DK ಒಬ್ಬರೇ ಅಲ್ಲ.. ಆರ್​ಸಿಬಿಯಲ್ಲಿ ಕಪ್ ಗೆಲುವಿನ ಹಿಂದಿನ ನಿಜವಾದ ಸೂತ್ರದಾರ ಇವರೇ..!

17 ವರ್ಷ ತಂಡದ ಆಟಗಾರರು ಬದಲಾದರು, ಕೋಚ್​ಗಳು ಬದಲಾದರು ಹಣೆ ಬರಹ ಕಿಂಚಿತ್ತು ಬದಲಾಗಿರಲಿಲ್ಲ. ಕಪ್​ ಗೆಲ್ಲೋ ಕನಸು ಕನಸಾಗಿಯೇ ಉಳಿದಿತ್ತು. ಇದೀಗ ಈ ಎಲ್ಲವೂ ಬದಲಾಗಿದೆ. ಇದಕ್ಕೆ ಕೇವಲ ಆಟಗಾರರ ಮಾತ್ರವೇ ಕಾರಣವಲ್ಲ. ತೆರೆ ಹಿಂದಿನ ಈ ಸೂತ್ರದಾರನೂ ಕಾರಣ. ಈತನಿದಲ್ಲಿ ಕಪ್ ಗೆಲ್ಲೋದು ಫಿಕ್ಸ್!

ಆ್ಯಂಡಿ ಫ್ಲವರ್​.. ಆರ್​​ಸಿಬಿ ಹೆಡ್​ ಕೋಚ್ ಮಾತ್ರವಲ್ಲ.. ರಾಯಲ್​ ಚಾಲೆಂಜರ್ಸ್ ಬೆಂಗಳೂರು ತಂಡದ ನಸೀಬು ಬದಲಿಸಿದ ಲೆಜೆಂಡ್​. 2023 ಆಗಸ್ಟ್ 4.. ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡದ ಹೆಡ್ ಕೋಚ್ ಆಗಿ ನಾಮಕರಣವಾದ ದಿನ. ಈತನ ಎಂಟ್ರಿಯೊಂದಿಗೆ ರಾಯಲ್ ಚಾಲೆಂಜರ್ಸ್ ತಂಡದಲ್ಲಿ ಶುರುವಾಗಿದ್ದೆ ಹೊಸ ಪರ್ವ. ಸೀಸನ್​​-17ರಲ್ಲಿ ರಣರಂಗಕ್ಕಿಳಿದ ಆ್ಯಂಡಿ ಫ್ಲವರ್ ಮೇಲೆ ಬೆಟ್ಟದಷ್ಟು ನಿರೀಕ್ಷೆ ಇತ್ತು. ಆರಂಭದಲ್ಲಿ ವೈಫಲ್ಯ ಅನುಭವಿಸಿದರೂ ನಂತರ ರಾಯಲ್ ಆಟವಾಡಿದ್ದ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ಪ್ಲೇ ಆಫ್​​ಗೆ ಎಂಟ್ರಿ ನೀಡ್ತು. ಈ ವರ್ಷ ಆ ರೀತಿ ಆಗಲು ಆ್ಯಂಡಿ ಫ್ಲವರ್ ಬಿಡಲಿಲ್ಲ.

ಇದನ್ನೂ ಓದಿ: ಕೊಹ್ಲಿಯ ಈ ನಡೆ ವಿರುದ್ಧ ರೊಚ್ಚಿಗೆದ್ದ ಫ್ಯಾನ್ಸ್.. ಘಟನೆ ನಡೆದ 2 ದಿನದಲ್ಲೇ ಇಂಥ ನಿರ್ಧಾರ ಯಾಕೆ?

