ಸ್ಟಾರ್​ ನಟನ ಮನೆಯಲ್ಲಿ ಜೋರು ಗಲಾಟೆ; ಗೇಟ್ ಮುರಿದ ಮನೋಜ್​​; ಹಲ್ಲೆ ಮಾಡಿದ ಮೋಹನ್​ ಬಾಬು

ಹೈದರಾಬಾದ್​: ತೆಲುಗು ಚಿತ್ರರಂಗದ ಖ್ಯಾತ ನಟ ಮೋಹನ್ ಬಾಬು ಹಾಗೂ ಪುತ್ರ ಮನೋಜ್ ನಡುವಿನ ಗಲಾಟೆ ತಾರಕ್ಕಕೇರಿದೆ. ಹೈದರಾಬಾದ್​​ನ ಎಸ್ಟೇಟ್​​ನಲ್ಲಿರೋ ನಟ ಮೋಹನ್‌ ಬಾಬು ಫಾರ್ಮ್‌ಹೌಸ್ ಬಳಿ ದೊಡ್ಡ ಹೈಡ್ರಾಮಾ ನಡೆದಿದ್ದು, ತಂದೆ ಮಗ ಇಬ್ಬರೂ ಪೊಲೀಸ್ ಠಾಣೆ ಮೆಟ್ಟಿಲೇರಿದ್ದಾರೆ.

ಮೀಡಿಯಾ ಮೇಲೆ ಮೋಹನ್​ ಬಾಬು ಹಲ್ಲೆ

ನಟ ಮನೋಜ್​​, ಮೋಹನ್​ ಬಾಬು ಪೊಲೀಸ್​ ಮೆಟ್ಟಿಲೇರಿದ್ದು, ಇದೊಂದು ಹೈಪ್ರೊಫೈಲ್​ ಕೇಸ್​ ಆಗಿದೆ. ಇದನ್ನು ಕವರ್​ ಮಾಡಲು ಮೀಡಿಯಾದವ್ರು ನಟ ಮನೋಜ್ ಜತೆಗೆ ಮೋಹನ್ ಬಾಬು ಮನೆ ಬಳಿ ಹೋದರು. ಈ ವೇಳೆ ತಮ್ಮ ಅಭಿಪ್ರಾಯ ತಿಳಿಸುವಂತೆ ಮೋಹನ್ ಬಾಬು ಕಡೆ ಮೀಡಿಯಾದವ್ರು ಮೈಕ್​ ಹಿಡಿದರು. ಕೂಡಲೇ ಮೈಕ್ ಕಿತ್ತುಕೊಂಡು ಮೋಹನ್​ ಬಾಬು ಪತ್ರಕರ್ತರ ಮೇಲೆ ಹಲ್ಲೆ ನಡೆಸಿದ್ದಾರೆ.

ಗೇಟ್​ ಮುರಿದ ಮನೋಜ್​​

ಇನ್ನು, ಮನೋಜ್ ಮನೆ ಒಳಗೆ ಪ್ರವೇಶಿಸಬಾರದು ಎಂದು ಮೋಹನ್​ ಬಾಬು ಬೌನ್ಸರ್​ಗಳು ಕಾರ್​ ತಡೆದರು. ಇದರಿಂದ ಗರಂ ಆದ ಮನೋಜ್​ ಗೇಟ್ ಮುರಿದು ಮನೆ ಒಳಗೆ ಪ್ರವೇಶಿಸಿದ್ದಾರೆ. ಅಡ್ಡ ಬಂದ ಸಿಬ್ಬಂದಿ ಮೇಲೆ ಕೆಂಡಕಾರಿದ್ದಾರೆ.

ಮಾಧ್ಯಮದವರನ್ನು ಒಳಗೆ ಕರೆದ ಮನೋಜ್​​

ಸಿಬ್ಬಂದಿ ಮಾಧ್ಯಮದವರನ್ನು ಹೊರಗಡೆ ಕಳುಹಿಸಿದರು. ಆದರೆ, ತನ್ನ ಮೇಲೆ ಹಲ್ಲೆಗೆ ಮುಂದಾಗಿದ್ದಾರೆ ಎಂದ ಮನೋಜ್ ಮಾಧ್ಯಮದವರನ್ನು ಒಳಗೆ ಕರೆದರು.

ಏನಿದು ಗಲಾಟೆ?

