ಎಲ್ಲ ಮಾದರಿಯ ಕ್ರಿಕೆಟ್​​ಗೆ ಗುಡ್​ ಬೈ ಹೇಳಿ ಫಾರಿನ್​ ಲೀಗ್​ಗಳಲ್ಲಿ ಆಡಲು ಮುಂದಾಗ್ತಿದ್ದಾರೆ. ಇದಕ್ಕೆ ಲೇಟೆಸ್ಟ್​ ಎಕ್ಸಾಂಪಲ್​ ಅಂಬಟಿ ರಾಯುಡು. ಈ ಬಾರಿ ಐಪಿಎಲ್​ ಫೈನಲ್​ ಪಂದ್ಯಕ್ಕೂ ಮುನ್ನ ರಿಟೈರ್​​ಮೆಂಟ್​ ಘೋಷಿಸಿದ ರಾಯಡು ಫೈನಲ್​ ಮುಗಿದ ಮರುದಿನವೇ ಫಾರಿನ್​ ಲೀಗ್​ನಲ್ಲಿ ಆಡೋದನ್ನ ಘೋಷಿಸಿದ್ರು. ಇದೇ ನೋಡಿ ಬಿಸಿಸಿಐ ದಂಗು ಬಡಿಸಿರೋ ವಿಚಾರ.

ಕಠಿಣ ನಿಯಮ ಜಾರಿಗೆ ತರಲು ಬಿಸಿಸಿಐ ಸಿದ್ದ.!

ಬಿಸಿಸಿಐನ ಆತಂಕ ಹೆಚ್ಚಿಸಿರೋದ್ರ ಹಿಂದಿನ ಕಾರಣ ಐಪಿಎಲ್​. ಮುಂದೆ ಭಾರತದ ಪ್ರಮುಖ ಆಟಗಾರರು ಕೂಡ ಇದೇ ರೀತಿಯ ನಿರ್ಧಾರ ಕೈಗೊಂಡು ವಿದೇಶಿ ಲೀಗ್​ಗಳತ್ತ ಮುಖ ಮಾಡಿದ್ರೆ, ಐಪಿಎಲ್​ ಮಾರ್ಕೆಟ್​ ಬೀಳಲಿದೆ. ಹೀಗಾಗಿ ಬಾಸ್​​ಗಳು ಕಠಿಣ ನಿಯಮ ಜಾರಿಗೆ ಮುಂದಾಗಿದ್ದಾರೆ.

ವಿದೇಶಿ ಲೀಗ್​ಗಳಲ್ಲೂ IPL​ ಫ್ರಾಂಚೈಸಿಗಳ ಕಾರು ಬಾರು.!

ಬಹುತೇಕ ವಿದೇಶಿ ಲೀಗ್​ಗಳಲ್ಲಿ ಐಪಿಎಲ್​ ಫ್ರಾಂಚೈಸಿ ಮಾಲೀಕರು ತಂಡವನ್ನ ಹೊಂದಿದ್ದಾರೆ. ಮೇಜರ್​ ಲೀಗ್​ ಕ್ರಿಕೆಟ್​​, ಸೌತ್​​ ಆಫ್ರಿಕಾ ಟಿ20, ಕೆರಬಿಯನ್​ ಪ್ರೀಮಿಯರ್​ ಲೀಗ್​ ಹಾಗೂ ಇಂಟರ್​ ನ್ಯಾಷನಲ್​ ಟಿ20ಗಳಲ್ಲಿ ಐಪಿಎಲ್​ ಫ್ರಾಂಚೈಸಿಗಳು ಒಡೆತನದ ತಂಡಗಳಿವೆ. ಆ ಟೂರ್ನಿಗಳಲ್ಲೂ ದೊಡ್ಡ ಮಟ್ಟದ ಲಾಭ ನಿರೀಕ್ಷೆ ಮಾಡ್ತಿರೋ ಫ್ರಾಂಚೈಸಿಗಳು, ಐಪಿಎಲ್​ನಲ್ಲಿ ತಮ್ಮ ತಂಡದ ಸ್ಟಾರ್​​ಗಳಾಗಿದ್ದ ಆಟಗಾರರನ್ನ ಆ ಟೂರ್ನಿಗಳಲ್ಲೂ ಬಳಸಿಕೊಳ್ಳೋ ಪ್ಲಾನ್​ ರೂಪಿಸಿದೆ.

