1 ರಾತ್ರಿ ಕಳೆಯಲು ₹1 ಲಕ್ಷ.. ಮಹಾ ಕುಂಭಮೇಳದಲ್ಲಿ ಯಾವುದಕ್ಕೆ ಎಷ್ಟು ದುಡ್ಡು ಗೊತ್ತಾ?

ಮಹಾಕುಂಭಮೇಳ 2025 ಅದ್ಧೂರಿ ಆರಂಭ ಪಡೆದಿದೆ. ಮಕರ ಸಂಕ್ರಾಂತಿಯ ಮೊದಲ ದಿನವೇ ಸುಮಾರು 1.75 ಕೋಟಿ ಜನರು ಅಮೃತ ಸ್ನಾನ ಮಾಡಿ ಪಾವನರಾಗಿದ್ದಾರೆ. ತ್ರಿವೇಣಿ ಸಂಗಮದಲ್ಲಿ ಭಕ್ತಾದಿಗಳ ಸಾಗರವೇ ಹರಿದು ಬಂದಿದೆ. ಈ ಬಾರಿ ಒಟ್ಟು 45 ಕೋಟಿ ಭಕ್ತಾದಿಗಳು ಪ್ರಯಾಗರಾಜ್​ಗೆ ಭೇಟಿ ಕೊಡುವ ಎಲ್ಲಾ ಸಾಧ್ಯತೆಗಳು ಇವೆ. ಗಂಗೆಯಲ್ಲಿ ಮಿಂದೆಳಲು ಅರ್ಧ ಭಾರತವೇ ಪ್ರಯಾಗರಾಜ್​ಗೆ ಬರುವ ಸಾಧ್ಯತೆ ಇದೆ. ಇದಕ್ಕಾಗಿ ಉತ್ತರಪ್ರದೇಶದ ಸರ್ಕಾರ ಹಾಗೂ ಕೇಂದ್ರ ಸರ್ಕಾರ ಬೇಕಾದ ಎಲ್ಲಾ ವ್ಯವಸ್ಥೆಗಳನ್ನು ಮಾಡಿವೆ. ಇನ್ನೂ ಆರು ವಾರಗಳ ಕಾಲ ಈ ಮಹಾಸಂಭ್ರಮ ಜಾರಿಯಲ್ಲಿರಲಿದೆ. ಇದರ ನಡುವೆ ಮಹಾಕುಂಭಮೇಳಕ್ಕೆ ಹೋಗಿ ಬರಲು ಎಲ್ಲಾ ದುಬಾರಿ ಎಂಬ ಮಾತುಗಳು ಕೇಳಿ ಬರುತ್ತಿವೆ.

ಅದರಲ್ಲೂ ಜನರು ತಂಗಲು ಬೇಕಾದ ವ್ಯವಸ್ಥೆಗಳೇ ಅತಿ ದುಬಾರಿ ಎಂದು ಹೇಳಲಾಗುತ್ತಿದೆ. ಒಂದು ರಾತ್ರಿ ಉಳಿಯಲು ನಾವು ಟೆಂಟ್ ಪಡೆಯಬೇಕಾದಲ್ಲಿ 1500 ರೂಪಾಯಿಯಿಂದ ಶುರುವಾಗಲಿದೆ. ಐಆರ್​ಸಿಟಿಸಿ ಟೆಂಟ್​ಗಳು 20 ಸಾವಿರ ರೂಪಾಯಿಯಿಂದ ಆರಂಭವಾಗುತ್ತವೆ. ಇನ್ನು ಅಲ್ಟ್ರಾ ಲಕ್ಷುರಿ ಟೆಂಟ್​ಗಳ ಬೆಲೆಯನ್ನಂತೂ ಕೇಳುವ ಹಾಗೆಯೇ ಇಲ್ಲ. ಒಂದು ರಾತ್ರಿ ಕಳೆಯಲು ಇಲ್ಲಿ ಬರೋಬ್ಬರಿ 1 ಲಕ್ಷ ರೂಪಾಯಿ ನೀಡಬೇಕಾಗುತ್ತದೆ.