ಆ್ಯಂಡಿ ಫ್ಲವರ್ ಇದ್ದಲ್ಲಿ ಟ್ರೋಫಿಗೆ ಬರವೇ ಇಲ್ಲ

ಆ್ಯಂಡಿ ಫ್ಲವರ್, ಮೂಲತಃ ಜಿಂಬಾಬ್ವೆಯವರೇ ಆಗಿದ್ರೂ ಕ್ರಿಕೆಟ್ ಎಂಬ ಜಂಟಲ್​​ಮ್ಯಾನ್​​ ಗೇಮ್​​ನ ಚತುರ ಅನ್ನೋದರಲ್ಲಿ ಎರಡು ಮಾತಿಲ್ಲ. ಎದುರಾಳಿ ಚಾಕಚಕ್ಯತೆಯನ್ನ ಅರೆಯುವಲ್ಲಿ ನಿಸ್ಸೀಮನಾಗಿರುವ ಫ್ಲವರ್, ಕೋಚ್ ಆಗಿ ತಂಡಗಳ ಗೆಲುವಿನಲ್ಲಿ ಮಹತ್ತರ ಪಾತ್ರವನ್ನೇ ವಹಿಸಿದ್ದಾರೆ. ಇದಕ್ಕೆಲ್ಲಾ ಬೆಸ್ಟ್​ ಎಕ್ಸಾಂಪಲ್​ ಆ್ಯಂಡಿ ಫ್ಲವರ್​ ಟ್ರ್ಯಾಕ್ ರೆಕಾರ್ಡ್.

ಅಂತಾರಾಷ್ಟ್ರೀಯ ಮಟ್ಟದಲ್ಲಿ ವಿವಿಧ ತಂಡಗಳ ಪರ ಕೆಲ್ಸ ಮಾಡಿರುವ ದಿಗ್ಗಜ ಫ್ಲವರ್‌, 2008ರಿಂದ 2014ರವರೆಗೆ ಇಂಗ್ಲೆಂಡ್​ ಸಹಾಯಕ ಕೋಚ್‌ ಆಗಿ ಕಾರ್ಯ ನಿರ್ವಹಿಸಿದ್ದರು. ವಿಶ್ವಕಪ್​ ಗೆಲ್ಲದ ಕೊರಗಿನಲ್ಲಿದ್ದ ಕ್ರಿಕೆಟ್​​​ ಜನಕರಿಗೆ, 2010ರಲ್ಲಿ T20 ವಿಶ್ವಕಪ್​ ಗೆಲ್ಲಿಸಿಕೊಟ್ಟರು.

ಕೇವಲ ಇಂಗ್ಲೆಂಡ್ ತಂಡದ ಮಾರ್ಗದರ್ಶಕರಾಗಿ ಮಾತ್ರವೇ ಆ್ಯಂಡಿ ಸಕ್ಸಸ್​ ಕಂಡಿಲ್ಲ. ಪ್ರತಿ ಲೀಗ್​ಗಳಲ್ಲೂ ಸಕ್ಸಸ್ ಕಂಡಿದ್ದಾರೆ. ಒಂದು ಮಾತಲ್ಲಿ ಹೇಳುವುದಾದ್ರೆ ಆ್ಯಂಡಿ ಫ್ಲವರ್ ಇದ್ದಲ್ಲಿ, ಟ್ರೋಫಿಗೆ ಬರ ಎಲ್ಲಿ ಅಂತಾನೇ ಹೇಳಬೇಕು. ಕೋಚ್ ಆ್ಯಂಡಿ ಫ್ಲವರ್ ಮಾರ್ಗದರ್ಶನದ ಅಡಿ ಸಾಲು ಸಾಲು ಕಪ್​​ಗಳಿಗೆ ಟೀಮ್​ಗಳು ಮುತ್ತಿಟ್ಟಿದ್ದೇ ಆಗಿದೆ.

