ಕ್ಯಾಪ್ಟನ್​ ಇಲ್ಲದೇ ಟೀಮ್ ಇಂಡಿಯಾ ಆಟಗಾರರ ಸಮರಾಭ್ಯಾಸ.. ರೋಹಿತ್ ಎಲ್ಲಿದ್ದಾರೆ?

ಇಂಡೋ-ಆಸಿಸ್​​ ಮೆಗಾ ಫೈಟ್​ಗೆ ದಿನಗಣನೆ ಶುರುವಾಗಿದೆ. ತವರಿನಲ್ಲಿ ಸೋತು ಆಸ್ಟ್ರೇಲಿಯಾಗೆ ಹಾರಿರುವ ಟೀಮ್​ ಇಂಡಿಯಾ ಕಾಂಗರೂ ನಾಡಲ್ಲಿ ಗೆಲುವಿನತ್ತ ಚಿತ್ತ ನೆಟ್ಟಿದೆ. ಪರ್ತ್​​​ನಲ್ಲಿ ನಡೆಯೋ ಮೊದಲ ಯುದ್ಧಕ್ಕೆ ಸಮರಾಭ್ಯಾಸ ಆರಂಭಿಸಿದೆ. ಇಂಡಿಯನ್​ ಟೀಮ್​ ಪರ್ತ್​ನಲ್ಲಿ ಅಭ್ಯಾಸ ನಡೆಸಿದ್ರೆ, ಕ್ಯಾಪ್ಟನ್​ ಮುಂಬೈನಲ್ಲಿ ಸಿದ್ಧತೆ ನಡೆಸುತ್ತಿದ್ದಾರೆ.

ವಿಶ್ವ ಕ್ರಿಕೆಟ್​ ಲೋಕದ ಮದಗಜಗಳ ಕಾದಾಟಕ್ಕೆ ವೇದಿಕೆ ಸಜ್ಜಾಗಿದೆ. ಪ್ರತಿಷ್ಠಿತ ಬಾರ್ಡರ್​-ಗವಾಸ್ಕರ್ ಟೆಸ್ಟ್​ ಸರಣಿಯ ಕಾವು ಕ್ರಿಕೆಟ್​ ಲೋಕದಲ್ಲಿ ದಿನದಿಂದ ದಿನಕ್ಕೆ ಹೆಚ್ಚಾಗ್ತಿದೆ. ತವರಿನಂಗಳಲ್ಲಿ ನ್ಯೂಜಿಲೆಂಡ್​ ವಿರುದ್ಧ ಸೋಲುಂಡ ಟೀಮ್​ ಇಂಡಿಯಾ, ಆಸ್ಟ್ರೇಲಿಯಾದಲ್ಲಿ ಗೆಲುವಿನ ಟ್ರ್ಯಾಕ್​ಗೆ​ ಮರಳೋ ಲೆಕ್ಕಾಚಾರ ಹಾಕಿಕೊಂಡಿದೆ. ಕಾಂಗರೂ ನಾಡಲ್ಲಿ ಹ್ಯಾಟ್ರಿಕ್​ ಟ್ರೋಫಿ ಗೆಲುವಿನ ಮೇಲೆ ಭಾರತ ತಂಡ ಕಣ್ಣಿಟ್ಟಿದೆ. ಸೇಡು ತೀರಿಸಿಕೊಳ್ಳಲು ಪಣ ತೊಟ್ಟಿರೋ ಎದುರಾಳಿ ಆಸ್ಟ್ರೇಲಿಯಾ, ಭಾರತಕ್ಕೆ ಶಾಕ್​ ಕೊಡಲು ತಯಾರಿದೆ.

ಇದನ್ನೂ ಓದಿ: ಯಂಗ್ ಇಂಡಿಯಾಕ್ಕೆ ಕಪ್ ಗೆಲ್ಲುವ ತವಕ.. ಸೂರ್ಯ ಪಡೆಯಲ್ಲಿ ಮಧ್ಯಮ ಕ್ರಮಾಂಕದ ಬ್ಯಾಟಿಂಗ್ ಹೇಗಿದೆ?

ಪ್ರತಿಷ್ಠೆಯ ಯುದ್ಧಕ್ಕೆ ಟೀಮ್​ ಇಂಡಿಯಾ ಸಮರಾಭ್ಯಾಸ.!

ಇಂಡೋ-ಆಸಿಸ್​ ಪ್ರತಿಷ್ಠೆಯ ಯುದ್ಧಕ್ಕೆ ಉಭಯ ತಂಡಗಳ ಸಮರಾಭ್ಯಾಸ ಕೂಡ ಆರಂಭವಾಗಿದೆ. ಪರ್ತ್​ ತಲುಪಿರೋ ಟೀಮ್​ ಇಂಡಿಯಾ ಆಟಗಾರರು ಫಸ್ಟ್​ ಪ್ರಾಕ್ಟಿಸ್​ ಸೆಷನ್​​ ಮುಗಿಸಿದ್ದಾರೆ. ಪರ್ತ್​​ನ ವೆಸ್ಟರ್ನ್​ ಆಸ್ಟ್ರೇಲಿಯಾ ಕ್ರಿಕೆಟ್​ ಸ್ಟೇಡಿಯಂನಲ್ಲಿ ಟೀಮ್​ ಇಂಡಿಯಾ ಆಟಗಾರರು ಭರ್ಜರಿ ಅಭ್ಯಾಸ ನಡೆಸಿದ್ದಾರೆ.

