ಟೆಸ್ಟ್​ನಲ್ಲಿ ಕಿಂಗ್​ ಕೊಹ್ಲಿ ಕಳಪೆ ಪ್ರದರ್ಶನದ ಬಗ್ಗೆ ಹಲವರಿಂದ ಟೀಕೆ

ವೆಸ್ಟ್​ ಇಂಡೀಸ್​ ವಿರುದ್ಧ ವಿರಾಟ್ ಕಮ್​​ಬ್ಯಾಕ್​ ಮಾಡಲೇಬೇಕು..!

ಫ್ಯಾಬ್​-4 ರೇಸ್​ನಿಂದ ಕಿಂಗ್ ಕೊಹ್ಲಿ ಔಟ್, ಈಗಿರುವುದು ಫ್ಯಾಬ್​-3

ವೆಸ್ಟ್​ ಇಂಡೀಸ್​​ ವಿರುದ್ಧದ ಟೆಸ್ಟ್​ ಸರಣಿ ಕಿಂಗ್​ ಕೊಹ್ಲಿ ಪಾಲಿಗೆ ಅಗ್ನಿ ಪರೀಕ್ಷೆಯ ಕಣ. ಈ ಡು ಆರ್​​ ಡೈ ಸಿರೀಸ್​ನಲ್ಲಿ ವಿರಾಟ್​ ಅದ್ಭುತ ಪ್ರದರ್ಶನ ಮಾಡಬೇಕಿದೆ. ಸ್ಥಾನ ಉಳಿಸಿಕೊಳ್ಳೋಕೆ ಮಾತ್ರವಲ್ಲ. ಅಧಃಪತನದ ಹಾದಿ ಹಿಡಿದಿರೋ ಟೆಸ್ಟ್​ ಸಾಮ್ರಾಜ್ಯವನ್ನ ಉಳಿಸಿಕೊಳ್ಳಬೇಕು ಎಂದರೆ ಕೊಹ್ಲಿ ಘರ್ಜಿಸ ಬೇಕು.

2019ರ ಬಳಿಕ ಕರಿಯರ್​ನಲ್ಲಿ ನೀರಿಕ್ಷೆನೇ ಮಾಡಲಾಗದಂತ ಕುಸಿತ ಕಂಡ ವಿರಾಟ್​ ಕೊಹ್ಲಿ, ಸದ್ಯ ಕಮ್​ಬ್ಯಾಕ್​ ಮಾಡಿದ್ದಾರೆ. ಕಳೆದ ಏಷ್ಯಾಕಪ್​ ಟೂರ್ನಿಯಲ್ಲಿ ಸೆಂಚುರಿ ಸಿಡಿಸಿ ಘರ್ಜಿಸಿದ ಕೊಹ್ಲಿ ಆ ಬಳಿಕ ರನ್​ ಕೊಳ್ಳೆ ಹೊಡೆದಿದ್ದಾರೆ. ಆದ್ರೆ, ಕೊಹ್ಲಿಯ ಆರ್ಭಟ, ಅಬ್ಬರ ಎಲ್ಲ ವೈಟ್​ಬಾಲ್​ ಕ್ರಿಕೆಟ್​ಗೆ ಸೀಮಿತವಾಗಿದೆ. ರೆಡ್​ ಬಾಲ್​ ಕ್ರಿಕೆಟ್​ನಲ್ಲಿ ಅದೇ ರಾಗ.. ಅದೇ ಹಾಡು.

ಅದಃಪತನದ ಹಾದಿಯಲ್ಲಿ ಕಿಂಗ್​ ಕೊಹ್ಲಿಯ ಟೆಸ್ಟ್​ ಸಾಮ್ರಾಜ್ಯ.!

