ಲ್ಯಾಂಬೋರ್ಘಿನಿ ಕಾರಿನ ನಂಬರ್​ ಪ್ಲೇಟ್​ ಬೆಲೆ 46.24 ಲಕ್ಷ ರೂಪಾಯಿ.. ಈ ಸಂಖ್ಯೆ​ ಇದ್ರೆ ಇಷ್ಟೊಂದು ದುಬಾರಿನಾ?

ಉದ್ಯಮಿಗಳು, ಸಿನಿಮಾ ಸ್ಟಾರ್ಸ್​, ಕ್ರಿಕೆಟರ್​​​ಗಳಿಗೆ ಐಷಾರಾಮಿ ಕಾರು, ಬೈಕ್​ ಖರೀದಿ ಮಾಡುವುದು ಎಂದರೆ ಎಲ್ಲಿಲ್ಲದ ಪ್ರೀತಿ. ಅಲ್ಲದೇ ಅವುಗಳಿಗೆ ಅಷ್ಟೇ ದೊಡ್ಡ ಮೊತ್ತದ ಹಣ ಕೂಡ ಪಾವತಿ ಮಾಡುತ್ತಾರೆ. ಇದರ ಜೊತೆಗೆ ಕೆಲವೊಮ್ಮೆ ನಂಬರ್​ ಪ್ಲೇಟ್​ಗಾಗಿ ಜಿದ್ದಿಗೆ ಕೂಡ ಬೀಳುತ್ತಾರೆ. ಸದ್ಯ ಇಂತಹದ್ದೇ ಒಂದು ಸಂಗತಿ ನಡೆದಿದ್ದು ಉದ್ಯಮಿಯೊಬ್ಬರು ತಮ್ಮ ದುಬಾರಿ ಐಷಾರಾಮಿ ಕಾರಿಗೆ 40 ಲಕ್ಷ ರೂಪಾಯಿಗೂ ಅಧಿಕ ಮೊತ್ತ ನೀಡಿ ನಂಬರ್ ಪ್ಲೇಟ್​ ಖರೀದಿ ಮಾಡಿದ್ದಾರೆ.

ಲಿಟ್ಮಸ್​ ಕಂಪನಿಯ ಸಿಇಒ ಆಗಿರುವ ವೇಣು ಗೋಪಾಲಕೃಷ್ಣ ಏರ್​ಬಸ್ H130 ಚಾಪರ್ ಖರೀದಿ ಮಾಡಲು ನ್ಯೂಜಿಲೆಂಡ್​ಗೆ ತೆರಳಿದ್ದರು. ನ್ಯೂಜಿಲೆಂಡ್​ಗೆ ತೆರಳುವ ಮೊದಲೇ ಉದ್ಯಮಿ ವೇಣು ಗೋಪಾಲಕೃಷ್ಣ ಅವರು ಹೊಸದಾಗಿ 6.6 ಕೋಟಿ ರೂಪಾಯಿ ಮೌಲ್ಯದ ಲ್ಯಾಂಬೋರ್ಘಿನಿ ಉರುಸ್ ಪರ್ಫಾರ್ಮೆಂಟ್‌ (Lamborghini Urus Performante SUV) ಕಾರುನ್ನು ಖರೀದಿ ಮಾಡಿದ್ದರು. ಆದರೆ ಈ ಕಾರಿಗೆ ಇನ್ನೂ ನಂಬರ್​ ಪ್ಲೇಟ್​ ಅಳವಡಿಕೆ ಮಾಡಿರಲಿಲ್ಲ.

ಇದೇ ವೇಳೆ ಕೇರಳದ ಎರ್ನಾಕುಲಂನಲ್ಲಿರುವ ಮೋಟಾರ್ ವಾಹನ ಇಲಾಖೆಯು KL 7, DG 0007 ನಂಬರ್​ ಪ್ಲೇಟ್​ಗೆ ಹರಾಜು ಕರೆದಿತ್ತು. ಈ ಮಾಹಿತಿಯನ್ನು ತಮ್ಮ ಕಂಪನಿಯ ಸಿಬ್ಬಂದಿಯಿಂದ ಪಡೆದುಕೊಂಡ ವೇಣು ಗೋಪಾಲಕೃಷ್ಣ ಆ ನಂಬರ್​ ಅನ್ನು ಹೇಗಾದರೂ ಮಾಡಿ ಪಡೆದುಕೊಳ್ಳಬೇಕು ಎಂದು ಯೋಜಿಸಿದರು. ಇದಕ್ಕೆ ಎಷ್ಟೇ ಹಣ ಖರ್ಚು ಆದರೂ ಚಿಂತೆಬೇಡ ಎಂದು ಮೊದಲೇ ಅಂದುಕೊಂಡಿದ್ದರು.

