ಎಐ ಫಾರ್​ ಕೇರ್​ ಸಮಿಟ್​​.. AI ಮೂಲಕ ವೈದ್ಯಕೀಯ ಲೋಕದ ಆವಿಷ್ಕಾರ ಹೇಗೆ? ಅನ್ನೋ ಚರ್ಚೆ!

ಇಡೀ ಜಗತ್ತಿನಾದ್ಯಂತ ಇತ್ತೀಚೆಗೆ ಭಾರೀ ಸದ್ದು ಮಾಡುತ್ತಿರೋ ಹೊಸ ಟೆಕ್ನಾಲಜಿ​ ಎಂದರೆ ಆರ್ಟಿಫಿಶಿಯಲ್ ಇಂಟೆಲಿಜನ್ಸ್​. ಈ ಎಐ ಈಗ ಎಲ್ಲಿಲ್ಲ ಹೇಳಿ? ಮಕ್ಕಳ ಸ್ಕೂಲ್​ನಿಂದ ಹಿಡಿದು ವೈದ್ಯಕೀಯ ಕ್ಷೇತ್ರದವರೆಗೂ ಇದರ ಬಳಕೆ ಅಪಾರ. ಹಾಗೇನೆ ವೈದ್ಯಕೀಯ ಕ್ಷೇತ್ರದಲ್ಲಿ ಎಐನ ಬಳಕೆಯಿಂದ ಆಗಬಹುದಾದ ಅನುಕೂಲಗಳೇನು ಎಂಬುದರ ಬಗ್ಗೆ ಸಿಲಿಕಾನ್​ ಸಿಟಿಯಲ್ಲಿ ಹೆಲ್ತ್​​-ಟೆಕ್​ ಸಮ್ಮಿಟ್​ ನಡೆಯಿತು. ಅದುವೇ ಎಐ ಫಾರ್​ ಲೈಫ್.

ರಾಜಧಾನಿಯಲ್ಲಿ ನಡೆದ ಈ ಕಾರ್ಯಕ್ರಮ, ವೈದ್ಯಕೀಯ ಕ್ಷೇತ್ರದಲ್ಲಿ ಎಐ ಬಳಕೆಯ ವಿಸ್ತಾರ ಹಾಗೂ ಉಪಯೋಗ ಎಲ್ಲವನ್ನು ಜನರಿಗಾಗಿ ತೆರೆದಿಟ್ಟಿದೆ. ನಗರದ ಸೆಂಟ್​ ಜಾನ್ಸ್​ ಆಡಿಟೋರಿಯಮ್​ನಲ್ಲಿ ನಡೆದ ಈ ಕಾರ್ಯಕ್ರಮದಲ್ಲಿ 25ಕ್ಕೂ ಹೆಚ್ಚು ಸ್ಪೀಕರ್ಸ್‌, ಹಾಸ್ಪಿಟಲ್ಸ್‌, ಸರ್ಕಾರದ ಪ್ರತಿನಿಧಿಗಳು, ಹೆಲ್ತ್ ಇನ್ಶುರೆನ್ಸ್ ಕಂಪನಿಯವ್ರು, ಟೆಕ್ ಸ್ಟಾರ್ಟಪ್ಸ್‌, ಟೆಕ್‌ ಎಂಟರ್‌ಪ್ರೈಸಸ್, ಇನ್‌ವೆಸ್ಟರ್ಸ್‌, ಅನ್ವೇಷಣಾ ತಂಡಗಳು, ಸಂಶೋಧಕರು ಭಾಗಿಯಾಗಿದ್ದರು.

ಎಐ ಟೆಕ್ನಾಲಜಿ ಬಳಸಿಕೊಂಡು ಸಿಟಿಯಲ್ಲಿರೋ ಡಾಕ್ಟ್​ರ್​ಗಳು ಗ್ರಾಮೀಣ ಭಾಗದ ಜನರ ಆರೋಗ್ಯವನ್ನು ಟೆಲಿ ಐಸಿಯು ಮೂಲಕ ಕಾಪಾಡಬಹುದು ಎಂದು GE ಹೆಲ್ತ್​ಕೇರ್​ನ ರಾಮಕೃಷ್ಣ ರಾವ್ ಹೇಳಿದ್ರು. ಜೊತೆಗೆ THRIVE ಡಿಜಿಟಲ್​ ಹೆಲ್ತ್​ನ ಬಾಲಸುಬ್ರಹ್ಮಣ್ಯಂ ಅವರು ವಿದೇಶದ ವೈದ್ಯಕೀಯ ಟೆಕ್ನಾಲಜಿಯನ್ನು ನಮ್ಮ ದೇಶಕ್ಕೆ ತರೋದ್ರಿಂದ ಇಲ್ಲಿನ ಜನಕ್ಕೆ ಉಪಯೋಗವಾಗುತ್ತೆ ಅಂತ ತಿಳಿಸಿದ್ರು. ಹಾಗೂ ಎಐ ಬಳಸಿದ್ರೆ ಯಾವ ರೀತಿ ಈಗಿನ ವೈದ್ಯಕೀಯ ಕ್ಷೇತ್ರದಲ್ಲಿರುವ ನ್ಯೂನ್ಯತೆಗಳನ್ನು ಪರಿಹರಿಸಬಹುದು ಎಂಬ ಅನೇಕ ವಿಚಾರಗಳ ಬಗ್ಗೆ ವಿಸ್ತೃತ ಚರ್ಚೆ ನಡೆಯಿತು.

ಈ ಬಗ್ಗೆ ಬ್ಯಾಕ್ಸ್​ಟರ್​ ಹೆಲ್ತ್​ಕೇರ್​ನ ಶ್ರೀಧರ್​ ಆಂಜನಪ್ಪ ಏನಂದ್ರು?

