ಇವು ಪ್ರಪಂಚದ ಅತ್ಯಂತ ಸುಂದರ 5 ನಗರಗಳು.. ಆದರೆ ಇಲ್ಲಿ ಕಾರುಗಳಿಗೆ ಪ್ರವೇಶವಿಲ್ಲ! ಕಾರಣವೇನು?

ಇವು ಪ್ರಪಂಚದ ಅತ್ಯಂತ ಸುಂದರವಾದ ನಗರಗಳು. ಈ ನಗರಗಳ ಸೌಂದರ್ಯ ಸವಿಯಲು ಎರಡು ಕಣ್ಣುಗಳು ಕಡಿಮೆ ಎನಿಸಿಬಿಡುತ್ತದೆ. ದೇಶ ವಿದೇಶಿ ಪ್ರವಾಸಿಗರನ್ನು ತನ್ನ ಕಬಂಧ ಬಾಹುಗಳನ್ನು ಚಾಚಿ ಕರೆಯುವ, ಪ್ರಕೃತಿ ಸೌಂದರ್ಯವೆನ್ನವುದು ಇಲ್ಲಿಯೇ ಬೀಡು ಬಿಟ್ಟುಕೊಂಡು ನಿಂತಿದೆಯಾ ಎನ್ನುವ ಮಟ್ಟಿನ ಸುಂದರತೆಯನ್ನು ತನ್ನ ನೆಲಕ್ಕಂಟಿಸಿಕೊಂಡಿರುವ ನಗರಳು ಇವು. ಆದರೆ ಈ ನಗರಗಳಲ್ಲಿ ಕಾರುಗಳಿಗೆ ಬಿಲ್ಕುಲ್ ಪ್ರವೇಶವಿಲ್ಲ. ಕಾರುಗಳನ್ನು ತೆಗೆದುಕೊಂಡು ಹೋದರೆ ಊರಾಚೆಯೇ ನಿಮ್ಮನ್ನು ನಿಲ್ಲಿಸುತ್ತಾರೆ. ಅಂತಹ ನಗರಗಳು ಯಾವುವು ಎಂಬುದನ್ನು ನೋಡುವುದಾದ್ರೆ.

1. ಇಟಲಿಯ ವೆನ್ಸಿ: ಇದನ್ನು ತೇಲುವ ನಗರಿ ಎಂದೇ ಜಗತ್ತು ಬಣ್ಣಿಸುತ್ತದೆ. ಇಟಲಿಯ ವೆನ್ಸಿಯಲ್ಲಿ ನೀವು ಹುಡುಕಿದರೂ ಕೂಡ ಒಂದೇ ಒಂದು ರೋಡು ಸಿಗೋದಿಲ್ಲ. ಇಲ್ಲಿ ಇರುವುದು ಕೇವಲ ಕೆನಾಲ್​ಗಳು ಅಂದ್ರೆ ಕಾಲುವೆಗಳು. ಗೊಂಡಾಲಾ ಇಲ್ಲವೇ ಹಡಗುಗಳ ಮೂಲಕವೇ ನೀವು ಸಾಗಬೇಕು ಮತ್ತು ಅವುಗಳ ಮೂಲಕವೇ ನೀವು ಈ ತೇಲುವ ನಗರಿ ವೆನ್ಸಿಯ ಸೌಂದರ್ಯವನ್ನು ಸವಿಯಬೇಕು.

2.ನೆದರ್​ಲ್ಯಾಂಡ್​​ನ ಗಿಥೋರ್ನ್: ನೆದರ್​ಲ್ಯಾಂಡ್​​ನ ಈ ಗಿಥೋರ್ನ್​ ನಗರವನ್ನು ಡಚ್​ ವೆನ್ಸಿ ಎಂದು ಕರೆಯಲಾಗುತ್ತದೆ. ಅಂದ್ರೆ ಇಟಲಿಯ ವೆನ್ಸಿಗೆ ಈ ನಗರವನ್ನು ಹೋಲಿಸಲಾಗುತ್ತದೆ. ಕಾರಣ ಇದು ಕೂಡ ಒಂದು ರೀತಿಯ ತೇಲುವ ನಗರಿ. ಈ ನಳನಳಿಸುವ ಪ್ರಕೃತಿ ಸೌಂದರ್ಯ ಹೊಂದಿರುವ ನಗರದಲ್ಲೂ ಕೂಡ ಒಂದೇ ಒಂದು ರಸ್ತೆಯಿಲ್ಲ. ಕೇವಲ ಕಾಲುವೆ ಹಾಗೂ ಪಾದಚಾರಿ ಸೇತುವೆಗಳು ಮಾತ್ರ ಕಾಣ ಸಿಗುತ್ತವೆ. ಹೀಗಾಗಿ ಇಲ್ಲಿಯೂ ಕೂಡ ನೀವು ನಾವೆಗಳ ಮೂಲಕವೇ ಈ ನಗರದ ಪ್ರಕೃತಿ ಸೌಂದರ್ಯ ಸವಿಯಬೇಕು.