ನೆಟ್ಸ್​ನಲ್ಲಿ ಕಿಂಗ್​ ಕೊಹ್ಲಿಯ ಇಂಟೆನ್ಸಿವ್​ ಅಭ್ಯಾಸ.!

ಟೀಮ್ ಇಂಡಿಯಾದ ನೆಟ್​ ಸೆಷನ್​ ಸೆಂಟರ್​ ಆಫ್​ ಅಟ್ರಾಕ್ಷನ್​ ಆಗಿದ್ದು ವಿರಾಟ್​ ಕೊಹ್ಲಿ. ಹೀನಾಯ ಪರ್ಫಾಮೆನ್ಸ್​ ನೀಡಿ ಟೀಕೆಗೆ ಗುರಿಯಾಗಿರೋ ವಿರಾಟ್​ ಕೊಹ್ಲಿ ಪಾಲಿಗೆ ಆಸ್ಟ್ರೇಲಿಯಾ ಪ್ರವಾಸ ಅಗ್ನಿ ಪರೀಕ್ಷೆಯ ಕಣವಾಗಿದೆ. ಕಾಂಗರೂ ನಾಡಲ್ಲಿ ಕೊಹ್ಲಿ ಕಮ್​ಬ್ಯಾಕ್​ನ ಎದುರು ನೋಡುತ್ತಿದ್ದಾರೆ. ಮೊದಲ ನೆಟ್​​ ಸೆಷನ್​ನಲ್ಲೇ ಇಂಟೆನ್ಸಿವ್​ ಅಭ್ಯಾಸ ನಡೆಸಿ ಗಮನ ಸೆಳೆದಿದ್ದಾರೆ. ಅರ್ಧಗಂಟೆಗೂ ಅಧಿಕ ಕಾಲ ಸುದೀರ್ಘ ಬ್ಯಾಟಿಂಗ್​ ನಡೆಸಿದ್ದಾರೆ.

ಕೋಚ್​ ಗೌತಮ್​ ಗಂಭೀರ್​ ಹದ್ದಿನ ಕಣ್ಣು.!

ಟೀಮ್​ ಇಂಡಿಯಾದ ಉಳಿದ ಆಟಗಾರರು ಕೂಡ ಪರ್ತ್​​ ಸ್ಟೇಡಿಯಂ ನೆಟ್ಸ್​ನಲ್ಲಿ ಭರ್ಜರಿ ಅಭ್ಯಾಸ ನಡೆಸಿದ್ದಾರೆ. ವೇಗಿ ಜಸ್​​ಪ್ರಿತ್​ ಬೂಮ್ರಾ, ಮೊಹಮ್ಮದ್​ ಸಿರಾಜ್​ ಹೆಚ್ಚು ಕಾಲ ಬೌಲಿಂಗ್​ ನಡೆಸಿದ್ದಾರೆ. ಶುಭ್​ಮನ್​ ಗಿಲ್, ಯಶಸ್ವಿ ಜೈಸ್ವಾಲ್​, ಸರ್ಫರಾಜ್​ ಖಾನ್ ಹೆಚ್ಚು ಬೌನ್ಸಿ ಎಸೆತಗಳನ್ನ ಎದುರಿಸಿದ್ದಾರೆ. ಎಲ್ಲರ ಅಭ್ಯಾಸದ ಮೇಲೆ ಕೋಚ್​ ಗೌತಮ್​ ಗಂಭೀರ್ ಹದ್ದಿನ ಕಣ್ಣಿಟ್ಟಿದ್ರು.

ಪರ್ತ್​ನಲ್ಲಿ ಟೀಮ್​ ಇಂಡಿಯಾ, ಮುಂಬೈನಲ್ಲಿ ನಾಯಕ.!

2ನೇ ಮಗುವಿನ ನಿರೀಕ್ಷೆಯಲ್ಲಿರುವ ರೋಹಿತ್​ ಶರ್ಮಾ, ಟೀಮ್​ ಇಂಡಿಯಾ ಜೊತೆ ಪ್ರಯಾಣಿಸದೇ ಭಾರತದಲ್ಲೇ ಉಳಿದಿದ್ದಾರೆ. ಮೊದಲ ಟೆಸ್ಟ್​ನಲ್ಲಿ ರೋಹಿತ್​ ಆಡ್ತಾರಾ.? ಆಡಲ್ವಾ.? ಅನ್ನೋದು ಇಂದಿಗೊ ಗೊಂದಲವಾಗಿ ಉಳಿದಿದೆ. ಸ್ವತಃ ಕೋಚ್​ ಗಂಭೀರ್​ಗೂ ಕ್ಲಾರಿಟಿ ಸಿಕ್ಕಿಲ್ಲ. ಇದ್ರ ನಡುವೆ ಮುಂಬೈ ಜಿಯೋ ಸ್ಟೇಡಿಯಂನಲ್ಲಿ ರೋಹಿತ್​ ಶರ್ಮಾ ಅಭ್ಯಾಸ ಆರಂಭಿಸಿದ್ದಾರೆ. ಬ್ಯಾಟಿಂಗ್​ ಅಭ್ಯಾಸ ನಡೆಸಿರುವ ರೋಹಿತ್​ ಶರ್ಮಾ ಮೊದಲ ಟೆಸ್ಟ್​ಗೆ ಮುನ್ನ ತಂಡ ಸೇರುವ ಸುಳಿವು ನೀಡಿದ್ದಾರೆ.

