246 ರನ್​ಗಳ ಬಿಗ್​ ಟಾರ್ಗೆಟ್ ಚೇಸ್​ ಮಾಡಿದ SRH.. IPL ಇತಿಹಾಸದಲ್ಲೇ ಹೊಸ ದಾಖಲೆ

ತವರಿನ ಅಂಗಳದಲ್ಲಿ ನಡೆದ ಐಪಿಎಲ್​ ಪಂದ್ಯದಲ್ಲಿ ಸನ್​ರೈಸರ್ಸ್​ ಹೈದ್ರಾಬಾದ್ ಟೀಮ್ ಅತ್ಯಂತ ದೊಡ್ಡ ಗೆಲುವು ಸಾಧಿಸಿದೆ. ಬರೋಬ್ಬರಿ 246 ರನ್​ಗಳನ್ನು ಟಾರ್ಗೆಟ್​ ಮಾಡಿ ಜಯಭೇರಿ ಬಾರಿಸಿದೆ.

ರಾಜೀವ್ ಗಾಂಧಿ ಅಂತರಾಷ್ಟ್ರೀಯ ಸ್ಟೇಡಿಯಂನಲ್ಲಿ ನಡೆದ ಪಂದ್ಯದಲ್ಲಿ ಪಂಜಾಬ್ ಕಿಂಗ್ಸ್​ ತಂಡದ ಕ್ಯಾಪ್ಟನ್​ ಶ್ರೇಯಸ್ ಅಯ್ಯರ್ ಟಾಸ್ ಗೆದ್ದು ಮೊದಲ ಬ್ಯಾಟಿಂಗ್ ತೆಗೆದುಕೊಂಡರು. ಪಂಜಾಬ್​ ಪರ ಓಪನರ್ಸ್​ ಆದ ಪ್ರಿಯಾಂಶ್​ ಆರ್ಯ ಕೇವಲ 13 ಎಸೆತದಲ್ಲಿ 4 ಸಿಕ್ಸರ್​ ಇಂದ 36 ರನ್​ ಹೊಡೆದು ಔಟ್​ ಆದ್ರೆ, ಪ್ರಭಸಿಮ್ರನ್ ಸಿಂಗ್ ಕೇವಲ 23 ಬಾಲ್​ಗಳಲ್ಲಿ 7 ಬೌಂಡರಿಗಳಿಂದ 42 ರನ್​ಗೆ ಕ್ಯಾಚ್ ನೀಡಿ ಔಟ್ ಆದರು.

ಬ್ಯಾಟಿಂಗ್​ನಲ್ಲಿ ಘರ್ಜನೆ ಮಾಡಿದ ಶ್ರೇಯಸ್ ಕೇವಲ 23 ಎಸೆತಗಳಲ್ಲಿ 2 ಫೋರ್, 5 ಅಮೋಘ ಸಿಕ್ಸರ್​ಗಳಿಂದ ಅರ್ಧಶತಕ ಪೂರೈಸಿದರು. ನೆಹಾಲ್ ವಧೇರಾ 27 ರನ್​ಗೆ ಔಟ್ ಆದರು. ಕೊನೆಯಲ್ಲಿ ಘರ್ಜಿಸಿದ ಮಾರ್ಕಸ್ ಸ್ಟೊನಿಸ್ ಕೇವಲ 11 ಬಾಲ್​ಗಳಲ್ಲಿ 34 ರನ್​ ಚಚ್ಚಿದರು. ಕೊನೆ ಓವರ್​ನಲ್ಲಿ ಮೊಹಮ್ಮದ್ ಶಮಿಗೆ ಮಾರ್ಕಸ್ ಸ್ಟೊನಿಸ್ ಸತತ 4 ಸಿಕ್ಸರ್​ಗಳನ್ನು ಬಾರಿಸಿದರು. ಇದರಿಂದ ಪಂಜಾಬ್​ ಕಿಂಗ್ಸ್​ 246 ರನ್​ಗಳ ದೊಡ್ಡ ಮೊತ್ತದ ಟಾರ್ಗೆಟ್​ ಅನ್ನು ಸೆಟ್​ ಮಾಡಿತ್ತು.