ಆ್ಯಂಡಿ ಫ್ಲವರ್ ಗೆದ್ದಿರುವ T20 ಲೀಗ್ಸ್​

2021ರ ಪಾಕಿಸ್ತಾನ ಸೂಪರ್ ಲೀಗ್‌ನಲ್ಲಿ ಆ್ಯಂಡಿ ಮಾರ್ಗದರ್ಶನದಲ್ಲಿ ಮುಲ್ತಾನ್ ಸುಲ್ತಾನ್‌ ಚಾಂಪಿಯನ್​ ಆಗಿದೆ. 2022ರಲ್ಲಿ ಇಂಗ್ಲೆಂಡ್​ನ ದಿ ಹಂಡ್ರೆಡ್‌ ಲೀಗ್​​ನಲ್ಲಿ ಟ್ರೆಂಟ್ ರಾಕೆಟ್ಸ್‌ ಚಾಂಪಿಯನ್​ ಆಗಿ ಹೊರಹೊಮ್ಮಿತ್ತು. 2023ರ ಇಂಟರ್​ನ್ಯಾಷನಲ್​ ಲೀಗ್​ನಲ್ಲಿ ಗಲ್ಫ್‌ ಜೈಂಟ್ಸ್‌ ಚಾಂಪಿಯನ್​ ಪಟ್ಟಕ್ಕೆ ಮುತ್ತಿಟ್ಟಿತ್ತು. 2025ರಲ್ಲಿ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ಚಾಂಪಿಯನ್ ಪಟ್ಟಕ್ಕೇರಿತ್ತು.

ಇದನ್ನೂ ಓದಿ: ಹೃದಯಗೆದ್ದ ಕನ್ನಡಿಗರು.. ಐಪಿಎಲ್​​ನಲ್ಲಿ ಕರ್ನಾಟಕ ಪ್ಲೇಯರ್​​ಗಳದ್ದೇ ಪರಾಕ್ರಮ..!

2020, 2021 ಕೆರಿಬಿಯನ್ ಪ್ರಿಮಿಯರ್ ಲೀಗ್​​ನಲ್ಲಿ ಆ್ಯಂಡಿ ಫ್ಲವರ್ ಮಾರ್ಗದರ್ಶನದ ಸೇಂಟ್ ಲೂಸಿಯಾ, ಸತತ 2 ವರ್ಷ ರನ್ನರ್ ಆಫ್ ಸ್ಥಾನಕ್ಕೆ ತೃಪ್ತಿ ಪಟ್ಟಿತ್ತು. 2022, 2023ರ ಪಾಕಿಸ್ತಾನ ಸೂಪರ್ ಲೀಗ್​ನಲ್ಲಿ ಮುಲ್ತಾನ್ ಸುಲ್ತಾನ್​ ​​ರನ್ನರ್ಸ್ ಆಗಿತ್ತು.
ಅಬುದಾಬಿಯ ಟಿ10 ಲೀಗ್​ನಲ್ಲಿ ಮರಾಠಾ ಅರೇಬಿಯನ್ಸ್ ತಂಡವನ್ನು ಚಾಂಪಿಯನ್ ಪಟ್ಟಕ್ಕೇರಿಸಿದ ಸಾಧನೆ ಮಾಡಿದ್ದಾರೆ. ಅಂತರಾಷ್ಟ್ರೀಯ ಮಟ್ಟದಲ್ಲಿ ಇಂಗ್ಲೆಂಡ್ ಹಾಗೂ ಆಸ್ಟ್ರೇಲಿಯಾ ತಂಡಗಳ ಪರವೂ ಕೆಲಸ ಮಾಡಿರುವ ಫ್ಲವರ್​, ಟೆಸ್ಟ್ ಹಾಗೂ ಏಕದಿನ ಮಾದರಿಯ ಕ್ರಿಕೆಟನಲ್ಲೂ ಅಪಾರ ಸಾಧನೆ ಮಾಡಿದ್ದಾರೆ. 2009, 2010/11, 2013ರ ಆ್ಯಶಸ್ ಟೆಸ್ಟ್​ ಸರಣಿಗಳಲ್ಲಿ ಇಂಗ್ಲೆಂಡ್ ತಂಡದ ಗೆಲುವಿನ ರೂವಾರಿಯಾಗಿದ್ದ ಆ್ಯಂಡಿ, 2023ರ ವಿಶ್ವ ಟೆಸ್ಟ್ ಚಾಂಪಿಯನ್ ಶಿಪ್​​, 2023ರ ಏಕದಿನ ವಿಶ್ವಕಪ್​​ ಗೆದ್ದ ಆಸ್ಟ್ರೇಲಿಯಾ ತಂಡದ ಸಪೋರ್ಟ್​​ ಸ್ಟಾಫ್ ಆಗಿದ್ರು.