ಜಿಮ್​ನಲ್ಲಿ ಬೆವರಿಳಿಸಿದ ಟೀಮ್​ ಇಂಡಿಯಾ ಕ್ಯಾಪ್ಟನ್​.!

ಮೈದಾನದಲ್ಲಿ ಬ್ಯಾಟ್​ ಹಿಡಿದು ಅಭ್ಯಾಸ ನಡೆಸಿದ್ದು ಮಾತ್ರವಲ್ಲ. ಜಿಮ್​ನಲ್ಲೂ ವರ್ಕೌಟ್​ ಮಾಡಿ ಬೆವರಿಳಿಸಿದ್ದಾರೆ. ಫಿಟ್​ನೆಸ್​ಗೆ ಹೆಚ್ಚಿನ ಆದ್ಯತೆ ನೀಡ್ತಿರುವ ರೋಹಿತ್​ ಶರ್ಮಾ, ವಿವಿಧ ವರ್ಕೌಟ್​ಗಳನ್ನ ಮಾಡಿ ಮ್ಯಾಚ್​ ಫಿಟ್​​ನೆಸ್​ ಕಾಯ್ದುಕೊಳ್ಳೋ ಯತ್ನ ಮಾಡಿದ್ದಾರೆ.

ಮೊದಲ ಟೆಸ್ಟ್​ ಪಂದ್ಯ ನವೆಂಬರ್​ 22ರಿಂದ ಆರಂಭವಾಗಲಿದೆ. ಅಷ್ಟರೊಳಗೆ ಪತ್ನಿ 2ನೇ ಮಗುವಿಗೆ ಜನ್ಮ ನೀಡಿದ್ರೆ, ರೋಹಿತ್​ ಶರ್ಮಾ ಆಸ್ಟ್ರೇಲಿಯಾಗೆ ತೆರಳಿ ತಂಡವನ್ನ ಕೂಡಿಕೊಳ್ಳಲಿದ್ದಾರೆ. ಇಲ್ಲದಿದ್ರೆ, 2ನೇ ಟೆಸ್ಟ್​ಗೂ ಆಸಿಸ್​ಗೆ ಹಾರಲಿದ್ದಾರೆ ಅನ್ನೋದು ಸದ್ಯಕ್ಕಿರೋ ಮಾಹಿತಿ.

ಮೊದಲ ಟೆಸ್ಟ್​ನಲ್ಲಿ ರೋಹಿತ್​ ಆಡ್ತಾರಾ.? ಇಲ್ವಾ.? ಅನ್ನೋದು ಸ್ವತಃ ರೋಹಿತ್​ಗೂ ಇನ್ನೂ ಕನ್​​ಫರ್ಮ್​ ಆಗಿಲ್ಲ. ಈ ಗೊಂದಲದ ನಡುವೆಯೇ ಆಸ್ಟ್ರೇಲಿಯಾ ತಲುಪಿರೋ ಟೀಮ್​ ಇಂಡಿಯಾ ಅಭ್ಯಾಸವನ್ನ ಆರಂಭಿಸಿದೆ. ಈ ಪ್ರಾಕ್ಟಿಸ್​ ಸೆಷನ್​ನೊಂದಿಗೆ ಆಸಿಸ್​ ಕಂಡಿಷನ್ಸ್​ಗೆ ಹೊಂದಿಕೊಳ್ಳೋ ಸರ್ಕಸ್ ಆರಂಭವಾಗಿದ್ದು, ಮುಂದಿನ ಹಂತದ ಪ್ರಿಪರೇಶನ್​ ಹೇಗಿರುತ್ತೆ ಅನ್ನೋದನ್ನ ಕಾದು ನೋಡಬೇಕಿದೆ.

ವಿಶೇಷ ಸೂಚನೆ: ಕ್ರಿಕೆಟ್‌ನ ಸುದ್ದಿಗಳಿಗಾಗಿ ಪ್ರತಿದಿನ ಬೆಳಗ್ಗೆ 8.27ಕ್ಕೆ ನ್ಯೂಸ್‌ಫಸ್ಟ್‌ಚಾನೆಲ್​​ನಲ್ಲಿ ‘ರನ್ ಭೂಮಿ’ ವೀಕ್ಷಿಸಿ