IND vs AUS; ರೋಹಿತ್ ಪಡೆಗೆ ಭಾರೀ ಮುಖಭಂಗ.. ಬ್ಯಾಟಿಂಗ್ ವೈಫಲ್ಯ, ಟೆಸ್ಟ್​ ಸೋತ ಟೀಮ್ ಇಂಡಿಯಾ

ಬಾರ್ಡರ್​ ಗವಾಸ್ಕರ್ ಟ್ರೋಫಿಯ 2ನೇ ಟೆಸ್ಟ್ ಪಂದ್ಯದಲ್ಲಿ ಆಸ್ಟ್ರೇಲಿಯಾದ ಬಲಿಷ್ಠ ಬೌಲಿಂಗ್​ಗೆ ಟೀಮ್ ಇಂಡಿಯಾ ಶರಣಾಗಿದೆ. ಮೊದಲ ಇನ್ನಿಂಗ್ಸ್​ನಲ್ಲಿ ಪೇಸ್ ಬೌಲರ್ ಮಿಚೆಲ್ ಸ್ಟಾರ್ಕ್ ಹಾಗೂ 2ನೇ ಇನ್ನಿಂಗ್ಸ್​ನಲ್ಲಿ ನಾಯಕ ಪ್ಯಾಟ್ ಕಮಿನ್ಸ್ ಅವರ ಬೌಲಿಂಗ್ ಎದುರಿಸಲಾಗದೇ ರೋಹಿತ್ ಶರ್ಮಾ ಪಡೆ ಸೋಲೋಪ್ಪಿಕೊಂಡಿದೆ. ಈ ಮೂಲಕ ಸರಣಿಯಲ್ಲಿ ಎರಡು ತಂಡಗಳು 1-1 ರಿಂದ ಸಮಬಲ ಸಾಧಿಸಿವೆ.

ಅಡಿಲೇಡ್​ನಲ್ಲಿ ನಡೆದ ಬಾರ್ಡರ್​ ಗವಾಸ್ಕರ್ ಟ್ರೋಫಿಯ 2ನೇ ಟೆಸ್ಟ್ ಪಂದ್ಯದಲ್ಲಿ ಟೀಮ್ ಇಂಟಿಯಾ ಟಾಸ್ ಗೆದ್ದು ಬ್ಯಾಟಿಂಗ್ ಆಯ್ಕೆ ಮಾಡಿಕೊಂಡಿತ್ತು. ಅದರಂತೆ ಬ್ಯಾಟಿಂಗ್​ ಮಾಡಿದ್ದ ಭಾರತ ತಂಡ ಮಿಚೆಲ್ ಸ್ಟಾರ್ಕ್ ಅವರ ಬೌಲಿಂಗ್ ಮುಂದೆ ಬೆಂಡಾಗಿತ್ತು. ಭಾರತ ಸತತ ಬ್ಯಾಟಿಂಗ್ ವೈಫಲ್ಯ ಅನುಭವಿಸಿತು. ಅನುಭವಿ ಬ್ಯಾಟರ್​ಗಳಾದ ಕೆ.ಎಲ್ ರಾಹುಲ್, ವಿರಾಟ್ ಕೊಹ್ಲಿ, ರೋಹಿತ್ ಶರ್ಮಾ, ಪಂತ್, ಶುಭಮನ್​ ಗಿಲ್​ ಹಾಗೇ ಬಂದು ಹೀಗೆ ಪೆವಿಲಿಯನ್​ಗೆ ನಡೆದರು. ಭಾರತದ ಪರ ಬೌಲರ್ಸ್ ಕೂಡ ಸರಿಯಾದ ಬ್ಯಾಟಿಂಗ್ ಮಾಡಲಾಗಲಿಲ್ಲ. ಹೀಗಾಗಿ 180 ರನ್​ಗೆ ತನ್ನೆಲ್ಲಾ ವಿಕೆಟ್​ಗಳನ್ನು ಕಳೆದುಕೊಂಡಿತ್ತು. ಈ ಇನ್ನಿಂಗ್ಸ್​ನಲ್ಲಿ ಮಿಚೆಲ್ ಸ್ಟಾರ್ಕ್ 6 ವಿಕೆಟ್ ಪಡೆದು ಸಂಭ್ರಮಿಸಿದ್ದರು.