3.ಯುಎಸ್​ನ ಮ್ಯಾಕಿನಾಕ್ ದ್ವೀಪ: ಇದು ಯುಎಸ್​ನ ಮಿಚಿಗನ್​ನಲ್ಲಿ ಇರುವಂತ ದ್ವೀಪ. ಇಲ್ಲಿ ಯಾವುದೇ ರೀತಿಯ ವಾಹನಗಳ ಓಡಾಟಕ್ಕೆ ಅವಕಾಶವಿಲ್ಲ. ಎಲ್ಲಾ ಮೋಟಾರ್ ವೆಹಿಕಲ್​ಗಳಿಗೆ ನಿಷೇಧವಿದೆ. ಕೇವಲ ಸೈಕಲ್, ಕುದುರೆಯ ಟಾಂಗಾ ಇಲ್ಲವೇ ಕಾಲ್ನಡಿಗೆಯಲ್ಲಿಯೇ ನೀವು ನಡೆದುಕೊಂಡು ಹೋಗಬೇಕು. ಕಾರು, ಬೈಕ್​ ಈ ರೀತಿಯ ಯಾವುದೇ ವಾಹನಗಳಿಗೂ ಪ್ರವೇಶವಿಲ್ಲ.

4. ಗ್ರೀಸ್​ನ ಹೈಡ್ರಾ ದ್ವೀಪ: ಈ ದ್ವೀಪವೂ ಕೂಡ ತನ್ನ ಸುತ್ತಲು ಸೌಂದರ್ಯ ರಾಶಿಯನ್ನು ಹೊತ್ತುಕೊಂಡು ಕುಳಿತಿದೆ. ಇಲ್ಲಿಯೂ ಕೂಡ ಯಾವುದೇ ಮೋಟಾರ್​ ವಾಹನಗಳಿಗೆ ಪ್ರವೇಶವಿಲ್ಲ. ಇಲ್ಲಿಗೆ ಬರುವ ಪ್ರವಾಸಿಗರು ಒಂದು ಕತ್ತೆ ಮೇಲೆ ಕುಳಿತು ಪ್ರಯಾಣ ಮಾಡಬೇಕು, ಹಡಗುಗಳ ಮೇಲೆ ಪ್ರಯಾಣಿಸಬೇಕು. ಇಲ್ಲವೇ ಕಾಲ್ನಡಿಗೆಯೇ ಗತಿ.

5. ಕೀನ್ಯಾದ ಲಮು: ಕಿನ್ಯಾದ ಲಮು ಯುನೆಸ್ಕೋದ ವಿಶ್ವ ಪಾರಂಪರಿಕ ತಾಣ ಎಂದು ಗುರುತಿಸಿಕೊಂಡಿದೆ. ಈ ಇಡೀ ನಗರದಲ್ಲಿ ಹುಡುಕಿದರೇ ಒಂದೇ ಒಂದು ಕಾರು ಅಥವಾ ಒಂದೇ ಒಂದು ಬೈಕ್​ ಕೂಡ ನಿಮ್ಮ ಕಣ್ಣಿಗೆ ಕಾಣುವುದಿಲ್ಲ. ಸ್ಥಳೀಯರ ಕತ್ತೆ ಮತ್ತು ನಾವೆಗಳನ್ನು ತಮ್ಮ ಪ್ರಾಥಮಿಕ ಸಾರಿಗೆಯ ವ್ಯವಸ್ಥೆಯನ್ನಾಗಿ ಮಾಡಿಕೊಂಡಿದ್ದಾರೆ. ಪ್ರವಾಸಿಗರಿಗೂ ಕೂಡ ಅದೇ ವ್ಯವಸ್ಥೆ ಇರುತ್ತದೆ.

ಇದನ್ನೂ ಓದಿ:ಕಳೆದ 48 ವರ್ಷಗಳಿಂದ ಬಾಹ್ಯಾಕಾಶದಲ್ಲಿ ಕೇಳಿ ಬರುತ್ತಿದೆ ಭಾರತದ ಈ ಹಾಡು.. ಬೆರಗಾಗಿದ್ದೇಕೆ ಪ್ರಪಂಚ?

ಹೀಗೆ ಈ ಸುಂದರ ನಗರಿಗಳಲ್ಲಿ ಮೋಟಾರು ವಾಹನಗಳನ್ನು ನಿಷೇಧಿಸಲು ಹಲವು ಕಾರಣಗಳಿವೆ. ತಮ್ಮ ಪ್ರದೇಶವನ್ನು ಪರಿಸರ ಸ್ನೇಹಿಯನ್ನಾಗಿಸುವ, ತಾಜಾ ಗಾಳಿ ಸಿಗುವಂತೆ ಮಾಡುವ ಹಾಗೂ ಬರುವ ಪ್ರವಾಸಿಗರಿಗೆ ಸ್ವಚ್ಛ ಹಾಗೂ ಸುಂದರ ಪರಿಸರವನ್ನು ಒದಗಿಸುವ ಉದ್ದೇಶದಿಂದ ಈ ತಾಣಗಳಲ್ಲಿ ಕಾರು, ಬೈಕ್, ಟ್ರಕ್ ಇಂತಹ ಯಾವುದೇ ಮೋಟಾರು ವಾಹನಗಳಿಗೆ ಪ್ರವೇಶವಿಲ್ಲ

ವಿಶೇಷ ಸೂಚನೆ: ಎಲ್ಲಾ DTH & Cableನಲ್ಲಿ ನ್ಯೂಸ್​ಫಸ್ಟ್​ ಚಾನೆಲ್​​​ ಲಭ್ಯ