ಈ ಸೀಸನ್​ನ ಐಪಿಎಲ್​ ಅಂತ್ಯದ ಬಳಿಕ ನಿವೃತ್ತಿ ಘೋಷಿಸಿದ ಅಂಬಟಿ ರಾಯುಡು, ಮೇಜರ್​ ಲೀಗ್​ ಕ್ರಿಕೆಟ್​​​ನಲ್ಲಿ ಸಿಎಸ್​ಕೆ ಫ್ರಾಂಚೈಸಿ ಒಡೆತನದ ಟೆಕ್ಸಾಸ್​​ ಸೂಪರ್​ ಕಿಂಗ್ಸ್​ ಸೇರಿದ್ದಾರೆ. ರಾಬಿನ್​ ಉತ್ತಪ್ಪ ಹಾಗೂ ಯೂಸೂಫ್​ ಪಠಾಣ್​ ಐಎಲ್​ಟಿ20 ಲೀಗ್​ನಲ್ಲಿ ಕಳೆದ ವರ್ಷ ಆಡಿದ್ರು. ಇದು ಹೀಗೆ ಮುಂದುವರೆದ್ರೆ, ಉಳಿದ ಆಟಗಾರರು ಇದೇ ಹಾದಿ ತುಳಿದ್ರೆ, ಬಿಸಿಸಿಐ ಆದಾಯಕ್ಕೆ ಕೊಕ್ಕೆ ಬೀಳಲಿದೆ.

ಗುಡ್​ ಬೈ ಹೇಳಿದ್ರೂ 1 ವರ್ಷ ಆಡಂಗಿಲ್ಲ..?

ಆಟಗಾರರು ವಿದೇಶಿ ಲೀಗ್​ಗಳತ್ತ ಮುಖ ಮಾಡ್ತಿರೋದನ್ನ ಗಮನಿಸಿರೋ ಬಾಸ್​​ಗಳು ಇದೀಗ, ಕಠಿಣ ನಿಯಮವನ್ನ ರೂಪಿಸಿದ್ದಾರೆ. ಭಾರತೀಯ ಕ್ರಿಕೆಟ್​ಗೆ ವಿದಾಯ ಘೋಷಿಸಿದ್ರೂ 1 ವರ್ಷಗಳ ಕಾಲ ಯಾವುದೇ ಲೀಗ್​ ಆಡುವಂತಿಲ್ಲ ಅನ್ನೋ ನಿಯಮ ಜಾರಿಗೆ ತರಲು ಮುಂದಾಗಿದ್ದಾರೆ. ಜುಲೈ 7ರಂದು ನಡೆಯೋ ಅಪೆಕ್ಸ್​​ ಕೌನ್ಸಿಲ್​ ಮೀಟಿಂಗ್​ನ ಪ್ರಮುಖ ಅಜೆಂಡಾ ಇದೇ ಆಗಿದ್ದು, ಸಭೆಯ ಒಪ್ಪಿಗೆ ಪಡೆದು ಜಾರಿಗೆ ತರೋ ಸಾಧ್ಯತೆ ದಟ್ಟವಾಗಿದೆ.

ಆಟಗಾರರು ಆದಾಯದ ಕಥೆ ಏನು.?

ಇಲ್ಲಿ ಅವಕಾಶ ಸಿಗ್ತಿಲ್ಲ.. ಬೇರೆಡೆ ಆಡಿ ಬದುಕೋಕು ಬಿಡ್ತಾ ಇಲ್ಲ.. ಅನ್ನೋದು ಆಟಗಾರರ ಅಳಲು ಆಗಿದೆ. ಸದ್ಯ ಭಾರತೀಯ ಕ್ರಿಕೆಟ್​ನಲ್ಲಿ ಇರೋ ಪೈಪೋಟಿ ಹಲವು ಆಟಗಾರರು ಕಳೆದು ಹೋಗಿದ್ದಾರೆ. ಅವರಲ್ಲಿ ಕ್ರಿಕೆಟ್​ ಆಡೋ ಕನಸು ಜೀವಂತವಾಗಿದ್ರೂ, ಅವಕಾಶ ಸಿಗ್ತಿಲ್ಲ. ಅಂತವರಿಗೆಲ್ಲ ಫಾರಿನ್​ ಲೀಗ್​ಗಳು ವರದಾನವಾಗಿದ್ವು. ಆದ್ರೆ, ಬಿಸಿಸಿಐ ತರಲು ಹೊರಟಿರೋ ಹೊಸ ನಿಯಮ ಆಟಗಾರರ ಹೊಟ್ಟೆ ಮೇಲೆ ಹೊಡೆತಂದಾಗುತ್ತೆ ಅನ್ನೋ ಮಾತುಗಳು ಸದ್ಯ ಕೇಳಿ ಬರ್ತಿವೆ.

ವಿಶೇಷ ಸೂಚನೆ: ಕ್ರಿಕೆಟ್‌ನ ಸುದ್ದಿಗಳಿಗಾಗಿ ಪ್ರತಿದಿನ ಬೆಳಗ್ಗೆ 8.27ಕ್ಕೆ ನ್ಯೂಸ್‌ ಫಸ್ಟ್‌ ಚಾನೆಲ್​​ನಲ್ಲಿ ‘ರನ್ ಭೂಮಿ’ ವೀಕ್ಷಿಸಿ