ವಿರಾಟ್​ ಕೊಹ್ಲಿ ಟೆಸ್ಟ್​ ಕ್ರಿಕೆಟ್​ ಅಂದರೆ ಪ್ರಾಣ. ಫ್ಯೂರೆಸ್ಟ್​ ಫಾರ್ಮೆಟ್​ನಲ್ಲಿ ಆಡೋದು ಮತ್ತು ಸಾಧಿಸೋದು ಎರಡೂ ಸಿಕ್ಕಾಪಟ್ಟೆ ಇಷ್ಟ. ಆದ್ರೆ, ಕಳೆದ ಕೆಲ ವರ್ಷಗಳಿಂದ ಈ ಲಾಂಗೆಸ್ಟ್​ ಫಾರ್ಮೆಟ್​​ನಲ್ಲಿ ಕೊಹ್ಲಿಯ ಆಟ ನಡೆಯುತ್ತಿಲ್ಲ. ಟೆಸ್ಟ್​ ಕ್ರಿಕೆಟ್​ನಲ್ಲಿ ಸಾಮ್ರಾಟ್​ ವಿರಾಟ್​ ಕೊಹ್ಲಿಯ ಸಾಮ್ರಾಜ್ಯ ಅಧಃಪತನದ ಹಾದಿ ಹಿಡಿದಿದೆ.

3 ವರ್ಷದಿಂದ ಟೆಸ್ಟ್​ ಫಾರ್ಮೆಟ್​ ಫುಲ್​ ಡಲ್​..!

ಒಂದು ಕಾಲದಲ್ಲಿ 50+ ಇದ್ದ ಕೊಹ್ಲಿಯ ಟೆಸ್ಟ್​ ಸರಾಸರಿ ಈಗ ಅದಕ್ಕಿಂತ ಕೆಳಕ್ಕೆ ಕುಸಿದಿದೆ. ದಾಖಲೆಯ 937ರ ರೇಟಿಂಗ್ಸ್​​​ನೊಂದಿಗೆ ವಿಶ್ವದ ನಂ.1 ಟೆಸ್ಟ್​​ ಕ್ರಿಕೆಟರ್​ ಆಗಿ ಮೆರೆದಾಡಿದ್ದ ಕೊಹ್ಲಿಗೆ ಈಗ ಟಾಪ್​ 10ರಲ್ಲೂ ಸ್ಥಾನವಿಲ್ಲ. ಕಳೆದ 3 ವರ್ಷದಿಂದ ನೀಡಿರುವದು ನಿರಾಶದಾಯಕ ಪ್ರದರ್ಶನ. ಕಳೆದ ಮಾರ್ಚ್​​ನಲ್ಲಿ ಆಸ್ಟ್ರೇಲಿಯಾ ವಿರುದ್ಧದ ಅಹಮದಾಬಾದ್​ನಲ್ಲಿ ಸೆಂಚುರಿ ಸಿಡಿಸಿದ್ದು ಬಿಟ್ರೆ, ಅದಕ್ಕೂ ಹಿಂದೆ ಹಾಗೂ ಅದಾದ ಮೇಲೆ ನೀಡಿರುವುದು ಕಳಪೆ ಫರ್ಪಾಮೆನ್ಸ್​.

2019ರ ನವೆಂಬರ್​ ಬಳಿಕ ಟೆಸ್ಟ್​ನಲ್ಲಿ ಕೊಹ್ಲಿ

2019ರ ನವೆಂಬರ್​​ ಬಳಿಕ ಟೆಸ್ಟ್​ ಕ್ರಿಕೆಟ್​ನಲ್ಲಿ 44 ಇನ್ನಿಂಗ್ಸ್​ಗಳನ್ನು ಆಡಿರುವ ಕೊಹ್ಲಿ ಗಳಿಸಿರೋದು ಕೇವಲ 1,277 ರನ್​ ಮಾತ್ರ. 29.69ರ ಸಾಧಾರಣ ಸರಾಸರಿಯನ್ನ ಹೊಂದಿರೋ ಕೊಹ್ಲಿ, 1 ಶತಕ 6 ಅರ್ಧಶತಕ ಸಿಡಿಸಿದ್ದಾರೆ. ಇದರ ಮಧ್ಯೆ 4 ಬಾರಿ ಡಕೌಟ್​ ಆಗಿದ್ದಾರೆ.

