ಎದುರಾಳಿಗಳಿಗೆ ಮಣ್ಣು ಮುಕ್ಕಿಸಿದ ಭಾರತ; ಆಸ್ಟ್ರೇಲಿಯಾ ಕೇವಲ 264 ರನ್​ಗೆ ಆಲೌಟ್​​

ಇಂದು ದುಬೈ ಇಂಟರ್​ ನ್ಯಾಷನಲ್​ ಕ್ರಿಕೆಟ್​ ಸ್ಟೇಡಿಯಮ್​ನಲ್ಲಿ ನಡೆಯುತ್ತಿರೋ ಐಸಿಸಿ 2025ರ ಚಾಂಪಿಯನ್ಸ್​ ಟ್ರೋಫಿ ಸೆಮಿಫೈನಲ್​ ಪಂದ್ಯದಲ್ಲಿ ಟೀಮ್​ ಇಂಡಿಯಾಗೆ ಆಸ್ಟ್ರೇಲಿಯಾ 265 ರನ್​ಗಳ ಟಾರ್ಗೆಟ್​ ನೀಡಿದೆ.

ಇನ್ನಿಂಗ್ಸ್​ ಆರಂಭದಲ್ಲೇ ಬಿರುಸಿನ ಬ್ಯಾಟಿಂಗ್ ನಡೆಸಿದ ಟ್ರಾವಿಸ್‌ ಹೆಡ್‌ ಭಾರತಕ್ಕೆ ತಲೆನೋವಾಗಿ ಪರಿಣಮಿಸಿದರು. ಇವರು ಟೀಮ್​ ಇಂಡಿಯಾ ಬೌಲರ್​ಗಳನ್ನು ಕಾಡಿದರು. ಮೊಹಮ್ಮದ್‌ ಶಮಿ ತಮ್ಮ ಮೊದಲ ಓವರ್‌ನಲ್ಲೇ ಟ್ರಾವಿಸ್ ಹೆಡ್‌ ಕ್ಯಾಚ್‌ ಕೈ ಚೆಲ್ಲಿದ್ದರು. ಇದಾದ ಬಳಿಕ ಹೆಡ್​ ಬ್ಯಾಟಿಂಗ್​ ಮತ್ತಷ್ಟು ಜೋರಾಗಿತ್ತು.

ಆಸೀಸ್ ಪರ ಓಪನಿಂಗ್​ ಮಾಡಿದ ಮತ್ತೋರ್ವ ಬ್ಯಾಟರ್​ ಕೂಪರ್ ಕಾನೊಲಿ ಸೊನ್ನೆ ಸುತ್ತಿದರು. ಈ ಅವಕಾಶ ಬಳಸಿಕೊಳ್ಳುವಲ್ಲಿ ಕೂಪರ್ ಕಾನೊಲಿ ವಿಫಲರಾದರು. ಟ್ರಾವಿಸ್‌ ಹೆಡ್ ದೊಡ್ಡ ಇನಿಂಗ್ಸ್ ಕಟ್ಟುವ ಸೂಚನೆ ನೀಡುತ್ತಿದ್ದಂತೆಯೇ ವರುಣ್​ ಚಕ್ರವರ್ತಿ ಖೆಡ್ಡಾ ತೋಡಿದರು. ಇದಕ್ಕೂ ಮುನ್ನ ಹೆಡ್​​ ಕುಲ್ದೀಪ್​ ಯಾದವ್​​ ಮತ್ತು ಹಾರ್ದಿಕ್​ ಪಾಂಡ್ಯ ಸಿಕ್ಸರ್​​ ಬಾರಿಸಿ ಅಬ್ಬರಿಸಿದ್ದರು.

ಮಾರ್ನಸ್ ಲಂಬುಶೇನ್ ಮತ್ತು ಜೋಶ್​ ಇಂಗ್ಲೀಷ್​ ಕೂಡ ಕೆಲ ಕಾಲ ಕ್ರೀಸ್​ನಲ್ಲಿದ್ದರು. ಒಂದೆಡೆ ಮಾರ್ನಸ್ ಲಂಬುಶೇನ್ 29 ರನ್​ ಗಳಿಸಿದರೆ, ಜೋಶ್​ ಇಂಗ್ಲೀಷ್​​ 11 ರನ್​ಗೆ ವಿಕೆಟ್​ ಒಪ್ಪಿಸಿದರು.

ಸ್ಟೀವ್​ ಸ್ಮಿತ್​ ಅಬ್ಬರ

ಸ್ಟೀವ್​ ಸ್ಮಿತ್​ ಆಸ್ಟ್ರೇಲಿಯಾ ಪರ ಅಬ್ಬರಿಸಿದರು. ಇವರು 96 ಬಾಲ್​ನಲ್ಲಿ 1 ಸಿಕ್ಸರ್​​, 4 ಫೋರ್​ ಸಮೇತ 73 ರನ್​ ಚಚ್ಚಿದ್ದಾರೆ. ಅಲೆಕ್ಸ್ ಕ್ಯಾರಿ ತಾನು ಆಡಿದ 57 ಬಾಲ್​ನಲ್ಲಿ 1 ಸಿಕ್ಸರ್​​, 8 ಫೋರ್​ನೊಂದಿಗೆ 61 ರನ್​​ ಗಳಿಸಿದರು.

ಗ್ಲೆನ್​ ಮ್ಯಾಕ್ಸ್​ವೆಲ್​​ 7, ಬೆನ್ ದ್ವಾರ್ಶುಯಿಸ್ 19, ನಾಥನ್ ಎಲ್ಲಿಸ್ 10, ಆಡಮ್ ಜಂಪಾ 7, ತನ್ವೀರ್ ಸಂಘ ಅಜೇಯ 1 ರನ್​ ಗಳಿಸಿದರು. ಆಸ್ಟ್ರೇಲಿಯಾ 49.3 ಓವರ್​ನಲ್ಲಿ 264 ರನ್​ಗಳಿಗೆ ಆಲೌಟ್​ ಆಗಿದೆ.

ಭಾರತ ತಂಡದ ಪರ ಮೊಹಮ್ಮದ್​ ಶಮಿ 3 ವಿಕೆಟ್​ ತೆಗೆದರು. ಹಾಗೆಯೇ ವರುಣ್​ ಚಕ್ರವರ್ತಿ ಮತ್ತು ರವೀಂದ್ರ ಜಡೇಜಾ ತಲಾ 2 ವಿಕೆಟ್​ ಪಡೆದರು. ಹಾರ್ದಿಕ್​​​ ಪಾಂಡ್ಯ, ಅಕ್ಷರ್​ ಪಟೇಲ್​ ತಲಾ 1 ವಿಕೆಟ್​ ಕಿತ್ತರು.

ಇದನ್ನೂ ಓದಿ:ಸೆಮಿಫೈನಲ್​​ ಕದನ; ಭಾರತಕ್ಕೆ ಹೆಚ್ಚಾದ ಆಘಾತ; 35 ಓವರ್​ಗೆ ಆಸ್ಟ್ರೇಲಿಯಾ 190 ರನ್​​!

ವಿಶೇಷ ಸೂಚನೆ: ಕ್ರಿಕೆಟ್​​ನ ವಿಶೇಷ ಸುದ್ದಿಗಳಿಗಾಗಿ ವೀಕ್ಷಿಸಿ ‘ರನ್ ಭೂಮಿ’ ಪ್ರತಿದಿನ ಬೆಳಗ್ಗೆ 8.27ಕ್ಕೆ ನ್ಯೂಸ್ ಫಸ್ಟ್ ಚಾನೆಲ್