ವೈಭವ್​ ಸೂರ್ಯವಂಶಿಗೆ ಬಹುಮಾನ ಘೋಷಿಸಿದ CM.. ಯುವ ಆಟಗಾರನಿಗೆ ಭಾರೀ ಲಕ್​!

2025ರ ಐಪಿಎಲ್​ ಟೂರ್ನಿಯಲ್ಲಿ ಈಗ ಎಲ್ಲಿ ನೋಡಿದರೂ ವೈಭವ್ ಸೂರ್ಯವಂಶಿ ಬಗ್ಗೆ ಮಾತುಗಳೇ ಕೇಳಿ ಬರುತ್ತಿವೆ. ಕಾರಣ ಕೇವಲ 14 ವರ್ಷಕ್ಕೆ 35 ಎಸೆತಕ್ಕೆ ಸಿಡಿಲಬ್ಬರದ ಸೆಂಚುರಿ ಬಾರಿಸಿದ್ದಾರೆ. ಇದರ ಬೆನ್ನಲ್ಲೇ ಉತ್ತರದ ರಾಜ್ಯವೊಂದರ ಮುಖ್ಯಮಂತ್ರಿ, ಈ ಯುವ ಆಟಗಾರನಿಗೆ 10 ಲಕ್ಷ ರೂಪಾಯಿಗಳನ್ನು ಘೋಷಣೆ ಮಾಡಿದ್ದಾರೆ.

ವೈಭವ್ ಸೂರ್ಯವಂಶಿ ಕ್ರಿಕೆಟ್ ಲೋಕದಲ್ಲಿ ಸಂಚಲನ ಸೃಷ್ಟಿಸಿದ ಅತ್ಯಂತ ಕಿರಿಯ ಆಟಗಾರ. ರಾಜಸ್ಥಾನ್ ರಾಯಲ್ಸ್​ ತಂಡದ ಯುವ ಆಟಗಾರನಾಗಿರುವ ಸೆನ್ಸೇಷನಲ್ ಸ್ಟಾರ್​ ಗುಜರಾತ್ ಟೈಟನ್ಸ್ ವಿರುದ್ಧ ಅಬ್ಬರಿಸಿದ್ದರು. ರಾಜಸ್ಥಾನ್ ಪರವಾಗಿ ಭರ್ಜರಿ ಬ್ಯಾಟಿಂಗ್ ಮಾಡಿದ್ದ ಸೂರ್ಯವಂಶಿ 265.79 ಸ್ಟ್ರೈಕ್​ ರೇಟ್​ನಲ್ಲಿ ರನ್ಸ್​ ಚಚ್ಚಿದ್ದರು. 11 ಸಿಕ್ಸರ್, 7 ಬೌಂಡರಿಗಳಿಂದ ಕೇವಲ 35 ಎಸೆತದಲ್ಲಿ ಶತಕ ಬಾರಿಸೋ ಮೂಲಕ ಐಪಿಎಲ್​ನಲ್ಲಿ ಐತಿಹಾಸಿಕ ದಾಖಲೆಗೆ ಕಾರಣರಾದರು.

ಇಂಡಿಯನ್‌ ಪ್ರೀಮಿಯರ್‌ ಲೀಗ್‌ನಲ್ಲಿ ಸ್ಫೋಟಕ ಶತಕ ಸಿಡಿಸಿದ 14 ವರ್ಷದ ವೈಭವ್‌ ಸೂರ್ಯವಂಶಿಗೆ ಬಿಹಾರ ರಾಜ್ಯ ಸರ್ಕಾರ ಬಂಪರ್‌ ಬಹುಮಾನ ಘೋಷಿಸಿದೆ. ವೈಭವ್​ ಸೂರ್ಯವಂಶಿಯನ್ನ ಅಭಿನಂದಿಸಿರುವ ಮುಖ್ಯಮಂತ್ರಿ ನಿತೀಶ್‌ ಕುಮಾರ್‌ ಅವರು 10 ಲಕ್ಷ ರೂಪಾಯಿಗಳ ಬಹುಮಾನ ಘೋಷಣೆ ಮಾಡಿದ್ದಾರೆ. ಈ ವಿಚಾರವನ್ನು ಬಿಹಾರ ಸಿಎಂ ನಿತೀಶ್ ಕುಮಾರ್ ತಮ್ಮ ಸೋಶಿಯಲ್ ಮೀಡಿಯಾದಲ್ಲಿ ಹಂಚಿಕೊಂಡಿದ್ದಾರೆ.

ಇದನ್ನೂ ಓದಿ: 11 ಸಿಕ್ಸರ್​ಗಳು.. ಅತಿ ವೇಗದ ಸೆಂಚುರಿ ಬಾರಿಸಿದ 14 ವರ್ಷದ ಬ್ಯಾಟರ್​ ವೈಭವ್ ಸೂರ್ಯವಂಶಿ

2025ರ ಐಪಿಎಲ್​​ ಹರಾಜಿನಲ್ಲಿ ವೈಭವ್​ಗಾಗಿ ಡೆಲ್ಲಿ ಕ್ಯಾಪಿಟಲ್ಸ್ ಹಾಗೂ ರಾಜಸ್ಥಾನ್ ರಾಯಲ್ಸ್​ ಪೈಪೋಟಿ ನಡೆಸಿದ್ದವು. ಆಗ ವೈಭವ್​ಗೆ ಕೇವಲ 13 ವರ್ಷ ತುಂಬಿತ್ತು. ಈ 13 ವರ್ಷದ ಪೋರನ ಬೇಸ್​ ಪ್ರೈಸ್ 30 ಲಕ್ಷ ಆಗಿತ್ತು. ಈ ಪೋರನಿಗಾಗಿ 2 ಫ್ರಾಂಚೈಸಿಗಳು ಜಿದ್ದಿಗೆ ಬಿದ್ದಿದ್ದವು. ಎಷ್ಟೇ ಖರ್ಚು ಆದರೂ ಸರಿ, ಆ ಬಾಲಕ ನಮಗೇ ಬೇಕು ಅಂತಾ ರಾಜಸ್ಥಾನ್ ತಂಡದ ಮುಖ್ಯ ಕೋಚ್ ರಾಹುಲ್ ದ್ರಾವಿಡ್ ಪಟ್ಟು ಹಿಡಿದಿದ್ದರು. ಹೀಗೆ ಬಿಡ್ ನಡೆಯುತ್ತಿದ್ದ ವೇಳೆ ದೆಹಲಿ ಫ್ರಾಂಚೈಸಿ ಕೊನೆಯದಾಗಿ 1 ಕೋಟಿ ರೂಪಾಯಿಗೆ ಹರಾಜು ಕರೆದಿತ್ತು. ಆದ್ರೆ ಕೊನೆಗೆ ರಾಜಸ್ಥಾನ್ 1.10 ಕೋಟಿ ನೀಡಿ ವೈಭನ ಖರೀದಿ ಮಾಡಿಯೇ ಬಿಟ್ಟಿತು.

ವಿಶೇಷ ಸೂಚನೆ: ಕ್ರಿಕೆಟ್‌ನ ಸುದ್ದಿಗಳಿಗಾಗಿ ಪ್ರತಿದಿನ ಬೆಳಗ್ಗೆ 8.27ಕ್ಕೆ ನ್ಯೂಸ್‌ಫಸ್ಟ್‌ಚಾನೆಲ್​​ನಲ್ಲಿ ‘ರನ್ ಭೂಮಿ’ ವೀಕ್ಷಿಸಿ