ಇದನ್ನೂ ಓದಿ: Bigg Boss; ‘ನಾವು ಒಳ್ಳೆ ಮನುಷ್ಯರಲ್ಲ, ಕೆಟ್ಟೋರೇ’ ರಜತ್- ಗೋಲ್ಡ್​ ಸುರೇಶ್ ಮಧ್ಯೆ ಮಾತಿನ ಸಮರ

ನಂತರ ಬ್ಯಾಟಿಂಗ್ ಮಾಡಿದ್ದ ಆಸಿಸ್ ಪಡೆ, ಇದರಲ್ಲಿ​ ಟ್ರಾವೀಸ್ ಹೆಡ್ ಅವರ ಸೆಂಚುರಿ ನೆರವಿನಿಂದ 337 ರನ್​ಗಳನ್ನು ಕಲೆ ಹಾಕಿ ಎಲ್ಲ ವಿಕೆಟ್​ಗಳನ್ನ ಕಳೆದುಕೊಂಡಿತ್ತು. ಈ ವೇಳೆ ಭಾರತದ ಪರ ಬೂಮ್ರಾ ಹಾಗೂ ಸಿರಾಜ್ ತಲಾ 4 ವಿಕೆಟ್ ಪಡೆದು ತಂಡಕ್ಕೆ ನೆರವಾಗಿದ್ದರು. ಹೀಗಾಗಿ 157 ರನ್​ಗಳ ಮುನ್ನಡೆಯನ್ನು ಕಮಿನ್ಸ್ ಪಡೆ ಪಡೆದುಕೊಂಡಿತ್ತು.

ನಂತರ 2ನೇ ಇನ್ನಿಂಗ್ಸ್ ಪ್ರಾರಂಭಿಸಿದ್ದ ಭಾರತ ವಿಫಲವಾದ ಬ್ಯಾಟಿಂಗ್​ನಿಂದ ಕೇವಲ 175 ರನ್​ಗೆ ಇಂದು ಆಲೌಟ್​ ಆಯಿತು. ಇದರಿಂದ ಕೇವಲ 19 ರನ್​ಗಳ ಗುರಿಯನ್ನು ಆಸ್ಟ್ರೇಲಿಯಾ ಟೀಮ್ ಪಡೆದಿತ್ತು. ಅತ್ಯಂತ ಸಣ್ಣ ಟಾರ್ಗೆಟ್ ಅದ ಇದನ್ನು ಆಸಿಸ್​ ಓಪನರ್ ಬ್ಯಾಟರ್​ಗಳಾದ ನಾಥನ್ ಮೆಕ್‌ಸ್ವೀನಿ 10 ಹಾಗೂ ಉಸ್ಮಾನ್ ಖವಾಜಾ 9 ರನ್​ ಗಳಿಸುವ ಮೂಲಕ ಪಂದ್ಯ ಗೆದ್ದರು. ಈ ಸರಣಿಯಲ್ಲಿ ಎರಡೂ ತಂಡಗಳು 1-1 ರಿಂದ ಸಮವಾಗಿ ಗೆಲವು ಪಡೆದಿವೆ. ಇನ್ನು ಮೂರು ಟೆಸ್ಟ್ ಪಂದ್ಯಗಳು ಬಾಕಿ ಇವೆ.

ವಿಶೇಷ ಸೂಚನೆ: ಕ್ರಿಕೆಟ್‌ನ ಸುದ್ದಿಗಳಿಗಾಗಿ ಪ್ರತಿದಿನ ಬೆಳಗ್ಗೆ 8.27ಕ್ಕೆ ನ್ಯೂಸ್‌ಫಸ್ಟ್‌ಚಾನೆಲ್​​ನಲ್ಲಿ ‘ರನ್ ಭೂಮಿ’ ವೀಕ್ಷಿಸಿ