‘ಫ್ಯಾಬ್​-4’ ರೇಸ್​​ನಲ್ಲಿ ವಿರಾಟ್​​ ಕೊಹ್ಲಿನೇ ಇಲ್ಲ..!

ಕೇನ್​ ವಿಲಿಯಮ್​ಸನ್​, ಸ್ಟೀವ್​ ಸ್ಮಿತ್​, ಜೋ ರೂಟ್​​ ಹಾಗೂ ವಿರಾಟ್​ ಕೊಹ್ಲಿ. ಈ ನಾಲ್ವರ ಆಟಕ್ಕೆ ಫಿದಾ ಆದ ಕ್ರಿಕೆಟ್​ ಜಗತ್ತು ಇವರನ್ನ ಫ್ಯಾಬ್​​-4ಗಳೆಂದು ಕರೆದಿತ್ತು. ಇವರ ಮಧ್ಯೆ ಪೈಪೋಟಿ ಹೇಗಿತ್ತು ಅಂದ್ರೆ, ಪಂದ್ಯದಿಂದ ಪಂದ್ಯಕ್ಕೆ ಸರಣಿಯಿಂದ ಸರಣಿಗೆ ಱಂಕಿಂಗ್​ ಪಟ್ಟಿಯಲ್ಲಿ ಅಲ್ಲೋಲ ಕಲ್ಲೋಲವನ್ನೇ ಸೃಷ್ಟಿಸ್ತಾ ಇದ್ರು. ಈಗಲೂ ಆ ಪೈಪೋಟಿ ಹಾಗೇ ಇದೆ. ಆದ್ರೆ, ರೇಸ್​ನಲ್ಲಿ ಕೊಹ್ಲಿ ಇಲ್ಲ. ಫ್ಯಾಬ್-​ 4 ಹೋಗಿ ಫ್ಯಾಬ್​ 3 ಆಗಿದೆ.

‘ಈಗಿರೋದು ಫ್ಯಾಬ್​-3 ಮಾತ್ರ’

‘ವಿರಾಟ್​ ಕೊಹ್ಲಿ, ಜೋ ರೂಟ್​, ಸ್ಟೀವ್​ ಸ್ಮಿತ್​​ ಮತ್ತು ಕೇನ್​ ವಿಲಿಯಮ್​ಸನ್​ ಒಂದು ಕಾಲದಲ್ಲಿ ‘ಫ್ಯಾಬ್​-4’ ಆಗಿದ್ರು. ಡೇವಿಡ್​ ವಾರ್ನರ್​ ಹೆಸರೂ ಪೈಪೋಟಿಯಲ್ಲಿತ್ತು. ನಾವು 2014ರಿಂದ 2019ರವರೆಗಿನ ಅವಧಿಯ ಬಗ್ಗೆ ಮಾತನಾಡುತ್ತಿದ್ದೇವೆ. ಆದ್ರೆ, ಈಗ ‘ಫ್ಯಾಬ್​-4’ ಇಲ್ಲ. ಈಗಿರೋದು ಫ್ಯಾಬ್​-3 ಮಾತ್ರ’

ಆಕಾಶ್​ ಚೋಪ್ರಾ, ಮಾಜಿ ಕ್ರಿಕೆಟಿಗ

ವಿಂಡೀಸ್​​ ವಿರುದ್ಧ ಮಾಡಲೇಬೇಕು ಕಮ್​ಬ್ಯಾಕ್​​.!

