ಸುವರ್ಣಸೌಧದಲ್ಲಿ ಚಳಿಗಾಲದ ಅಧಿವೇಶನ; 24.89 ಕೋಟಿ ಹಣ ಖರ್ಚು.. ಯಾವುದಕ್ಕೆ ಎಷ್ಟು ವೆಚ್ಚ?, ಇಲ್ಲಿದೆ ಮಾಹಿತಿ

ಬೆಳಗಾವಿ: ಪ್ರತಿ ವರ್ಷದಂತೆ ಈ ವರ್ಷವು ಡಿಸೆಂಬರ್ 9 ರಿಂದ 19ರವರೆಗೆ ಸುವರ್ಣಸೌಧದಲ್ಲಿ ಚಳಿಗಾಲದ ಅಧಿವೇಶನ ನಡೆಯಲಿದೆ. ಈ ಅಧಿವೇಶನ ನಡೆದ್ರೆ ಉತ್ತರ ಕರ್ನಾಟಕದ ಸಮಸ್ಯೆಗಳು ಪರಿಹಾರ ಆಗುತ್ತವೆ ಎಂದು ಹೇಳಲಾಗುತ್ತೆ. ಆದರೆ ಅಲ್ಲಿನ ಸಮಸ್ಯೆಗಳಿಗಿಂತ ಅಧಿವೇಶನದ ಹೆಸರಲ್ಲಿ ಸರ್ಕಾರದ ಕೋಟಿ ಕೋಟಿ ಹಣವನ್ನ ಖರ್ಚು ಮಾಡಲಾಗುತ್ತೆ ಎಂದು ಆರ್​ಟಿಐ ಕಾರ್ಯಕರ್ತರೊಬ್ಬರು ಹೇಳಿದ್ದಾರೆ.

2023ರ ಚಳಿಗಾಲದ ಅಧಿವೇಶನದಲ್ಲಿ 10 ಕೋಟಿ, 15 ಕೋಟಿ ಅಲ್ಲ ಬರೋಬ್ಬರಿ 24.89 ಕೋಟಿ ರೂಪಾಯಿ ಖರ್ಚು ಮಾಡಲಾಗಿತ್ತು. ಕೇವಲ 10 ದಿನಕ್ಕೆ ಈ ಮಟ್ಟದಲ್ಲಿ ಹಣ ವ್ಯಯ ಮಾಡಲಾಗಿದೆ. ವಿಧಾನಸಭೆಯ ಕಾರ್ಯಕಲಾಪಗಳು 66 ಗಂಟೆ 11 ನಿಮಿಷ ನಡೆದಿದೆ. ಇದರಂತೆ ವಿಧಾನ ಪರಿಷತ್ ಕಾರ್ಯಕಲಾಪ 57 ಗಂಟೆ, 29 ನಿಮಿಷ ನಡೆದಿದೆ. ಒಟ್ಟು 123 ಗಂಟೆಗಳ ಸರ್ಕಾರದ ಈ ಕೆಲಸಕ್ಕೆ 24.89 ಕೋಟಿ ಹಣವನ್ನು ಖರ್ಚು ಮಾಡಲಾಗಿದೆ. ಅಂದರೆ ಪ್ರತಿ ಒಂದು ಗಂಟೆಗೆ 20 ಲಕ್ಷದ 8 ಸಾವಿರ ರೂಪಾಯಿ ‌ಖರ್ಚು ಆದಂತೆ ಆಗಿದೆ.

[caption id="attachment_100096" align="alignnone" width="800"] ಭೀಮಪ್ಪ ಗಡಾದ್[/caption]