ಇದನ್ನೂ ಓದಿ:ತ್ರಿವೇಣಿ ಸಂಗಮದಲ್ಲಿ ಮಹಾಕುಂಭ ವೈಭವ; ಮೌನಿ ಅಮಾವಾಸ್ಯೆ ಶಾಹಿಸ್ನಾನಕ್ಕೆ 10 ಕೋಟಿ ಭಕ್ತರ ನಿರೀಕ್ಷೆ..

ಈಗಾಗಲೇ ಅಲ್ಟಿಮೇಟ್ ಟ್ರಾವೆಲಿಂಗ್ ಕ್ಯಾಂಪ್ ಸುಮಾರು 40 ಟೆಂಟ್​ಗಳನ್ನು ಪ್ರಯಾಗರಾಜ್​ದ ಸಂಗಮ ನಿವಾಸದ ಬಳಿಯಲ್ಲಿ ನಿರ್ಮಾಣ ಮಾಡಿವೆ. ಮಹಾಕುಂಭಮೇಳದಲ್ಲಿ ಇದು ಮೂರನೇ ಬಾರಿಗೆ ಇಂತಹದೊಂದು ವ್ಯವಸ್ಥೆಯನ್ನು ಈ ಸಂಸ್ಥೆ ಮಾಡಿದೆ. ಇಲ್ಲಿ ಹೆಚ್ಚು ಕಡಿಮೆ ತಂಗುವವರು ಎನ್​ಆರ್​ಐ ಗಳು, ಬಾಲಿವುಡ್​ ಸ್ಟಾರ್​ಗಳು, ಹೆಚ್​ಎನ್​ಐ, ದೊಡ್ಡ ದೊಡ್ಡ ಕಂಪನಿಯ ಸಿಇಒಗಳು ಇಂತವರು ಈ ರೀತಿಯ ಟೆಂಟ್​ಗಳಲ್ಲಿ ವಾಸ ಮಾಡುತ್ತಾರೆ. ಈ ಟೆಂಟ್​ಗಳ ಆರಂಭಿಕ ಬೆಲೆಯೇ ಒಂದು ರಾತ್ರಿಗೆ 70 ಸಾವಿರ ರೂಪಾಯಿಯಿಂದ 1 ಲಕ್ಷದವರೆಗೂ ಇದೆ. ಈ ಐಷಾರಾಮಿ ಟೆಂಟ್​ಗಳು ಒಟ್ಟು 3 ಎಕರೆ ವಿಸ್ತಾರ ಪ್ರದೇಶದಲ್ಲಿ ನಿರ್ಮಿಸಲಾಗಿದೆ. ಒಂದೊಂದು ಟೆಂಟ್​ 400 ರಿಂದ 500 ಸ್ಕೇರ್​ಫೀಟ್​ನಷ್ಟು ಜಾಗದಲ್ಲಿ ನಿರ್ಮಾಣಗೊಂಡಿವೆ.

ಇದು ಐಷಾರಾಮಿ ಹಾಗೂ ಸಾಧಾರಣ ಟೆಂಟ್​ಗಳ ಕಥೆಯಾದರೆ ಕ್ಯಾಬ್ ಆಟೋಗಳು ಕೂಡ ಭಕ್ತಾದಿಗಳಿಂದ ಬೇಕಾಬಿಟ್ಟು ಹಣವನ್ನು ವಸೂಲಿ ಮಾಡುತ್ತಿವೆ. ಏರ್​ಪೋರ್ಟ್​ನಿಂದ ಗಂಗಾ ತೀರಕ್ಕೆ ಸುಮಾರು 3 ಪಟ್ಟು ಹಣ ವಸೂಲಿ ಮಾಡಲಾಗುತ್ತಿದೆ. ಓಲಾಕ್ಯಾಬ್ ಆ್ಯಪ್​ನಲ್ಲಿ 500 ರೂಪಾಯಿ ಬೆಲೆ ನಿಗದಿ ಮಾಡಲಾಗಿದೆ. ಆದ್ರೆ ಕ್ಯಾಬ್ ಚಾಲಕರು 1500 ರೂಪಾಯಿಗೆ ಬೇಡಿಕೆ ಇಡುತ್ತಿದ್ದಾರೆ. ಇನ್ನು ಸಾಮಾನ್ಯ ದಿನಗಳಲ್ಲಿ ಲಾಡ್ಜ್​, ಹೋಟೆಲ್​ಗಳ ದರ 1 ಸಾವಿರ ರೂಪಾಯಿ ಇರುತ್ತದೆ. ಆದ್ರೆ ಕುಂಭಮೇಳದ ಹಿನ್ನೆಲೆಯಲ್ಲಿ ಹೊರಗಿನಿಂದ ಬಂದ ಭಕ್ತಾದಿಗಳು ಹಾಗೂ ಪ್ರವಾಸಿಗರಿಂದ ದಿನಕ್ಕೆ 3 ರಿಂದ 4 ಸಾವಿರ ರೂಪಾಯಿ ವಸೂಲಿ ಮಾಡಲಾಗುತ್ತಿದೆ.