ಸದ್ಯ ಈ ಬಗ್ಗೆ ಮಾತನಾಡಿದ ಉದ್ಯಮಿ ವೇಣು ಗೋಪಾಲಕೃಷ್ಣ ಅವರು, ಕೆಲವು ವರ್ಷಗಳ ಹಿಂದೆ ನನ್ನ ಬಳಿ ಅಂಬಾಸಿಡರ್ ಕಾರು ಇತ್ತು. ಅದರ ನಂಬರ್​ಪ್ಲೇಟ್​ 1717 ಇತ್ತು. ಇಲ್ಲಿಂದಲೇ ನನಗೆ 7 ಸಂಖ್ಯೆಯ ಮೇಲೆ ಆಸಕ್ತಿ ಬೆಳೆಯಿತು. ಇದನ್ನು ನಾನು ಅದೃಷ್ಟ ಎಂದು ಭಾವಿಸುತ್ತೇನೆ. ಈಗಲೂ ನಮ್ಮ ಮನೆಯಲ್ಲಿರುವ ಎಲ್ಲ ಫೋನ್​ ನಂಬರ್​ಗಳು 7 ಅಂಕಿಯಿಂದ ಕೊನೆಗೊಳ್ಳುತ್ತವೆ. ಇದು ಇಲ್ಲಿಗೆ ನಿಲ್ಲಲಿಲ್ಲ. ಲಿಟ್ಮಸ್​ ಕಂಪನಿಗೂ ಕೂಡ Litmus7 ಎಂದು ನಾಮಕರಣ ಮಾಡಿದೆ. ಕೇರಳದ ಕೊಚ್ಚಿಯಲ್ಲಿರುವ ಈ ಕಂಪನಿ ವರ್ಷಕ್ಕೆ 450 ಕೋಟಿ ರೂಪಾಯಿಗೂ ಹೆಚ್ಚು ವಹಿವಾಟು ನಡೆಸುತ್ತದೆ ಎಂದು ಹೇಳಿದ್ದಾರೆ.

ಇದನ್ನೂ ಓದಿ:ಗುಜರಾತ್ ಗೆಲುವಿಗೆ ಬಿಗ್​ ಬ್ರೇಕ್​.. ಮಾರ್ಕ್ರಾಮ್, ಪೂರನ್ ಬ್ಯಾಟಿಂಗ್​ ಅಬ್ಬರಕ್ಕೆ ತಲೆ ಬಾಗಿದ ಗಿಲ್​ ಸೇನೆ

ನಾನು ನ್ಯೂಜಿಲೆಂಡ್​ನಲ್ಲಿ ಇದ್ದಿದ್ದರಿಂದ KL 7, DG 0007 ನಂಬರ್​ ಪ್ಲೇಟ್​ ಅನ್ನು ಹೇಗದರೂ ಮಾಡಿ ನಮಗೆ ಬರಬೇಕು. ಹಣದ ಬಗ್ಗೆ ಚಿಂತಿಸಬೇಡ ಎಂದು ಸಿಬ್ಬಂದಿಗೆ ಗ್ರೀನ್​ ಸಿಗ್ನಲ್​ ಕೊಟ್ಟಿದ್ದೆ. ಲ್ಯಾಂಬೋರ್ಘಿನಿ ಉರುಸ್ ಪರ್ಫಾರ್ಮೆಂಟ್‌ ಕಾರಿಗಾಗಿ ಹರಾಜಿನಲ್ಲಿ 46.24 ಲಕ್ಷ ರೂಪಾಯಿಗಳನ್ನು ನೀಡಿ ನಂಬರ್​ ಪ್ಲೇಟ್ ಖರೀದಿ ಮಾಡಲಾಯಿತು ಎಂದು ಹೇಳಿದ್ದಾರೆ.

ವೇಣು ಗೋಪಾಲಕೃಷ್ಣ ಅವರು ಕಾರುಗಳನ್ನು ತುಂಬಾ ಇಷ್ಟಪಡುತ್ತಾರಂತೆ. ಹೀಗಾಗಿಯೇ ಅವರ ಗ್ಯಾರೇಜ್​ನಲ್ಲಿ ಹೊಸ ಲಂಬೋರ್ಘಿನಿ ಉರುಸ್ ಪರ್ಫಾರ್ಮೆಂಟ್ ಎಸ್‌ಯುವಿ ಜೊತೆಗೆ ಲಂಬೋರ್ಘಿನಿ ಹುರಾಕನ್ ಸ್ಟೆರಾಟೊ, ಮಿನಿ ಕೂಪರ್ ಮತ್ತು ಮರ್ಸಿಡಿಸ್ ಬೆಂಜ್ ಜಿ-ವ್ಯಾಗನ್ ಕೂಡ ಇವೆ. ಇದರ ಜೊತೆ ಏರ್‌ಬಸ್ H130 ಚಾಪರ್ ಕೂಡ ಸದ್ಯದಲ್ಲೇ ನ್ಯೂಜಿಲೆಂಡ್​ನಿಂದ ಕೊಚ್ಚಿ ನಗರಕ್ಕೆ ಬರಲಿದೆ ಎಂದು ಹೇಳಿದ್ದಾರೆ.

ಸೂಚನೆ: ಎಲ್ಲಾ DTH & Cableನಲ್ಲಿ ನ್ಯೂಸ್​ಫಸ್ಟ್​ ಚಾನೆಲ್​​​ ಲಭ್ಯ