ಇನ್ನು ಈ ಹಣದಲ್ಲಿ ಇನ್ನು 15 ಕೋಟಿ ರೂಪಾಯಿಯನ್ನು ಯಾವುದಕ್ಕೆ ಖರ್ಚು ಮಾಡಲಾಗಿದೆ ಎಂದು ಲೆಕ್ಕವೇ ಇಲ್ಲವಂತೆ. ಈ ಸುವರ್ಣಸೌಧದಲ್ಲಿ ನಡೆಯುವ ಅಧಿವೇಶನದಲ್ಲಿ ಉತ್ತರ ಕರ್ನಾಟಕದ ಸಮಸ್ಯೆಗಳ ಕುರಿತು ಚರ್ಚೆ ಮಾಡಿದರೂ ಪರಿಹಾರ ಮಾತ್ರ ಕಾಣಲ್ಲ. ಅಲ್ಲಿನ ಯಾವುದೇ ಕೆಲಸಗಳು ಈ ಅಧಿವೇಶನದಿಂದ ಆಗಲ್ಲ. ಸದ್ಯ ಈ ಎಲ್ಲ ಖರ್ಚು ಸಂಬಂಧ ಮಾಹಿತಿ ಹಕ್ಕು ಹೋರಾಟಗಾರ ಭೀಮಪ್ಪ ಗಡಾದ್ ಅವರು ಮಾಹಿತಿ ಹಕ್ಕಿ‌ನಡಿ ರಾಜ್ಯ ಸರ್ಕಾರದಿಂದ ಪಡೆದಿರುವ ದಾಖಲೆಗಳನ್ನು ಬಿಡುಗಡೆ ಮಾಡಿದ್ದಾರೆ.

10 ದಿನದ ಅಧಿವೇಶನದಲ್ಲಿ ಯಾವುದಕ್ಕೆ ಎಷ್ಟು ಖರ್ಚು..?

• ಅಧಿವೇಶನಕ್ಕೆ ಆಗಮಿಸುವ ಗಣ್ಯರ ವಸತಿಗಾಗಿ ₹6.82 ಕೋಟಿ ಖರ್ಚು
• ಊಟ ಉಪಹಾರಕ್ಕಾಗಿ- ₹2.35 ಕೋಟಿ ಖರ್ಚು
• ಭದ್ರತೆಗೆ ಆಗಮಿಸಿದ ಪೊಲೀಸ್ ಇಲಾಖೆಗೆ ₹7.32 ಕೋಟಿ ವ್ಯಯ
• ಮೂಲ ಸೌಲಭ್ಯಕ್ಕಾಗಿ ಲೋಕೋಪಯೋಗಿ ಇಲಾಖೆಯಿಂದ ₹5.71 ಖರ್ಚು
• ಫ್ರೂಟ್ ಸಾಲಾಡ್​​ಗೆ 1,13,700 ರೂಪಾಯಿ ವೆಚ್ಚ
• ಸಲಗರ್ ಟೀ, ಹಟ್ಟಿ ಕಾಫಿಗೆ 3,40,058 ರೂಪಾಯಿ ವೆಚ್ಚ
• ಕಲಾಪ ವೀಕ್ಷಣೆಗೆ ಬರುವ ಮಕ್ಕಳಿಗೆ ಅರೇಬಿಯನ್ ಜ್ಯೂಸ್- 4,01,715 ರೂ. ಖರ್ಚು
• ಮಾಧ್ಯಮದವರ ಊಟ ಉಪಾಹಾರಕ್ಕಾಗಿ 27,86,000 ರೂ. ಖರ್ಚು
• ಮಧ್ಯಾಹ್ನದ ಊಟ ಉಪಹಾರ- 92,39,875 ರೂ. ಖರ್ಚು
• ಪೆಂಡೆಲ್, ಬ್ಯಾರಿಕೇಡ್ ಆಸನದ ಸಲುವಾಗಿ- 22,98,2054 ರೂ. ಖರ್ಚು
• ಸುವರ್ಣಸೌಧದ ಒಳಗೆ-ಹೊರಗೆ ಸುಣ್ಣ-ಬಣ್ಣ, ಕುಡಿಯುವ ನೀರು- 1,55,86,783 ರೂ.
• ಪೊಲೀಸ್ ಸಿಬ್ಬಂದಿ ವಸತಿಗಾಗಿ- 2,89,99,857 ರೂಪಾಯಿ ವ್ಯಯ
• ಪೋಲಿಸ್ ಸಿಬ್ಬಂದಿ ಊಟ ಉಪಾಹಾರ- 3,37,35,000 ರೂಪಾಯಿ ಖರ್ಚು
• ಸಿಸಿ ಟಿವಿ ಅಳವಡಿಸಲು 69,48,503 ರೂಪಾಯಿ ಖರ್ಚು
• ತಾತ್ಕಾಲಿಕ ಶೌಚಾಲಯಕ್ಕಾಗಿ 36,00,000 ರೂಪಾಯಿ
• ಸಚಿವರು, ಶಾಸಕರು ಅಧಿಕಾರಿಗಳ ವಾಹನಗಳ ಇಂಧನ- 40,30,813 ರೂಪಾಯಿ ಖರ್ಚು
• ಸಚಿವರು ಶಾಸಕರ ವಾಸ್ತವ್ಯದ ಖರ್ಚು- 6,82,08,057 ರೂಪಾಯಿ
• ಗಣ್ಯರು, ಮಾರ್ಷಲ್ ಅಧಿಕಾರಿಗಳ ಉಪಾಹಾರ, ಕಾಫಿ, ಟೀ ಫ್ರೂಟ್​ ಸಾಲಾಡ್- 2,35,94,238 ರೂಪಾಯಿ ಖರ್ಚು
• ಪರಿಷತ್ತಿನ ಸದಸ್ಯರ ಪ್ರಯಾಣ ಭತ್ಯೆಗಾಗಿ 38,10,640 ರೂಪಾಯಿ ವೆಚ್ಚ ‌
• ವಿಧಾನ ಸಭೆ ಅಧಿಕಾರಿಗಳ ಸಿಬ್ಬಂದಿ ಭತ್ಯೆಗಾಗಿ- 82,94,000 ರೂಪಾಯಿ ಖರ್ಚು
• ವಿಧಾನ ಸಭೆ ಸಿಬ್ಬಂದಿ, ಅಧಿಕಾರಿಗಳ ರಾತ್ರಿ ಊಟಕ್ಕೆ 15,86,500 ರೂ. ಖರ್ಚು