ಇದನ್ನೂ ಓದಿ:ರಷ್ಯಾದಿಂದ ಮಹಾಕುಂಭಮೇಳಕ್ಕೆ ಬಂದ 7 ಅಡಿ ಎತ್ತರದ ಮಸ್ಕ್ಯುಲರ್ ಬಾಬಾ; ಇವರ ಲೈಫ್ ಜರ್ನಿಯೇ ರೋಚಕ!

ಇತ್ತ ವಿಮಾನಯಾನ ಕಂಪನಿಗಳು ಕೂಡ ಭಕ್ತಾದಿಗಳಿಂದ ಹಣ ವಸೂಲಿ ಮಾಡುವ ವಿಚಾರದಲ್ಲಿ ಹಿಂದೆ ಬಿದ್ದಿಲ್ಲ. ಸಾಮಾನ್ಯ ದಿನಗಳಿಗಿಂತ ಈಗ ಶೇಕಡಾ162 ರಷ್ಟು ಬೆಲೆಗಳನ್ನು ಏರಿಸಿಕೊಂಡು ಕುಳಿತಿವೆ. ಮುಂಬೈನಿಂದ ಪ್ರಯಾಗರಾಜ್​ಗೆ ಹೊರಡುವ ವಿಮಾನಗಳ ಟಿಕೆಟ್​ದರದಲ್ಲಿ ಸುಮಾರು 13ಪರ್ಸೆಂಟ್ ಏರಿಕೆಯಾಗಿದೆ. ದೆಹಲಿಯಿಂದ ಪ್ರಯಾಗರಾಜ್​ಗೆ ಹೊರಡುವ ವಿಮಾನಗಳ ಟಿಕೆಟ್​ ಬೆಲೆ ಶೇಕಡಾ 21 ರಷ್ಟು ಏರಿಕೆಯಾಗಿದೆ 5 ರಿಂದ 6 ಸಾವಿರ ರೂಪಾಯಿಗೆ ದೆಹಲಿಯಿಂದ ಪ್ರಯಾಗರಾಜ್ ತಲುಪುತ್ತಿದ್ದ ವಿಮಾನಗಳು ಈಗ ಬೆಲೆ ಏರಿಕೆ ಮಾಡಿಕೊಂಡಿವೆ. ದೆಹಲಿಯಿಂದ ಪ್ರಯಾಗರಾಜ್​​ಗೆ ಹೋಗಲು ಇಂಡಿಗೋ 17497 ರೂಪಾಯಿ ಬೆಲೆ ನಿಗದಿದೆ ಮಾಡಿದೆ. ಏರ್​​ ಇಂಡಿಯಾ 23727 ರೂಪಾಯಿ ಮತ್ತು ಸ್ಪೈಸ್ ಜೆಟ್​ 26215 ರೂಪಾಯಿ ಬೆಲೆ ನಿಗದಿ ಮಾಡಿದೆ.

ವಿಶೇಷ ಸೂಚನೆ: ಎಲ್ಲಾ DTH & Cableನಲ್ಲಿ ನ್ಯೂಸ್​ಫಸ್ಟ್​ ಚಾನೆಲ್​​​ ಲಭ್ಯ