ವೆಸ್ಟ್​ ಇಂಡೀಸ್​ ವಿರುದ್ಧ ಟೆಸ್ಟ್​ನಲ್ಲಿ ಕೊಹ್ಲಿ ಕಮ್​​ಬ್ಯಾಕ್​ ಮಾಡಲೇಬೇಕು. ಇಲ್ಲದಿದ್ರೆ, ಫ್ಯಾಬ್​4 ರೇಸ್​ನಿಂದ ಕೊಹ್ಲಿ ಹೊರಬೀಳೋದು ಕನ್​​ಫರ್ಮ್​. ಅಷ್ಟೇ ಅಲ್ಲ.. ಕೊಹ್ಲಿ ಸಾಮ್ರಾಜ್ಯಕ್ಕೆ ಪಾಕ್​ ಕ್ಯಾಪ್ಟನ್​ ಬಾಬರ್​ ಅಝಂ ಎಂಟ್ರಿ ಕೊಡೋ ಸಾಧ್ಯತೆಯೂ ದಟ್ಟವಾಗಿದೆ. ಕೊಹ್ಲಿ ರನ್​ಗಳಿಕೆಗೆ ಟೆಸ್ಟ್​ ಮಾದರಿಯಲ್ಲಿ ಪರದಾಡ್ತಿದ್ರೆ, ಬಾಬರ್​ ಅಝಂ ಕನ್ಸಿಸ್ಟೆಂಟ್​​ ಪರ್ಫಾಮೆನ್ಸ್​ ನೀಡ್ತಿದ್ದಾರೆ. ಕೆರಿಬಿಯನ್​ ನಾಡಲ್ಲಿ ಯಾಮಾರಿದ್ರೆ ಸಾಮ್ರಾಟ್​ ಕೊಹ್ಲಿಯ ಸಾಮ್ರಾಜ್ಯ ಬಾಬರ್​ ಪಾಲಾಗಲಿದೆ.

ಟೀಕೆಗಳಿಗೆ ಉತ್ತರ ಕೊಡ್ತಾರಾ ಕಿಂಗ್​ ಕೊಹ್ಲಿ..?

ವೈಟ್​ಬಾಲ್​ ಫಾರ್ಮೆಟ್​ ಕೊಹ್ಲಿಯ ಆಟವನ್ನ ಸದ್ಯ ಎಲ್ರೂ ಕೊಂಡಾಡ್ತಿದ್ದಾರೆ. ಇದ್ರ ಜೊತೆಗೆ ಟೆಸ್ಟ್​ ಕ್ರಿಕೆಟ್​ನ ಕಳಪೆ ಆಟ ಬಹಿರಂಗವಾಗಿ ಟೀಕೆ ಮಾಡ್ತಿದ್ದಾರೆ. ಈಗಾಗಲೇ ಟಿ20 ತಂಡದಲ್ಲಿ ಸ್ಥಾನವನ್ನ ಬಹುತೇಕ ಕಳೆದುಕೊಂಡಿರುವ ಕೊಹ್ಲಿ, ಟೆಸ್ಟ್​ ಫಾರ್ಮೆಟ್​ನಿಂದ ಔಟ್​ ಆಗ್ತಾರೆ ಎಂದು ಭವಿಷ್ಯ ನುಡಿತಿದ್ದಾರೆ. ಕಳೆಪೆ ಪ್ರದರ್ಶನ ಮುಂದಿವರೆದ್ರೆ, ಭವಿಷ್ಯ ನಿಜವಾಗೋದ್ರಲ್ಲಿ ಅನುಮಾನವೇ ಇಲ್ಲ. ಹೀಗಾಗಿ ಇಂಡೀಸ್​ ಸರಣಿಯಲ್ಲಿ ವಿರಾಟ್​ ಎಚ್ಚರಿಕೆಯ ಆಟ ಆಡಲೇಬೇಕು.

ವಿಶೇಷ ಸೂಚನೆ: ಕ್ರಿಕೆಟ್‌ನ ಸುದ್ದಿಗಳಿಗಾಗಿ ಪ್ರತಿದಿನ ಬೆಳಗ್ಗೆ 8.27ಕ್ಕೆ ನ್ಯೂಸ್‌ ಫಸ್ಟ್‌ ಚಾನೆಲ್​​ನಲ್ಲಿ ‘ರನ್ ಭೂಮಿ’ ವೀಕ್ಷಿಸಿ