ಇದನ್ನೂ ಓದಿ:6, 6, 6, 6, 6, 6; ಅಭಿಷೇಕ್​ ಶರ್ಮಾ ಸಿಡಿಲಬ್ಬರ.. ಸೆಂಚುರಿ ಸಿಡಿಸಿ ಪಂಜಾಬ್​ಗೆ ಚಳಿ ಬಿಡಿಸಿದ ಯಂಗ್ ಬ್ಯಾಟರ್

ಈ ಗುರಿ ಬೆನ್ನು ಹತ್ತಿದ್ದ ಹೈದ್ರಾಬಾದ್​ ಆರಂಭದಲ್ಲೇ ಬಿಗ್ ಓಪನಿಂಗ್ ಪಡೆದುಕೊಂಡಿತು. ಅಭಿಷೇಕ್ ಶರ್ಮಾ ಹಾಗೂ ಟ್ರಾವಿಸ್​ ಹೆಡ್​ ಅವರ ಜೊತೆಯಾಟ 171 ರನ್​ ವರೆಗೆ ಇತ್ತು. ಈ ವೇಳೆ ಹೆಡ್ 66 ರನ್​ಗೆ ಮ್ಯಾಕ್ಸ್​ವೆಲ್​ಗೆ ಕ್ಯಾಚ್​ ಕೊಟ್ಟರು. ಆದರೆ ಸಿಡಿಲಬ್ಬರದ ಬ್ಯಾಟಿಂಗ್ ಮುಂದುವರೆಸಿದ್ದ ಅಭಿಷೇಕ್ ಶರ್ಮಾ 11 ಬೌಂಡರಿ ಹಾಗೂ 6 ಭರ್ಜರಿ ಸಿಕ್ಸರ್​ಗಳಿಂದ ಶತಕ ಸಿಡಿಸಿದರು. ಒಟ್ಟು 55 ಎಸೆತ ಎದುರಿಸಿ 14 ಬೌಂಡರಿ, 10 ಆಕಾಶದೆತ್ತರದ ಸಿಕ್ಸರ್​ಗಳಿಂದ 141 ರನ್​ಗಳಿಸಿ ಆಡುವಾಗ ಅರ್ಷದೀಪ್ ಸಿಂಗ್ ಬೌಲಿಂಗ್​ನಲ್ಲಿ ಔಟ್ ಆದರು.

ಹೆನ್ರಿಚ್ ಕ್ಲಾಸಿನ್ 21 ಹಾಗೂ ಇಶನ್ ಕಿಶನ್ 9 ರನ್​ಗಳಿಂದ ಹೈದ್ರಾಬಾದ್​ ತಂಡವನ್ನು ಗೆಲುವಿನ ದಡ ಸೇರಿಸಿದರು. ಇದು ಐಪಿಎಲ್​ ಇತಿಹಾಸದಲ್ಲಿ 2ನೇ  ಅತ್ಯಂತ ದೊಡ್ಡ ಚೇಸಿಂಗ್ ಆಗಿದೆ. ಈವರೆಗೂ 246 ರನ್​ಗಳ ಟಾರ್ಗೆಟ್ ಮಾಡಿದ ಟೀಮ್ ಎಸ್​ಆರ್​ಹೆಚ್​ ಆಗಿದೆ. ಇದಕ್ಕೂ ಮೊದಲು ಅಂದರೆ 2024ರ ಐಪಿಎಲ್​ನಲ್ಲಿ ಕೆಕೆಆರ್​ ವಿರುದ್ಧ ಪಂಜಾಬ್​ ತಂಡ 262 ರನ್​ಗಳನ್ನು ಚೇಸ್​ ಮಾಡಿ ಗೆಲುವು ಸಾಧಿಸಿತ್ತು. ಅದರಂತೆ ಇದು ಐಪಿಎಲ್​ನಲ್ಲಿ 2ನೇ ದೊಡ್ಡ ಗೆಲುವು ಆಗಿದೆ.

ವಿಶೇಷ ಸೂಚನೆ: ಕ್ರಿಕೆಟ್‌ನ ಸುದ್ದಿಗಳಿಗಾಗಿ ಪ್ರತಿದಿನ ಬೆಳಗ್ಗೆ 8.27ಕ್ಕೆ ನ್ಯೂಸ್‌ಫಸ್ಟ್‌ಚಾನೆಲ್​​ನಲ್ಲಿ ‘ರನ್ ಭೂಮಿ’ ವೀಕ್ಷಿಸಿ