ಕಳೆದ ಒಂದು ವಾರದಿಂದ ಜಗಳ ನಡೆಯುತ್ತಲೇ ಇದೆ. ಮನೆಯ ವಿಚಾರಕ್ಕೆ ಶುರುವಾದ ಜಗಳದಿಂದ ಇಡೀ ಕುಟುಂಬ ಬೀದಿಗೆ ಬಂದಿದೆ. ಸದ್ಯ ಇರೋ ಮನೆ ವಿಚಾರಕ್ಕೆ ಕಿರಿಯ ಪುತ್ರ ಮಂಚು ಮನೋಜ್‌ ಹಾಗೂ ತಂದೆ ಮೋಹನ್‌ ಬಾಬು ಮಧ್ಯೆ ಗಲಾಟೆ ನಡೆಯುತ್ತಿದ್ದು, ಈಗ ತಾರಕಕ್ಕೇರಿದೆ.

ತಂದೆ ವಿರುದ್ಧ ಮಂಚು ಮನೋಜ್‌ ಗಂಭೀರ ಆರೋಪ

ಇನ್ನು, ಈ ಸಂಬಂಧ ಮಾತಾಡಿರೋ ಮಂಚು ಮನೋಜ್‌, ನಾನು ಎಸ್ಟೇಟ್‌ ಮನೆಯಲ್ಲಿ 1 ವರ್ಷದಿಂದ ಕುಟುಂಬ ಸಮೇತ ವಾಸಿಸುತ್ತಿದ್ದೇನೆ. ಆದರೆ, ಇತ್ತೀಚೆಗೆ ನನ್ನ ತಂದೆ ತನ್ನ ಬೌನ್ಸರ್​ಗಳಿಂದ ಹಲ್ಲೆ ಮಾಡಿಸಿದ್ದಾರೆ. ನನ್ನ ಮೇಲೆ ಮಾತ್ರವಲ್ಲ ಹೆಂಡತಿ ಮಕ್ಕಳ ಮೇಲೂ ಹಲ್ಲೆ ನಡೆಸಲಾಗಿದೆ. ಡಾಕ್ಟರ್‌ ಬಳಿ ಹೋದರೆ ಎಲ್ಲೆಲ್ಲಿ ಇಂಜುರಿ ಆಗಿದೆ ಎಂಬುದು ಗೊತ್ತಾಗುತ್ತದೆ ಎಂದಿದ್ದಾರೆ. ಅಷ್ಟೇ ಅಲ್ಲ ಪೊಲೀಸರಿಗೆ 3 ಪುಟಗಳ ದೂರು ಕೂಡ ನೀಡಿದ್ದಾರೆ.

ಮೋಹನ್​ ಬಾಬು ಕೌಂಟರ್​ ಕಂಪ್ಲೈಂಟ್​​

ಮತ್ತೊಂದೆಡೆ ತನ್ನ ಮೇಲಿನ ಆರೋಪವನ್ನು ನಟ ಮೋಹನ್​ ಬಾಬು ತಳ್ಳಿ ಹಾಕಿದ್ದಾರೆ. ಅದು ನಮ್ಮ ಮನೆ. ನಾನು ಮನೆಗೆ ಹೋದರೆ ನನ್ನ ಮಗನ ಬಾಡಿಗಾರ್ಡ್​ ನನ್ನ ಮೇಲೆ ಹಲ್ಲೆ ನಡೆಸಲು ಬರುತ್ತಿದ್ದಾರೆ. ನನಗೆ ಏನಾದರು ಆದರೆ ಯಾರು ಹೊಣೆ. ನನಗೆ ಕೊಲೆ ಬೆದರಿಕೆ ಹಾಕಲಾಗಿದೆ ಎಂದು ಕೌಂಟರ್​ ಕಂಪ್ಲೈಂಟ್​​ ಕೊಟ್ಟಿದ್ದಾರೆ.

ಇದನ್ನೂ ಓದಿ: ಸ್ಟಾರ್​ ನಟನ ಮನೆಯಲ್ಲಿ ಅಲ್ಲೋಲ ಕಲ್ಲೋಲ; ತಂದೆ, ಮಗನ ಮಧ್ಯೆ ಮಾರಾಮಾರಿ; ಕಾರಣವೇನು?

ವಿಶೇಷ ಸೂಚನೆ: ಕ್ರಿಕೆಟ್‌ನ ಸುದ್ದಿಗಳಿಗಾಗಿ ಪ್ರತಿದಿನ ಬೆಳಗ್ಗೆ 8.27ಕ್ಕೆ ನ್ಯೂಸ್‌ಫಸ್ಟ್‌ಚಾನೆಲ್​​ನಲ್ಲಿ ‘ರನ್ ಭೂಮಿ’ ವೀಕ್ಷಿಸಿ