ಇದನ್ನು ಓದಿ: Shivanna; ತಿರುಪತಿ ತಿಮ್ಮಪ್ಪಗೆ ಮುಡಿಕೊಟ್ಟ ಶಿವರಾಜ್​ ಕುಮಾರ್ ದಂಪತಿ

ಈ ಮೇಲಿನ ಅಂಕಿ ಅಂಶಗಳೆಲ್ಲ ಕಳೆದ ವರ್ಷದ್ದು ಆಗಿವೆ. 2023ರ ಸದನದ ಸಮಯದಲ್ಲಿ 24.89 ಕೋಟಿ ರೂಪಾಯಿ ಖರ್ಚು ಆಗಿದೆ ಎಂದರೆ ಈ ಸಲ ಅಂದರೆ 2024ರ ಅಧಿವೇಶನದಲ್ಲಿ ಇದಕ್ಕಿಂತ ಹೆಚ್ಚು ಖರ್ಚು ಆಗುವ ಸಾಧ್ಯತೆ ಇರಬಹುದು. ಏಕೆಂದರೆ ಕಳೆದ ವರ್ಷಕ್ಕಿಂತ ಈ ಬಾರಿ ವಸ್ತುಗಳ ಬೆಲೆ ಸೇರಿ ಎಲ್ಲವು ಬದಲಾವಣೆ ಆಗಿರುತ್ತವೆ. ಅಧಿವೇಶನದಲ್ಲಿ ಉತ್ತರ ಕರ್ನಾಟಕದ ಸಮಸ್ಯೆಗಳು ಪರಿಹಾರ ಕಾಣುವುದು ಶೂನ್ಯ. ಆದರೆ ಅಧಿವೇಶನ ಹೆಸರಲ್ಲಿ ಸಾರ್ವಜನಿಕ ತೆರಿಗೆಯ ಹಣ ಮಾತ್ರ ನೀರಿನಂತೆ ಪೋಲಾಗುತ್ತದೆ ಎಂಬುದು ಮಾತ್ರ ದಿಟ.

ವಿಶೇಷ ಸೂಚನೆ: ಎಲ್ಲಾ DTH & Cableನಲ್ಲಿ ನ್ಯೂಸ್​ಫಸ್ಟ್​ ಚಾನೆಲ್​​​ ಲಭ್ಯ