ಇನ್ನೂ ಮನುಷ್ಯನ ಡಯಾಲಿಸಿಸ್​ನಲ್ಲೂ ಕೂಡ ಎಐ ಪರಿಣಾಮಕಾರಿ ಆಗುತ್ತೆ. ಯಾವ ರೋಗಿ ಡಯಾಲಿಸಿಸ್​ಗೆ ಒಳಗಾಗಿದ್ದಾರೋ, ಅವರ ದೇಹ ಯಾವ ಮಟ್ಟಿಗೆ ಸ್ಪಂದಿಸ್ತಾ ಇದೆ ಅನ್ನೋದ್ರ ಅಂದಾಜನ್ನು ಈ ಎಐ ಪವರ್ಡ್​ ಮಷೀನ್​ಗಳು ಸಹಕಾರಿಯಾಗುತ್ತೆ ಎಂದು ಬ್ಯಾಕ್ಸ್​ಟರ್​ ಹೆಲ್ತ್​ಕೇರ್​ನ ಶ್ರೀಧರ್​ ಆಂಜನಪ್ಪ ಹೇಳಿದ್ದಾರೆ.

ಇದೆಲ್ಲದರ ಜೊತೆಗೆ ಮನುಷ್ಯನ ದೇಹದ ಸಮಸ್ಯೆಗಳನ್ನ ಗುರುತಿಸಿ, ಅವುಗಳನ್ನು ಕ್ಯೂರ್ ಮಾಡುವ ಸ್ಟಾಲ್​​ಗಳು ಕೂಡ ಎಐ ಫಾರ್​ ಲೈಫ್​ ಸಮ್ಮಿಟ್​ನಲ್ಲಿ ಕಂಡು ಬಂತು. ಇದರ ಕುರಿತಾಗಿ ಅನೇಕ ಸ್ಟಾಲ್​ಗಳನ್ನು ಈ ಸಮ್ಮಿಟ್​ನಲ್ಲಿ ಏರ್ಪಡಿಸಲಾಗಿತ್ತು. ಅದರಲ್ಲಿ ಒಂದು, ‘ಇಕ್ಷಣ’ ಅನ್ನೋ ಮ್ಯಾಜಿಕಲ್ ಪ್ಯಾಂಟ್. ಕೇವಲ ಈ ಪ್ಯಾಂಟ್‌ನ ಧರಿಸಿ ಪೆಲ್ವಿಕ್​​ ಮಾಂಸಖಂಡಗಳ ಸಡಿಲುವಿಕೆ ಸರಿಪಡಿಸಬಹುದು. ಜೊತೆಗೆ ಕೆಲಸ ಮಾಡ್ತಾನೇ ಯಾವುದೇ ಶ್ರಮ ಇಲ್ಲದೇ, ವ್ಯಾಯಾಮ ಮಾಡದೇ, ಈ ಮಾಂಸಖಂಡಗಳನ್ನು ಗಟ್ಟಿಗೊಳಿಸಬಹುದಾದ ಆವಿಷ್ಕಾರವನ್ನು ಇಲ್ಲಿ ಪ್ರಸ್ತುತಪಡಿಸಲಾಗಿತ್ತು.

ಅನೇಕ ಸ್ಟಾಲ್​ಗಳ ಪೈಕಿ ಜನರ ಗಮನಸೆಳೆದ ಮತ್ತೊಂದು ಸ್ಟಾಲ್ ಅಂದ್ರೆ ಅದು ಸ್ಟ್ರೆಸ್​ ಕ್ಯಾಲ್ಕುಲೇಟರ್. ಹೌದು ಮನುಷ್ಯ ದಣಿದಾಗಲೆಲ್ಲ.. ತುಂಬಾ ಸ್ಟ್ರೆಸ್​ ಗುರೂ ಅಂತಾನೆ. ಆದ್ರೆ ಎಷ್ಟರ ಮಟ್ಟಿಗೆ? ಅದಕ್ಕೆ ಉತ್ತರ ಇಲ್ಲ. ಆದ್ರೆ ಸ್ಪಾರ್ಕೊ ಲೈಫ್ ತಯಾರಿಸಿರೋ ಈ ಡಿವೈಸ್​ನಿಂದ ಎಷ್ಟು ಸ್ಟ್ರೆಸ್​ ಆಗಿದೆ ಅನ್ನೋದನ್ನು ಎಐ ಬಳಸಿ, ಲೆಕ್ಕ ಹಾಕಿ, ಅದಕ್ಕೆ ತಕ್ಕಂತ ಮಾನಸಿಕ ಚಿಕಿತ್ಸೆಯನ್ನು ನೀಡಲಾಗುತ್ತೆ. ಹೀಗೆ ಅನೇಕ ಮೈಂಡ್​ಬ್ಲೋಯಿಂಗ್​ ಆವಿಷ್ಕಾರಗಳು, ಎಐ ಫಾರ್ ಲೈಫ್​ ಸಮ್ಮಿಟ್​​ನಲ್ಲಿ ಜನರ ಗಮನ ಸೆಳೆದಿದೆ. ಮುಂದೆ ಈ ಆವಿಷ್ಕಾರಗಳು ಮತ್ತಷ್ಟು ಮುಂದುವರಿದು, ಮನುಕುಲದ ಒಳಿತಿಗಾಗಿ ಸ್ಪಂದಿಸಲಿ ಅನ್ನೋದೇ ಪ್ರತಿಯೊಬ್ಬರ ಆಶಯವಾಗಿತ್ತು.

ವಿಶೇಷ ಸೂಚನೆ: ಎಲ್ಲಾ DTH & Cableನಲ್ಲಿ ನ್ಯೂಸ್​ಫಸ್ಟ್​ ಚಾನೆಲ್​​​ ಲಭ್ಯ