ಐಪಿಎಲ್​ನಲ್ಲೂ ಚಾಫು ಮೂಡಿಸಿದ್ದ ಆ್ಯಂಡಿ

2020 ಪಂಜಾಬ್ ಕಿಂಗ್ಸ್​ ತಂಡದ ಸಹಾಯಕ ಕೋಚ್ ಆಗಿ ಎಂಟ್ರಿ ನೀಡಿದ್ದ ಆ್ಯಂಡಿ ಫ್ಲವರ್, 2 ವರ್ಷಗಳ ಕಾಲ ಪಂಜಾಬ್ ತಂಡದಲ್ಲಿದ್ರು. ಆ ಬಳಿಕ 2022, 2023ರಲ್ಲಿ ಕೆ.ಎಲ್.ರಾಹುಲ್ ನಾಯಕತ್ವದ ಲಕ್ನೋ ತಂಡದ ಕೋಚ್ ಕಾರ್ಯ ನಿರ್ವಹಿಸಿದರು. ಪ್ಲೇ ಆಫ್​​ಗೂ ತಂಡವನ್ನು ಕೊಡೊಂಯ್ದಿದ್ದರು. ಈ ನಂತರ ಆರ್​ಸಿಬಿ ಸೇರಿದ ಆ್ಯಂಡಿ ಸೀಸನ್​​-17ರಿಂದ ಬಲಿಷ್ಠ ಆರ್​ಸಿಬಿ ತಂಡ ಕಟ್ಟುವತ್ತ ಮಹತ್ವದ ಹೆಜ್ಜೆಯನ್ನಿಟ್ಟಿದರು. ಅದಕ್ಕೆ ತಕ್ಕಂತೆಯೇ ಮೆಗಾ ಹರಾಜಿನಲ್ಲಿ ತಂಡವನ್ನು ಕಟ್ಟಿದರು. ವಿದೇಶಿಗರನ್ನೇ ಹೆಚ್ಚು ನಂಬಿಕೊಳ್ತಿದ್ದ ಆರ್​ಸಿಬಿಗೆ ಇಂಡಿಯನ್ ಫ್ಲೇವರ್ ನೀಡಿದರು. ಇದು ಸಹಜವಾಗಿಯೇ ಆರ್​ಸಿಬಿಯನ್ನು ಮತ್ತಷ್ಟು ಬಲಿಷ್ಠವಾಗಿಸಿತ್ತು. 18 ವರ್ಷಗಳ ಕೊರಗಿಗೆ ನೋವಿಗೆ ಬ್ರೇಕ್ ಬೀಳುವಂತೆ ಮಾಡ್ತು.

ಇದನ್ನೂ ಓದಿ: ಗೋಯೆಂಕ ಮತ್ತೆ ಗರಂ.. ಪಂತ್ ಒಬ್ಬರೇ ಅಲ್ಲ LSGಯಲ್ಲಿ ಮೂವರ ತಲೆದಂಡ ಪಕ್ಕಾ..!

ವಿಶೇಷ ಸೂಚನೆ: ಕ್ರಿಕೆಟ್‌ನ ಸುದ್ದಿಗಳಿಗಾಗಿ ಪ್ರತಿದಿನ ಬೆಳಗ್ಗೆ 8.30ಕ್ಕೆ ನ್ಯೂಸ್‌ಫಸ್ಟ್‌ಚಾನೆಲ್​​ನಲ್ಲಿ ‘ರನ್ ಭೂಮಿ’ ವೀಕ್ಷಿಸಿ